YUHANA 17
17
Yesu aduakɛna a ìbanɔnɛ
1Yesu yã pì onaa gbɛra à wɛ́ sɛ̀ musu à pì: Baa, a gɔrɔ kà. Ǹ n Nɛ́ tɔ́ bo, de n Nɛ́ n tɔ́ bo. 2N tò má iko vĩ gbɛ̃ sĩnda pínki musu, de mà wɛ̃̀ndi kũ àdi lákaro kpá gbɛ̃ kũ n kpàmanɔa. 3Mɔkɔ̃n Luda mɛ̀n do légelege yãpurade kũ makũ Yesu Kirisi kũ n zĩ̀io dɔ̃namɛ wɛ̃̀ndi kũ àdi lákaro pì ũ. 4Ma n tɔ́ bò zĩtɛ. Zĩ kũ n dàmɛnɛ mà kɛ ma kɛ̀ ma laka. 5Baa, ǹ gakuri kpáma n kĩnaa tera sà, lákũ n kpàma nà n kĩnaa zaade andunia katɛnaro. 6Gbɛ̃ kũ n ń sɛ́ andunian n ń kpámanɔ ma tò ò n dɔ̃. N pɔ́nɔmɛ, akũ n ń kpáma. Ò n yã kũna, 7ò dɔ̃̀ sà kũ yã kũ n dàmɛnɛ pínki bò n kĩnaamɛ. 8Ma yã kũ n dàmɛnɛ dàńnɛ. Ò sì, akũ ò dɔ̃̀ kũ ma bo n kĩnaamɛ yãpura. Ò sì kũ mɔkɔ̃n mɛ́ n ma zĩ. 9Matɛn wɛ́ kɛńnɛ, adi kɛ andunian matɛn kɛnɛro, séde gbɛ̃ kũ n ń kpáma pìnɔ, zaakũ n pɔ́nɔmɛ. 10Ma gbɛ̃nɔ bi n gbɛ̃nɔmɛ ń pínki, n pɔ́nɔ bi ma pɔ́nɔmɛ pínki. Matɛn tɔ́ bo ń gãi. 11Matɛn su n kĩnaa, manigɔ̃ kú andunia gũn doro, ama mɔ́kɔ̃nɔ nigɔ̃ kú andunia gũn. Baa Kúadonade, ǹgɔ̃ ń kũna kũ n tɔ́ kũ n kpàma gbãnao, de ògɔ̃ kun mɛ̀ dokɔ̃nɔ lán ó bà. 12Gɔrɔ kũ má kú kũńwo, má ń kũna kũ tɔ́ kũ ń kpàma pì gbãnao. Ma ń dãkpã, akũ ń gbɛ̃ke dí sãtɛro, tó adi kɛ gbɛ̃ kũ à mìi pɛ̀ kakatɛnaaa de n yã le à papa yãi. 13Tera sà matɛn su n kĩnaa. Ma yã dínɔ ò andunia gũn, de ògɔ̃ pɔnna kũ má vĩ vĩ àgɔ̃ papanaḿma. 14Ma n yã dàńnɛ, akũ andunia zã̀ńgu, kũ andunia gbɛ̃nɔmɛ ń ũro yãi, lákũ makũ má de andunia gbɛ̃ ũro nà. 15Matɛn wɛ́ kɛmma, adi kɛ de ǹ ń bo andunia gũnnlo, ama de ǹ ń dãkpã a vãni yãimɛ. 16Andunia gbɛ̃nɔmɛ ń ũro, lákũ makũ má de andunia gbɛ̃ ũro nà. 17Ǹ tó ń kunna gɔ̃ adona kũ yãpura gbãnao. N yãmɛ yãpura pì ũ. 18Lákũ n ma zĩ andunia gũn nà, lɛn makũ sɔ̃ ma ń zĩ andunia gũn lɛ. 19Matɛni ma zĩda kpámma ń yãi, de ògɔ̃ kun n gbɛ̃nɔ ũ yãpura. 20Adi kɛ matɛn wɛ́ kɛńnɛ ńdonlo, kũ gbɛ̃ kũ oni ma náani kɛ ń yã yãinɔmɛ dɔ, 21de ń pínki gɔ̃ kun mɛ̀ dokɔ̃nɔ ũ. Baa, lákũ ń kú ma gũn nà akũsɔ̃ má kú n gũn, mɔ́kɔ̃nɔ sɔ̃ gɔ̃ kú ó gũn lɛ, de andunia le à sí mɔkɔ̃n mɛ́ n ma zĩ. 22Gakuri kũ n kpàman ma kpàḿma, de ògɔ̃ kun mɛ̀ dokɔ̃nɔ lán ó bà. 23Má kú ń gũn, akũsɔ̃ ń kú ma gũn, de ògɔ̃ kun mɛ̀ dokɔ̃nɔ ũ mámmam, de andunia gɔ̃ dɔ̃ kũ mɔkɔ̃n mɛ́ n ma zĩ, akũsɔ̃ ń yeńyĩ lákũ ń yemai nà. 24Baa, gbɛ̃ kũ n kpàmanɔ, má ye ògɔ̃ kú gu kũ má kún, de ò wɛ́ kɛ pla kũ ma gakurio, gakuri kũ n kpàma kũ ń yemai yãi zaade andunia katɛnaro. 25Baa Mana, andunia n dɔ̃ro, ama má n dɔ̃, akũ gbɛ̃ dínɔn dɔ̃ kũ mɔkɔ̃n mɛ́ n ma zĩ. 26Ma tò ò n dɔ̃, manigɔ̃ tó ògɔ̃ n dɔ̃, de yenyĩ kũ ń vĩ kũmao gɔ̃ kú ń gũn, de makũ sɔ̃ màgɔ̃ kú ń gũn.
Currently Selected:
YUHANA 17: BB2005
Highlight
Share
Copy
Want to have your highlights saved across all your devices? Sign up or sign in
Bisã Bible © SIM International, 2005.
