Fuɗɗoode 17
17
No innde Abram waylitorii Ibrahiima
1Nde Abram hewtunoo duuɓi 99 ndeen, Joomiraaɗo ɓangani ɗum wi'i:
— Miin woni Laamɗo Jom Baawɗe. Njokkaa laawol am, laatoɗaa ponnditiiɗo. 2Mi waɗan amaana hakkunde am e maaɗa, mi ɗuuɗinan ƴuwdi maa sanne.
3Abram hippi yeeso muuɗum dow leydi. Laamɗo haaldi e makko katin wi'i:
4— Inan amaana mo ngaddammi e maaɗa: A laatoto baaba lenyi keewɗi. 5A noddirtaake Abram katin, de joonin kaa, innde maa laatake Ibrahiima#17:5 Abram na fiirta «Baaba tedduɗo», Ibrahiima na fiirta «Baaba heewɓe». sabo mi waɗete baaba lenyi keewɗi. 6Mi ɗuuɗinan ɓeyngu maaɗa sanne, mi waɗe lenyi keewɗi. Kaanankooɓe njaltan e maaɗa. 7Mi tabintinan amaana hakkunde am e maaɗa e ƴuwdi maaɗa ley jamaanuuji muɓɓen fuu. O laatoo amaana duumotooɗo faa abada. Mi laatoto Laamɗo maaɗa, aan e taaniraaɓe maa caggal maaɗa. 8Mi hokkete aan e ƴuwdi maaɗa ngaroori caggal maa, leydi ndi laatinoɗaa beero ley muuɗum ndiin ɗum woni leydi Kanaana. Leydi ndiin fuu laatoto jeyal maaɗa faa abada. Wooɗi miin du, mi laatoto Laamɗo ƴuwdi maaɗa.
9Laamɗo haaldi e Ibrahiima katin, wi'i ɗum:
— Aan kaa, njogoɗaa amaana am oon, aan e ƴuwdi maaɗa ngaroori caggal maa ley jamaanuuji muɓɓen fuu. 10Inan amaana hakkunde am e maaɗa mo njeyɗaa jokkude aan e ƴuwdi maa ngaroori caggal maaɗa: Taadon ɓiɓɓe worɓe fuu. 11Taadol ngool laatoo maande amaana gonɗo hakkunde am e mooɗon oon. 12Ley jamaanuuji fuu, nde ɓiɗɗo gorko rimaa faa hewti balɗe jeetati fu, taadon ɗum. Noon ngaɗanton ɓii maccuɗo dimaaɗo ley ɓaade mooɗon e maccuɓe ɓe cooduɗon laatii yimɓe mooɗon fuu. 13Ndelle maccuɗo dimaaɗo ley ɓaade maaɗa e mo cooduɗaa fuu taadee faa amaana am oon tawee e ɓalli mon de laatoo amaana duumotooɗo faa abada. 14Gorko mo taadaaka fu ittete e yimɓe muuɗum, sabo joomum bonnii amaana am oon.
15Laamɗo haaldi e Ibrahiima katin, wi'i ɗum:
— Saaray deeka oon du, taa noddiraa ɗum Saaray katin. Joonin kaa, Saaratu woni innde makko (ɗum na fiirta «ɓii laamu debbo»). 16Mi barkinan o, mi hokkete ɓiɗɗo gorko ƴuuroowo e makko. Mi barkinan o, o laatoto inna lenyi keewɗi. Laamiiɓe lenyi keewɗi njaltan e makko.
17Ibrahiima hippi yeeso muuɗum dow leydi de jali. O wi'i ley ɓernde makko:
— Gorko mo duuɓi 100 na waawi rimude katin naa? Yalla Saaratu mo duuɓi 90, na waawi heɓude ɓeyngu katin naa?
18Ibrahiima haaldi e Laamɗo, wi'i:
— Ko ŋaarotoomi woni Ismaa'iila wuura yeeso maaɗa.
19Laamɗo jaabii, wi'i:
— Wanaa noon! Saaratu deeka oon jaati rimante ɓiɗɗo gorko. Inndiraa mo Isiyaaka. Mi tabintinan amaana hakkunde am e makko, de amaana oon laatanto taaniraaɓe makko ley jamaanuuji fuu faa abada. 20Ko mbiiɗaa e Ismaa'iila ɗuum, mi jaɓanii ma. Mi barkinan o. Mi hokkan o ɓeyngu, mi ɗuuɗinan ƴuwdi makko sanne. O laatoto baaba laamotooɓe 12. Mi waɗan mo lenyol manngol. 21Ammaa amaana am oon kaa, e Isiyaaka mo Saaratu rimante mawuuri ley wakkati oo tabintinanmi ɗum.
22Nde Laamɗo selnoo haaldude e Ibrahiima fu, dilli.
23Ibrahiima hooƴi Ismaa'iila ɓiyum gorko oon, e rimaaɓe ley ɓaade muuɗum e ɓe soodi ɓeen fuu. O hooƴi worɓe galle makko fuu, o taadi ɗum'en nyalooma oon hono no Laamɗo wi'iri mo noon. O taadi hoore makko du. 24Nde Ibrahiima taadotonoo ndeen, duuɓi muuɗum wo 99. 25Ismaa'iila ɓiyiiko oon du duuɓi muuɗum wo 13 de taadaa. 26Nyalooma oon pay, Ibrahiima e Ismaa'iila ɓiyum oon taadodii. 27Worɓe ɓaade makko e maccuɓe worɓe rimaaɓe ley ɓaade makko e ɓe o soodi to yananɓe fuu, taadodii e makko.
Currently Selected:
Fuɗɗoode 17: FBF
Highlight
Share
Copy
Want to have your highlights saved across all your devices? Sign up or sign in
© SIM International 2012, 2022
