Shitatiko 21
21
Kuhemuwa kwa Ishaki
1Nyambi ya Ngula watandalishile Shala ngonehe amukulupishile. 2#Bah 11:11. Shala wemitile na kubelekela Abulahama mwana wa mulume oho wakulumpalakale. Kanuke wahemuwile hashikati shiyo Nyambi atoyele ngayi nisho akahemuwa. 3Abulahama wamutumbile lizina ngayi Ishaki. 4#Shit 17:12; Mil 7:8. Niho Abulahama atwalile mwanendi Ishaki ku mukanda oho ekalile na matena mutanu na ahatu. Ngonehe Nyambi amutongwezele. 5Abulahama wekalile na myaka 100 oho mwanendi Ishaki ahemuwile. 6Shala wambile ngayi, “Nyambi unandetele ku wahilila na mahepo. Nimwendi ou ukayuvwako ukahepeshako.” 7Niho atwalilileho kwamba ngayi, “Yani watweshele kwamba kuli Abulahama ngayi Shala ukayamwisha? Ngoboni namubelekele mwana wa mulume oho wakulumpalakale.”
8Kanuke Ishaki wakulile, pe ha mutena uya ahumukile, Abulahama wapingile shimbo shashinene.
Hangali na Ishimaele ba kutandiwa
9Mutena umo Ishimaele ou abelekele Hangali wa Kaengepita kuli Abulahama walihengamininenga na Ishaki mwana Shala. 10#Nga 4:29, 30. Shala wabamonene niho ambile kuli Abulahama ngayi, “Tanda ou mbuyama wa ndungo na mwanendi, ndaba ou mwana mbuyama wa ndungo ku fwanina kukona shitapilo sha wuheti wobe wufwako, ou akakona mwanami Ishaki.” 11Eshe shayandishile shikuma Abulahama ku mutima ndaba na Ishimaele wengile mwanendi. 12#Lom 9:7; Bah 11:18. Ngoboni Nyambi wambile kuli Abulahama ngayi, “Hinga ulikekula ndaba ya ndumbana wobe na hali ndungo wa mbuyama wobe. Tenda eshe nimwasho akukutongweza mukazobe Shala ndaba muli Ishaki nimo ukawana bazukulu na ku kulupishile. 13Nikapana bana babengi kami kuli mbuyama wa ndungo, ngayi mwanga benge litunga, kami na niye unengi mwanobe.”
14Oho kwashile lumenemene Abulahama wapanikile byakulya kuli Hangali na mpamba ya kwinzala ya mema. Wamutwikileyo ha shifuzi shendi, wamupanikile na mwana naku mu mfunzula. Hangali wayile na kuyambangila mu libelelengwa lya Mbelishemba. 15Oho mema nimwawo amumaninine, washiyile kanuke mu nceto ya lipukumuna. 16Niho Hangali akekalilile ha kantabule ha kushinga kulingana mamita 100 nanaha hekalile kanuke, ndaba walyambashanine ngayi, “Kushinga ku mona eshe akufwa mwanami nifwako.” Oho ushili kwikala kuyo Hangali#21:16 Hangali: Kutontolola kwamina kwa mwaka ngayi mwana. watatikile kulila.
17Nyambi wayuvwile kulila kwa kanuke, pe lingeloyi lya Nyambi kuyilu lyambile ngayi, “Obe Hangali, kati bishini shikukuyandisha? Hinga ulikekula. Nyambi unayuvwu kulila kwa kanuke. 18Katuka, umupindule na kumumwenesha. Nikatenda mushobo wawunene ha bazukulyendi.” 19Niho Nyambi atoneshele meho a Hangali pe wamonene lishima lya mema. Wayile na kwinzalisha mpamba na mema pe wanwishilemo kanuke. 20Nyambi wekalile na kanuke oho akulilenga, pe wazikile mu libelelengwa lya Palani na kwinga shibinda wawunongi. 21Mandiyendi wamuyekelele mbuyama waku Engepita.
Kuliyuvwashana mukati ka Abulahama na Ambimeleki
22 #
Shit 26:26. Ha shikati shiyo Ambimeleki na Fwikole mukulwane wa bakanzita bendi bayile kuli Abulahama, bambile kukwendi ngayi, “Nyambi uli hamo na nobe mu byuma nimwabyo ukutenda. 23Haya libeze kukwami mu lizina lya Nyambi ngayi wufwako kunyongeza na bana bami hinge bazukulyami, nengi wakulunga kukwobe nohobene nkulupishe ngayi ukenga wakulunga kukwami na litunga lino unaziki.”
24Abulahama wambile ngayi, “Nikukulupisha kutenda noho.”
25Ngoboni Abulahama walinyengele kuli Ambimeleki bya lishima elye ba muyangwile bakamilimo ba Ambimeleki. 26Ambimeleki wambile ngayi, “Kulimuka ou watendele eshe nifwako, kaliha wantongwezele haneshe, pe kami eshe nisho shikati sha kutatika kushiyuvwa.” 27Niho Abulahama ashimbile bamo bambelele na zingombe na kupanika Ambimeleki, kami wubili wabo baliyuvwashanine. 28Abulahama watapulwile bana babambelele mutanu na babili kufuma mu litanga lyendi.
29Ambimeleki wepwile Abulahama ngayi, “Kati eshe shuma shikutontolola bishini, hanaba bana babambelele unatapululu?” 30Abulahama wakumbwile ngayi, “Eshe shikutontolola ngayi hanaba bana babambelele mutanu na babili ukushimba kukwami, kwinga wupaki ngayi ami nakabile elye lishima.” 31Nohobene mbalila iyo yatumbiwile ngayi Mbeleshemba.#21:31 Mbeleshemba:Lizina elye likununguluka mu shihebelu ngayi “Lishima lya kulibezela” hinge “Lishima lya mutanu na abili” (penza kami 26:33).
32Aha bamanishile kuliyuvwashana ku Mbelishemba, Ambimeleki na Fwikole mukulwane wa bakanzita bendi babokele ku litunga lya Fwilishitina. 33Niho Abulahama atampikile mutondo wa Tamalishika mu Mbelishemba na kulemesha Nyambi ya Ngula, Nyambi wa mwaya myaka. 34Abulahama wazikile shikati shashitali mu litunga lya Fwilishitina.
Currently Selected:
Shitatiko 21: LLK
Highlight
Share
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
