Ima̍tiyu 23

Ɔna yī lɛlā yī āchɛ yī Ifa̍rasīi ba̍la āchɛ ongū Lihɔ yī Iju̍u

(Ima̍aki 12:38-39; Ilu̍uku 11:43, 46; 20:45-46)

1Iji̍sɔ̄ɔsi ka de alɔgbādu ɔla̍ā ba̍la a̍chi̍kpo̍ yī nū bɛ̍ɛ̄nɛ̄ hīka, 2“Ala̍ jo̍ōkū hīka āchɛ ongū Lihɔ yī Iju̍u ba̍la Āchɛ yī Ifa̍rasīi re̍ka āchɛ nīi hɔ̄ la igblɛ̍chi̍ yī Imo̍sīisi a̍nɛ. 3Wu̍chē yī ɔla̍ā, ala̍ ā de otūlichō de wa̍. Ala̍ ā ku wa̍ la lɛlāha̍-ɛlāha̍ wa̍a̍ nīi e̍ ge̍ē ka ala̍ ɔ̍lɔ ge̍ ya̍ ma̍. Ɔjā ūkpo̍he, ala̍ e̍e gbla aa̍ la abɔ̄lɛ̄lā ɔyɔ̍ɔ̄ya̍ ɔha̍lɔha̍ ni̍. Wu̍chē oji̍ nɛ, lɛlā nīi e̍ ē ka ma̍, e̍ i̍ ē chɛ̄ ya̍ i̍ngɔ̍ɔ la abɔ̄ yī wā ni̍. 4E̍ ē tū iho̍ ɔlyɛnɛ̍nu̍ ē nāa che āchɛ la agbīihi; aa̍ ɛlɛjā i̍ ē chī bɔ̍ɔ̄tū nā abɔ̄ kpaa i̍ngɛ̍ɛ̄nɛ̄ hu iho̍ hwa̍a̍ ē tāa āchɛ ni̍. 5E̍ ē ya̍ ɛlāha̍-ɛlāha̍ wa̍a̍ lɛbɛ nīi āchɛ ge̍ē ma̍ wā. Je̍ka aa̍ ala̍ ma̍ ɔjā nīi e̍ kplɛ̍ɛ̄lā yī Īpū yī Ɔwɔ ē tū de ba̍ la inēyī ba̍la ugbrɔ̍ɔ̄bɔ̄ ma̍! Ahu̍ yī ɔ̄pa̍ yī wā nīi e̍ ē ya̍ ugu ē tū ɔ̄ ma̍ chī lɛ bāa ohyo̍lōhyolō ma̍. 6Ɛbɛ nīi - ɛbɛ ɔlamu-ɔlamu gɔ̄ga ma̍ hi wa̍ ɔtū la ɔhyāhɔ̄ nīi e̍ ge̍ yɛ ē ya̍ ɔwɔ̄wīyā ɔha̍ ma̍ a̍nɛ. Igblɛ̍chi̍ nīi lā ke̍e̍ hī āchɛ ma̍ nīi e̍ ē hɔ̄ la anu̍ la u̍nu̍ ogrēeyī a̍nɛ. 7E̍ ē chikpo̍ nīi āchɛ ge̍ē da wa̍ o̍be ē de otūlichō de wa̍ la o̍gra. E̍ ē chikpo̍ nīi āchɛ ge̍ē hī wā hīka, ‘Ɔngūlɛ̄lā.’ 8Ala̍ ma̍, ɔ̄chɔ̄chɛ ge̍ e̍e hī ala̍ hīka, ‘Ɔngūlɛ̄lā’ i̍ngɔ̍ɔ ni̍. Wu̍chē oji̍ nɛ, ala̍ wa̍a̍ aɛ̍nɛ̍ nɛ; ala̍ lɛ ɔngūlɛ̄lā ūkpo̍he kpo̍kpo̍. 9Ala̍ e̍e hī ɔ̄chɔ̄chɛ hīka, ‘Ādā’ amu la ajɛ ni̍. Wu̍chē oji̍ nɛ, A̍dā yī ala̍ lɛ ūkpo̍he kpo̍kpo̍ hɔ̄ abɔ̍ɔ la ichō. 10Ɔ̄chɔ̄chɛ ge̍ e̍e de ala̍ re̍ka, ‘Abābā’ ni̍. Wu̍chē oji̍ nɛ, Abā yī ala̍ lɛ ūkpo̍he kpo̍kpo̍; anu̍ - Ɔhɔ̍ɔnyɛta̍ Nīi Ɔwɔ Hōhu a̍nɛ. 11Ɔ̄chɛ nīi re̍ka ɔmaga lipu̍ yī ala̍ ma̍, anu̍ ge̍ē de ē pīya ɔ̍chɛ̍ yī ala̍ wa̍a̍ a̍nɛ. 12Ɔ̄chɛ nīi ge̍ nāa iyī nū ke̍ke̍ni̍, e̍ ge̍ē bī ɔlɔjā gāa ajɛ. Ɔ̄chɛ nīi ge̍ chī bī iyī nū ga ajɛ, e̍ ge̍ē nāa ɔlɔjā ke̍ke̍ni̍.

Iji̍sɔ̄ɔsi kalābi̍ tāa āchɛ yī Ifa̍rasīi ba̍la āchɛ ongū Lihɔ yī Iju̍u

(Ima̍aki 12:40; Ilu̍uku 11:39-42, 44, 52; 20:27)

13“I̍īyo̍ de ala̍ Āchɛ yī Ifa̍rasīi ba̍la āchɛ ongū Lihɔ yī Iju̍u! Ala̍ āchɛ ɔkɛlā ɔha̍ chōo̍chē ya̍ ɔha̍ ɛla̍ā! Ala̍ ta̍ ɔpu yī Ɔchwɔ̄lɛ̍ Oro̍ōre̍ yī Ɔwɔ gū la īkprī yī āchɛ wa̍a̍. Ala̍ ɛlɛjā i̍ yɛ abɔ̍ɔ ge̍ē chɛ̄ gāa ni̍, ala̍ i̍ chī chɛ̄ de āchɛ nīi chikpo̍ ge̍ē chɛ̄ gāa ma̍ nīi e̍ chɛ̄ gānyɔ̄ ni̍.

14[“I̍īyo̍ de ala̍ Āchɛ yī Ifa̍rasīi ba̍la āchɛ ongū Lihɔ yī Iju̍u! Ala̍ āchɛ ɔkɛlā ɔha̍ chōo̍chē ya̍ ɔha̍ ɛla̍ā! Ala̍ ē ma̍ anyōkū la obu̍we̍, nu̍ wā ɔjā nīi e̍ lɛ ma̍ a̍nɛ. Ala̍ ē chī mɔ̍ɔ̄ma̍chi̍ ē jɔhā kpradada ji a̍nɛ. Wu̍chē yī ɔla̍ā, ichi̍ yī ala̍ ge̍ē re̍ka ɔdwɔ̄bi̍ ɔdwɔnyɛ.]

15“I̍īyo̍ de ala̍ Āchɛ yī Ifa̍rasīi ba̍la āchɛ ongū Lihɔ yī Iju̍u! Ala̍ āchɛ ɔkɛlā ɔha̍ chōo̍chē ya̍ ɔha̍ ɛla̍ā! Ala̍ ē pɛ̍ wɔwu̍ ē hɛ̍ li̍hu ārɛ̄, gla ɔcha yɛ̄mɛ̄mɛ̄ ta̍ wa̍a̍ ge̍ē ya̍ nīi ɔ̄chɛ ūkpo̍he kpo̍kpo̍ ē chɛ̄ku ala̍. O̍ ge̍ de ngmɛ̍rɛ̍ i̍ngɔ̍ɔ de ala̍ mɛ̍, ala̍ ē ya̍ nīi o̍ ē de ē pīya ɔ̄chɛ ɔngma̍ la ɔga ayekū oli̍gba̍o̍ pɛtɛpɛtɛ bāa ala̍ ɛlɛjā ma̍.

16“I̍īyo̍ de ala̍ alɛhu̍ epriyī-priyī ɛla̍ā! Ala̍ ē ngū āchɛ hīka, ɔ̄chɛ ɔ̍lɔ ge̍ gbriyī yī u̍nu̍ yī Ɔwɔ, ɔ̍lɔ i̍ gblɛfiyɛ ni̍; ɔ̄chɛ nīi - ɔ̍lɔ ge̍ chī gbriyī yī igo̍olu yī u̍nu̍ yī Ɔwɔ, ɔlɔjā ɔ̍lɔ gblɛfiyɛ. 17Ali̍bobo epriyī-priyī āchɛ! Ɔna - ɔlamu-ɔlamu gɔ̄ga ma̍? Igo̍olu nīi lā la U̍nu̍ yī Ɔwɔ ma̍ kɛ̄ɛ u̍nu̍ yī Ɔwɔ nīi - ohu̍ nīi igo̍olu de lɛ cha̍ri̍cha̍ri̍ ma̍? 18Ala̍ gba̍a ka ɔha̍ hīka, ɔ̄chɛ ɔ̍lɔ ge̍ gbriyī yī ɛbɛ ode ɔjā pā Ɔwɔ, ɔ̍lɔ i̍ gblɛfiyɛ ni̍; ɔ̄chɛ nīi - ɔ̍lɔ ge̍ chī gbriyī yī ɔjā nīi ɛ̍lɛ bī ge̍ē pā Ɔwɔ ma̍, ɔlɔjā ɔ̍lɔ gblɛfiyɛ. 19Ala̍ priyī kpa̍a! Ɔna - ɔlamu-ɔlamu gɔ̄ga ma̍? Ɔjā nīi e̍ bī ge̍ē pā Ɔwɔ ma̍ kɛ̄ɛ ɛbɛ ode ɔjā pā Ɔwɔ nīi - ohu̍ nīi ɔjā ɔla̍ā de lɛ cha̍ri̍cha̍ri̍ ma̍? 20Ala̍ ā jo̍ōkū gɛ hīka ɔ̄chɛ ge̍ gbriyī yī ɛbɛ ode ɔjā pā Ɔwɔ ma̍, o̍ re̍ka o̍ yɛ ē gbriyī yī nū ba̍la ɛjā wa̍a̍ nīi gblāa abɔ̍ɔ i̍ngi̍ngɔ̍ɔ ma̍. 21Ɔ̄chɛ ge̍ chī gbriyī yī u̍nu̍ yī Ɔwɔ mɛ̍, o̍ re̍ka ɔlɔjā yɛ ē gbriyī yī nū ba̍la Ɔwɔ nīi hɔ̄ abɔ̍ɔ ma̍. 22Ɔ̄chɛ ge̍ chī gbriyī yī ichō mɛ̍, o̍ re̍ka ɔlɔjā yɛ ē gbriyī yī atɛ̍ yī Ɔwɔ ba̍la Ɔwɔ ɔlɔjā nīi hɔ̄ abɔ̍ɔ ma̍.

23“I̍īyo̍ de ala̍ Āchɛ yī Ifa̍rasīi ba̍la āchɛ ongū Lihɔ yī Iju̍u! Ala̍ āchɛ ɔkɛlā ɔha̍ chōo̍chē ya̍ ɔha̍ ɛla̍ā! Ala̍ jwɔ̍ɔnyɛ yī obī ɔjā ūkpo̍he lipu̍ yī igwo̍ ge̍ kɔ̄ de Ɔwɔ. Ala̍ jwɔ̍ɔnyɛ yī ɔya̍ i̍ngɔ̍ɔ la ɛjā bāa īpū oro̍ōre̍ ɛha̍ nīi lɛ gɛnɛgɛnɛ re̍ka imi̍nti ba̍la idi̍li ba̍la iku̍min nīi ala̍ ē de kɔ̄ de Ɔwɔ ma̍. Ɛjā bāa lɛha̍ ɔmɔ̍ɔ̄ma̍ de āchɛ, ba̍la lɛpɔ̄ ɔhɔ̍ɔ̄hɛ̍ kpakpa, ba̍la lɛlā olēchi̍ lēchi̍ nīi - ɛjā ɔlamu-ɔlamu gba̍a̍ nīi Lihɔ yī Imo̍sīisi chikpo̍ ka āchɛ ɛ̍lɛ ge̍ ya̍ ma̍, ala̍ chī chōo̍chē hi̍hi̍yo̍ yī wā. Ɛjā nūma̍ ngma̍ nīi ala̍ ge̍ ya̍ o̍bū a̍nɛ. Bū la ɛbɛ ɔla̍ā, anu̍ nīi ala̍ ge̍ē hi̍hi̍yo̍ yī ɛjā ehēhī ɛla̍ā la ɔyɔ̍ɔ̄ya̍ ni̍ a̍nɛ. 24Ala̍ alɛhu̍ epriyī-priyī ɛla̍ā! Ala̍ jwɔ̍ɔnyɛ yī iju ode wu̍ ta̍anū hī lipu̍ yī ɔjā ɔgwɔ̍ɔ̄gwa̍ yī ala̍, ɛbɛ̍ obīho̍ ogbigū ligbo̍-ligbo̍, ala̍ ē chī de nāa ē mlɛ gura̍!

25“I̍īyo̍ de ala̍ Āchɛ yī Ifa̍rasīi ba̍la āchɛ ongū Lihɔ yī Iju̍u! Ala̍ āchɛ ɔkɛlā ɔha̍ chōo̍chē ya̍ ɔha̍ ɛla̍ā! Ala̍ ē nāa okwi̍ihi yī ɔgba̍galā ba̍la u̍kpu̍ūhā yī ala̍ ngma̍ cha̍cha̍, lipu̍ yī wā chī mōmu la ɛjā ānyānyi ba̍la ɛjā ode gbō iyī ala̍ iyī ala̍. 26Ala̍ Āchɛ yī Ifa̍rasīi epriyī-priyī ɛla̍ā! Ala̍ ā de lipu̍ yī ɔgba̍galā nɔ̄na cha̍cha̍ o̍bū gɛ; bū la ɛbɛ ɔla̍ā, okwi̍ihi yī nū ge̍ē de ē lɛ cha̍ri̍cha̍ri̍ i̍ngi̍ngɔ̍ɔ ē de ala̍.

27“I̍īyo̍ de ala̍ Āchɛ yī Ifa̍rasīi ba̍la āchɛ ongū Lihɔ yī Iju̍u! Ala̍ āchɛ ɔkɛlā ɔha̍ chōo̍chē ya̍ ɔha̍ ɛla̍ā! Ala̍ lɛ ke̍e̍ bāa u̍nwɔ̍wu̍ nīi e̍ de ya̍ri̍ ngmo̍ ɔ̄ fre̍te̍te̍ ma̍. A ge̍ ma̍ ɔ̄ amu la yɛchɛ, o̍ ē li̍hi̍ bāa eblo ma̍, abɔ̍ɔ lipu̍ yī nū chī mōmu la ukpoku̍ yī āchɛ̄ɛchɛ ba̍la ɛjā ɔdwɔ̄bi̍ ɛha̍lɛha̍ wa̍a̍. 28I̍ngi̍ngɔ̍ɔ nīi ala̍ lɛ a̍nɛ. Āchɛ ge̍ ma̍ ala̍ la yɛchɛchɛ, ala̍ ē hwɔhi hwɔhi; abɔ̍ɔ lipu̍ yī ala̍ chī mōmu la arīmɛ̄ ba̍la lɛlā ɔdwɔ̄bi̍.

Ichi̍ ɔdwɔ̄bi̍ nīi ge̍ē hɔ̄ de wa̍ ma̍

(Ilu̍uku 11:47-51)

29“I̍īyo̍ de ala̍ Āchɛ yī Ifa̍rasīi ba̍la āchɛ ongū Lihɔ yī Iju̍u! Ala̍ āchɛ ɔkɛlā ɔha̍ chōo̍chē ya̍ ɔha̍ ɛla̍ā! Ala̍ ē gbla̍a u̍nwɔ̍wu̍ yī āchɛ ɔkɛrɔ̄ yī Ɔwɔ gblɛ̍ɛgblɛ̍ɛgblɛ̍ɛ! Ala̍ ē ya̍ ugu ē tū ɛbɛ nīi e̍ nyi āchɛ ɛnɛ̄ɛhɛhi ma̍! 30Ala̍ ē ka hīka, ala̍ ɔ̍lɔ ge̍ hɔ̄leyī i̍chɔ̍lɔ yɛ̄grāa yī aa̍ ɔ̍kɔ̄kū yī ala̍ nɛ, ala̍ ɔ̍lɔ i̍ ge̍ē kpo̍ āchɛ-ɔkɛrɔ̄ yī Ɔwɔ ngmo̍ lɔkɔ nīi ɛ̍lɛ ya̍ ma̍ ni̍. 31I̍ngɔ̍ɔ? O̍ re̍ka ala̍ de chɛ̄ hīka ala̍ ɔ̍lɔ bū la wɔma yī āchɛ ɛla̍ā nīi kpo̍ āchɛ ɔkɛrɔ̄ yī Ɔwɔ ngmo̍ ma̍? 32Ɔ̍lɔma̍, ala̍ īcha gɛ! Ala̍ kwɛ̍ɛjī la ɔjā ɔla̍ā nīi ɔ̍kɔ̄kū yī ala̍ wu̍tu ma̍ gɛ! 33Ala̍ ogbiji ba̍la wɔma yī ogbiji yī āchɛ nīi gblāa ma̍ ma̍! Ala̍ gbɛri̍ya̍ hīka ala̍ ɔ̍lɔ ge̍ē hɛ̍ ē ga ē hī lɛpɔ̄ ode ku̍ ala̍ ga ayekū oli̍gba̍o̍? 34N ā koko̍o de ala̍ gɛ! N ge̍ē de āchɛ ɔkɛrɔ̄ yī Ɔwɔ ba̍la āchɛ oje̍ kure̍kure̍ ba̍la āchɛ ɔngūlɛ̄lā tɛ̄rɔ̄ hu ala̍. Ala̍ ge̍ē kpo̍ āchɛ ɛha̍ yī wā ngmo̍. Ala̍ ge̍ē de āchɛ ɛha̍ yī wā gwōba̍ la ɔchi̍ ɔhrɛ̍ɛpa. Ala̍ ge̍ē grāa aa̍ a̍grɛ̄chi̍ la u̍nu̍ ogrēeyī yī ala̍. Ala̍ ge̍ē che wa̍ ɛnya ē ta̍ ipwo̍gra-ipwo̍gra ē ta̍. 35Wu̍chē yī lɛlā nūma̍ wa̍a̍, Ɔwɔ ge̍ē de ichi̍ ɔmɔ̍ɔ̄ma̍ ē de ala̍, wu̍chē yī āchɛ nīi i̍ jɔ̍ha̍ ni̍ nīi ala̍ kpo̍ ngmo̍ ma̍, wu̍tu bū la E̍bɛ̄ɛli ɔ̄chɛ ɔnɛ̄ɛhɛhi nīi ala̍ ngmo̍ ma̍ ge̍ chɛ̄ la Ijakara̍ya ɔyi̍ Ibaraka̍ya nīi ala̍ ngmo̍ la ɔprɛ̍ɛpa yī u̍nu̍ yī Ɔwɔ ba̍la ɛbɛ ɔpā Ɔwɔ ɔpɔ̄pā ma̍. 36Lēchi̍-lēchi̍, n ge̍ē koko̍o ē de ala̍! Ichi̍ yī lɛlā nūma̍ wa̍a̍ ge̍ē de ē ji la lɛhu̍ yī āchɛ yī yɛchɛ nūma̍.”

Iji̍sɔ̄ɔsi kɛlā ku̍ Ijɛru̍sālɛm

(Ilu̍uku 13:34-35)

37“Ijɛru̍sālɛm be̍e! Ijɛru̍sālɛm! Awɔ nīi re̍ka ongmo̍ āchɛ ɔkɛrɔ̄ yī Ɔwɔ, ongmo̍ alɛrɔ̄ yī nū lɛchɛ̄chɔ̄ ma̍! N chɛ̄rī kpa̍a ka n ge̍ē kpo̍ wɔ ē tū la acha̍ lɔkɔ nīi ugū kpo̍ ayi̍ yī nū tū ma̍, a i̍ chī chɛ̄ de u ni̍. 38U̍ma̍ama, wɔlɛ̍ yī wɔ ge̍ē ta̍lā ji bɛ̍ɛ̄nɛ̄. 39Bū la u̍ma̍ama ga iyɔ̄bū, a i̍ ge̍ē ma̍ u ge̍ē gbo̍ ē gɛ ni̍. Lēchi̍, a i̍ ge̍ē ma u ē gɛ ni̍, kpɛɛ nīi a ge̍ē ka hīka, Ɔwɔ ɔ̍lɔ ge̍ de ɔpiyɛ de ɔ̄chɛ ɔla̍ā nīi - ɔ̍lɔ wā la riyī yī Ādādā ma̍.”

Currently Selected:

Ima̍tiyu 23: YBASR

Highlight

Copy