Luka 22

1Henohu chawija chakudya mankendi akadi iluŋi, chi kweti ijina dapaseka, hichikuswila kwakwihi. 2Akulumpi jawatupristu niansoneki hiyakukeŋa hakumujahila, muloŋa atiyili antu woma.

3Satana hakwijila mudi Yudasi atumbawu ijina di kwawu daIsakaroti, wadiŋi wahekumi nayedi. 4Hakuya, hakutiyaloŋana nawawakulumpi jawatupristu niakulumpi janjita, mwakumuhena kudi wena. 5Atiya nikuwaha; hiyakutiyaloŋana nindi kumwinka mali. 6Yena hakwitiya, hakukeŋa hatela kumuhenena kudi wena hakadi izaza dawantu.

7Chidinashiki ifuku damankendi akadi iluŋi, dajahaŋawu paseka, 8hakutemesha aPetulu naYowanu nindi, Yenu namutuloŋesheli paseka, twakadyi. 9Wena hiyakumwihula nawu, Wunakeŋi tuloŋesheli kudihi? 10Yena hakuyila nindi, Chimukushika muŋanda, kukuyibulakana iyala nasendi nsaba yameji; mwakamulondi mwitala mwakwijila yi. 11Mwakamwili mwini itala nenu, Nkuluŋaŋa neliuli nindi, Itala dawenyi dinakadiila paseka nawatumbanji twami didihi? 12Yena wakayileja itala dahewulu deneni, mudi yuma yakupoŋomwena dehi; dimu mwakaloŋeshela. 13Hiyakuya, hiyakuwana mwomwayilejayi; aloŋesha nipaseka.

14Chiyinashiki mpinji, hakushakama hamu nawapostolu. 15Hakuyila nindi, Nafwili kudya nenu pasekiyi, hinichidi kanda nikabi. 16Muloŋa nukuyileja nami, kuyidya cheŋi, chiŋa yinalumbuluki dehi chalala muwanta waNzambi. 17Hakutambula lupasa, chanasakililiyi hakwila nindi, Tambulenu lwenilu munwi wejima wenu. 18Ami nukuyileja nami, kufumisha kulelu hinakanwa cheŋi yanyikabu yamuvinyuku, kunwa cheŋi, chiŋa wanta waNzambi wunenzi dehi. 19Hakunona dinkendi, chanasakililiyi hakudihumuna, hakuyinka, nindi, Weniwu diwu mujimba wami wanahanuwu hanyijimba yenwenu; ilenuŋa mwenimu muŋanakanaŋa nachu. 20Mwomumu nawa, cheliluwu anadyi dehi, hakunona lupasa nindi, Lupasilu dichi chitiyaŋenu chachiha chamumashi ami, awa akuyipwekela. 21Talenu, chikasa chanfukeji chidi hamu nachami hamesa. 22Muloŋa Mwana kamuntu chalala hakuya, mwomwatoŋweluwu dehi; o yihuŋu yakamona muntu wukumufukeja! 23Wena hiyakutachika kudihujola nawu mukwetwinyi wukwila chumichi?

24Mukachi kawu himukuvulumuka ntaai yakwila nawu mwinetwinyi aketejawu nawu nabadiki akwawu? 25Yena hakuyila nindi, Anyanta jawaJentili ayiyulaŋa; niakweti wanta mukachi kawu ayitenaŋa nawu akwakuwahisha akwawu. 26Ilaŋa enu bayi mwilaŋa omuku. Nabadiki akwawu mukachi kenu ekali neyi kansi, niwalema ekali neyi mukwakukalakela akwawu. 27Muloŋa nabadiki hinyi, wakalakalaŋa, tahindi iwu nashakami nakudya? Netu, iwu nashakami nakudya. Ilaŋa ami nidi mukachi kenu nimukwakukalakala.

28Enu munakakeli kushakama nanami mwanaŋesekuwu; 29ami nukuyikunjika wanta wenu, neyi chankunjikiluwu ami kudi Tata yami, 30kulonda mwakadyi nakunwa kumesa yami muwanta wami, mwakashakami hamatanda awanta nakusompesha nyuza yaIsarela ikumi nayiyedi.

31Eyi Shimona, Shimona, Satana nayilombi dehi kulonda ayisali neyi tidiku; 32ilaŋa ami nakulembeleli kulonda kukuhwelela kweyi kubulikukaŋanya. Nineyi, chiwakabalumuka mumuchima, wakakoleshaŋa ana kweyi. 33Petulu hakumwila nindi, Mwanta neteji kuya naneyi hela mukaleya hela tuhu kufwa. 34Hakumwila nindi, Eyi Petulu, nukukuleja nami, ikombu kwidikila lelu chiŋa eyi wunasambili dehi kudikala kasatu neyi hinamwiluka Yesuku.

35Hakuyila nindi, Chinayitemesheli chakadi hela chikwama hela ipakumuna hela nkwabilu, mwakaankilili chuma, tahindi? Nawu, Nehi. 36Hakuyila nindi, Ichi dinu, yowu wukweti chikwama asendi, niipakumuna chochimu; nabuli mpoku yakabali alandishi kahuma kindi kulonda alandi yimu. 37Muloŋa nukuyileja nami, chuma chasonekeluwu chakuntenami chakwila nawu, Amubombeli bamu nawakwakuputola; keŋa chilumbulukili mudami. Muloŋa nsaŋu jasonekawu dehi jejima jakuntenami keŋa jimani. 38Wena nawu, Mwanta, tala mpoku jatubali jiyedi ŋi. Yena hakuyila nindi, Jinawani.

39Hakwidika, hakuya kumpidi yaOliveta neyi chelilaŋayi; atumbanji niwena hiyakumulondela. 40Chanashikiyi kwayilaŋayi, hakuyila nindi, Lombenu mubuli kwijila mukweseka. 41Hakwambuka nawu kuleha neyi mwakunatila ilola, hakufukama nakulomba, 42nindi, Eyi Tata, neyi wuneteji anfumishi lupasilu; ilaŋa bayi ela munakeŋamuku, chiŋa muwunakeŋeyi. 43Hikukumumwekena kaŋelu wakufuma mwiwulu nakumukolesha. 44Hakulwisha nankashi, hakusweja kulomba; masulwilindi hiyakwila kafwampi neyi malekileki amashi aweni hiyakuholokela hamaseki. 45Hakunyamuka kukulomba kwindi, hakwinza kudi atumbanji, hakuyiwana anakami dehi tulu twakuneŋa. 46Hakuyila nindi, Munakaminidi tulu? Hindukenu mulombi, mubuli kwijila mukweseka.

47Iku wuchidi kuhosha, kutala izaza dawantu, ninowu wahekumi nayedi wukweti ijina daYudasi, natwaminuku. Hakwinza kwakwihi naYesu amupwepuli. 48Ilaŋa Yesu hakumwila nindi, Eyi Yudasi, wufukeji Mwana kamuntu nakupwepula? 49adiŋi nindi, chanamonuwu chakukeŋa kwilawu, hiyakwila nawu, Mwanta tutapani nampoku yakabali, tahindi? 50Mwinawu wumu hakutapa ŋamba yakapristu muneni, kutapa kwakumuketula itu dachidiilu. 51Yesu hakwila nindi, Nlekenu ntahi. Yokunka niitu dindi, yomukuswisha nikumukuswisha. 52Yesu hakuyila awakulumpi jawatupristu niakulumpi jamashidika akutembeli, niakulumpi jawantu enjili nakumukwata, nindi, Munenzi nampoku jatubali nanyitondu neyi chakukwata ikombi? 53Chinadiŋi nenu mutembeli hefuku hefuku, enu himwolweli makasenu nakunkwataku. Ilaŋa iyi himpinji yenu, hiŋovu yamwidima.

54Hiyakumukwata, hiyakumutwala nakumwiŋija mwitala dakapristu muneni. Petulu hakulondela hahalehi. 55Chanabutuluwu kesi muchipaŋu, hiyakushakama hamu, Petulu niyena hakushakama nawu. 56Chaŋadima wumu chanamumoniyi nashakami kuchejeji chakesi, hakumushinshika nindi, Iwu muntu niyena wadiŋi nindi. 57Yena hakudikala nindi, Eyi mumbanda, hinamwilukaku. 58Chihanalehi chanti, mukwawu hakumumona, nindi, Nineyi wumwinawu. Petulu nindi, Eyi iyala, ami hinimwinawuku. 59Chihanahiti neyi mpinji yimu, mukwawu hakumulamata nindi, Iwu muntu, chalala wadiŋi nindi, muloŋa niyena hikaŊaliliya. 60Petulu nindi, Eyi iyala, ami kwami kwiluka chiwudi nakuhosha nehi. Iku wuchidi kuhosha, ikombu edikila nikwidikila. 61Mwanta hakushetumuka, hakumutala Petulu. Petulu hakwanuka mazu aMwanta amwililiyi nindi, Lelu hakela ikombu wuchidi kanda edi kili, wakadikala kasatu neyi hinamwilukaku. 62Hakwidika muchipaŋu nakudila chacheni.

63Amayala adiŋi amukwata Yesu hiyakumuseha nikumweta. 64Amukasa niihina hamesu, hiyakumwila nawu, Profwetaku! Nakweti hinyi? 65Amuhosheli chatama yuma yi kwawu yayivulu, nikunamutuka.

66Chikunachi awakulumpi jawaYudeya hiyakupompa nawawakulumpi jawatupristu niansoneki; hiyakumutwala muchota chawu, 67nawu, Neyi wuKristu, tuleji. Hakuyila nindi, Neyi nukuyileja, himukwitiyaku. 68Hela nukuyihula, himukuŋakulaku. 69Kufumisha hanu, Mwana kamuntu akamushakamisha kuchikasa chaNzambi chachidiilu chaŋovu. 70Wejima wawu hiyakwila nawu, Komana, eyi wuMwana kaNzambi? Yena nindi, Mwomwenomu mumunahoshi, muloŋa dichi chinidi. 71Wena nawu, Tukeŋi nawa wunsahu wukwawu? Tunamutiyi dehi etu aweni kukanwa kindi yomweni.

Currently Selected:

Luka 22: MW62

Highlight

Copy