1. Mose 26
26
O Isaak chochella o Abimeleches
1His i tsiro, kai was i bari bok an o them, jaake har an o Abrahameskro tsiro. Doleske djas o Isaak an o foro Gerar pash o Abimelech. Kowa his o baro rai pral i Filistarja.
2Koi mukas pes o baro Dewel o Isaakestar te dikell un penas ap leste: “Ma dja tele an o them Egiptia! Djib an ko them, kai me tuke penau. 3Atch i tsiro an kau them. Me hom pash tute, te tchiwap miri soor un miri bacht ap tute. Kalla tsele themma dau me tut un tire tchawen, kai pal tute wenna. Me rikrau miro lab, hoi dom tiro dadeste Abraham, un kai dom miro wast koi pre. 4-5O Abraham shunas ap mande un kras kowa, hoi me leske penom. Job rikras pes ap mire laba un djiwas pal miro tchatchepen. Doleske krau me, te wenn tire tchawe jaake bud har i bolepangre momlia. Un me dau len kalla tsele themma. Un koi bacht, hoi dau tire tchawende, djal dureder ap i tsele natsjone, kai ap i phub hi.”
6Jaake atchas o Isaak an o foro Gerar.
7Har i menshe an ko foro leskri romjat dikan, putchan le: “Koon hi koja?”
Penas job: “Joi hi miri pheen.” Les his traash te penell: ‘Joi hi miri romni.’ Job daras, te denn le les mulo, te lenn jon lat, jaake shukar his li.
8Har job i rah tsiro koi his, dikas o Abimelech, ko rai pral kol Filistarja, dran i wochni. Un dikas, har las o Isaak peskri romjat, i Rebekka, an i mussi. 9Koi mukas o Abimelech o Isaakes te kharell un penas ap leste: “Dik! Koja hi tiri romni. Hoske penal tu, kai joi tiri pheen hi?”
Penas o Isaak ap leste: “Me darom, te denn man le mulo un lenn jon lat.”
10Penas o Abimelech: “Hoske kral tu kowa mentsa? Har sik nashte wals jek i murshendar un lals tiri romjat un tchiwals pes pash late. Tu anals bari doosh ap mende!”
11Koi pal penas o Abimelech ap lauterende: “Koon kol murshes ninna leskri romjat an-tapella, ko hunte merella.”
O Isaak well brawelo
12O Isaak tchiwas djob an i phub an ko them. Un o baro Dewel tchiwas peskri soor koi pre. Jaake las o Isaak an ko bersh sheel kope jaake bud djob, har lo an i phub tchiwras. 13Un o Isaak was brawelo un brawleder, un les his i baro brawlepen: 14bud bakre, busja, grumja un budepangre. Un i Filistarja dikan tchilatche jakentsa ap leskro brawlepen. 15Un i tsele brunne, kai leskro dadeskre budepangre kran an o Abrahameskro tsiro, witsran le pherdo tchik, te nai lenn jon kek pani buder.
16Un o Abimelech penas ap o Isaak: “Dja dran maro them! Tu wal sorleder har mer.”
17Jaake djas o Isaak peske un tchiwas peskre plachtene khera pre an i tala pash o foro Gerar un atchas koi. 18Un mukas kol brunne pale newes te krell, hoi jon kran an ko tsiro, kai leskro dad Abraham djiwas, un kolen i Filistarja pherdo tchik witsran pal leskro merepen. Un o Isaak das kol brunne ko lab, har leskro dad len das.
19Un o Isaakeskre budepangre hadan tchik win an koi tala un hatsan pani. 20Koi tchingran i bakrengre dran o foro Gerar ap o Isaakeskre bakrengre un penan: “Kau pani hi maro.” Koi das o Isaak koi brunna ko lab ‘Esek’#26:20 Esek, ap hebretikes: tchingepen .
21Un o Isaakeskre budepangre kran i wawar brunna. Pral koja das ninna tchingepen. Koi das o Isaak kai brunna ko lab ‘Sitna’#26:21 Sitna, ap hebretikes: silwepen .
22Un job djas dureder un kras i wawar brunna. Pral koja tchingran pen le gar. Koi das lo lat ko lab ‘Rechobot’#26:22 Rechobot, ap hebretikes: buchlo them , un penas: “Kanna das men o baro Dewel i buchlo them. Mer nai wah an kau them bud menshe un bud vieche.”
23Kotar djas job an Beersheba. 24An koi rati mukas pes o baro Dewel lestar te dikell un penas: “Me hom o Dewel tiro dadestar Abraham. Ma traash! Me hom tuha. Me tchiwau miri soor un miri bacht ap tute. Tire tchawe, kai pal tute wenna, wenna bud un budeder. Jaake dom miro lab o Abrahameste, kai mange koi his.”
25Un kote kras o Isaak i chatchepaskri#26:25 chatchepaskri altaro , te wenn vieche chatchedo o Debleske, un mangas o baro Debles an. Un kote tchiwas job peskro plachteno kheer pre. Un peskre budepangre hadan kote i brunna win.
26Un o Abimelech was dran o foro Gerar peskro maleha Ahussat un peskro pralstuno lurdeha Pichol pash o Isaak. 27Un o Isaak penas ap lende: “Hoske wenn pash mande? Tumer kamenn man gar un tradan man tumendar krik.”
28Penan le: “Mer dikah un haiwah, kai o baro Dewel tuha hi. Doleske penam menge: Mer hunte kras tuha win, un das men sowel, te krah buder kek tchingepen jek o wawareha. 29De tiro dadeskro wast koi pre, te kress menge kek tchilatchepen, jaake har mer hams tuke latcho un mukam tut te djal, har tu kamal. Ap tute hi i bacht o baro Deblestar tchiddo.”
30Koi kras o Isaak lenge i chapen, te chan un pijan le. 31Taissarlakro stan le pre, un jek pal o wawar das pes sowel. Un o Isaak mukas len te djal. Un jon djan penge an o latchepen. 32Ap ko diwes wan o Isaakeskre budepangre pash leste, un rakran leha pral koi brunna, hoi jon wi-hadan, un penan: “Mer hatsam pani.” 33Koi das job koi brunna ko lab ‘Shiba’#26:33 Shiba sowel . Doleske kharell ko foro gomme kau diwes ‘Beersheba’#26:33b Beersheba brunna, kai dan pen le sowel .
O Esaeskre romja
34O Esau his star-deesh bersh phuro. Un job romedineras i Judit, – lakro dad his o Beeri. Ninna romedineras job i Basmat. Lakro dad his o Elon. O Beeri un o Elon his Hetarja. 35Kalla dui romja kran o djipen pharo o Isaakeske un i Rebekkake.
Currently Selected:
1. Mose 26: Sint2021
Highlight
Share
Copy
Want to have your highlights saved across all your devices? Sign up or sign in
© 2021 Romanes-Arbeit-Marburg e.V.
Erste Auflage
Alle Rechte vorbehalten
Die Lizenzvereinbarung erlaubt eine nicht-kommerzielle Nutzung des Textes. Änderungen des Textes sind jedoch untersagt. Der Rechteinhaber, Romanes-Arbeit-Marburg e.V., muss bei jeder Veröffentlichung erwähnt werden. Für jegliche kommerzielle Verbreitung muss ein Herausgeber beim Rechteinhaber eine schriftliche Genehmigung beantragen.
Herausgeber und Vertrieb: Romanes-Arbeit-Marburg e.V., Germany
info@romanes-arbeit-marburg.de
ISBN: 978-3-00-068366-4
Illustrationen von Louise Bass und Horace Knowles © The British amp Foreign Bible Society, 1954, 1967, 1972, 1994, 1995
Farbige Illustrationen mit Erlaubnis von Louise Bass
Kartenmaterial generiert mit Bible Mapper © 2005-2010 von David P. Barret
Alle Rechte an den Karten © 2021, Wycliffe Bible Translators, Inc.
