توریت شریف: پَیدایش 38
38
1اُنہاں دیہاڑیاں وِچ اِس طرح ہویا کہ یہُودہ اپݨے پہراواں نالوں بکھ ہوئی کے اِک عدُلام شہر نے بندے کول رہݨے واسطے گیا ، جس نا ناں حیرہ سی۔ 2تے یہُودہ اُتھے شُوع نامی اِک کنعانی نی تیہوں کی تکیا، تے اُس نال بیاہ کیتا۔ 3او حاملہ ہوئی، تے اُس نا اِک پُتر جمیا جس نا ناں یہُودہ عِر رخیا۔ 4تے فِر او دوبارہ حاملہ ہوئی، تے اِک ہور پُتر جمیا جس نا ناں اُس اونان رخیا۔ 5فِر اُس نا اِک ہور پُتر جمیا تے اُس نا ناں اُس سیلہ رخیا. یہوداہ اُس ویلے کزیب شہر وِچ رہݨا سی۔
6کُج عرصے بعد یہُودہ اپݨے پہلے مُنڈے عِر واسطے اِک کُڑی بیاہی کے کہنی آیا، جس نا ناں تمر سی۔ 7پر رب نی نظری وِچ عِر بہُوں بُرا سی، اِس واسطے رب اُس کی ماری سٹیا۔
8تاں یہُودہ اونان کی آخیا، «تُوں اپݨے پہراؤ نی کہرے آلی کول جا تے اُس نال بیاہ کری کے دیورے نا حق پورا کر، تانکہ تہاڑے پہراؤ نی نسل ٹُرے۔» 9پر اُس کی پتہ سی کہ رسم رواج نے مطابق اے اولاد اُس نی ناں ہوسی، اِس واسطے جس ویلے او اپݨے پہراؤ نی کہرے آلی کول جاݨا سی، تے او اپݨا نطفہ زمِیں پر سٹی شوڑنا سی تانکہ اُس نے پہراؤ نی نسل ناں ٹُرے۔ 10اُس نا اے کم رب نی نظری وِچ بہُوں پہیڑا سی۔ اِس واسطے رب اُس کی وی ماری شوڑیا۔
11فِر یہُودہ اپݨی نُوں کی آخیا، «توں مہاڑے پُتر سیلہ نے جوان ہوݨے تک اپݨے پیؤ نے کہار بیٹھی رہ». اُس اے اِس واسطے آخیا کِیئانکہ اُس سوچیا کہ اے ناں ہووے کہ اے وی اپݨے پہراواں نی طرح مری جائے. تے فِر تمر اپݨے پیؤ نے کہار ریݨ لغی۔
12فِر اِس طرح ہویا کہ بہُوں مُدت توں بعد یہوداہ نی کہرے آلی مِری گئی. فِر جس ویلے یہوداہ کی اِس نا غم پُہلیا، تے او اپݨے عدُلام شہر نے سنگی حيرہ نے نال اپݨیاں پِہڈاں نے بال کُترنے آلیاں کول تمنأ شہر در گیا۔
13فِر تمر کی اے پتہ لغی گیا کہ اُس نا سُہرا اپݨیاں پہڈاں نے بال کُتراݨے واسطے تمنأ در جاݨا پیا۔ 14اُس کے کِیتا کہ اپݨے رنڈاپے نیاں کپڑیاں کی لہوائی کے سٹی شوڑیا، تے پُہرخا بائی کے اپݨے آپ کی ٹہکی کِہندا تے عَینئِیم شہر نے پھاٹک کول جیہڑا تمنأ نے راہ وِچ سی بیہی گئی. اُس اے حرکت اِس واسطے کیتی کِیئانکہ اُس تکیا کہ سیلہ جوان ہوئی گیا اے، پر اِس نا بیاہ اُس نال نی ہویا۔
15یہُودہ اُس کی تکی کے سمجھیا کہ کوئی طوائف اے، کِیئانکہ اُس اپݨا مُونہ ٹہکی کے رخیا سی۔ 16یہُودہ کی اے بلکل نی پتہ سی کہ اے اُس نی نَوں اے۔ فِر او راہے دروں ہٹی کے اُس کول گیا تے آخݨ لغا، «توں مِکی اپݨے نال سیئݨ دے».
اُس آخیا، «توں مِکی کے دیسیں، اے کم کراݨے نا؟»
17اُس آخیا، «میں اَجڑے وِچوں اِک بکری نا بچہ تُکی پہیجساں۔»
اُس پُچھیا، «تاں تک مہاڑے کول کُج ضمانت چھوڑسیں؟»
18یہُودہ آخیا، «تُکی کے دیاں؟»
اُس جواب دِتا، «اپݨی مُہر تے اُس نی رسی تے اپݨی سوٹی جیہڑی تُہاڑے ہتھے وِچ اے، مِکی دیئی شوڑ۔»
یہُودہ اے چیزاں اُس کی دِتیاں، تے اُس نال مباشرت کیتی، تے او اُس نال حاملہ ہوئی گئی۔ 19فِر او اُٹھی کے ٹُری گئی، تے پُہرخہ لَوائی کے رنڈاپے نے کپڑے لائی کہندے۔
20اُس تُوں بعد یہُودہ اپݨے عدُلامی سنگیئے نے ہتھ بکری نا بچہ پہیجیا، تانکہ اُس زناݨی کولوں اپݨی ضمانت نیاں چیزاں موڑی کے کہنی اچھَے. پر اُس کی او زناݨی نی لبھی۔ 21فِر اُس، اُس جغہ نیاں لوکاں کولوں پُچھیا، «او طوائف جیہڑی عیَنئِیم نے راہ وِچ بیٹھی سی، کُتھے اَے؟»
اُنہاں لوکاں جواب دِتا، «اِیہے جی کوئی زناݨی نی سی۔»
22فِر اُس بندے مُڑی کے یہوداہ کی دَسیا، «او مِکی نی لبھی، تے اُتہے نے لوک وی آخݨے اݨ کہ اِتھے تے کوئی اِیہے جی زناݨی نی۔»
23یہُودہ آخیا، «چنگا! او اُنہاں چِیزاں کی ہی کول رخی کہنے، تانکہ اساں بدنام ناں ہوواں۔ میں تے بکری نا بچہ پہیجھی شوڑیا سی، پر او تُکی لبھی ہی نی۔»
24فِر کوئی تہرَے مہینیاں تُوں بعد یہوداہ کی کُسے کولوں پتہ لغا کہ اُس نی نوں تمر زنا کیتا، تے اُس نا حمل وی ٹھہری گیا.
یہوداہ آخیا، ”اِس کی باہر کہڈی کے آݨو، تانکہ اِس کی ساڑی کے ماریا جائے!»
25جس ویلے اُس کی باہر آݨنے پئے سے، تے اُس اپݨے سُہرے کی سنیہا پیجیا کہ «مہاڑا حمل اُس آدمی نے نال اے، جس نیاں اے چیزاں اݨ. توں سیاݨ تے سِہی، اے مہر، رسی تے سوٹی کُس نی اے؟»
26تاں یہوداہ اُنہاں چِیزاں کی پہچاݨی کِہندا تے آخیا، «او مہاڑے کولوں سچی اے، کِیئانکہ میں اُس کی اپݨے پُترے سیلہ نال نی بیایا۔“ تے او کدے وی اِس کول نی گیا۔
27فِر جیہڑے ویلے اُس نے حمل نے دیہاڑے پورے ہوئی گئے، تے پتہ لغا کہ ٹہڈے وِچ دو بچے اݨ۔ 28تے جدوں او جمݨ لغے، تے اِک بچے نا ہتھ باہر آیا تے دائی پغڑی کے ہتھے پر رتا تہاغہ بنی شوڑیا، تے آخیا، «اے پہلے جمیا۔»
29پر اِس طرح ہویا کہ اُس اپݨا ہتھ فِر اندر چھکی کِہندا، تے اِتنے وِچوں اِسے نا دوآ پہرآ جمیا، تے دائی آخݨ لغی، «توں کِیئاں زورے نال باہر نکلی آیا ایں؟» فِر اُس نا ناں فارص مطلب ڈاڈھا زورے نال نکلنے آلا رخیا گیا۔
30فِر اُس نا پہرآ جس نے ہتھے وِچ رتا تہاگہ بنیا سی جمیا، تے اُس نا ناں زارح رَخݨ گیا۔
Currently Selected:
توریت شریف: پَیدایش 38: phr
Highlight
Share
Copy
Want to have your highlights saved across all your devices? Sign up or sign in
Text (c) 2021 Noor-e-Kashmir
Audio (p) 2021 Noor-e-Kashmir
