Ima̍tiyu 27

E̍ bī Iji̍sɔ̄ɔsi ga ɛbɛ yī Ipa̍yi̍lēeti

(Ima̍aki 15:1; Ilu̍uku 23:1-2; Ijɔ̍ɔn 18:28-32)

1La obūrɔ̍ɔ̄chī i̍chi̍chɛ ɔla̍ā, alɛhu̍ aligbe ba̍la ɛgabɔ̄ yī Iju̍u wa̍a̍ gāa ge̍ ya̍ ɔmɔ̄miya yī wā tū Iji̍sɔ̄ɔsi nīi e̍ ge̍ē de ɔ̍ ē ngmo̍. 2E̍ tū ɔ̄ agba̍ bī ɔ̄ pīya ge̍ wa̍ābɔ̄ la anu̍ de Ipa̍yi̍lēeti nīi - ɔ̄chɛ odeyīrɛ ɔcha ɔla̍ā de Aliro̍om ma̍.

Ɔpīyaku̍ yī Iju̍dasi ɔlɔwɛ

(U̍ku̍rɔ̍ yī Alɛrɔ̄ 1:18-19)

3Iju̍dasi ɔlɔwɛ ma̍ hīka ɛ̍lɛ de lɛpɔ̄ ku̍ Iji̍sɔ̄ɔsi i̍ngɔ̍ɔ ma̍, o̍ hi̍je̍mā. O̍ ku̍chē la okpo yī isi̍li̍ba ohu che igwo̍ ɔla̍ā ga ɛbɛ yī alɛhu̍ aligbe ba̍la ɛgabɔ̄ yī Iju̍u wa̍a̍. 4O̍ koko̍o de wa̍ hīka, “N yɛ̍ɛ̄lā ɔdwɔ̄bi̍ mɛ̍. Wu̍chē oji̍ nɛ, n chɔ̄ɔwɛ tū ɔ̄chɛ nīi i̍ jɔ̍ha̍ ni̍ ma̍ nīi o̍ ge̍ē pīyēku̍.”

Āchɛ ɛla̍ā hīya anu̍ ɔkɔ hīka, ɔna̍ ɔ̍lɔ - iyī aa̍ abɔ̍ɔ lipu̍ yī lɛlā ɔla̍ā? Ɔla̍ā ɔ̍lɔ - lɛlā yī ɔ̍lɔ ɔlɔjā nɛ.

5Iju̍dasi wa̍ābɔ̄ la okpo chīyēgblāa abɔ̍ɔ la u̍nu̍ yī Ɔwɔ, pīya gāa ge̍ de iyī nū che orīɔkɔ.

6Alɛhu̍ aligbe de okpo ɔla̍ā kpo̍ hī ajɛ. E̍ ka hīka okpo ɔla̍ā ɔ̍lɔ - okpo yī ɔpīyaku̍ yī ɔ̄chɛ nɛ. E̍ ka hīka ɔ̍lɔ lihɔ nɛ; okpo ɔla̍ā ɔ̍lɔ i̍ ge̍ē tū la ɛbɛ ogbōokpo yī u̍nu̍ yī Ɔwɔ ni̍. 7E̍ lɛ ɔmɔ̄miya nīi oko̍o yī wā de grāa ma̍, e̍ bī okpo ɔla̍ā ge̍ ra̍ ajɛ ɔha̍ nīi - iyī ɔ̄chɛ ɔmyɛ̄hī ma̍. E̍ ra̍ ajɛ ɔla̍ā lā nīi e̍ ge̍ē bī nyi okū yī āchɔga. 8Anu̍ - ohu̍ nīi ajɛ ɔla̍ā de re̍ka “Ajɛ yī Yeyī” ku yɛnɔ oli̍chɛ a̍nɛ.

9Bū la ɛbɛ ɔla̍ā, lɛlā nīi Ijɛrɛma̍ya ɔ̄chɛ ɔkɛrɔ̄ yī Ɔwɔ mwɔ̍ɔmu ma̍ de pīya ichɛ̄ɛhi ke̍e̍. O̍ ka hīka,

“E̍ de okpo yī isi̍li̍ba ohu che igwo̍ ɔla̍ā nāa;

okpo ɔla̍ā nīi Ali̍sɛ̄rɛli chrōoko̍o ge̍ē de la lɛhu̍ yī nū a̍nɛ.

10E̍ de nāa ra̍ ajɛ ɔha̍ nīi - iyī ɔ̄chɛ ɔmyɛ̄hī ma̍;

lɔkɔ nīi Ādā koko̍o de u ka amɔ̍lɔ ge̍ ya̍ ma̍ nɛ.”

Ipa̍yi̍lēeti che Iji̍sɔ̄ɔsi ikpo̍ yī lɛlā

(Ima̍aki 15:2-15; Ilu̍uku 23:3-5; Ijɔ̍ɔn 18:33-38)

11E̍ bī Iji̍sɔ̄ɔsi ge̍ rɛ la iyɔ̄bū yī Ipa̍yi̍lēeti bɛ̍ɛ̄nɛ̄. O̍ che Iji̍sɔ̄ɔsi ikpo̍ hīka, “Awɔ - ɔchwɔ̄lɛ̍ yī Iju̍u a̍nɛ?”

Iji̍sɔ̄ɔsi hīya anu̍ ɔkɔ hīka, “I̍ngɔ̍ɔ nīi a ka a̍nɛ.” 12Iji̍sɔ̄ɔsi i̍ chɛ̄ kɛlɛ̄lā ku̍ lɛlā ɔla̍ā wa̍a̍ nīi alɛhu̍ aligbe ba̍la ɛgabɔ̄ yī Iju̍u ka ku̍ ɔ̄ ma̍ ni̍.

13Wu̍chē yī ɔla̍ā, Ipa̍yi̍lēeti da ɔ̍ hīka, “A i̍ plɛ̍ɛ̄lā nūma̍ wa̍a̍ nīi e̍ ka ku̍ wɔ ma̍ ni̍?”

14Iji̍sɔ̄ɔsi i̍ chɛ̄ hīyɔkɔ yī lɛlɛ̄lā ni̍. Wu̍chē yī ɔla̍ā, o̍ de ya̍ Ipa̍yi̍lēeti lɛbɛ̍bi̍ ɔlamu-ɔlamu.

E̍ hɛ̍ Iji̍sɔ̄ɔsi ɔpīyaku̍

(Ima̍aki 15:6-15; Ilu̍uku 23:13-25; Ijɔ̍ɔn 18:39—19:16)

15Mlɛ̍yi̍mlɛ̍yi̍ yɛ̄grāa yī Ɔwɔ̄wīyā Owu̍lā, Ɔ̄chɛ Odeyīrɛ Ɔcha ɔla̍ā ē wu̍ oligbakɔbɔ nīi āchɛ ge̍ chikpo̍ ma̍ ē bīyɛchɛ ē de wa̍. 16Yɛ̄grāa ɔla̍ā, oligbakɔbɔ ɔha̍ nīi ro̍ohohu tū abɔ̍ɔ ma̍ re̍ka Iji̍sɔ̄ɔsi Ibara̍bāsi. 17Āchɛ tu̍ grēeyī bɛ̍ɛ̄nɛ̄ ma̍, Ipa̍yi̍lēeti che wa̍ ikpo̍ hīka, “Ɔ̄nyɛ lipu̍ yī āchɛ ɛpa nūma̍ nīi ala̍ chikpo̍ nīi n ge̍ē wu̍ ɔ̄ bīyɛchɛ ē de ala̍ ma̍: Iji̍sɔ̄ɔsi Ibara̍bāsi, kɛ̄ɛ Iji̍sɔ̄ɔsi Ikra̍yisi?” 18Ipa̍yi̍lēeti jo̍ōkū wa̍a̍ hīka uji nīi ɛ̍lɛ tū Iji̍sɔ̄ɔsi ma̍ - ohu̍ nīi ɛ̍lɛ ku̍ ɔ̍lɔ ge̍ de anu̍ a̍nɛ.

19Ipa̍yi̍lēeti hyāhɔ̄ abɔ̍ɔ la ɛbɛ ɔklɛpɔ̄ ma̍, ɔnyā yī nū tɛ̄rɔ̄ ɔha̍ hu ɔ̍ hīka, “A ā tābɔ̄ lɛlɛ̄lā yī ɔngrɔ̄ɔ ɔnɛ̄ɛhɛhi ɔla̍ā ni̍ ko̍ō! Wu̍chē oji̍ nɛ, wɔ̄na nīi n nā i̍chɛ la otu̍ ma̍, n mi̍chi̍ kpɛ̍ɛji wu̍chē yī ɔngrɔ̄ɔ ɔla̍ā.”

20Alɛhu̍ aligbe ba̍la ɛgabɔ̄ yī Iju̍u ba̍ āchɛ ɛla̍ā tū ka ɛ̍lɛ ge̍ ka nīi Ipa̍yi̍lēeti ɔ̍lɔ ge̍ tu̍ hī Ibara̍bāsi de ɛ̍lɛ, hɛ̄ɛbɛ nīi ɛ̍lɛ ge̍ de Iji̍sɔ̄ɔsi ngmo̍. 21Ipa̍yi̍lēeti gba̍a che wa̍ ikpo̍ hīka, “Ɔ̄nyɛ lipu̍ yī āchɛ ɛpa nūma̍ nīi ala̍ chikpo̍ nīi n ge̍ē wu̍ ɔ̄ bīyɛchɛ ē de ala̍ ma̍?”

E̍ hīyɔkɔ hīka ɔ̍lɔ Ibara̍bāsi nɛ oo!

22Ipa̍yi̍lēeti gba̍a che wa̍ ikpo̍ hīka, “Oji̍ nīi ami ma̍ chī ge̍ē ya̍ la Iji̍sɔ̄ɔsi nīi re̍ka Ikra̍yisi ma̍?”

E̍ ka ɔ̍lɔ ge̍ de ɔ̍lɔ gwōba̍ la ɔchi̍ ɔhrɛ̍ɛpa oo!

23Ipa̍yi̍lēeti da wa̍ ka ɔ̍lɔ wu̍chē oji̍ nɛ? Lɛlā abi̍ ɔna̍ nīi ɔ̍lɔ ya̍ ma̍?

Āchɛ ɛla̍ā ya̍ ojiya wɔhu̍-wɔhu̍ bɛ̍ɛ̄nɛ̄ hīka, “E̍ ge̍ de ɔ̍ gwōba̍ la ɔchi̍ ɔhrɛ̍ɛpa oo!”

24Ipa̍yi̍lēeti ma̍ bɛ̍ɛ̄nɛ̄ hīka ɔ̍lɔ i̍ hwɔhi la ɔka kpɛɛ gɛ ni̍, nɛ̄ni̍ ɛbɛ ɔ̍lɔ ge̍ē de ti̍ya ē tū. O̍ nāa yenyi na abɔ̄ abɔ̍ɔ la īkprī yī āchɛ ɛla̍ā wa̍a̍, koko̍o de wa̍ hīka, “Ala̍ ma̍ ko̍ō! Abɔ̄ yī u i̍ tū abɔ̍ɔ la ɔpīyaku̍ yī ɔngrɔ̄ɔ nūma̍ ni̍. O̍ hɔ̄ la abɔ̄ yī ala̍ ɛlɛjā.”

25Āchɛ ɛla̍ā hīya anu̍ ɔkɔ hīka ɔ̍lɔ ge̍ ēē! Lɛfiyɛ yī ɔpīyaku̍ yī ɔ̍lɔ ge̍ de jī la lɛhu̍ yī aa̍ ba̍la ayi̍ yī aa̍ gɛ!

26Bɛ̍ɛ̄nɛ̄, Ipa̍yi̍lēeti wā ge̍ wu̍ Ibara̍bāsi ta̍ de wa̍. O̍ ka nīi e̍ gwō Iji̍sɔ̄ɔsi lijē la a̍grɛ̄chi̍. O̍ wa̍ābɔ̄ la anu̍ de wa̍ nīi e̍ ge̍ē bī ɔ̄ ge̍ē gwōba̍ la ɔchi̍ ɔhrɛ̍ɛpa bɛ̍ɛ̄nɛ̄.

Icho̍ojiya ɛla̍ā bī Iji̍sɔ̄ɔsi ya̍

(Ima̍aki 15:16-20; Ijɔ̍ɔn 19:2-3)

27Icho̍ojiya yī Ipa̍yi̍lēeti wā ge̍ bī Iji̍sɔ̄ɔsi pīya ga ipwɔ̍ɔ̄nū bɛ̍ɛ̄nɛ̄. Ribi yī icho̍ojiya ɔla̍ā wa̍a̍ grēeyī tū Iji̍sɔ̄ɔsi. 28E̍ de ɔ̍ āɛ̄jā otūlibi̍īyē yī nū gbawu̍, chōo̍chē nāa aru̍ ɔkwajɛ ɔnɔ̄a̍ ɔha̍ ru ɔ̍. 29E̍ krāa a̍bɔ̄ ɔchi̍ olijīijē de ya̍ ɔjā ɔkla̍lɛhu̍ bāa iyī ɔchwɔ̄lɛ̍ ma̍ ge̍ kla̍ anu̍ lɛhu̍. E̍ de ɔchi̍ ɔkwajɛ tū ɔ̄ la abɔ̄ līre̍. E̍ ē gāa ge̍ē de ūnōowu tū ajɛ ē de ɔ̍ ē bī ɔ̄ ya̍. E̍ da ɔ̍ o̍be hīka, “Gbo̍kɛkɛ Ādā, Ɔchwɔ̄lɛ̍ yī Iju̍u!” 30E̍ ē ta̍arɛ ē kla̍ anu̍. E̍ ē nāa ɔchi̍ ɔla̍ā de ē dra̍ anu̍ lɛhu̍. 31E̍ bī ɔ̄ ya̍ wa̍a̍ kwɛ̍ɛjī ma̍, e̍ de aru̍ ɔkwajɛ ɔla̍ā wu̍ hī ɔ̄, chōo̍chē de iyī anu̍ ɔlɔjā ru ɔ̍. E̍ ta̍ ɔ̄ tɔ̍ɔbū bɛ̍ɛ̄nɛ̄, bī ɔ̄ yɛ gāa ge̍ē gwōba̍ la ɔchi̍ ɔhrɛ̍ɛpa.

E̍ de Iji̍sɔ̄ɔsi gwōba̍ la ɔchi̍ ɔhrɛ̍ɛpa

(Ima̍aki 15:21-32; Ilu̍uku 23:26-43; Ijɔ̍ɔn 19:17-27)

32E̍ yɔ̄yɛ yɛ gāa ma̍, e̍ grāa ɔngrɔ̄ɔ Olisayiri̍in ɔha̍ nīi re̍ka Isa̍yi̍mɔ̄ɔn ma̍. E̍ ku̍ ɔ̄ wɔhu̍-wɔhu̍ nāa ɔchi̍ ɔhrɛ̍ɛpa yī Iji̍sɔ̄ɔsi de ɔ̍ nīi o̍ bī. 33E̍ wā ge̍ gbajɛ la ɛbɛ nīi re̍ka Igo̍li̍gōta ma̍ bɛ̍ɛ̄nɛ̄. Ochi̍chi̍ yī ɔla̍ā re̍ka “Ɛbɛ yī Īkplɛ̄hu̍ Āchɛ.” 34E̍ de ɔjā ɔha̍ nīi lɛ bāa a̍gwɔ̍ɔnɔ ma̍ tū ɛ̍mwɔ̄ de Iji̍sɔ̄ɔsi abɔ̍ɔ ka ɔ̍lɔ ge̍ gwa̍. O̍ de u̍blɛ̍ɛ̄nyī ku ɔ̍ ma̍, o̍ i̍ chɛ̄ gwa̍ ni̍.

35E̍ de Iji̍sɔ̄ɔsi gwōba̍ la ɔchi̍ ɔhrɛ̍ɛpa abɔ̍ɔ bɛ̍ɛ̄nɛ̄. E̍ de āɛ̄jā otūlibi̍īyē yī nū kpo̍ kɔ̄ tū iyī wā. E̍ ta̍ ɔjā ɔha̍ la ajɛ bāa ɛbā ma̍ lɛbɛ ge̍ē je̍ onīi ɔnyɔnyɛ ge̍ē nāa ma̍ o̍bū. 36E̍ kwɛ̍ɛjī la ɔla̍ā wa̍a̍ ma̍, e̍ pīya hyāhɔ̄ abɔ̍ɔ ē gbō ɔ̄ ogbōgbō bɛ̍ɛ̄nɛ̄. 37E̍ ta̍ ɔjā nīi hu̍ nīi e̍ ku̍ ɔ̄ ma̍ gblāa la wāā yī ɛbɛ yī lɛhu̍ yī nū. I̍ngɛ̍ɛ̄nɛ̄ nīi e̍ ta̍ ba̍ a̍nɛ: “IJI̍SƆ̄ƆSI NĪI - ƆCHWƆ̄LƐ̍ YĪ IJU̍U MA̍ HƆ̄ MA̍ A̍NƐ.” 38E̍ de ebu̍ūwī āchɛ ɛpa ɛha̍ gwōba̍ la ɔchi̍ ɔhrɛ̍ɛpa abɔ̍ɔ bla̍a Iji̍sɔ̄ɔsi; ɔha̍ hɔ̄ la wāā yī abɔ̄ līre̍, ɔha̍ hɔ̄ la wāā yī abɔ̄ līfīyē.

39Āchɛ nīi yɛ ē ga la ɔpɔ̄pū ma̍ chɛ̄ lɛhu̍ kpeke̍ekpeke̍e, pra̍a Iji̍sɔ̄ɔsi ɛcha̍. 40E̍ da ɔ̍ hīka, “Je̍ka aa̍ awɔ ge̍ē de u̍nu̍ yī Ɔwɔ ē gbo, ē chōo̍chē de ɔ̍ ē gwo̍ lipu̍ yī ɔ̄chī ɛta̍ a̍nɛ! A ge̍ - Ɔyi̍ yī Ɔwɔ ma̍, hɛ̍ iyī wɔ ta̍ mɛ gɛ/. Hrāajɛ hī ɔchi̍ ɔhrɛ̍ɛpa ɔla̍ā we̍ e̍ē!”

41Alɛhu̍ aligbe ba̍la āchɛ ongū Lihɔ yī Iju̍u ba̍la ɛgabɔ̄ yī Iju̍u titi bī ɔ̄ ya̍ i̍ngi̍ngɔ̍ɔ. 42E̍ ka hīka, “Ala̍ ma̍ gɛ! O̍ ē hɛ̍ āchɛ ehēhī ta̍; o̍ i̍ chī hɛ̍ iyī nū ta̍ mɛ ni̍. I̍ anu̍ - Ɔchwɔ̄lɛ̍ yī Iju̍u a̍ni̍? O̍ ge̍ hrāajɛ hī ɔchi̍ ɔhrɛ̍ɛpa ɔla̍ā wā la ajɛ u̍ma̍ama, alɔ ge̍ē chɛ̄ku ɔ̍. 43O̍ ē de ɔtū che Ɔwɔ ē ka hīka anɔ̍lɔ - Ɔyi̍ yī Ɔwɔ nɛ. Alɔ ā ma̍ we̍ e̍ē hīka Ɔwɔ chikpo̍ ge̍ē hɛ̍ ɔ̄ ta̍?”

44Ebu̍ūwī ɛla̍ā nīi e̍ de wa̍ gwōba̍ la ɔchi̍ ɔhrɛ̍ɛpa abɔ̍ɔ bla̍a Iji̍sɔ̄ɔsi ma̍ titi cha̍ ɔ̄ ɛcha̍ i̍ngi̍ngɔ̍ɔ.

Ɔpīyaku̍ yī Iji̍sɔ̄ɔsi

(Ima̍aki 15:33-41; Ilu̍uku 23:44-49; Ijɔ̍ɔn 19:28-30)

45Yɛ̄grāa nīi yɛnɔ che la yakpalɛ̄hu̍ ma̍, ɔcha ɔla̍ā wa̍a̍ de dobū, i̍ngɔ̍ɔ kpɛɛ la ākārākā ɛta̍. 46Yɛ̄grāa yī oje ɛta̍ yī yɛnɔ bɛ̍ɛ̄nɛ̄, Iji̍sɔ̄ɔsi to̍ohwe̍e gbōō hīka, “E̍li, E̍li lɛma̍ sabakita̍ni?” Ochi̍chi̍ yī ɔla̍ā re̍ka, “Ɔwɔ yī u, Ɔwɔ yī u, oji̍ - ohu̍ nīi a pīya hī u ma̍/?”

47Āchɛ ɛha̍ nīi rɛ abɔ̍ɔ po̍ ma̍ ka hīka ɔ̍lɔ yɛ abɔ̍ɔ ē hī Ɛla̍yi̍ja ɛra̍. 48Ɔha̍ yī wā rɛ̄ɛnya ɔpɔ̄ɔpɛ̄ ge̍ nāa ipu yī owu̍ bī ge̍ ru ɛ̍mwɔ̄ ɔmɔ̍ɔ̄ma̍-mɔ̍ɔ̄ma̍ ɔha̍, de pla̍tū la u̍kpɔ̍chi̍ bī gāa ge̍ pī ɔ̄ nīi o̍ ge̍ē pi ē gwa̍.

49Āchɛ ehēhī ka ɔ̍lɔ ge̍ ehe̍, ɔ̍lɔ ge̍ pi̍ye̍mā o̍bū! Aɛ̍lɛ ge̍ ma̍ gɛ e̍ē ka Ɛla̍yi̍ja ɔ̍lɔ ge̍ē wā ge̍ē hɛ̍ ɔ̍lɔ ē ta̍.

50Iji̍sɔ̄ɔsi gba̍a to̍ohwe̍e ɔpɔ̄ɔpɛ̄ hīyɔtū du̍mɔ̍.

51Yɛ̄grāa ɔla̍ā ɔpɔ̄ɔpɛ̄, ɔ̄pa̍ nīi e̍ de hɛ̍ u̍kwee̍ yī u̍nu̍ yī Ɔwɔ ma̍ ha̍ārɛ̄ ɛpa ke̍e̍ bū la ichō ge̍ chɛ̄ ajɛ. Ajɛ wa̍a̍ he̍ejē wɔhu̍-wɔhu̍. Lɛchɔ̄ yɛ̄mɛ̄mɛ̄ ta̍ āā. 52U̍nwɔ̍wu̍ lwāa ta̍āpāapɛ̄. Āchɛ yī Ɔwɔ nīi pīyaku̍ ma̍ hye̍ēyī la okū yɛ̄mɛ̄mɛ̄. 53E̍ pīya hī u̍nwɔ̍wu̍ wa̍a̍. Iji̍sɔ̄ɔsi hye̍ēyī la okū o̍bū ma̍ nīi e̍ pīya ga Ipwo̍gra Ɔnɛ̄ɛhɛhi ɔla̍ā nīi āchɛ yɛ̄mɛ̄mɛ̄ ma̍ wā abɔ̍ɔ a̍nɛ.

54Ɔlɛhu̍ yī icho̍ojiya ɔla̍ā ba̍la āchɛ yī nū nīi yɛ ē gbō Iji̍sɔ̄ɔsi ma̍, ma̍ ajɛ ohe̍ejē ba̍la lɛlā ɛla̍ā wa̍a̍ nīi ya̍ ma̍, o̍ de ya̍ ɔ̄ uhuhwi. E̍ ka ɔ̍lɔ ge̍ lēchi̍, ɔngrɔ̄ɔ nūma̍ ɔ̍lɔ - Ɔyi̍ yī Ɔwɔ nɛ.

55Anyā ɛha̍ yɛ̄mɛ̄mɛ̄ gblāa abɔ̍ɔ hwɛɛ ē deyīrɛ wā abɔ̍ɔ. Aa̍ ku Iji̍sɔ̄ɔsi bū la Iga̍līli, yɛ ē chrāa anu̍ ɛrɔ̄ a̍nɛ. 56Ɛha̍ yī wā re̍ka Imeri̍ Oyo̍olima̍gīdala ba̍la Imeri̍ nīi - ɛ̍nɛ̍ yī Ije̍mēehi ba̍la Ijo̍sɛ̄ɛfu ma̍ ba̍la ɛ̍nɛ̍ yī ayi̍ anāngrɔ̄ɔ āchɛ ɛpa nīi - ayi̍ yī Ijɛ̍bɛ̄di ma̍.

Onyōnyi yī Iji̍sɔ̄ɔsi

(Ima̍aki 15:42-47; Ilu̍uku 23:50-56; Ijɔ̍ɔn 19:38-42)

57Ɔ̄nɛ̄ de gbo ma̍, ɔlwɔdu ɔha̍ nīi re̍ka Ijo̍sɛ̄ɛfu bū la ipwo̍gra yī Arīmati̍ya ma̍ wā abɔ̍ɔ. Anu̍ titi - a̍chi̍kpo̍ yī Iji̍sɔ̄ɔsi nɛ. 58Ijo̍sɛ̄ɛfu nūma̍ pīya ga ɛbɛ yī Ipa̍yi̍lēeti ge̍ ra̍ābɔ̄ de ɔ̍ ka anɔ̍lɔ ge̍ē nāa okū yī Iji̍sɔ̄ɔsi. Ipa̍yi̍lēeti chɛ̄ hīka ɛ̍lɛ ge̍ de okū de Ijo̍sɛ̄ɛfu. 59Ijo̍sɛ̄ɛfu de okū nāa bɛ̍ɛ̄nɛ̄. O̍ de ābāchā onīpīpɛ̄ mi̍ya anu̍ gblɛ̍ɛgblɛ̍ɛgblɛ̍ɛ. 60O̍ de okū yī Iji̍sɔ̄ɔsi nāa ge̍ gbo la wɔ̄gɔ̄ yī u̍nwɔ̍wu̍ yī anu̍ ɔlɔjā nīi o̍ e̍e bōbu īpīpɛ̄ lipu̍ yī lɛchɔ̄ ma̍. O̍ mi̍ya lɛchɔ̄ ɔnɔ̄kɔ̄kū ɔha̍ gū oko̍o yī wɔ̄gɔ̄ ɔla̍ā bɛ̍ɛ̄nɛ̄ ma̍, o̍ wā ge̍ ku̍ pīya. 61Imeri̍ Oyo̍olima̍gīdala ba̍la Imeri̍ ɔ̍mɛpa gblāa abɔ̍ɔ, hyāhɔ̄ pīyeyīta̍ wā abɔ̍ɔ la ɛbɛ yī u̍nwɔ̍wu̍ ɔla̍ā.

E̍ hu āchɛ gbō u̍nwɔ̍wu̍ yī Iji̍sɔ̄ɔsi

62La ɔ̄chī ɔ̍mɛpa nīi lā che Ɔ̄chī Oti̍bi̍īyē Chɛ̄ ɔla̍ā ma̍, alɛhu̍ aligbe ba̍la Āchɛ yī Ifa̍rasīi pīya dikpo̍ba̍ Ipa̍yi̍lēeti. 63E̍ ka de Ipa̍yi̍lēeti hīka, “Ādā be̍e! Alɔ lɛ ɔbɔ̄bla u̍ma̍ama hīka, yɛ̄grāa nīi ɔlarīmɛ̄ ɔla̍ā e̍e hɔ̄leyī ma̍, o̍ ka hīka anɔ̍lɔ ge̍ē hye̍ēyī la okū la ɔ̄chī ɔmɛta̍. 64O̍ lɛ i̍ngɔ̍ɔ ma̍, ka gɛ hɛ̄ɛbɛ nīi e̍ ge̍ gbō u̍nwɔ̍wu̍ ɔla̍ā kpɛɛ gbo̍ ɔ̄chī ɔmɛta̍, hɛ̄ɛbɛ nīi a̍chi̍kpo̍ yī nū ge̍ e̍e gāa ge̍ de okū yī nū nāa la uwī ni̍; nɛ̄ni̍ e̍ ge̍ē ka ē de āchɛ ka ɔ̍lɔ hye̍ēyī la okū ke̍e̍ mɛ̍. Bū la ɛbɛ ɔla̍ā, arīmɛ̄ ogwīihi nūma̍ ge̍ē re̍ka ɔdwɔ̄bi̍ ɔdwɔnyɛ yī ɔrāarāa.”

65Ipa̍yi̍lēeti hīya aa̍ ɔkɔ hīka, ɛ̍lɛ ɛlɛjā ɛ̍lɛ ge̍ nāa āchɛ ɔgbɛ̄ɛbɛ gɛ nīi ɛ̍lɛ ge̍ gbō ɔ̍lɔ lɔkɔ nīi ɔ̍lɔ hi ɛ̍lɛ ɔtū ma̍.

66E̍ wā ge̍ pīya bɛ̍ɛ̄nɛ̄ gāa ge̍ de ɔjāha̍-ɔjāha̍ wa̍a̍ ya̍ i̍ngɔ̍ɔ hwɔhi hwɔhi. E̍ de lɛchɔ̄ yī oko̍o yī wɔ̄gɔ̄ ɔla̍ā gū hwɔhi hwɔhi de ɔ̍ hukɔ̄. E̍ gba̍a de āchɛ gbō ɔ̄.

Currently Selected:

Ima̍tiyu 27: YBASR

Highlight

Copy