YUHANA 15

Yesumɛ geepi lí yãpura ũ

1Makũmɛ geepi lí yãpura ũ, ma Demɛ geepi lí búde ũ. 2Àdi lígã kũ à pɛ́ma nɛ́'inaa sari zɔ̃ pínki, akũsɔ̃ àdi a nɛ́'iri ɔnɛ lago pínki de a nɛ́'ina kara yãi. 3Ákɔ̃nɔ sɔ̃ á punamɛ yã kũ ma òárɛ yãi. 4Àgɔ̃ kú ma gũn lákũ má kú á gũn nà. Lígãa dì fɔ̃ à nɛ́ kpá a zĩdaoro, séde àgɔ̃ kú lídaa. Lɛmɛ ákɔ̃nɔ áni fɔ̃ à nɛ́ kpáro, tó adi kɛ àgɔ̃ kú ma gũn baasiro. 5Makũmɛ geepi lída ũ, ákɔ̃nɔmɛ a gã̀nɔ ũ. Gbɛ̃ kũ à kú ma gũn, akũsɔ̃ má kú a gũn, àkũ mɛ́ ani nɛ́ kpá manamana, zaakũ áni fɔ̃ à pɔ́ke kɛ ma sariro. 6Tó gbɛ̃ kú ma gũnlo, oni a zukũna, lákũ òdi lígã zɔ̃ ò zukũna à kori kũ ò sɛ́tɛ ò ká tɛ́n à tɛ́ kũ nà. 7Tó á kú ma gũn, akũsɔ̃ ma yã kú á gũn, à pɔ́ sĩnda pínki kũ á yei wɛ́ kɛ, áni le. 8Tó a nɛ́ kpà manamana, gbɛ̃nɔ nigɔ̃ dɔ̃ kũ ma ìbanɔn á ũ yãpura, ma De tɔ́ ni bo. 9Má yeái lákũ ma De yemai nà. Àgɔ̃ kú ma yenyĩ gũn. 10Tó á yã kũ ma dìtɛnɔ kũna, ánigɔ̃ kú ma yenyĩ gũn, lákũ má yã kũ ma De dìtɛnɔ kũna nà, akũsɔ̃ má kú a yenyĩ gũn. 11Ma yã pìnɔ òárɛ, de pɔnna kũ má vĩ gɔ̃ kú á gũn yãimɛ, á pɔnna nigɔ̃ papana. 12Yã kũ ma dìtɛárɛn dí: Àgɔ̃ yekɔ̃i lákũ má yeái nà. 13Tó gbɛ̃ gì a wɛ̃̀ndiii a gbɛ̃nnanɔ yãi, gbɛ̃ke yenyĩ vĩ de abirekũlaro. 14Tó átɛn yã kũ ma dìtɛárɛ kɛ, ma gbɛ̃nnanɔn á ũ. 15Madì á sísi zɔ̀blerinɔ doro, zaakũ zɔ̀blerii dìgɔ̃ a dikiri bɔkɔtɛ dɔ̃ro. Ma á sísi ma gbɛ̃nnanɔmɛ, zaakũ yã kũ ma mà ma De kĩnaan ma òárɛ pínki. 16Ákɔ̃nɔ mɛ́ a ma sɛro, makũ mɛ́ ma á sɛ́, akũ ma á zĩ à gɛ́ nɛ́ ká, nɛ́kana kũ ani lákaro, gbasa De Luda á gba pɔ́ sĩnda pínki kũ a wɛ́ kɛ̀a kũ ma tɔ́o. 17Yã kũ ma dìtɛárɛn dí: Àgɔ̃ yekɔ̃i.

Andunia zãna Yesugu kũ a ìbanɔ

18Tó andunia zã̀águ, àgɔ̃ dɔ̃ kũ à zã̀magu á ã. 19Tó andunia gbɛ̃nɔn á ũ, de andunia yeái. Lákũ ma á sɛ́ ma á bó andunia gũn nà, á de a gbɛ̃nɔ ũro. Abire yãin andunia zã̀águ. 20À tó yã kũ ma òárɛ gɔ̃ dɔágu. Zɔ̀blerii dìgɔ̃ de a dikirilaro. Lákũ ò wɛ́ tã̀ma nà, lɛn oni tãáwa lɛ. Tó ò ma yã kũnamɛ, onigɔ̃ á yã kũna se dɔ. 21Oni yã birenɔ kɛárɛ pínki ma tɔ́ yãi, zaakũ ò gbɛ̃ kũ à ma zĩ dɔ̃ro. 22Tó mádi su ma yã òńnɛ yãro, de ò taari vĩro. Ama tera sà ń taari kutɛna vĩro. 23Gbɛ̃ kũ à zã̀magu zã̀ ma Degumɛ se. 24Tó mádi yã kũ odi kɛ yãro kɛ ń tɛ́ro, de ò taari vĩro. Ama tera sà ò yã kũ ma kɛ̀nɔ è, akũ ò zã̀magu kũ ma Deo ó pínki, 25de yã kũ à kú ń doka gũn papa, kũ ò pì ò zã̀magu pãmɛ. 26Tó Zɛkũnwode kũ mani a gbarɛáwa bò ma De kĩnaa à sù, Nini yãpurade kũ àdi bo a kĩnaa pìi, ani ma sèeda kɛ. 27Ákɔ̃nɔ sɔ̃, áni ma sèeda kɛ, kũ á kú kũmao zaa káaku yãi.

Currently Selected:

YUHANA 15: BB2005

Highlight

Copy