Vilinga 8
8
Saulu mwenyeka liuka
1Jino Saulu alikundwijile navo hakujiha Setefwano.
Kaha halikumbi lize kwakatukile luyanjisa lwalunene lwakuyanjisa liuka lyapwile kuYelusalema. Kaha vosena valimwangilile mujingalila jaYuleya naSamaliya, kwasalile vaposetolo kaha.
2Kaha malunga vakuzakama Kalunga vafunjile Setefwano nakumulila chikuma.
3Oloze Saulu asakilenga kwenyeka liuka, kaha engililenga muzuvo hizuvo nakukokangiza namalunga namapwevo nakuvatwala kukamenga.
Fwilipu mwambulula mujimbu wamwaza kuSamaliya
4Jino vaze valimwangile vayilenga nakwambulula mazu amujimbu wamwaza.
5Fwilipu ashikumukile kunganda yaSamaliya nakuvambulila Kulishitu.
6Kaha mazavu avatu evwilililenga kanawa namuchima umwe mazu ahanjikilenga Fwilipu, hakwivwa nakumona vinjikizo vize alingilenga.
7Mwomwo vashipilitu vaunyengwe valovokelenga nakutetumuka muli vatu vavavulu vaze vapwile navo, kaha vaka-kalepa navaka-kumbilikita vavavulu vavahindwile.
8Kaha munganda yize mwapwile kuwahilila chachinene.
9Oloze kwapwile lunga umwe, lijina lyenyi Shimona. Hamakumbi akunyima alingilenga visava muze munganda nakukomwesa vaka-Samaliya, alivulukilenga kupwa wamulemu.
10 Vatu vosena vamwivwilililenga kanawa, kufuma kuli wakukehelamo swi-i nakuli wamulemu, nakwamba ngwavo, Ou ikiye ngolo jaKalunga jajinene vavulukilenga.
11Vamwivwilililenga kanawa mwomwo avakomweselenga navisava vyenyi hamyaka yayivulu.
12Oloze omu vafwelelele mazu amujimbu wamwaza ambulwile Fwilipu akuvuluka wangana waKalunga nalijina lyaYesu Kulishitu, namalunga namapwevo vavajimikile.
13Kaha naShimona nawa etavile#8:13 Tala 8:21-14. Chipwe Shimona etavile, kamufwelelele Yesu Kulishitu nakutambula ulwiloko. Petulu amumwene ngwenyi achili muupapwoki, mukuli yakuhenga, nakumulweza akunyuke hashili nakwalumuka mumuchima wenyi nakumufwelela Mwata Yesu Kulishitu., kaha omu vamujimikile, alikachile naFwilipu, kaha alikomokelele hakumona vinjikizo navilinga vyangolo vize vyasolokele.
14Jino omu vaposetolo kuYelusalema vevwile ngwavo vaSamaliya vanatambula lyehi mazu aKalunga, vavatuminyine Petulu naYowano.
15Vakiko vashikumukile#8:15 Vaposetolo vapwile kuYelusalema hapili, kaha vashikumukile nakuya kuSamaliya. kuze nakuvalombela mangana vatambule Shipilitu Wajila,
16mwomwo apwile kanda achize muli umwe wavo, oloze vavajimikile kaha mulijina lyaMwata Yesu.
17Kaha vavanangikile mavoko, vatambwile Shipilitu Wajila.
18Jino Shimona hakumona Kalunga nahane Shipilitu Wajila omu vavanangikile mavoko kuli vaposetolo, avanehelele jimbongo jajivulu,
19nakwamba ngwenyi, Nguhanenuko nayami nawa eji ngolo kana mangana weshowo nangunangika mavoko ami atambule Shipilitu Wajila.
20Oloze Petulu amwambile ngwenyi, Jimbongo jove japalata jinonge hamwe nayove, mwomwo unashinganyeka ngwove unahase kulanda wana waKalunga najimbongo!
21Echi kachakupandama oveko, mwomwo muchima wove kawoloka kumeso aKalungako!
22Shikaho kunyuka hashili nakwalumuka mumuchima, ufume kuupapwoki uli muli ove, lomba Mwata pamo mwakukonekela kujina chamuchima wove.
23Mwomwo, ngunamono ngwami wazala nalwiso#8:23 MuchiHelase ngwavo uli munyangwa yayisasu. , kaha uli muundungo washili.
24Shimona amukumbulwile ngwenyi, Ngulombelenu kuli Mwata, kuchina hali evi munavuluka nahanguwana chimwe.
25Shikaho omu vambulwile unjiho wavo nakuhanjika mazu aMwata, vakindulukile kuYelusalema, oku vali nakuya nakwambulula mujimbu wamwaza mumembo avaSamaliya amavulu.
Fwilipu nakaselwa wakuEchopa
26Jino kangelo kaMWATA ahanjikile kuli Fwilipu ngwenyi, Katuka, yako kumutamba wachilyo chamututuko mujila yakufuma kuYelusalema yashikumuka kuNgaza, kuze kupambo.
27Akatukile nakuya. Kaha aliwanyine nalunga kaEchopa#8:27 Uze lunga apwile nawa wakulutula, hakupwa kaselwa wakumuzachila mwangana namuchima wenyi wosena., kaselwa#8:27 Kaselwa uze vafwelela alame luheto lwamutu wamulemu chipwe lwalifuchi. kaKandese mwangana wavaEchopa wapwevo, muka-kumulamina luheto lwenyi lwosena, ou áfuminenga kuYelusalema kuze ayile nakulifukula kuli Kalunga.
28Omu apwile nakukinduluka, natwame mulitemba lyenyi teta-a, nakutanga mukanda wakapolofweto Isaya.
29Kaha Shipilitu alwezele Fwilipu ngwenyi, Yako, pandama kulitemba eli.
30Fwilipu alahilileko, kaha amwivwile ali nakutanga mukanda wakapolofweto Isaya. Kaha amuhulishile ngwenyi, Owo mazu uli nakutanga anakulumbunukila tahi?
31Kaha ambile ngwenyi, Naahasa ngachilihi kungulumbunukila? Kuvanga umwe angulumbunwinewo. Kaha amulembelelele Fwilipu anyine atwame nenyi.
32Chihanda chaMazu-vasoneka-ajila apwile nakutanga chikiko echi ngwavo,
Ngana muze apwa mukoko omu navamutwala kwakumujihila,
NaIkiye mukiko apwile hakumutwala kwakumujihila
Kaha nge muze ahola mwanamukoko kuli muka-kumuteula,
NaIkiye nawa aholele kulu#8:32 MuchiHelase ngwavo, kalokolwele mukanwako..
33Mukulinyisa chenyi, kavamusopesele mwaya chiyuloko,
Kaha iya mwahasa kulumbununa chisemunwino chenyi?
Mwomwo mwono wenyi vanaufumisaho hamavu.
34Uze lunga ambile Fwilipu ngwenyi, Ngunasake kuhulisa, ou kapolofweto ali nakuvuluka iya? Ali nakulivuluka ivene tahi? Nyi mukwavo weka?
35Kaha Fwilipu alokolwele mukanwa kenyi nakumwambulila mujimbu wamwaza waYesu, kuputuka naMazu-vasoneka-ajila awa ápwile nakutanga.
36Jino omu vapwile nakuya mujila vahetele kumeya. Kaha uze lunga ambile ngwenyi, Tala, meya awa, chuma muka nachinguhonesa kungujimika?
37[Fwilipu ambile ngwenyi, Nge unafwelela namuchima wove wosena nachihashiwa. Amukumbulwile ngwenyi, Ngunafwelela ngwami Yesu Kulishitu Ikiye MwanaKalunga.]
38Kaha avalwezele vemike litemba. Vosena vavali, naFwilipu nauze lunga, vashikumukile mumeya, kaha amujimikile.
39Omu vakandukile kufuma mumeya, Shipilitu yaMwata ahukwile Fwilipu. Kaha uze lunga kamumwene chekako, ayilenga mujila yenyi nakuwahilila.
40Oloze Fwilipu akasumukile ali kuAzotu. Kaha ahichilenga nakwambulula mujimbu wamwaza mumembo-akembwe osena palanga nomu ahetele kuKesaliya.
Currently Selected:
Vilinga 8: LUE
Highlight
Share
Copy
Want to have your highlights saved across all your devices? Sign up or sign in
Bible Society of Zambia
