Ilu̍uku 15

Ɔnyīyɛrɔ̄ nīi pīyabi̍ ma̍

(Ima̍tiyu 18:12-14)

1Yɛ̄grāa ɔha̍, ali̍kpa̍da̍ ba̍la a̍kpla āchɛ yɛ̄mɛ̄mɛ̄ wā ge̍ gblāa abɔ̍ɔ ē plɛ̍ɛ̄lā yī Iji̍sɔ̄ɔsi. 2Āchɛ yī Ifa̍rasīi ba̍la āchɛ ongū Lihɔ yī Iju̍u gblāa abɔ̍ɔ ē ta̍ ɔ̄ iru: Ɔ̍lɔ ge̍ yii̍s! Ɔngrɔ̄ɔ nūma̍ ɔ̍lɔ lɛ gɛnɛgɛnɛ tāa a̍kpla āchɛ ɔ̄kɔ̄kū. Ɔ̍lɔ ē nōnuni̍ ē tū abɔ̄ yī ojōre̍ ba̍la ɛ̍lɛ! 3Wu̍chē yī ɔla̍ā, Iji̍sɔ̄ɔsi chā wɔ̄chīije ɔha̍ de wa̍.

4O̍ da wa̍ hīka, “Ɔ̄chɛ ɔha̍ lipu̍ yī ala̍ ge̍ lɛ anyīyɛrɔ̄ ohu ɛrwɔ̄ nīi ūkpo̍he ngmla̍a anu̍ pīyabi̍ ma̍, o̍ ē ya̍ kana̍? Je̍ka o̍ ge̍ē pīya ē hī ohu ɛnɛ che igwa̍arāanɛ ɛla̍ā gblāa abɔ̍ɔ ē re̍ a̍chi̍, e̍ gāa ge̍ē gāla̍ ūkpo̍he ɔla̍ā kpɛɛ nīi o̍ ē de ɔ̄ ē ma̍. 5O̍ ge̍ de ɔ̍ ma̍ mɛ̍, o̍ ē lɛ ɔwɔ̄wīyā ē nāa anu̍ kla̍ la ɔkɔ. 6O̍ ē bī ɔ̄ pīya wɔlɛ̍. O̍ ē hī aɛ̍ɛya anu̍ ɛra̍ ba̍la aɛ̍nɛ̍ yī nū ehēhī wa̍a̍ ge̍ē grēeyī. O̍ ē ka ē de wa̍ ka ɛ̍lɛ ge̍ lɛ ɔwɔ̄wīyā ba̍la anu̍, ma̍a anɔ̍lɔ de ɔnyīyɛrɔ̄ yī anu̍ nīi - ɔ̍lɔ pīyabi̍ ma̍ ma̍ mɛ̍. 7N ā koko̍o de ala̍ gɛ! I̍ngi̍ngɔ̍ɔ nīi ɔwɔ̄wīyā ge̍ē hɔ̄ abɔ̍ɔ la ichō wu̍chē yī ɔ̄chɛ ɔdwɔ̄bi̍ ūkpo̍he nīi ge̍ pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ ma̍ a̍nɛ. Ɔwɔ̄wīyā yī anu̍ pi̍i̍ ge̍ē lɔ̄kū pɛtɛpɛtɛ ē hi̍ iyī āchɛ ɛnɛ̄ɛhɛhi ohu ɛnɛ che igwa̍arāanɛ nīi i̍ gba̍a ge̍ē pīyabɔ̄ta̍ ē gɛ ni̍ ma̍.

Okpo nīi pīyabi̍ ma̍

8“Kɛ̄ɛ ɔnyā ɔha̍ ge̍ chī lɛ ihi̍li igwo̍ nīi ūkpūkpo̍he ngmla̍a anu̍ pīyabi̍ ma̍, o̍ ē ya̍ kana̍? Je̍ka o̍ ē mwɔla̍ tū otīnīkā, ē fi̍yɛ̍ u̍nu̍ wa̍a̍, ē gāla̍ i̍ngɔ̍ɔ kpɛɛ nīi o̍ ē de ɔ̍ ē ma̍. 9O̍ ge̍ de ɔ̍ ma̍ mɛ̍, o̍ ē hī aɛ̍ɛya anu̍ ɛra̍ ba̍la aɛ̍nɛ̍ yī nū ehēhī ge̍ē grēeyī. O̍ ē ka ē de wa̍ ka ɛ̍lɛ ge̍ lɛ ɔwɔ̄wīyā ba̍la anu̍, ma̍a ihi̍li yī anu̍ ɔha̍ nīi - ɔ̍lɔ pīyabi̍ ma̍, anɔ̍lɔ de ɔ̍lɔ ma̍ mɛ̍. 10N ā koko̍o de ala̍ gɛ! I̍ngi̍ngɔ̍ɔ nīi ayɛ̍ɛ̄chɛ̄rɔ̄ yī Ɔwɔ ē lɛ ɔwɔ̄wīyā wu̍chē yī ɔ̄chɛ ɔdwɔ̄bi̍ ɔha̍ nīi ge̍ pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ ma̍ a̍nɛ.”

Ɔyi̍ ɔnɔ̄ngrɔ̄ɔ nīi pīyabi̍ ma̍

11Iji̍sɔ̄ɔsi gba̍a ka de wa̍ hīka, “Ɔngrɔ̄ɔ ɔha̍ ma ayi̍ anāngrɔ̄ɔ āchɛ ɛpa. 12Onīi - onīchi̍chɛ̍ ma̍ da a̍dā yī nū ka ɔ̍lɔ ge̍ de ɔjā u̍gū yī anu̍ de anu̍. Wu̍chē yī ɔla̍ā, a̍dā yī wā de ɔjā nīi o̍ lɛ wa̍a̍ ma̍ kɔ̄ de ayi̍ yī nū āchɛ ɛpa ɛla̍ā. 13O̍ i̍ re̍ ɔ̄chī ɛmɛ̍ɛmla̍a o̍bū ni̍, ɔla̍ā nīi - onīchi̍chɛ̍ ma̍ de āɛ̄jā nīi - iyī nū ma̍ kpo̍ ra̍ cha̍cha̍, o̍ nāa okpo ɔla̍ā pīya hī wɔlɛ̍ ga ɔcha ɔha̍ hwɛɛ. O̍ kpo̍ okpo ɔla̍ā bīya wa̍a̍ tū ɔhɔ̄leyī ɔdwɔ̄bi̍ ba̍la ya̍chi yī lɛlā. 14Ɔjɔ̄jā i̍ hōhī de ɔ̍ gɛ ni̍ lachi̍lachi̍. Lɛmiyɛ ɔdwɔ̄bi̍ ɔha̍ wā ge̍ ya̍ la ɔcha ɔla̍ā bɛ̍ɛ̄nɛ̄; ɔjɔ̄jā i̍ chī hɔ̄ de ɔ̍ gɛ ni̍. 15Wu̍chē yī ɔla̍ā, o̍ pīya gāa ge̍ē ya̍ u̍ku̍rɔ̍ de ɔngrɔ̄ɔ ɔha̍ abɔ̍ɔ la ɔcha ɔla̍ā. Ɔngrɔ̄ɔ ɔla̍ā de ɔ̍ tɛ̄rɔ̄ ga yɛrɔ̄ yī nū gāa ge̍ē deyīrɛ eko̍oba yī nū. 16Ojōre̍ yī eko̍oba ɔbɔbɔ ē hla̍ ɔyi̍ ɔla̍ā la ode kpo̍ re̍. Ɔ̄chɔ̄chɛ i̍ chī de ta̍ ɔ̄ oko̍o o̍bo̍bū ni̍. 17O̍ hɔ̄ chi̍i̍ ma̍, ɛri̍ya̍ ɔha̍ wā dikpo̍ba̍ ɔ̄ bɛ̍ɛ̄nɛ̄. O̍ ka de iyī nū hīka, alu̍ku̍rɔ̍ yī a̍dā yī anu̍ wa̍a̍ ɛ̍lɛ ē ma̍ ɔjā re̍, jɛ̄ ɛ̍lɛ ē hōhī pɛtɛpɛtɛ. Anɔ̍lɔ chī ta̍lā ma̍ i̍ngɔ̍ɔ ji ge̍ē pīyaku̍ lɛmiyɛ. 18Anɔ̍lɔ ge̍ē ku̍chē pīya ē dikpo̍ ē ba̍ a̍dā yī anu̍. Anɔ̍lɔ ge̍ē koko̍o ē de ɔ̍lɔ hīka, ‘Ādā, n yɛ̍ɛ̄lā ɔdwɔ̄bi̍ ku̍ Ɔwɔ la ichō ba̍la awɔ mɛ̍! 19N i̍ ngma̍ lɛbɛ o̍ re̍ka ɔyi̍ yī wɔ gɛ ni̍! Nāa ami bɔ̄ɔkɔ nīi a nāa a̍chɛ̍ yī wɔ nīi ē ya̍ u̍ku̍rɔ̍ ē de wɔ ma̍.’ 20Bū la ɛbɛ ɔla̍ā, o̍ nīichō bɛ̍ɛ̄nɛ̄, pīya yɛ gāa dikpo̍ba̍ a̍dā yī nū.

“Yɛ̄grāa nīi o̍ e̍e yɛ hwɛɛ ma̍, a̍dā yī nū de ɔ̍ ma̍. O̍ mlɛ̍ha̍ de ɔ̍ ɔlamu-ɔlamu, rɛ̄ɛnya yɛ grāa anu̍ ge̍ ku̍ ɔ̄ ba̍ ɔtū, de oko̍o tū ɔ̄. 21Ɔyi̍ ka de ɔ̍ bɛ̍ɛ̄nɛ̄ hīka, ‘Ādā, n yɛ̍ɛ̄lā ɔdwɔ̄bi̍ ku Ɔwɔ la ichō ba̍la awɔ mɛ̍! N i̍ ngma̍ la ore̍ka ɔyi̍ wɔ gɛ ni̍!’ 22A̍dā yī nū hī a̍chɛ̍ yī nū ɛra̍ ɔpɔ̄ɔpɛ̄, ka de wa̍ hīka, ‘Ala̍ ā pa̍pa̍ gɛ! Ala̍ ā gāa ge̍ wu̍ ihiyobō nīi - ɔlamu-ɔlamu gɔ̄ga ma̍ bī wā ge̍ miya tū ɔ̄ hwɔhi hwɔhi. Ala̍ ā de oyi̍ije tū ɔ̄ la abɔ̄, nīi ala̍ ge̍ de wɔkpa̍ che ɔ̍ la ikpo̍. 23Ala̍ ā gāa ge̍ ku̍ ɔ̍drɔ̄ yī egedebi̍ya̍ nīi hiyē ka̍ka̍ ma̍ nīi ala̍ ge̍ de ngmo̍; hɛ̄ɛbɛ nīi alɔ ā ya̍ ɔwɔ̄wīyā ɔnɔ̄kɔ̄kū. 24Wu̍chē oji̍ nɛ, ɔyi̍ u nūma̍ pīyaku̍ o̍bū; u̍ma̍ama o̍ de wōwi mɛ̍. O̍ pīyabi̍ o̍bū; u̍ma̍ama n de ɔ̍ ma̍ mɛ̍.’ Bū la ɛbɛ ɔla̍ā, e̍ kū la wɔga ɔnɔ̄kɔ̄kū ɔla̍ā la ɔyɔ̍ɔ̄ya̍ bɛ̍ɛ̄nɛ̄.

25“Yɛ̄grāa ɔla̍ā wa̍a̍, ɔyi̍ yī nū ɔnyɔ̄nyāku̍ e̍e jī abɔ̍ɔ la yɛrɔ̄ we̍. O̍ yɛ ē chɔ̄cha nīi o̍ tu̍ bla̍a wɔlɛ̍ ma̍, o̍ po̍ ojiya yī ɔjā ogwōgwō ba̍la ejē. 26O̍ de ɛra̍ hī ɔ̍chɛ̍ yī a̍dā yī nū ɔha̍ du̍mɔ̍, che ɔ̍ ikpo̍ ka ɔ̍lɔ - iyī nɛ? 27Ɔ̍chɛ̍ yī a̍dā yī nū koko̍o de ɔ̍ hīka, ɔɔ̍nɛ̍ yī ɔ̍lɔ ku̍chē cha a̍nɛ. Aa̍ nīi a̍dā yī ɛ̍lɛ ngmo̍ ɔ̍drɔ̄ yī egedebi̍ya̍ ohiyē de ɔ̍lɔ a̍nɛ. Wu̍chē oji̍ nɛ, ɔ̍lɔ ku̍chē cha ke̍e̍; ɔjɔ̄jā ɔ̍lɔ i̍ ya̍ ɔ̍lɔ ni̍. 28Lɛlā nūma̍ wu̍ ɔɔ̍pɛ̄ nūma̍ ɔtū lēchi̍ lēchi̍. O̍ i̍ chɛ̄ ga ga wɔlɛ̍ gɛ ni̍. Wu̍chē yī ɔla̍ā, a̍dā yī nū bīyɛchɛ gāa ge̍ ra̍ābɔ̄ de ɔ̍ ka ɔ̍lɔ ge̍ yewā la wɔlɛ̍. 29Ɔkɔ yī lɛlā nīi o̍ hīya a̍dā yī nū ma̍ hɔ̄ ma̍ a̍nɛ: ‘Ma̍ ko̍ō, ādā! N ya̍ u̍ku̍rɔ̍ bāa ɔfiyɛ ma̍ de wɔ gbajɛ lɛ̍yi̍ ɛmɛ̍ɛmla̍a mɛ̍! Ɔ̄chī ɔha̍lɔha̍ i̍ hɔ̄ abɔ̍ɔ nīi n tɔ̍ɔkɔ yī wɔ je̍ ni̍. A i̍ de ɔyi̍ yī yɛwū ɔbɔbɔ de u nīi n de ya̍ ɔwɔ̄wīyā ba̍la aɛ̍ɛya ami je̍ ni̍. 30Ma̍ gɛ, anu̍ ɔyi̍ yī wɔ nūma̍ nīi kpo̍ āɛ̄jā yī wɔ wa̍a̍ ge̍ bīya tū akpara ma̍ ku̍chē cha ma̍, a ngmo̍ ɔ̍drɔ̄ yī egedebi̍ya̍ ohiyē de ɔ̍ mɛ̍.’ 31A̍dā yī nū hīya anu̍ ɔkɔ du̍mɔ̍ hīka, ‘Ɔyi̍ yī u! Je̍ka aa̍ awɔ ma̍ hɔ̄ amu la wɔlɛ̍ myɛ̄grāa-myɛ̄grāa. Ɔjāha̍-ɔjāha̍ nīi n lɛ wa̍a̍ ma̍ - iyī wɔ nɛ. 32O̍ ngma̍ nīi alɔ ā ya̍ ɔɔ̍nɛ̍ yī wɔ nūma̍ wɔga, ē lɛ ɔwɔ̄wīyā gba̍a̍. Wu̍chē oji̍ nɛ, o̍ pīyaku̍ o̍bū; u̍ma̍ama, o̍ de wōwi mɛ̍. O̍ pīyabi̍ o̍bū; u̍ma̍ama, alɔ de ɔ̍ ma̍ mɛ̍.’ ”

Currently Selected:

Ilu̍uku 15: YBASR

Highlight

Copy