Vilinga 17
17
Paulu naShilase kuTesolonyika
1Jino omu vapulasanyine muAfwipole namuApolonya, vayile nakuheta kuTesolonyika, kuze kwapwile sunangonga#17:1 Tala ha6:9. yavaYuleya.
2Paulu engililemo nge mwaya chijililo chenyi, kaha hajiSambata jitatu alijingishilenga navo haMazu-vasoneka-ajila,
3nakuvalumbunwina nakuvamwenesa shindakanyi ngwenyi chamutelele Kulishitu kuvanga kumona makava akufwa nakusanguka muvafu, kaha ngwenyi, Ou Yesu nguli nakumyambulila Ikiye vene Kulishitu.
4 Kaha vaYuleya vamwe vakunyukile, valinungile navaPaulu naShilase, hamwe naliyongomena lyalinene lyavaHelase vaka-kukomoka Kalunga, namapwevo vavalemu vavavulu.
5Oloze vaze vaYuleya vakwavo, vevwile lisungu, valifumbile namalunga vamwe vavapi vaka-kwimajala tuhu kuchilanjilo, kaha vakungulwile lizavu nakukatula pindangano mulimbo lize lyakembwe, valukukile zuvo yaYasone, vasakile ngwavo vavalowele vaze vatu kulize lizavu.
6Oloze omu vahonene kuvawana, vakokelele Yasone navandumbwenyi vamwe kuli vaka-kusopesa vamwimbo lize, vatambakanyine ngwavo, Ava váli nakuluwanganyisa kaye kosena vaneza nakuno nawa.
7Jino Yasone navatambula, kaha vosena ava veji kulinganga mwakulisepasana najishimbi jaKesale, nakwamba ngwavo kuli Mwangana weka, Ikiye Yesu.
8Hakwivwa vyuma evi chanehele chizungo mulize lizavu namuli vaze vaka-kusopesa.
9Kaha omu vatambwile kapopo kuli Yasone navaze vakwavo, vavechele.
Vaposetolo navaya kuMbeleya
10Hahaze vene vandumbwavo vasuwile Paulu naShilase naufuku, mangana vayenga kuMbeleya. Vakiko hakuheta kuMbeleya vengilile musunangonga yavaYuleya.
11Ava jino vapwile vakalemesa kuhambakana vaze vakuTesolonyika, mwomwo mazu vawatambwile namuchima wakwanguhwa, kaha vahezelenga hakumbi hakumbi muMazu-vasoneka-ajila, mangana vamone nge vyuma kana mukiko vene vyapwa.
12Shikaho vaYuleya vavavulu vafwelelele, namapwevo vavalemu vavaHelase, namalunga vavavulu nawa.
13Oloze omu vaYuleya vakuTesolonyika vatachikijile ngwavo Paulu nambulula lyehi mazu aKalunga nakuMbeleya nawa, vayile nakuze nawa nakusowangiza lizavu lilovole chizungo.
14Kaha hahaze vene vandumbwavo vasuwile Paulu ayenga kukalungalwiji, oloze Shilase naChimoteu vasalile kuze.
15Jino vaze vatongwele kumushinjikiza Paulu, vamuhetesele swi-i nakuAtene. Kaha hakuvalweza ngwenyi vakalweze Shilase naChimoteu veze washi kuli ikiye, vakiko vahilukile.
Paulu hakupwa kuAtene
16Shimbu Paulu apwile nakuvavandamina kuAtene, afutukile mushipilitu yenyi hakumona muze mulimbo-lyakembwe omu munazale namakombelo.
17Shikaho alijingishilenga musunangonga navaYuleya navaHelase vaka-kukomoka Kalunga — nákuchilanjilo nawa hakumbi hakumbi navaze awanyinengako.
18Jino vamwe vaka-kufwila kushishika mwaya mangana, vaEpikule navaShitoke, valipulile nenyi jipami. Vamwe vambile ngwavo, Ou lindengu kana mwasaka kuhanjika ika? Kaha vakwavo ngwavo, hakumwivwa, nge ali nakwambulula tulunga vakumafuchi eka, mwomwo apwile nakwambulula mujimbu wamwaza waYesu nakusanguka chavafu.
19Kaha vamumbachile nakuya nenyi kuzango#17:19 Zango yavaka-Atene yakungulukilenga hapili yaAlese. Alese apwile kalunga kavo wajita. yahapili yaAlese. Vamwambile ngwavo, Nachihasa kutulumbunwina mwaya kunangula chachihya echi weji kwambululanga?
20Mwomwo unanehe vimwe vyaungeji kumatwitwi etu, shikaho tunasake kutachikiza kulumbunuka chavyo.
21(Mwomwo vaka-Atene vosena navangeji vaze vazuzumanyinengamo kavasakilenga kulinga vyekako, shina kwambulula vihande vyavihya kaha, chipwe kuvivwilila.)
22Kaha Paulu hakwimana mukachi kazango yize yahapili yaAlese ambile ngwenyi,
Enu malunga vaka-Atene, ngunamono ngwami, muvyosena mweji kulinganga mwafwila chikuma kukombela.
23Mwomwo ami hakutambwojoka, kaha hakutala kanawa ovyo mweji kulifukulangako, ngwawananga nawa lijiko lyakulumbila hakusoneka ngwavo,
LYAKALUNGA VAZENEKA KUTACHIKIZA.
Shikaho, haechi mwalifukulako muuhukuma, hakiko nangumyambulila ngwami,
24 Kalunga Ou atangile kaye navyosena viliho, hakupwa Ikiye Mwenya-lilu namavu, katwama mujitembele jakutunga namavokoko,
25chipwe kumuzachila namavoko avatu nge muka-kukalikizako. Mwomwo Ikiye eji kuhananga vosena mwono nakuhwima navyosena.
26Kaha muli umwe mukiko vene afumishile miyachi yavatu yosena, mangana vatwamenga hamavu hosena. Kaha avatongwela jingonde najingiza jamafuchi vatwama,
27mangana vamutondenga Kalunga, chikálu kuvanahase kupupuchila nakumuwana, oloze Ikiyenyi, katwama hahasuku naumwe wetuko.
28Mwomwo,
Muli Ikiye mukiko vene twayoyela, twatambukila, atulingisa tupweko
nge omu vamba vakwenu vamwe vaka-kusoneka myaso nawa ngwavo,
Mwomwo twapwa tuvana venyi.
29Shikaho hakupwa tuvana vaKalunga, katwatela kushinganyeka ngwetu, Kalunga apwa nge ulu, chipwe palata, chipwe lilolwa — chifwanyisa chakutenga naunyoji nakutaka chamutuko.
30Kaha myaka kana yauhukuma Kalunga ayiliwile, oloze oholili ali nakulweza vatu vosena vali kwosena ngwenyi vakunyuke hashili nakwalumuka mumuchima.
31Mwomwo nasakula lyehi likumbi mwakasopesa vaka-kaye mwakwoloka muli Lunga átongola. Nahane vatu vosena hakutachikijila kanawa, hakumusangula muvafu.
32Omu vevwile kusanguka chavafu, vamwe vamungumukile wo-o, oloze vakwavo vamwambile ngwavo, Natukakwivwilila cheka hamazu awa.
33Ngocho Paulu afumine mukachi kavo nakuliyila.
34Oloze malunga vamwe valinungile nenyi, kaha vafwelelele. Hakachi kavo hapwile Ndeyonyishu umwe wavaka-zango yapwile kupili yaAlese, napwevo umwe lijina lyenyi Ndamale, navakwavo vapwile navo.
Currently Selected:
Vilinga 17: LUE
Highlight
Share
Copy
Want to have your highlights saved across all your devices? Sign up or sign in
Bible Society of Zambia
