Vilinga 15
15
Chihande chaUlwilo nakujihana
1Kaha kwejile vamwe kufuma kuYuleya vanangwilenga vandumbwavo ngwavo, Nge kaveshi kumijihana mwaya jishimbi jaMoseko, kaha kaveshi kuhasa kumilwilako.
2Jino kakwapwile kuvakokojwesochoko vaPaulu naMbalanape nakulipula navo jipami, vaPaulu naMbalanape navakwavo vamwe vavatongwele mangana vakanduke kuYelusalema kuli vaposetolo navakulwane hachihande kana.
3Shikaho liuka lyavashinjikijileko, vapulasanyine muFwenyisha namuSamaliya, nakuvalumbunwina nawa omu vaka-mafuchi vanalumuka nakufwelela. Kaha vandumbwavo vosena vawahililile chikuma.
4Omu vahetele kuYelusalema, vavatambwile kuliuka nakuli vaposetolo nakuli vakulwane, kaha vavahichilililemo vyosena vize navalingila Kalunga.
5Oloze vaka-kufwelela vamwe vakumukana wavaFwaliseu, vemanyine nakwamba ngwavo, Kuvanga vavajihane nakuvalweza kulinga mwaya Jishimbi jaMose.
6Jino vaposetolo navakulwane valiwanyine mangana vatale hachihande kana.
7Kaha omu vatwalilileho nakulipula jipami, Petulu akatukile nakuvamba ngwenyi,
Enu malunga vandumbwami, enu munatachikiza ngwenu hamakumbi akunyima, Kalunga angusakwile muli enu, mangana vaka-mafuchi vakevwe mazu amujimbu wamwaza mukanwa kami nakufwelela.
8Kaha Kalunga átachikiza michima yavatu, asolwele unjiho kuli vakiko nakuvahana Shipilitu Wajila nge omu alingile hali etu.
9Kaha Ikiye kahandunwine etu navakikoko, atomesele michima yavo hakufwelela.
10Shikaho jino, mwomwo ika muli nakumwesekela Kalunga nakuhaka tumbaji#15:10 Nge ngwavo vaka-kufwelela, mwomwo vosena vapwa tumbaji twaMwata. toka hajishingo javo, eyi vahonene vakakuluka jetu chipwe etu kumbata?
11Oloze, tunafwelela ngwetu vanatulwili halikoji lyaMwata Yesu, mwomumwe navakiko nawa.
12Kaha lize liyongomena lyosena lyaholele kulu, kaha vevwililile Mbalanape naPaulu omu vapwile nakulumbununa vinjikizo navyakukomwesa vize alingile Kalunga kumavoko avo muli vaka-mafuchi.
13Kaha omu vakumishile kuhanjika, Yakova ambile ngwenyi,
Enu malunga vandumbwami, ngwivwililenu.
14Shimeyone nalumbununa lyehi omu Kalunga avangilile kwalakana vaka-mafuchi nakumbatamo vamwe vapwenga vatu valijina lyenyi.
15Mazu awa anayi mwomumwe namazu avapolofweto ngana muze vasoneka, ngwavo,
16Kufuma aha nangukakinduluka,
Nangukatungulula mbalaka yaNdavichi yize yashiuka,
Kaha nangukatungulula yize vashiwile, kaha nangukayimika cheka,
17Mangana vaze navakasalaho vakamusakenga MWATA,
Navaka-mafuchi vosena vaze vávulukila lijina lyami.
18Mukiko nambe MWATA, Ou alinga vyuma evi —
vatachikiza kufuma kumwaka.
19Shikaho nangwamba ngwami, vaze vaka-mafuchi vanalumukila kuli Kalunga kanda natuvahana kilikako.
20Oloze twatela kuvasonekela ngwetu valihendenga kutunyama vanapihisa hakuvavatwila makombelo#15:20 Vaka-mafuchi amwe likombelo apwa kalunga kavo., nakuujila, nakutunyama vakunyotolola hakuvajiha#15:20 Nge ngwavo, valihendenga kutunyama vakuzeneka kuvatula miliu hakuvajiha., nakumanyinga.
21Mwomwo kufuma kuvisemunwino vyakumwaka, Jishimbi jaMose veji kujambululanga mulimbo hilimbo#15:21 MuchiHelase ngwavo, limbo hilimbo lyakembwe., mwomwo veji kujitanganga mujisunangonga#15:21 Tala ha6:9. haSambata hiSambata.
Mukanda wakuzamikisa vaka-mafuchi vaze vafwelelele
22Haze vene vaposetolo navakulwane nalize liuka lyosena vachimwene kuwaha kusakula malunga mukachi kavo nakuvatuma kuAndeyoka hamwe naPaulu naMbalanape. Vatumine Yuta, ou vavulukilenga ngwavo Mbalasava, naShilase — ava vapwile vakutumbunuka mukachi kavandumbwavo.
23 Vavahanyine mukanda wakusoneka ngwavo,
Etu vandumbwenu vaposetolo navakulwane.
Kuli enu vandumbwetu vaka-mafuchi muli kuAndeyoka nakuSulya nakuShilisha,
Tunamimeneka mwane!
24 Tunamisonekela mwomwo tunevu ngwavo, vamwe vetu vaneza namazu akumipinjisa anamizakamisa mumuchima oloze etu katwavatumine namazu kanako.
25Shikaho etu hakulivwasana tunachimono kuwaha kusakula malunga hakachi ketu nakuvatuma kuli enu hamwe naava twazanga vaMbalanape naPaulu,
26ava vatu valyonene#15:26 Nge ngwavo, vetavile kufwa. MuchiHelase ngwavo, valyonene myono yavo. halijina lyaMwata wetu Yesu Kulishitu.
27Shikaho tunatumu Yuta naShilase, vakiko navamilweza mazu oamwe.
28Mwomwo Shipilitu Wajila achimwene kuwaha, nayetu nawa tunachitavila ngwetu, katwatela kumitwika chiteli chachilemu chikumako kuvanga echi chakumilweza ngwetu,
29Lihendenunga kutunyama vanavatwila makombelo#15:29 Vaka-mafuchi amwe likombelo apwa kalunga kavo., nakumanyinga, nakutunyama vakunyotolola hakuvajiha#15:29 Nge ngwavo, valihendenga kutunyama vakuzeneka kuvatula miliu hakuvajiha..
Nge namulihendanga kuvyuma evi, kaha namulinga kanawa.
Twamenu kanawa.
30Shikaho omu vavasuwile vashikumukile kuAndeyoka kaha vakungulwile liuka nakuvahana uze mukanda.
31Kaha omu vautangile, vawahililile mwomwo wapwile wakuvazamikisa.
32VaYuta naShilase vaze vapwile vapolofweto, vazamikishile vandumbwavo namazu amavulu nakuvakolezeza.
33Omu vatwamine makumbi amavulu kuze, vandumbwavo vavasuwile mukuunda kaha vakindulukile kuli vaze vavatumine.
34[Oloze Shilase achimwene kuwaha kusala kuze.]
35Kaha vaPaulu naMbalanape vatwalilileho kutwama kuAndeyoka nakunangula nakwambulula mujimbu wamwaza waMwata navakwavo vavavulu.
Paulu mwalihandununa naMbalanape
36Kaha omu mwahichile makumbi amwe, Paulu ambile Mbalanape ngwenyi, Tukinduluke jino nakutala vandumbwetu mulimbo hilimbo#15:36 MuchiHelase ngwavo, limbo hilimbo lyakembwe. muze twambulwile mazu aMwata, tukamone omu vali nakutwamina.
37Jino Mbalanape afwilile kumbata Yowano, uze vavulukilenga ngwavo Mako.
38Oloze Paulu kachimwene kuwaha kuya nauze avasezele muPamafulyako, uze akanyine kuya navo kumilimo yize.
39Shikaho valikokojwesele chikuma, kaha valihandunwine. Mbalanape ayile naMako muwato kuKupulusu.
40Oloze Paulu asakwile Shilase, kaha omu vandumbwenyi vavakunjikile kulikoji lyaMwata vasuukile nakuya.
41Kaha ahichile mu Sulya namuShilisha nakuzamikisa mauka.
Currently Selected:
Vilinga 15: LUE
Highlight
Share
Copy
Want to have your highlights saved across all your devices? Sign up or sign in
Bible Society of Zambia
