Ijɔ̍ɔn 7

Iji̍sɔ̄ɔsi ba̍la aɛ̍nɛ̍ yī nū

1La okwi̍ihi yī ɔla̍ā, Iji̍sɔ̄ɔsi hɔ̄ aba̍bɔ̍ɔ la ajɛ yī Iga̍līli bɛ̍ɛ̄nɛ̄. O̍ i̍ chikpo̍ ge̍ē hɔ̄ la ajɛ yī Ijudi̍ya ē gɛ ni̍. Wu̍chē oji̍ nɛ, alɛhu̍ yī Iju̍u yɛ ē chikpo̍ ge̍ē de ɔ̍ ē ngmo̍ abɔ̍ɔ. 2Yɛ̄grāa yī ɔwɔ̄wīyā ɔha̍ nīi Iju̍u ē ya̍ Ɔbɔ̄bla yī Otū La A̍ywɔ̍da̍ ma̍ wā ge̍ de hōhī kurɛkurɛ bɛ̍ɛ̄nɛ̄. 3Aɛ̍nɛ̍ yī Iji̍sɔ̄ɔsi da ɔ̍ bɛ̍ɛ̄nɛ̄ hīka, “A i̍ ē pīya ē hī ɛbɛ nūma̍ ē gāa ajɛ yī Ijudi̍ya, hɛ̄ɛbɛ nīi a̍chi̍kpo̍ yī wɔ ē ma̍ u̍ku̍rɔ̍ nīi a yɛ ma̍ ē ya̍ ma̍ ni̍? 4Ɔ̄chɛ ge̍ chikpo̍ nīi āchɛ wa̍a̍ ge̍ē je̍ ɔ̄, o̍ i̍ ē de lɛlā nīi o̍ yɛ ē ya̍ ma̍ ē trɛ̍ba ni̍. Lɛlā nūma̍ wa̍a̍ nīi a yɛ ma̍ ē ya̍ ma̍, gāa ge̍ ya̍ abɔ̍ɔ lɛbɛ nīi yɛchɛ wa̍a̍ ge̍ jo̍ōkū yī wɔ.” 5Aɛ̍nɛ̍ yī nū titi i̍ gba̍a chɛ̄ku ɔ̍ ni̍.

6Iji̍sɔ̄ɔsi da aɛ̍nɛ̍ yī nū ɛla̍ā hīka, “Ala̍ ma̍ ko̍ō! Yɛ̄grāa yī u kpakpa i̍ gbajɛ we̍ ni̍. Ala̍ ma̍, yɛ̄grāa ɔha̍lɔha̍ ku de ala̍. 7Ala̍ ma̍ i̍ ta̍ yɛchɛ anyī ni̍. Ami ma̍, n ta̍ yɛchɛ anyī. Wu̍chē oji̍ nɛ, n ē ka ē tāa anu̍ myɛ̄grāa-myɛ̄grāa hīka ɔpɔ̄pū yī lɛlā yī nū hwɔhi ni̍. 8Ala̍ gāa ga ɔwɔ̄wīyā ɔla̍ā gɛ. Ami ma̍, n i̍ yɛ gāa ni̍. Wu̍chē oji̍ nɛ, yɛ̄grāa yī u kpakpa i̍ gbajɛ we̍ ni̍.” 9Iji̍sɔ̄ɔsi ka i̍ngɔ̍ɔ ma̍, o̍ pīya hɔ̄ aba̍bɔ̍ɔ la Iga̍līli kpɔ̍ɔ̍.

Iji̍sɔ̄ɔsi ga Ijɛru̍sālɛm la ɔwɔ̄wīyā ɔla̍ā.

10Aɛ̍nɛ̍ yī Iji̍sɔ̄ɔsi wā ge̍ pīya yī Ijɛru̍sālɛm la ɔwɔ̄wīyā ɔla̍ā ma̍, Iji̍sɔ̄ɔsi titi wā ge̍ pīya gānyɔ̄. O̍ yɛ fi̍yɛ̍-fi̍yɛ̍; o̍ i̍ chɛ̄ nīi ɔ̄chɔ̄chɛ jo̍ōkū tū ɔ̄ ni̍. 11Alɛhu̍ yī Iju̍u wa̍a̍ gblāa abɔ̍ɔ ē gāla̍ ɔ̄ yɛ̄grāa nīi e̍ yɛ ē ya̍ ɔwɔ̄wīyā ɔla̍ā ma̍. E̍ ē che iyī wā ikpo̍ ka ɔ̍lɔ hɔ̄ aba̍ ma̍/?

12Āchɛ yɛ̄mɛ̄mɛ̄ gblāa abɔ̍ɔ ē kɛlā ku̍ ɔ̄ ya̍cha̍cha̍ ē de iyī wā. Āchɛ ɛha̍ ka ɔ̍lɔ - ɔ̄chɛ ɔnɛ̄ɛhɛhi nɛ. Ɛha̍ ka ɔ̍lɔ ge̍ aba̍! I̍bobo nīi ɔ̍lɔ ē gwō tū āchɛ a̍nɛ. 13Ɔ̄chɔ̄chɛ i̍ chī bɔ̍ɔ̄tū ka hwōō la ɔgbādu ni̍; wu̍chē oji̍ nɛ, e̍ yɛ ē tūuhwi yī alɛhu̍ yī Iju̍u.

14Yɛ̄grāa yī ɔwɔ̄wīyā ɔla̍ā de hōhī pi̍nyɛ̍ nīi o̍ ge̍ kwɛ̍ɛjī o̍bū nīi Iji̍sɔ̄ɔsi ga u̍nu̍ yī Ɔwɔ ge̍ ngū āchɛ lɛlā a̍nɛ. 15O̍ de ya̍ alɛhu̍ yī Iju̍u lɛbɛ̍bi̍ ɔlamu-ɔlamu ma̍, e̍ ka hīka, kana̍ nīi ɔngrɔ̄ɔ nūma̍ ɔ̍lɔ je̍ ɔjā i̍ngɔ̍ɔ ma̍/? Ɔ̍lɔ i̍ chī ga īpū je̍ ni̍?

16Iji̍sɔ̄ɔsi hīya aa̍ ɔkɔ bɛ̍ɛ̄nɛ̄ hīka, “Ala̍ ma̍ gɛ ko̍ō! Lɛlā nīi n ē ngū āchɛ ma̍, i̍ lɛlā yī ami ɔlɔjā ni̍. O̍ bū la abɔ̄ yī Ɔwɔ nīi de u tɛ̄rɔ̄ ma̍. 17Ɔ̄chɛ nīi ge̍ chikpo̍ ge̍ē ya̍ ɔjā nīi Ɔwɔ chikpo̍ ma̍, ɔlɔjā ge̍ē jo̍ōkū yī lɛlā nīi n ē ngū āchɛ ma̍ ɔpɔ̄ɔpɛ̄! O̍ ge̍ē jo̍ōkū hīka ɔ̍lɔ bū la abɔ̄ yī Ɔwɔ kɛ̄ɛ ɔ̍lɔ - lɛlā yī amɔ̍lɔ ɔlɔjā nīi amɔ̍lɔ ē ka a̍nɛ. 18Ɔ̄chɛ nīi ē koko̍o yī lɛlā yī anu̍ ɔlɔjā ma̍, otūlichō yī anu̍ ɔlɔjā nīi o̍ ē gāla̍ a̍nɛ. Ɔ̄chɛ nīi yɛ ē chikpo̍ yī otūlichō yī ɔ̄chɛ nīi de ɔ̍ tɛ̄rɔ̄ ma̍, anu̍ - ɔ̄chɛ ɔka lɛlā lēchi̍ lēchi̍ a̍nɛ. Arīmɛ̄ ɔha̍lɔha̍ i̍ ē hɔ̄ la ibi̍īyē yī nū ni̍. 19Je̍ka aa̍ ala̍ nīi Imo̍sīisi de Lihɔ ɔla̍ā de ala̍ a̍nɛ? Ɔ̄chɔ̄chɛ lipu̍ yī ala̍ i̍ chī de Lihɔ yī Imo̍sīisi ɔ̍lɔma̍ gbō mɛ ni̍. Nɛ̄ni̍, oji̍ - ohu̍ nīi ala̍ yɛ ē chikpo̍ ge̍ē de u ē ngmo̍ ma̍?”

20Alɔgbādu ɛla̍ā wa̍a̍ hīyɔkɔ hīka ɔ̍lɔ ge̍ o̍ō! Ɔngrɔ̄ɔ nūma̍ ɔ̍lɔ ē ku̍ yapri̍ija? Ɔ̄nyɛ ɔ̍lɔ yɛ amu ē chikpo̍ ge̍ē ngmo̍ ɔ̍lɔ ma̍?

21Iji̍sɔ̄ɔsi gba̍a ka de wa̍ hīka, “Ala̍ ma̍ gɛ! U̍ku̍rɔ̍ ɔlɛbɛ̍bi̍ ūkpo̍he nīi n ya̍ ma̍ chī de ya̍ ala̍ lɛbɛ̍bi̍ wa̍a̍ mɛ̍. 22Imo̍sīisi ka hīka ala̍ ɔ̍lɔ ge̍ ta̍ ayi̍ yī ala̍ anāngrɔ̄ɔ wɔwu̍. Lɛlā ɔla̍ā i̍ wu̍tu bū la abɔ̄ yī Imo̍sīisi ni̍; o̍ bū la abɔ̄ yī aa̍ a̍dɔ̄kū yī ala̍. Je̍ka aa̍ ala̍ ē ta̍ ayi̍ yī ala̍ wɔwu̍ la Ɔ̄chī Ɔmyɛ̍nyɛ̍? 23Ala̍ ge̍ ta̍ ayi̍ wɔwu̍ la Ɔ̄chī Ɔmyɛ̍nyɛ̍ nīi Lihɔ yī Imo̍sīisi i̍ bīya ni̍, oji̍ - ohu̍ nīi ala̍ ē ya̍ ɔtū ngurangura ē tāa ami wu̍chē yī ɔngrɔ̄ɔ nīi n ya̍ nīi o̍ de lɛ cha̍cha̍ gɔ̄grāa la Ɔ̄chī Ɔmyɛ̍nyɛ̍ ma̍? 24Ala̍ e̍e hlɛ̍ɛ̄pɔ̄ ji lɔkɔ nīi ala̍ ma̍ lɛlā yɛchɛchɛ yī nū ma̍ ni̍. Ala̍ ā hlɛ̍ɛ̄pɔ̄ lɔkɔ nīi lɛlā lɛ kpakpa ma̍.”

Anu̍ - Ɔhɔ̍ɔnyɛta̍ nīi Ɔwɔ hōhu a̍nɛ?

25Alijɛru̍sālɛm ɛha̍ ka bɛ̍ɛ̄nɛ̄ hīka, “I̍ ɔngrɔ̄ɔ nūma̍ nīi e̍ yɛ ē chikpo̍ ge̍ē ngmo̍ ɔ̄ a̍ni̍? 26Mɔ̍ɔkɔ nīi o̍ chī rɛ ma̍ la ɔgbādu ē kɛlā da̍a̍ gɛ! Ɔ̄chɔ̄chɛ i̍ chī ya̍ ɔ̄ ka be̍e gɛ ni̍! Kɛ̄ɛ alɛhu̍ ɛlɛjā ka̍a de jo̍ōkū mɛ̍ hīka ɔ̍lɔ Ɔhɔ̍ɔnyɛta̍ Nīi Ɔwɔ Ɔ̍lɔ Hōhu Ma̍ a̍nɛ oo? 27Alɔ wa̍a̍ ma̍ chī je̍ ɛbɛ nīi ɔngrɔ̄ɔ nūma̍ bū ma̍! Ɔhɔ̍ɔnyɛta̍ Nīi Ɔwɔ Hōhu Ma̍ ge̍ē wā ma̍, ɔ̄chɔ̄chɛ i̍ ge̍ē je̍ ɛbɛ nīi o̍ bū ma̍ ni̍!”

28Iji̍sɔ̄ɔsi yɛ ē ngū āchɛ lɛlā abɔ̍ɔ la u̍nu̍ yī Ɔwɔ bɛ̍ɛ̄nɛ̄ ma̍, o̍ tɔ̍ɔna koko̍o de wa̍ hīka, “Lēchi̍ nɛ, ala̍ je̍ u. Ala̍ gba̍a je̍ ɛbɛ nīi n bū ma̍. N i̍ chī wā wɔ̄bɔ̄bɔ̄ yī u ni̍. Ɔ̄chɛ nīi de u tɛ̄rɔ̄ ma̍ - ɔ̄chɛ olēchi̍ lēchi̍ nɛ. Ala̍ ma̍ i̍ je̍ ɔ̄ ni̍. 29Ami je̍ ɔ̄. Wu̍chē oji̍ nɛ, n bū la abɔ̄ yī nū. Anu̍ de u tɛ̄rɔ̄ a̍nɛ.”

30Bū la ɛbɛ ɔla̍ā, aa̍ wa̍a̍ kū yɛ ge̍ē de ɔ̍ ē ku̍. Ɔ̄chɔ̄chɛ i̍ ku̍ ɔ̄ mɛ ni̍, wu̍chē lɔkɔ nīi yɛ̄grāa ɔ̍lɔma̍ i̍ gbajɛ we̍ ni̍ ma̍. 31Āchɛ yɛ̄mɛ̄mɛ̄ abɔ̍ɔ lipu̍ yī ɔgbādu ɔla̍ā chɛ̄ku ɔ̍. E̍ ka hīka Ɔhɔ̍ɔnyɛta̍ Nīi Ɔwɔ Ɔ̍lɔ Hōhu Ma̍ ɔ̍lɔ ge̍ wā ma̍, re̍ka ɔ̍lɔ ge̍ē ya̍ u̍ku̍rɔ̍ ɔlɛbɛ̍bi̍ ē hi̍ onūma̍ wa̍a̍ nīi ɔngrɔ̄ɔ nūma̍ ɔ̍lɔ yɛ ma̍ ē ya̍ ma̍ ē mɛ u̍uma?

E̍ de āchɛ ɔgbɛ̄ɛbɛ tɛ̄rɔ̄ wā ge̍ē ku̍ Iji̍sɔ̄ɔsi

32Āchɛ yī Ifa̍rasīi po̍ i̍ngwrī yī lɛlā nūma̍ wa̍a̍ nīi āchɛ yɛ ē ka ē ku̍ Iji̍sɔ̄ɔsi ma̍. Wu̍chē yī ɔla̍ā, aa̍ ba̍la alɛhu̍ aligbe de āchɛ ɔgbɛ̄ɛbɛ tɛ̄rɔ̄ wā ge̍ē ku̍ Iji̍sɔ̄ɔsi. 33Iji̍sɔ̄ɔsi yɛ ē koko̍o ē de āchɛ hīka, “Ala̍ ma̍ gɛ ko̍ō! N ge̍ē hɔ̄ amu ba̍la ala̍ yɛ̄grāa ɔha̍ pi̍nyɛ̍ o̍bū nīi n ē pīya ē dikpo̍ba̍ ɔ̄chɛ nīi de u tɛ̄rɔ̄ ma̍. 34Ala̍ ge̍ē gāla̍ u; ala̍ i̍ chī ge̍ē ma̍ u ni̍. Wu̍chē oji̍ nɛ, ɛbɛ nīi n ge̍ē hɔ̄ ma̍, ala̍ i̍ ge̍ē wā abɔ̍ɔ ē mɛ ni̍.”

35Alɛhu̍ yī Iju̍u gblāa abɔ̍ɔ ē che iyī wā ikpo̍ bɛ̍ɛ̄nɛ̄ hīka, “Aba̍ kpa̍a nīi ɔngrɔ̄ɔ nūma̍ u̍tu yɛ gāa nīi alɔ i̍ ge̍ē ma̍ ɔ̄ gɛ ni̍ ma̍/? Ɔla̍ā ma̍, o̍ ge̍ē pɔ̄pīya ē gāa ɔcha yī Igri̍iki ɛha̍ nīi Iju̍u ē gblāa ma̍ ge̍ē hɔ̄ abɔ̍ɔ ē ngū āchɛ yī Igri̍iki lɛlā kɛ̄ɛ? 36Nɛ̄ni̍, oji̍ - ochi̍chi̍ yī lɛlā nūma̍ nīi o̍ ē ka ma̍? Aɛ̍lɛ ge̍ē gāla̍ anu̍, aɛ̍lɛ i̍ chī ge̍ē ma̍ anu̍ ni̍! Ɛbɛ nīi anɔ̍lɔ ge̍ē hɔ̄ ma̍, aɛ̍lɛ i̍ ge̍ē wā mɛ ni̍!”

Yenyi yī ɔhɔ̄leyī

37I̍chi̍chɛ nīi ɔwɔ̄wīyā ɔla̍ā ge̍ē chlɛhu̍ ma̍, anu̍ kpɛ̍ɛ - ɔ̄chī ɔlamu-ɔlamu gɔ̄ga a̍nɛ. I̍chi̍chɛ ɔla̍ā, Iji̍sɔ̄ɔsi nīichō yarɛ tɔ̍ɔna koko̍o de āchɛ hīka, “Ɔ̄chɛ nīi ge̍ ku̍ odīyenyi, ɔlɔjā ge̍ yewā dikpo̍ba̍ u ge̍ gwa̍ yenyi. 38Wu̍chē oji̍ nɛ, Īpū yī Ɔwɔ ka i̍ngɔ̍ɔ hīka, ‘Ɔ̄chɛ nīi ge̍ chɛ̄ku u, yenyi yī ɔhɔ̄leyī ge̍ē pɔ̍ɔ̄pɛ̍ ē bū la ūkpɔ̄tū yī ɔlɔjā.’ ” 39Lɛlā yī Uhu yī Ɔwɔ nīi āchɛ nīi chɛ̄ku ɔ̍ ma̍ ge̍ē nāa ma̍ nīi Iji̍sɔ̄ɔsi yɛ ē ka a̍nɛ. Wu̍chē oji̍ nɛ, yɛ̄grāa ɔla̍ā, o̍ i̍ de Uhu yī Ɔwɔ de wa̍ we̍ ni̍. Wu̍chē lɔkɔ nīi Iji̍sɔ̄ɔsi i̍ hye̍ēyī la okū wā rīgā yī nū we̍ ni̍ ma̍.

Āchɛ de iyī wā yi̍ya

40Āchɛ yɛ̄mɛ̄mɛ̄ abɔ̍ɔ lipu̍ yī ɔgbādu ɔla̍ā plɛ̍ɛ̄lā ɔla̍ā ma̍, e̍ ka hīka ɔ̍lɔ ge̍ lēchi̍, ɔngrɔ̄ɔ nūma̍ ɔ̍lɔ - Ɔ̄chɛ Ɔkɛrɔ̄ yī Ɔwɔ nɛ.

41Ɛha̍ ka hīka ɔ̍lɔ - Ɔhɔ̍ɔnyɛta̍ Nīi Ɔwɔ Ɔ̍lɔ Hōhu Ma̍ nɛ.

Ɛha̍ ma̍ ka hīka, Ɔhɔ̍ɔnyɛta̍ Nīi Ɔwɔ Ɔ̍lɔ Hōhu Ma̍ ɔ̍lɔ ge̍ē bū la Iga̍līli kana̍? 42Je̍ka Īpū yī Ɔwɔ ɔ̍lɔ ka hīka ɔ̍lɔ ge̍ē bū la wɔma yī Ide̍bīidi? Je̍ka ɛ̍lɛ ge̍ē ma ɔ̍lɔ la Ibɛ̍tɛlɛhɛ̄ɛm nīi - ɔ̍lɔ ipwo̍gra yī Ide̍bīidi ma̍? 43Bū la ɛbɛ ɔla̍ā, alɔgbādu ɔla̍ā de iyī wā yi̍ya wu̍chē yī lɛlā yī Iji̍sɔ̄ɔsi. 44Āchɛ ɛha̍ ma̍ chikpo̍ yɛ ge̍ē de ɔ̍ ē ku̍. Ɔ̄chɔ̄chɛ i̍ chī mlɔtū de abɔ̄ gwō ɔ̄ ni̍.

I̍chɛ̄ni̍ yī alɛhu̍ yī Iju̍u

45Āchɛ ɔgbɛ̄ɛbɛ nīi alɛhu̍ aligbe ba̍la Āchɛ yī Ifa̍rasīi de tɛ̄rɔ̄ ma̍ cha wā dikpo̍ba̍ wā. E̍ che wa̍ ikpo̍ hīka oji̍ nīi ɛ̍lɛ i̍ ku̍ Iji̍sɔ̄ɔsi bī wā ni̍ ma̍?

46Āchɛ ɔgbɛ̄ɛbɛ ka de wa̍ hīka aɛ̍lɛ i̍ ma̍ ita yī ɔ̄chɛ ɔkɛlā i̍ngɔ̍ɔ bāa ɔngrɔ̄ɔ ɔla̍ā ma̍ je̍ ni̍ oo!

47Āchɛ yī Ifa̍rasīi ɛla̍ā da wa̍ bɛ̍ɛ̄nɛ̄ hīka, “Re̍ka o̍ gwi̍bobo tū ala̍ titi kpa̍a! 48Ala̍ je̍ma̍ ɔlɛhu̍ yī Iju̍u ɔha̍ kɛ̄ɛ ɔ̄chɛ yī Ifa̍rasīi ɔha̍ chɛ̄ku ɔ̄ je̍? 49Āchɛ ɛla̍ā nīi grēeyī gblāa aa̍ nīi i̍ je̍ Lihɔ yī Imo̍sīisi ni̍ ma̍, e̍ de jī mɛ̍!”

50Ɔ̄chɛ ɔha̍ abɔ̍ɔ lipu̍ yī alɛhu̍ yī Iju̍u ɛla̍ā re̍ka Inikode̍mūusi. Anu̍ pi̍i̍ ga ɛbɛ yī Iji̍sɔ̄ɔsi īchāha̍ a̍nɛ. O̍ ka de alɛhu̍ āchɛ ehēhī bɛ̍ɛ̄nɛ̄ hīka, 51“Je̍ka ala̍ jo̍ōkū lɔkɔ nīi Lihɔ yī alɔ ka ma̍? Alɔ i̍ ē hɛ̍ ɔ̄chɛ lɛpɔ̄ ji ni̍, ɔ̍chi̍kpa̍kpa̍ alɔ plɛ̍ɛ̄lā la oko̍o yī ɔlɔjā, je̍ ɔjā nīi ɔlɔjā ya̍ ma̍ o̍bū.”

52Alɛhu̍ ɛla̍ā de Inikode̍mūusi hīka, “Hɔ̍ɔ! Awɔ titi gba̍a - Oliga̍līli nɛ? Gāla̍ la Īpū yī Ɔwɔ gɛ e̍e nīi a ma̍ la abɔ̄ yī wɔ! A ma̍ ma̍ ɔ̄chɛ ɔkɛrɔ̄ yī Ɔwɔ ɔha̍ ē bū la Iga̍līli je̍?” 53Bū la ɛbɛ ɔla̍ā, ɔ̄chɛmɔ̄chɛ wā ge̍ pīya ga wɔlɛ̍ yī nū bɛ̍ɛ̄nɛ̄.

Currently Selected:

Ijɔ̍ɔn 7: YBASR

Highlight

Copy