U̍ku̍rɔ̍ yī Alɛrɔ̄ 11
11
Lɛlā nīi Ipi̍ta koko̍o de Ogrēeyī yī āchɛ yī Ɔwɔ la Ijɛru̍sālɛm ma̍
1Āchɛ yī Ikra̍yisi nīi gblāa la ajɛ yī Ijudi̍ya ma̍ ba̍la alɛrɔ̄ yī Iji̍sɔ̄ɔsi wa̍a̍ po̍ hīka Ɛchɛkɔcha ɔ̍lɔ nāa lɛlā yī Ɔwɔ mɛ̍. 2Ipi̍ta cha ga Ijɛru̍sālɛm ma̍, āchɛ ɛha̍ ya̍ ɔ̄ la oko̍o. Āchɛ nīi ka ɛ̍lɛ ge̍ ta̍ Ɛchɛkɔcha wɔwu̍ pi̍i̍ o̍bū ma̍ nɛ. 3E̍ ka ɔ̍lɔ ge̍ yii̍s! Ɔ̍lɔ gāa ge̍ tū wɔga la wɔlɛ̍ yī Ɛchɛkɔcha i̍twɔ̍wu̍ ni̍! Ɔ̍lɔ nōnuni̍ tābɔ̄ yī ojōre̍ tāa ɛ̍lɛ! 4Wu̍chē yī ɔla̍ā, Ipi̍ta koko̍o yī lɛlā ɔla̍ā wa̍a̍ bū la owu̍tu de wa̍:
5“N kū yɛ ē jɔhā abɔ̍ɔ la ipwo̍gra yī Ijɔ̍pa i̍chi̍chɛ ɔha̍ ma̍, n myɛ̍ma̍ ɔlɛbɛ̍bi̍ ɔha̍ bāa wɔ̄na ma̍. N ma̍ ɔjā ɔha̍ lɛ bāa ukuru yī ɔ̄pa̍ ma̍ nīi orī tū ɔ̄ la ɛ̍ngɔ̍ ɛnɛnɛ yɛ ē wā la ajɛ. O̍ wā ge̍ lā bla̍a ami. 6N gbeyīchi̍i̍ ma̍ lipu̍ yī nū ma̍, n ma̍ ɛbɛ̍wɔ̄lɛ̍, ba̍la ɛbɛ̍la̍chi̍, ba̍la a̍gba̍ana ba̍la ɛjāajɛ nīi ē pōpi wa̍a̍ ma̍ mwɛbɛ abɔ̍ɔ la anu̍. 7N po̍ ɔkɔlɛ̄lā ɔha̍ nīi da um bɛ̍ɛ̄nɛ̄ hīka, ‘Ipi̍ta! Nīichō nīi a ā ngmo̍ re̍ gɛ!’ 8N hīya anu̍ ɔkɔ hīka, ‘Īchāha̍ īchāha̍, Ādā! Ɔjā oli̍hi̍hi̍ya̍ ba̍la ɔjā yī lɛbi̍ eli̍ngɔ̍ɔ, ami i̍ de oko̍o tū ɔ̄ je̍ ni̍ oo!’ 9Ɔkɔlɛ̄lā ɔla̍ā gba̍a ka bū la ichō hīka, ‘Ɔjā nīi Ɔwɔ de ka hīka ɔ̍lɔ lɛ cha̍ri̍cha̍ri̍ ma̍, a ā gbɛri̍ya̍ hīka ɔ̍lɔ li̍hi̍hi̍ya̍ ni̍.’ 10Lɛlā nūma̍ ya̍ i̍ngɔ̍ɔ igbɛta̍; o̍bū nīi e̍ de ɔ̍ pi pīya yī ichō. 11Yɛ̄grāa ɔla̍ā pi̍i̍, āchɛ ɛta̍ gbajɛ wā abɔ̍ɔ la wɔlɛ̍ nīi n tū wɔga ma̍. E̍ tū wā ɛrɔ̄ hu u bū la Isi̍sari̍ya. 12Uhu yī Ɔwɔ ka amɔ̍lɔ ge̍ pīya gāa ba̍la ɛ̍lɛ. Amɔ̍lɔ ge̍ e̍e gbɛri̍ya̍ hīka i̍ngɛ̍ɛ̄nɛ̄ nɛ, i̍ngɛ̍ɛ̄nɛ̄ nɛ ni̍. Aɛ̍nɛ̍ yī alɔ āchɛ erīiyī nūma̍ nīi bū la Ijɔ̍pa ma̍ bī u ɔtū ga Isi̍sari̍ya a̍nɛ. Alɔ wā ge̍ chɛ̄ ga wɔlɛ̍ yī Ikɔnɛ̍līyusi bɛ̍ɛ̄nɛ̄. 13O̍ koko̍o de alɔ lɔkɔ nīi o̍ ma̍ ɔyɛ̍ɛ̄chɛ̄rɔ̄ yī Ɔwɔ rɛ abɔ̍ɔ la u̍nu̍ yī nū, lɔkɔ nīi ɔyɛ̍ɛ̄chɛ̄rɔ̄ yī Ɔwɔ ka de ɔ̍ wa̍a̍ ma̍: ɔ̍lɔ ka anɔ̍lɔ ge̍ de ɔ̄chɛ tɛ̄rɔ̄ ga Ijɔ̍pa, gāa ge̍ hī Isa̍yi̍mɔ̄ɔn nīi - ɔ̍lɔ re̍ka Ipi̍ta ma̍ ɛra̍ wā. 14Bū la lɛlā nīi Ipi̍ta ɔ̍lɔ ge̍ē ka ma̍ nīi anu̍ ba̍la alwɔlɛ̍ yī anu̍ ɔ̍lɔ ge̍ē lɛ ɔhɛ̍ta̍ a̍nɛ. 15N kū lɛlā la ɔkɔ̄ka de wa̍ bɛ̍ɛ̄nɛ̄ ma̍, Uhu Ɔnɛ̄ɛhɛhi yī Ɔwɔ wā dikpo̍ba̍ wā lɔkɔ nīi iyī alɔ lɛ la owu̍tu ma̍. 16N wā ge̍ bla lɛlā nīi Ādā ɔlɔjā ka ma̍ bɛ̍ɛ̄nɛ̄, ‘Ijɔ̍ɔn ē hu yenyi la yenyi yī ɔkpa̍ ɔlamu. Ala̍ ma̍ ge̍ē hu yenyi la Uhu Ɔnɛ̄ɛhɛhi yī Ɔwɔ.’ 17O̍ lā nyaa hīka, ɔjā ɔnɛ̄ɛhɛhi ɔla̍ā nīi Ɔwɔ kɔ̄ de alɔ yɛ̄grāa nīi alɔ chɛ̄ku Ādā Iji̍sɔ̄ɔsi Ikra̍yisi ma̍, ana̍nu̍ nīi o̍ kɔ̄ de Ɛchɛkɔcha ɛla̍ā a̍nɛ. Ami chī - ɔ̄nyɛ nɛ nīi n ge̍ē ku̍ Ɔwɔ chi̍yɛ ma̍?”
18E̍ plɛ̍ɛ̄lā yī Ipi̍ta nūma̍ ma̍, e̍ i̍ ya̍ ɔ̄ la oko̍o gɛ ni̍. Aa̍ wa̍a̍ kā Ɔwɔ ɔkɔ̄kā bɛ̍ɛ̄nɛ̄ hīka, Ɔwɔ ɔ̍lɔ kɔ̄ ɔpɔ̄pū ta̍ de Ɛchɛkɔcha nīi ɛ̍lɛ ge̍ pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ ge̍ē de ē wōwi mɛ̍.
Ogrēeyī yī āchɛ yī Ɔwɔ abɔ̍ɔ la A̍ntīyɔ̄ɔki
19Āchɛ yī Ikra̍yisi yɛ̄mɛ̄mɛ̄ mīyanya wu̍chē yī ichi̍ ɔdwɔ̄bi̍ ɔla̍ā nīi e̍ de Isiti̍bīin ngmo̍ la anu̍ ma̍. Āchɛ ɛha̍ yī wā yɛ hwɛɛ ga ɛbɛ bāa Ifoni̍siya, ba̍la Isa̍yi̍prɔ̄ɔsi ba̍la A̍ntīyɔ̄ɔki ma̍. E̍ ē ka ɛrɔ̄ yī Ɔwɔ ē de āchɛ nīi - Iju̍u ma̍ ke̍e̍. 20Āchɛ ɛha̍ yī wā - Alisa̍yi̍prɔ̄ɔsi ba̍la Alisayiri̍in nɛ. Aa̍ ma̍ ga A̍ntīyɔ̄ɔki ge̍ ka ɛrɔ̄ yī Ɔwɔ de Ɛchɛkɔcha i̍ngi̍ngɔ̍ɔ. Wɔ̄kā Ɔlwɔnyɛ yī Ādā Iji̍sɔ̄ɔsi nīi e̍ ē ka a̍nɛ. 21Wɔhu̍ yī Ādā ɔlɔjā hɔ̄ abɔ̍ɔ tāa aa̍. Āchɛ lyɛ̄mɛ̄ kpɛ̍ɛ nīi chɛ̄ku Ādā, pīya ūkpɔ̄tū yī wā kɔ̍ ɔ̄ ma̍.
22Ohu yī lɛlā nūma̍ gbajɛ ga ogrēeyī yī āchɛ yī Ɔwɔ la Ijɛru̍sālɛm ɔpɔ̄ɔpɛ̄. Wu̍chē yī ɔla̍ā, e̍ de Iba̍nābasi tɛ̄rɔ̄ ga A̍ntīyɔ̄ɔki bɛ̍ɛ̄nɛ̄. 23O̍ gbajɛ gāa ma̍, o̍ ma̍ hīka Ɔwɔ ɔ̍lɔ de ɔpiyɛ kla̍ ɛ̍lɛ lēchi̍ lēchi̍. O̍ lɛ ɔwɔ̄wīyā kpɛ̍ɛji. O̍ mla aa̍ ɔtū, ra̍ābɔ̄ de wa̍ ka ɛ̍lɛ ge̍ yɛ hwɔhi hwɔhi ba̍la Ādā la ūkpɔ̄tū yī ɛ̍lɛ wa̍a̍. 24Iba̍nābasi - ɔ̄chɛ ɔnɛ̄ɛhɛhi nɛ. Uhu Ɔnɛ̄ɛhɛhi yī Ɔwɔ mu ɔ̍ ibi̍īyē omōmu; o̍ de ɔtū che Ɔwɔ brii. Āchɛ yɛ̄mɛ̄mɛ̄ pīya tū tāa Ādā abɔ̍ɔ.
25Iba̍nābasi wā ge̍ pīya bɛ̍ɛ̄nɛ̄ ga Ita̍susi ge̍ gāla̍ Isɔ̍ɔli. 26O̍ ma̍ ɔ̄ ma̍, o̍ bī ɔ̄ wā la A̍ntīyɔ̄ɔki. Lipu̍ yī lɛ̍yi̍ ligbo̍ ligbo̍, aa̍ āchɛ ɛpɛpa ē gāa ge̍ē hɔ̄ abɔ̍ɔ ba̍la alogrēeyī yī āchɛ yī Ɔwɔ. Āchɛ ē mwɛbɛ kpɛ̍ɛji nīi e̍ ē ngū wā lɛlā ma̍. Abɔ̍ɔ la A̍ntīyɔ̄ɔki ɔla̍ā nīi e̍ hī a̍chi̍kpo̍ yī Iji̍sɔ̄ɔsi hīka “Āchɛ yī Ikra̍yisi” yɔbɔ̄ɔbū a̍nɛ.
27Yɛ̄grāa ɔla̍ā, āchɛ ɛha̍ nīi - āchɛ ɔkɛrɔ̄ yī Ɔwɔ ma̍ pīya bū la Ijɛru̍sālɛm ga A̍ntīyɔ̄ɔki. 28Ɔha̍ yī wā nīi re̍ka A̍gābusi ma̍ nīichō yarɛ mwɔ̍ɔmu bū la wɔhu̍ yī Uhu yī Ɔwɔ hīka, lɛmiyɛ ɔdwɔ̄bi̍ gba̍a ɔ̍lɔ yɛ abɔ̍ɔ ge̍ē ya̍ la ajɛ yī ɛbɛ ɔla̍ā wa̍a̍. Lɛmiyɛ ya̍ i̍ngɔ̍ɔ ichɛ̄ɛhi yɛ̄grāa ɔla̍ā nīi Ikla̍dīyusi re̍ka ɔchwɔ̄lɛ̍ ma̍. 29A̍chi̍kpo̍ yī Iji̍sɔ̄ɔsi ɛla̍ā wa̍a̍ miya hīka aɛ̍lɛ ge̍ē da ɔjā ɔdɔ̄da ē tɛ̄rɔ̄ hu āchɛ yī Ikra̍yisi nīi gblāa la Ijudi̍ya ma̍. 30E̍ ya̍ i̍ngɔ̍ɔ ichɛ̄ɛhi, de tɛ̄rɔ̄ gala abɔ̄ yī Iba̍nābasi ba̍la Isɔ̍ɔli hu ɛgabɔ̄ yī ogrēeyī yī āchɛ yī Ɔwɔ la Ijudi̍ya.
Currently Selected:
U̍ku̍rɔ̍ yī Alɛrɔ̄ 11: YBASR
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)
