NAANAA 7
7
Í dana anduniala
1Akũ Dikiri pì Nuhunɛ: Ǹ gɛ̃ gó gũn kũ n bedenɔ, zaakũ mɔkɔ̃mmɛ ma n e yãnnade ũ gbãragbɛ̃nɔ tɛ́. 2Ǹ nɔ̀bɔ kũ à de sa'opɔ ũnɔ sɛ́ ǹ gɛ̃ kũńwo da kũ a sàao mɛ̀n supplapla, ǹ nɔ̀bɔ kũ òdi sa ooronɔ sɛ́ mɛ̀n plapla da kũ a sàao. 3Ǹ bãnɔ sɛ́ ǹ gɛ̃ kũńwo dɔ da kũ a sàao mɛ̀n supplapla de ń burinɔ gɔ̃ kú andunia gu sĩnda pínkia. 4Zaakũ gɔrɔ suppla gbɛra mani tó legũ ma zĩtɛ ari gɔrɔ bupla fãnantɛ̃ kũ gwãanio, de mà pɔ́ wɛ̃̀ndide kũ ma kɛ̀nɔ wara zĩtɛ pínki.
5Nuhu yã kũ Dikiri ònɛɛ kɛ̀ pínki. 6Gɔrɔ kũ í dà anduniala, Nuhu kun wɛ̃̀ wàa aakɔ̃mɛ. 7À gɛ̃̀ gó'itɛ gũn kũ a nɛ́nɔ kũ a nanɔo kũ a nɛ́nɔ nɔnɔo de ò bo í pì yãn. 8Akũ nɔ̀bɔ kũ ò de sa'opɔ ũnɔ kũ nɔ̀bɔ kũ òdi sa ooronɔ kũ bãnɔ kũ pɔ́ kũ òdi táa o kũ kùaonɔ 9sù Nuhu kĩnaa gó gũn mɛ̀n plapla da kũ a sàao lákũ Luda ònɛɛ nà. 10Gɔrɔ suppla gbɛra í da pìi dà anduniala. 11Nuhu wɛ̃̀ wàa aakɔ̃de gũn a mɔ plade gɔrɔ gɛ̃ro awɛɛplade zĩ, akũ í kũ à kú zĩtɛ gbárunɔ pũ̀tã pínki, akũ ludambɛ guforonɔ fɔ̃̀. 12Legũ mà ari gɔrɔ bupla fãnantɛ̃ kũ gwãanio.
13Gɔrɔ birea Nuhu gɛ̃̀ gó gũn kũ a nɛ́nɔ Sɛmu kũ Hamuo kũ Yafɛtio kũ api nanɔo kũ a nɛ́nɔ nɔnɔ gbɛ̃nɔn aakɔ̃, 14kũ nɔ̀bɔsɛ̃ntɛnɔ pínki ń buria kũ bɛ pɔ́kãdenɔ pínki ń buria kũ pɔ́ kũ òdi táa o kũ kùaonɔ pínki ń buria kũ pɔ́ vurananɔ pínki ń buria, bãnɔ kũ pɔ́ dɛ̀mbɛrɛdenɔ pínki. 15Pɔ́ kũ òdi wesa bonɔ sù Nuhu kĩnaa gó gũn buri kũ burio mɛ̀n plapla. 16Pɔ wɛ̃̀ndidenɔ buri pínki gɛ̃̀ da kũ a sàao lákũ Luda dìtɛnɛ nà. Akũ Dikiri gbà tàtańlɛ.
17Legũ mà ari gɔrɔ bupla. Kũ í tɛn kara, akũ à gó pìi sɛ̀ zĩtɛla. 18Í fùtɛ à kàra manamana à dà zĩtɛla, akũ gó pì fù íla. 19Í kàra à dà zĩtɛla lái, à dà kpi lei kũ ò kú andunia gũnnɔla míɔmiɔ. 20Í fùtɛ à dà kpi pìnɔla ari gã̀sãkuru gɛ̃ro. 21Pɔ́ wɛ̃̀ndide kũ òdi táa o zĩtɛnɔ gàga pínki, bãnɔ kũ bɛ pɔ́kãdenɔ kũ nɔ̀bɔsɛ̃ntɛnɔ kũ pɔ́ kũ òdi táa o kũ kùaonɔ kũ bisãsirinɔ ń pínki. 22Pɔ́ kũ òdi wesa bo kũ ò kú sĩ̀sĩanɔ gàga pínki. 23Luda pɔ́ wɛ̃̀ndide kũ ò kú sĩ̀sĩanɔ kàkatɛ pínki. À bisãsirinɔ kũ nɔ̀bɔnɔ kũ pɔ́ kũ òdi táa o kũ kùaonɔ kũ bãnɔ kàkatɛ andunia gũn. Nuhu mɛ́ à bò ado kũ pɔ́ kũ ò kú kãao gó gũnnɔ. 24Akũ í gɔ̃̀ da anduniala ari gɔrɔ basuppla akuri.
Currently Selected:
NAANAA 7: BB2005
Highlight
Share
Copy
Want to have your highlights saved across all your devices? Sign up or sign in
Bisã Bible © SIM International, 2005.
