Ijɔ̍ɔn 1

Lɛlā nīi ē de ɔhɔ̄leyī ma̍

1O̍bo̍o̍bū nīi yɛchɛ wu̍tu ma̍, anu̍ nīi re̍ka Lɛlā ma̍ hɔ̄ mɛ̍. Lɛlā ɔla̍ā hɔ̄ ba̍la Ɔwɔ. Lɛlā ɔla̍ā - Ɔwɔ nɛ. 2Bū la owu̍tu nīi Lɛlā ɔla̍ā hɔ̄ ba̍la Ɔwɔ a̍nɛ. 3Ɔwɔ ya̍ ɔjāmɔjā wa̍a̍ gala abɔ̄ yī nū. Ɔjɔ̄jā i̍ hɔ̄ abɔ̍ɔ nīi Ɔwɔ ya̍ wu̍ ɔ̄ lā ni̍. 4Ɔjāha̍-ɔjāha̍ wa̍a̍ nīi hɔ̄ ma̍ lɛ ɔhɔ̄leyī bū la Lɛlā ɔla̍ā. Ɔhɔ̄leyī nūma̍ de ɛbɛ ɔlɛgēdēgēdē de ɔ̄chɛ̄ɛchɛ a̍nɛ. 5Ɛbɛ ɔlɛgēdēgēdē nūma̍ fi̍yajɛ ē gāa ɛbɛ odobū. Ɛbɛ odobū i̍ chī de ɔ̍ kla̍ mɛ je̍ ni̍.

6Ɔwɔ de ɔlɛrɔ̄ yī nū ɔha̍ nīi re̍ka Ijɔ̍ɔn ma̍ tɛ̄rɔ̄ wā. 7O̍ wā ge̍ koko̍o yī lɛlā yī ɛbɛ ɔlɛgēdēgēdē ɔla̍ā de āchɛ, hɛ̄ɛbɛ nīi āchɛ wa̍a̍ ge̍ē chɛ̄ku ɛrɔ̄ yī nū ɔla̍ā. 8I̍ Ijɔ̍ɔn nūma̍ re̍ka ɛbɛ ɔlɛgēdēgēdē ɔ̍lɔma̍ a̍ni̍. Anu̍ wɔ̄wā ge̍ē koko̍o yī lɛlā yī ɛbɛ ɔlɛgēdēgēdē ɔla̍ā. 9Ɛbɛ ɔlɛgēdēgēdē nūma̍ re̍ka ɛbɛ ɔlɛgēdēgēdē olēchi̍ lēchi̍ nīi wā lipu̍ yī yɛchɛ nūma̍ ge̍ē fi̍yajɛ ē de āchɛ wa̍a̍ a̍nɛ.

10Lɛlā ɔla̍ā hɔ̄ amu la yɛchɛ gbi̍chɛ-gbi̍chɛ. Ɔwɔ ya̍ yɛchɛ gala abɔ̄ yī nū. Yɛchɛ i̍ chī je̍ ɔ̄ ni̍. 11O̍ wā la ɔcha yī anu̍ ɔlɔjā; āchɛ yī anu̍ ɔlɔjā i̍ chī chikpo̍ yī nū ni̍. 12Āchɛ ɛha̍ ma̍ chikpo̍ yī nū, chɛ̄ku ɔ̍. Āchɛ ɛla̍ā, o̍ de wɔhu̍ de wa̍ nīi e̍ de pīya ayi̍ yī Ɔwɔ. 13E̍ i̍ de pīya ayi̍ yī Ɔwɔ bū la ɔpɔ̄pū ɔlamu ba̍la ɔkɔ nīi ɔ̄chɛ̄ɛchɛ ɔlamu ē ma ayi̍ ma̍ ni̍. Ɔwɔ ɔlɔjā de pīya A̍dā yī wā a̍nɛ.

14Lɛlā ɔla̍ā de pīya ɔ̄chɛ̄ɛchɛ. O̍ hɔ̄ la olo̍ōlo̍ yī alɔ. Uhwa ɔnɛ̄ɛhɛhi ba̍la lɛlā olēchi̍ lēchi̍ mōmu la ibi̍īyē yī nū. Alɔ ma̍ rīgā ɔnɔ̄kɔ̄kū nīi o̍ lɛ ma̍. Rīgā ɔnɔ̄kɔ̄kū nūma̍ nīi o̍ nāa bū la onīi o̍ wɛ Ɔyi̍ ūkpo̍he kpo̍kpo̍ yī Ɔwɔ A̍dā ma̍ nɛ.

15Ijɔ̍ɔn wā bāa itɛ̍ɛhi̍yɛ̍ yī nū ma̍. O̍ tɔ̍ɔna ka de āchɛ hīka, “Ala̍ ma̍ ko̍ō! Ɔ̄chɛ nīi n kɛlā ku̍ ɔ̄ ma̍ yɛ ma̍ a̍nɛ. Wu̍chē oji̍ nɛ, n koko̍o de ala̍ hīka, ‘Ɔ̄chɛ ɔha̍ yɛ amu yewā la okwi̍ihi yī u. O̍ ga um ɔgɔ̄ga pɛtɛpɛtɛ; wu̍chē oji̍ nɛ, o̍ hɔ̄ o̍bū nīi e̍ ma u.’ ”

16Bū la uhwa ɔnɛ̄ɛhɛhi yī nū nīi mwɛbɛ mwɛbɛ ma̍, anu̍ nīi alɔ nāa ɔpiyɛ chɔba la ɔpiyɛ ɔha̍ mɛ a̍nɛ. 17Ɔwɔ de Lihɔ gala abɔ̄ yī Imo̍sīisi. Uhwa ɔnɛ̄ɛhɛhi ba̍la lɛlā olēchi̍ lēchi̍ ma̍ bū la abɔ̄ yī Iji̍sɔ̄ɔsi Ikra̍yisi. 18Ɔ̄chɔ̄chɛ i̍ ma̍ Ɔwɔ la eyī je̍ ni̍. Ɔyi̍ yī Ɔwɔ lōri̍īnū nīi lɛ bāa Ɔwɔ, gba̍a hɔ̄ la yɛgɔ̄ yī Ɔwɔ A̍dā ma̍, anu̍ ya̍ nīi āchɛ je̍ ɔ̄ a̍nɛ.

Ɛrɔ̄ nīi Ijɔ̍ɔn Ohuyenyi ka ma̍

(Ima̍tiyu 3:1-12; Ima̍aki 1:1-8; Ilu̍uku 3:1-18)

19I̍ngɛ̍ɛ̄nɛ̄ nīi Ijɔ̍ɔn wā la itɛ̍ɛhi̍yɛ̍ otōtū yī nū a̍nɛ: Alajɛ yī Iju̍u abɔ̍ɔ la Ijɛru̍sālɛm de aligbe yī Ɔwɔ ba̍la āchɛ yī Ili̍fāyi tɛ̄rɔ̄ wā dikpo̍ba̍ Ijɔ̍ɔn. E̍ wā ge̍ che ɔ̄ ikpo̍ hīka ɔ̍lɔ - ɔ̄nyɛ nɛ?

20Ijɔ̍ɔn i̍ hi̍hi̍yo̍ yī ɔhīya aa̍ ɔkɔ ni̍. O̍ koko̍o de wa̍ hwōō hīka i̍ anɔ̍lɔ - Ɔhɔ̍ɔnyɛta̍ Nīi Ɔwɔ Ɔ̍lɔ Hōhu Ma̍ a̍ni̍.

21E̍ che ɔ̍ ikpo̍ hīka ɔ̍lɔ chī - ɔ̄nyɛ nɛ? Ɔ̍lɔ - Ɛla̍yi̍ja a̍nɛ?

Ijɔ̍ɔn hi̍hi̍yo̍ ka ɔ̍lɔ i̍ anu̍ ni̍.

E̍ che ɔ̍ ikpo̍ hīka ɔ̍lɔ - Ɔ̄chɛ ɔkɛrɔ̄ yī Ɔwɔ ɔla̍ā a̍nɛ?

Ijɔ̍ɔn hi̍hi̍yo̍.

22E̍ gba̍a che ɔ̍ ikpo̍ hīka ɔ̍lɔ chī - ɔ̄nyɛ nɛ? Ɔ̍lɔ ge̍ ka de aa̍ gɛ! Wu̍chē oji̍ nɛ, aɛ̍lɛ ge̍ē bī ɔkɔ ɔhɔ̄hīya yī ɔ̍lɔ ge̍ē ka ē de āchɛ nīi - ɛ̍lɛ tū aa̍ ɛrɔ̄ ma̍. Kana̍ nīi ɔ̍lɔ ge̍ē chabɔ̄ yī iyī ɔ̍lɔ ma̍?

23Ijɔ̍ɔn koko̍o de wa̍ bɛ̍ɛ̄nɛ̄ hīka, “Ala̍ ma̍ ko̍ō! Ami - ɔ̄chɛ nīi Ayisa̍ya kɛlā nūma̍ ku̍ ɔ̄ ma̍ a̍nɛ:

“ ‘Ɔ̄chɛ ɔha̍ yɛ abɔ̍ɔ ē tɔ̍ɔna lipu̍ a̍chi̍ chukuru.’

O̍ hīka, ‘Ala̍ gbla̍a ɔgu yī Ādā lɔ̄lā de ɔ̍.’ ”

24Āchɛ yī Ifa̍rasīi de āchɛ nūma̍ tɛ̄rɔ̄ a̍nɛ. 25E̍ gba̍a da Ijɔ̍ɔn bɛ̍ɛ̄nɛ̄ hīka, “Oji̍ - ohu̍ nīi a chī yɛ ē hu āchɛ yenyi ma̍? I̍ awɔ chī - Ɔhɔ̍ɔnyɛta̍ Nīi Ɔwɔ Hōhu Ma̍ a̍ni̍! I̍ awɔ chī - Ɛla̍yi̍ja a̍ni̍! I̍ awɔ chī - Ɔ̄chɛ Ɔkɛrɔ̄ yī Ɔwɔ ɔla̍ā a̍ni̍!”

26Ijɔ̍ɔn hīya aa̍ ɔkɔ hīka, “Ala̍ ma̍ ko̍ō! Ami ē hu āchɛ yenyi la yenyi yī ɔkpa̍ ɔlamu. Ɔ̄chɛ ɔha̍ chī rɛ amu la olo̍ōlo̍ yī ala̍ nīi ala̍ i̍ je̍ ɔ̄ ni̍. 27Anu̍ ge̍ē wā la okwi̍ihi yī u a̍nɛ. N i̍ chī ngma̍ lɛbɛ owīyōrī hī wɔkpa̍ ochelikpo̍ yī nū ɔbɔbɔ ni̍.”

28Lɛlā nūma̍ wa̍a̍ ya̍ abɔ̍ɔ la Ibɛ̍tāni, la oe̍ ɔla̍nū yī Ɔkpa̍ yī Ijɔ̍dan la ɛbɛ nīi Ijɔ̍ɔn yɛ ē hu āchɛ yenyi ma̍.

Ɔyɔ̍ɔ̄nyīyɛrɔ̄ yī Ɔwɔ

29La ɔ̄chī ɔmɛpa, Ijɔ̍ɔn ma̍ Iji̍sɔ̄ɔsi nīi o̍ yɛ ē wā dikpo̍ ē ba̍ ɔ̄ ma̍, o̍ ka bɛ̍ɛ̄nɛ̄ hīka, “Ala̍ ma̍ Ɔyɔ̍ɔ̄nyīyɛrɔ̄ yī Ɔwɔ nīi de lɛlā ɔdwɔ̄bi̍ yī yɛchɛ nāa pīya ma̍ gɛ oo! 30Anu̍ nīi n yɛ ē kɛlā ku̍ ɔ̄ de ala̍ a̍nɛ. N hīka, ‘Ɔ̄chɛ ɔha̍ yɛ amu yewā la okwi̍ihi yī u. Ɔlɔjā ga um ɔgɔ̄ga pɛtɛpɛtɛ. Wu̍chē oji̍ nɛ, o̍ ngma̍ o̍bo̍bū nīi e̍ ma u a̍nɛ.’ 31N i̍ je̍ ita ɔ̄chɛ nīi o̍ ge̍ē wɛ ma̍ o̍bū ni̍. N wā ge̍ yɛ ē hu āchɛ yenyi la yenyi yī ɔkpa̍ ɔlamu hɛ̄ɛbɛ ge̍ē ya̍ nīi Ali̍sɛ̄rɛli ē je̍ ɔ̄.”

32Itɛ̍ɛhi̍yɛ̍ yī lɛlā nīi Ijɔ̍ɔn gba̍a de ma̍ hɔ̄ ma̍ a̍nɛ: O̍ ka hīka, “Ala̍ ma̍ ko̍ō! N ma̍ Uhu yī Ɔwɔ bāa libɔkpa̍ ma̍ bū la ichō wā ge̍ che ɔ̍ lɛhu̍. 33N i̍ chī je̍ ɔ̄ we̍ ni̍ kpɔ̍. Ɔwɔ ɔlɔjā nīi de u tɛ̄rɔ̄ wā ge̍ yɛ ē hu āchɛ yenyi la yenyi yī ɔkpa̍ ɔlamu ma̍ chī de koko̍o de u mɛ̍. O̍ ka hīka amɔ̍lɔ ge̍ē ma̍ Uhu yī Ɔwɔ nīi - ɔ̍lɔ ge̍ē hrāajɛ ē wā ge̍ē che ɔ̄chɛ ɔha̍ lɛhu̍. O̍ ka ɔ̄chɛ ɔla̍ā ɔ̍lɔ ge̍ē hu āchɛ yenyi la Uhu Ɔnɛ̄ɛhɛhi yī Ɔwɔ a̍nɛ. 34N de ɔ̍ ma̍ mɛ̍. N ge̍ē koko̍o ē de ala̍ bɛ̍ɛ̄nɛ̄ hīka anu̍ - Ɔyi̍ yī Ɔwɔ a̍nɛ.”

A̍chi̍kpo̍ ɛrāarāa yī Iji̍sɔ̄ɔsi

35La ɔ̄chī ɔmɛpa, Ijɔ̍ɔn gba̍a hɔ̄ abɔ̍ɔ ba̍la a̍chi̍kpo̍ yī nū āchɛ ɛpa. 36O̍ ma̍ Iji̍sɔ̄ɔsi nīi o̍ yɛ ē ga ma̍, o̍ ka bɛ̍ɛ̄nɛ̄ hīka, “Ala̍ ma̍ Ɔyɔ̍ɔ̄nyīyɛrɔ̄ yī Ɔwɔ nīi yɛ aa̍ gɛ!”

37A̍chi̍kpo̍ yī Ijɔ̍ɔn āchɛ ɛpa ɛla̍ā po̍ i̍ngɔ̍ɔ ma̍, e̍ pīya ku Iji̍sɔ̄ɔsi la u̍tu. 38Iji̍sɔ̄ɔsi pīyeyīhii ma̍ wa̍ nīi e̍ yɛ ē ku ɔ̍ la u̍tu ma̍, o̍ che wa̍ ikpo̍ hīka ɔ̄nyɛ nīi ɛ̍lɛ ē gāla̍ ma̍?

E̍ chōo̍chē da ɔ̍ hīka, “Ira̍bāayi be̍e! Aba̍ nīi a hɔ̄ ma̍?” Ochi̍chi̍ yī Ira̍bāayi re̍ka “Ɔngūlɛ̄lā.”

39Iji̍sɔ̄ɔsi da wa̍ hīka ɛ̍lɛ ge̍ yewā ge̍ ma̍ gɛ! E̍ pīya ba̍la anu̍ wa̍a̍ gāa ge̍ ma̍ ɛbɛ nīi o̍ hɔ̄ ma̍. E̍ jī hɔ̄ abɔ̍ɔ tāa anu̍ i̍chi̍chɛ ɔla̍ā. Yɛ̄grāa ɔha̍ bāa oje ɛnɛ yī ɔ̄nɛ̄ ma̍ nīi e̍ yɛ a̍nɛ.

40Ɔ̄chɛ ɔha̍ lipu̍ yī aa̍ āchɛ ɛpa ɛla̍ā nīi plɛ̍ɛ̄lā yī Ijɔ̍ɔn pīya ku Iji̍sɔ̄ɔsi ma̍ re̍ka A̍ndru. Ɔɔ̍nɛ̍ yī Isa̍yi̍mɔ̄ɔn nīi gba̍a re̍ka Ipi̍ta ma̍ nɛ. 41La eyī ɔnyɔ̄nyā yī nū ɔpɔ̄ɔpɛ̄, A̍ndru ma̍ Isa̍yi̍mɔ̄ɔn ɔɔ̍nɛ̍ yī nū de koko̍o de ɔ̍ hīka aɛ̍lɛ ma̍ Ɔhɔ̍ɔnyɛta̍ Nīi Ɔwɔ Ɔ̍lɔ Hōhu Ma̍ mɛ̍. Ochi̍chi̍ yī Ikra̍yisi bī aa̍ a̍nɛ. 42A̍ndru bī Isa̍yi̍mɔ̄ɔn ga ɛbɛ yī Iji̍sɔ̄ɔsi.

Iji̍sɔ̄ɔsi ma̍ ɔ̄ chi̍i̍, da ɔ̍ hīka, “Je̍ka aa̍ awɔ re̍ka Isa̍yi̍mɔ̄ɔn ɔyi̍ yī Ijɔ̍ɔn a̍nɛ! Riyī yī wɔ ge̍ē re̍ka Ike̍fāasi bɛ̍ɛ̄nɛ̄.” Ike̍fāasi ba̍la Ipi̍ta - ɔjā ūkpo̍he-ūkpo̍he nɛ. Ochi̍chi̍ yī nū re̍ka “Lɛchɔ̄ Ɔlwɔhɔ̍hu̍.”

Iji̍sɔ̄ɔsi hī Ifi̍līipu ba̍la Inata̍nīyɛli ɛra̍

43La ɔ̄chī ɔ̍mɛpa, Iji̍sɔ̄ɔsi miya ge̍ē gāa Iga̍līli. O̍ ma̍ Ifi̍līipu ma̍, o̍ da ɔ̍ hīka, “Yewā ba̍la ami!” 44Ifi̍līipu bū la Ibɛsa̍yi̍da, ipwo̍gra nīi A̍ndru ba̍la Ipi̍ta hɔ̄ ma̍. 45Ifi̍līipu ma̍ Inata̍nīyɛli ma̍, o̍ koko̍o de ɔ̍ hīka, “Ma̍ ko̍ō! Alɔ ma̍ ɔ̄chɛ nīi Imo̍sīisi kɛlā yī nū la īpū yī Lihɔ ma̍ mɛ̍. Anu̍ nīi āchɛ ɔkɛrɔ̄ yī Ɔwɔ kɛlā yī nū la īpū yī wā i̍ngi̍ngɔ̍ɔ a̍nɛ. O̍ re̍ka Iji̍sɔ̄ɔsi, ɔyi̍ yī Ijo̍sɛ̄ɛfu, Olina̍jārɛ̄ɛti.”

46Inata̍nīyɛli che ɔ̍ ikpo̍ hīka, ɔjāha̍ ɔnɛ̄ɛhɛhi ɔ̍lɔ ē bū la Ina̍jārɛ̄ɛti ē mɛ dɛdɛ?

Ifi̍līipu da ɔ̍ ka ɔ̍lɔ ge̍ yewā ge̍ ma̍!

47Iji̍sɔ̄ɔsi ma̍ Inata̍nīyɛli nīi o̍ yɛ ē wā dikpo̍ ē ba̍ ɔ̄ ma̍, o̍ kɛlā ku̍ ɔ̄: Oli̍sɛ̄rɛli lēchi̍ lēchi̍ ke̍e̍ ɔ̍lɔ yɛ ma̍ a̍nɛ. Lɛlɛ̄lā yī arīmɛ̄ ɔ̍lɔ i̍ hɔ̄ abɔ̍ɔ la ibi̍īyē yī ɔ̍lɔ ni̍.

48Inata̍nīyɛli che Iji̍sɔ̄ɔsi ikpo̍ hīka, kana̍ nīi ɔ̍lɔ chī je̍ anu̍ ma̍?

Iji̍sɔ̄ɔsi da ɔ̍ hīka anɔ̍lɔ ma̍ ɔ̍lɔ yɛ̄grāa nīi ɔ̍lɔ rɛ abɔ̍ɔ la u̍tu yī ejū ɔha̍ ma̍, o̍bū nīi Ifi̍līipu ɔ̍lɔ hī ɔ̍lɔ ɛra̍ a̍nɛ.

49Inata̍nīyɛli ka bɛ̍ɛ̄nɛ̄ hīka, “Lēchi̍, Ɔngūlɛ̄lā! Awɔ - Ɔyi̍ yī Ɔwɔ nɛ! Awɔ - Ɔchwɔ̄lɛ̍ yī I̍sɛ̄rɛli a̍nɛ!”

50Iji̍sɔ̄ɔsi da Inata̍nīyɛli hīka, “O̍ re̍ka wu̍chē lɔkɔ nīi n koko̍o de wɔ hīka n ma̍ wɔ nīi a rɛ abɔ̍ɔ la u̍tu yī ejū ma̍ - ohu̍ nīi a chɛ̄ a̍nɛ? A ge̍ē ma̍ lɛlā ɔnɔ̄kɔ̄kū nīi gla ɔla̍ā ta̍ pɛtɛpɛtɛ ma̍ we̍! 51Lēchi̍-lēchi̍, n ā koko̍o de ala̍! Ala̍ ge̍ē ma̍ akpɔ̍ɔwɔ nīi o̍ ge̍ē lwāa ē ta̍āpāapɛ̄. Ayɛ̍ɛ̄chɛ̄rɔ̄ yī Ɔwɔ ge̍ē yɛ abɔ̍ɔ ē tīichō, ē hrāajɛ ē wā dikpo̍ ē ba̍ Ɔyi̍ yī Ɔngrɔ̄ɔ.”

Currently Selected:

Ijɔ̍ɔn 1: YBASR

Highlight

Copy