Mâk 11
11
Jisos o/nung ké Jerúsélem ne Akpee
(Mátyuu 21:1-11; Lûk 19:28-40; Jǒn 12:12-19)
1Ké nkéré mú mbé baa/ribi ké Bét-Féje ne Bétányi, fáráng ne Jerúsélem, ké kaku ńké badakó Ólif, Jisos o-twóm bǎmgbán emen ashí afee ba-bwóp kashú. 2O-sét kámbé o/fu, ca n̂g ké oshê mú mu běn ányi ké kashú. Â ba-byí i áku ba-câ, ben ba/chi ba-ri kyisu-kaanyam-atû ńké ba/tú, ńké ba*da/yú ne nang kabónge*. Firi n̂g kánké ba-bâ ne nké kwán. 3Â onet o/bí běn o/fu, ebóng ben bamu ba-chi i éné, sét n̂g ǎ ba/fu, bonchí eten mu o-ryuu ng kánké. O/chi o-bwa ne nké esim kántîk.
4Ne ba-dim kâng ba-da-ri kyisu-kaanyam-atû ké ótíbingé tútú, ké ocím-dyifyi. Ké nkéré mú mbe ba-firi ng kánké, 5banet ḿbé ba/mû ányi ba/bí kámbé ba/fu, ebóng ńkyí bamu ba-firi ng kyisu-kaanyam-atû.
6Ne mbé ba-sét banet ámbe eringe nyí Jisos o/mû o/sét kámbé. Ne banet ámbe kâng ba-mîng kámbé ba-dim ne nké. 7Ba-bâ ne kyisu-kaanyam-atû ánke ba-ba-kye Jisos. Ba-pii bankyû ebe kâng ba-tát kánké ké byiko. Jisos o-yú o-kyú ké nké. 8Banet chwóó ba-pii bankyû ebe to ba-tát ké bukwóp. Bakíri to ba-két byire-byichí ké byifát, ba-tát kámbyí ké bukwóp. 9Banet ḿbé ba/mû ké kashú ne ḿbé ba/mû ké esim ba-kpet ekwán ba/fu, kpee n̂g Osówo. Ojware okyú ne onet mú mu o-bâ ké bubwô ḿbú Otu Kyítá. 10Ojware okyú ne Butu ḿbú bonchí eten Otu Dívit ḿbú mbu bu-bâ. Akpee akyú ne Osówo.
11Jisos o-ribi Jerúsélem, o-shwôm o-da-nung ké kiǐtí-kyise-kyifen-Osówo echi. O-kpúrî o-ri kángkáng byěm. Nké dyicí dyi/mû dii/tíbî dyi-shwôm, nyǐ o-dim kâng Bétányi ne bǎmgbán emen ḿbé ashí diǐkpú ne afee.
Jisos o/shú Kyichí ńkyí nkyi wǎ Kyifem
(Mátyuu 21:18-19)
12Ké orî-dyicí, ńdyí baa/fím Bétányi ba-kú ba-fyi ng ké Jerúsélem, esong e-kpet enwa Jisos. 13Ne o-ri kyichí ńkyí nkyi wǎ kyifem áku tete ne eshǎan ké nkyí. O-dim o-wâa o/fu, nyǐ o-da ng ekpúrî â nyǐ o-ri ng nang kyirim ké nkyí. Nké ké nkéré o/ribi ké nkyí, o*da/ri nang kyirim* kyi-cibi ne eshǎan nké nke* ké ebóng, nkéré o/mû o*da/fyi ne mú kyichí ánkyi kyidazím*. 14Jisos o-raa ne nkyí o/fu, onet o*fí mú o/chi o-chîryí byirim eyên*.
Bǎmgbán emen ba-jwo ńkyí o/raa éné.
Jisos o/ce ké Kiǐtí-Kyise-Kyifen-Osówo echi
(Mátyuu 21:12-17; Lûk 19:45-48; Jǒn 2:13-22)
15Ké nkéré mú mbé baa/ribi Jerúsélem, Jisos o-dim o-wâa ké kiǐtí-kyise-kyifen-Osówo echi, ne o-kpet eró banet ḿbé mbe ányi ba-ré ng byěm ne ḿbé mbe ba-shee ng to byěm ké nkyí. O-bírî ékpákpúrúk nyí banyánge akpuga ne biincincîm ḿbyí banshee bootǒmtǒm o-cít bashú kyísí. 16O*da/bángê nang onet o-kúng nang chwǒm kyibónge o-ba-shwôm ányi ké kafâ-kiǐtí-kyise-kyifen-Osówo echi*. 17Ne o-kpet etángê kâng banet o/fu, ejá-Osówo nyí ba/sáng kyísí e/fu, Osówo o/fu, kyise ejí ba/chi ba-kûkó kánkyí kyise-banshwam efé ńkyí kángkáng banet. Nké ben baa/yángê kánkyí kyi/firi kyikit ńkyí banet-bujii badarem.
18Batu-banchi kyifen-Osówo ne bantánge Byije-Músis ba-jwo ńkyí kyi/chi éné. Ne mbé kâng ba-kpet ekyé bukwóp ḿbú badaju Jisos. Mbé ba/mû ba-shî ng ǎ, ké ebóng, kángkáng bujê-banet ámbe, byiko byi/kaa kámbé ké eringe nyí nyǐ mu o-tángê e.
19Ńdyí dyikurúku dii/fyi, Jisos ne bǎmgbán emen ba-dim ba-mîng oshê ámu.
Chwǒm ekwâa kyi-kim ne Kyichí ńkyí nkyi wǎ Kyifem
(Mátyuu 21:20-22)
20Pirípirí ké orî-dyicófóróng, ba/ri kyichí ánkyi ńkyí nkyi wǎ kyifem ńdyí mbe ba-cen n ba-câ ké bukwóp, ké kii/kpú tata kyi-ribi ké eriri. 21Pyíta o-zîim ńkyí kyi/mû kyi/chi, ne o-raa ne Jisos o/fu, ri, ǎ ntánge byiraa-Osówo, kyichí ńkyí a/mû a/shú kii/kpú.
22Jisos o-faa kámbé o-fu, fé n̂g atyém enen ne Osówo. 23Ntûntû nké me mu n-sét ng běn n/fu, nang yeě nké o/raa ne kaku ńkén něen o/fu, yip byiko eyên a-twóp ké baya. Â dyityém eyên dyi*fí ǒ kabekabe* nké a/bángê ne dyityém eyên a/fu, ńkyí wo a/fu, kyichi éné, Osówo o/chi o-chi éné o-kye ǒ. 24Ké bubwô ḿbún, me mu n-sét ng běn n/fu, â ben ba/fé nshwam ba-bí Osówo chwǒm, bángê ê ne atyém enen ba/fu, ben baa/koo kánkyí, ne Osówo o/chi o-kye běn nang ebóng ńkyí ba/bí ǎ. 25Ké nkéré mú ben ba-kú ba-fâ nshwam ba-kyâ Osówo, pwoo n̂g nang yeě mú oo/chi běn kyibî, eringe nyí Bonchí enen mú mu kyíbóng oda běn epwoo to byibî enen. [ 26Â ben ba*da/pwoo barî-banet* nang Bonchí enen mú mu kyíbóng oo*pwoo běn ké byibî enen*.]
Ḿbím kyi-kim ne Busa ḿbú Jisos
(Mátyuu 21:23-27; Lûk 20:1-8)
27Ba-bwa esim ké Jerúsélem. Ké nkéré Jisos mu o-cen n ké kafâ-kiǐtí-kyise-kyifen-Osówo echi, batu-banchi kyifen-Osówo ne bantánge Byije-Músis ne bakínkán-banet-Jûs ba/bê ba-kâm ǎ. 28Ba-bí ǎ ba/fu, busa burá ḿbú wo amu a-yip ng a-chi i byěm ḿbyín. Yeě o/kye ǒ busa ḿbún o/fu, wo achi kámbyí.
29Jisos o-faa kámbé o/fu, me m-bí ng běn ḿbím něen obónge. Â ben ba/faa mě kámú, me n/chi n-sét běn kyicê ńkyí busa ḿbú me mu n-chi i byěm ḿbyín bu/fím. 30Sét n̂g mě, busa ḿbú Jǒn mú o/mû o-kyâ banet osoo mú Osówo bu/fím ne yeě. Bu/fím ne Osówo aa, aa bu/fím ne banet.
31Mbé ba-kpet ekán ké dyishí ne barî ba/fu, byi-faa ng ǎ nǎ. Â be byi/faa byi/fu, bu/fím ne Osówo, nyǐ o/chi o-bí bě o/fu, aa ebóng kâng ben ba*da/bángê ne Jǒn*. 32Aa byi-fu ng bu/fím ne banet aa? Mbé ba/mû ba-shî ng bujê-banet ḿbé ba/mû ányi, ké ebóng, kángkáng banet ámbe ba/bángê ba/fu, Jǒn o/mû mkpábé mú odasét byiraa-Osówo. 33Ne mbé kâng ba-faa Jisos ba/fu, be byi*fí byi-nyît ng*.
Jisos o-raa ne mbé o/fu, nang me to nn*sét běn kyicê ńkyí busa ḿbú me mu n-chi i byěm ḿbyín bu/fím*.
Currently Selected:
Mâk 11: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
