மத்தேயு 7
7
மத்தோருன நேயதீர்சுவுது
(லூக்கா 6:41–42)
1நீமு மத்தோருன குத்தவாளிகோளு அந்து நேயதீர்சுலாங்க இருரி. ஆக தேவரு நிம்முன குத்தவாளிகோளு அந்து நேயதீர்சுலாங்க இருவுரு. 2ஏக்கந்துர நீமு மத்தோருன ஏங்கே நேயதீர்சுத்தாரியோ அது மாதரயே தேவருவு நிம்முன நேயதீர்சுவுரு. நீமு ஏ அளவுன மடகி மத்தோருன நேயதீர்சுத்தாரியோ தேவரு ஆ அளவுன மடகியே நிம்முனவு நேயதீர்சுவுரு. 3நிய்யி நின்னு கண்ணுல மரகட்டெ மாதர இருவுது தொட்டு குத்தகோளுன நோடுலாங்க நின்னு கூடவுட்டிதோனு மாதரயிருவோனு கண்ணுல தூசி மாதர இருவுது சின்னு குத்தான நோடுவுது ஏனு? 4இல்லாந்துர நின்னு கண்ணுல மரகட்டெ மாதர இருவுது இருவாங்க நின்னு கூடவுட்டிதோனு மாதரயிருவோனொத்ர அவுனோட கண்ணுல இருவுது தூசின எத்திபுடாட்டு அந்து ஏங்கே ஏளுவாரி? 5வெளிவேஷகாரனே, மொதல்ல நிய்யி நின்னு கண்ணுல இருவுது மரகட்டெ மாதர இருவுதுன எத்தி ஆக்கு. அப்பறா நின்னு கண்ணு சென்னங்க தெளிவுதுனால நின்னு கூடவுட்டிதோனு மாதரயிருவோனோட கண்ணுல இருவுது தூசின எத்தி ஆக்குவுக்கு முடுஞ்சுவுது. 6தேவரியெ அந்து மடகியிருவுது சுத்தவாதது எதுனவு நாய்கோளியெ கொடுபேடரி. கொட்டுரெ அதுகோளு நிம்முன கச்சுவுக்கு திருசி பருவுது. நிம்மு முத்துகோளுனவு அந்திகோளு முந்தால ஆக்குபேடரி. ஆங்கே ஆக்கிரெ அதுகோளு அதுகோளோட காலுகோளுனால அதுன மெட்டுவுது.
கேளு, தேடு, தட்டு
7கேள்ரி, ஆக நிமியெ கொடுவுரு. தொளாவுரி, ஆக கண்டுயிடிவுரி. தட்டுரி, ஆக நிமியெ தெகெவுரு. 8ஏக்கந்துர கேளுவோனு எவுனுவு ஈசிகோத்தான. தேடுவோனு எவுனுவு கண்டுயிடித்தான. தட்டுவோனு எவுனியெவு தெகெவுது. 9நிம்முல யாராசி அவுனொத்ர ரொட்டின கேளுவுது அவுனோட மகனியெ கல்லுன கொடுவுனா? 10அவ மீனுன கேளிரெ அவுனியெ பாம்புன கொடுவுனா? 11அதுனால, மோசவாதோராங்க இருவுது நீமே நிம்மு மக்குளுகோளியெ ஒள்ளி பொருளுகோளுன கொடுவுக்கு தெளுது இருவாங்க சொர்கதுல இருவுது நிம்மு அப்பாவாத தேவரு அவுரொத்ர வேண்டுவோரியெ ஒள்ளிதுன கொடுவுது ஏசு நிச்சியா? 12அதுனால மனுஷரு நிமியெ ஏனு மாடுபேக்கு அந்து விரும்புத்தாரியோ அதுன நீமு அவுருகோளியெ மாடுரி. ஏக்கந்துர இதுத்தா யூதமத சட்டகோளாங்கவு, தேவரொத்ர இத்து பருவுது மாத்துகோளாங்கவு இத்தாத.
குறுகலாங்க இருவுது தாரிவு, அகலவாத தாரிவு
13குறுகலாங்க இருவுது பாக்குலு வழியாங்க ஒழக ஓகுரி. ஏக்கந்துர நம்முன அழிவியெ கொண்டுகோண்டு ஓவுது பாக்குலு அகலவாங்கவு, தாரி விசாலவாங்கவு இத்தாத. அது வழியாங்க ஓவோரு தும்ப ஆளுகோளு. 14ஆதர நெஜவாத பதுக்கியெ ஓவுது பாக்குலு குறுகலாங்கவு, நெருக்கவாங்கவு இத்தாத. அது வழியாங்க ஓவோரு கொஞ்ச ஆளுகோளுத்தா.
15தேவரொத்ர இத்து பருவுது மாத்துன ஏளுவோரு அந்து பொய்யாங்க ஏளுவோருன பத்தி கவனவாங்க இருரி. ஏக்கந்துர அவுருகோளு ஏ கெடுதலுவு மாடுலாங்க இருவுது குரிகோளு மாதர தோர்சுவுக்கு குரிகோளோட தோலுன ஆக்கிகோண்டு நிம்மொத்ர பருவுரு. ஆதர அவுருகோளோட மனசுல அவுருகோளு குரிகோளுன கச்சி தின்னுவுது ஓநாய்கோளு மாதர இத்தார. 16கொடுவுது அண்ணுகோளுல இத்தே அது ஏ மரா அந்து தெளுகோம்புது மாதர அவுருகோளு மாடுவுது காரியகோளுல இத்தே அவுருகோளு யாரு அந்து நீமு தெளுகோம்புரி. முள்ளு கிடகோளுல இத்து திராச்செ அண்ணுகோளுனவு, முள்ளு பொதருல இத்து அத்தி அண்ணுகோளுனவு கிழுவுரா? 17அது மாதரயே ஒள்ளி மரகோளு ஒள்ளி அண்ணுகோளுன கொடுவுது. ஆதர கெட்ட மரகோளு கெட்ட அண்ணுகோளுன கொடுவுது. 18ஒள்ளி மரா கெட்ட அண்ணுகோளுன கொடுனார்து. கெட்ட மரா ஒள்ளி அண்ணுகோளுன கொடுனார்து. 19அதுனால ஒள்ளி அண்ணுகோளுன கொடுனார்த மரகோளுன எல்லா பெட்டி கிச்சுல ஆக்குவுரு. 20அதுனால அவுருகோளுன அவுருகோளு மாடுவுது காரியகோளுல இத்தே தெளுகோம்புரி.
21சொர்கதுல இருவுது நன்னு அப்பாவாத தேவரு விரும்புவுது மாதர மாடுவோனுத்தா சொர்கதோட ஆட்சியொழக பருவா. ஆதர நன்னுன நோடி சும்முக்கு ஆண்டவரே ஆண்டவரே அந்து ஏளுவோனு ஆ ஆட்சியொழக பருனார்ரா. 22தேவரு நேயதீர்சுவுது தினதுல தும்ப ஆளுகோளு பந்து நன்னொத்ர, “ஆண்டவரே, ஆண்டவரே அதிகாரா இருவுது நிம்மு பேரு மூலியவாங்க தேவரொத்ர இத்து பருவுது மாத்துன ஏளிரிதான? அதிகாரா இருவுது நிம்மு பேருன ஏளி பேய்யிடுதோரொத்ர இத்து பேய்கோளுன ஓடுசிரிதான? அதிகாரா இருவுது நிம்மு பேருனால தும்ப அற்புதகோளுன மாடிரித்தான?” அந்து ஏளுவுரு. 23ஆக நானு அவுருகோளொத்ர, “ஏவாங்குவு நிம்முன நனியெ தெளினார்து. தேவரியெ விருப்பவிருனார்த காரியகோளுன மாடுவோராத நீமு நன்னுனபுட்டு ஓகுரி அந்து ஏளுவே.
மனெ கட்டித எரடு ஆளுகோளு
(லூக்கா 6:47–49)
24அதுனால நானு ஏளித ஈ மாத்துகோளுன கேளி அது மாதர மாடுவோனு, அவுனோட மனென பாறெ மேல கட்டித புத்திசாலியாத ஆளு மாதர இருவா. 25தொட்டு மழெ ஒய்து, தொட்டு பெள்ளா பந்து, காளி பீசி ஆ மனெ மேல மோதிரிவு அது இடுஞ்சு பிழுலா. ஏக்கந்துர ஆ மனெயோட அஸ்திபாரா பாறெ மேல ஆக்கி இத்துத்து. 26நானு ஏளித ஈ மாத்துகோளுன கேளி அது மாதர மாடுலாங்க இருவோனு அவுனோட மனென மணலு மேல கட்டியிருவுது முட்டாளு மாதர இருவா. 27தொட்டு மழெ ஒய்து, தொட்டு பெள்ளா பந்து, காளி பீசி ஆ மனெ மேல மோதுவாங்க ஆ மனெ இடுஞ்சு பித்துத்து. அதோட அழிவு தும்ப தொட்டுதாங்க இத்தாத” அந்தேளிரு. 28யேசு ஈ மாத்துகோளுன ஏளி முடுசுவாங்க, அவுரு யூதமத சட்டான ஏளிகொடுவோரு மாதர ஏளிகொடுலாங்க அதிகாரதோட அவுருகோளியெ ஏளிகொட்டுதுனால 29ஜனகோளு அவுரு ஏளிகொட்டுதுன பத்தி ஆச்சரியபட்டுரு.
Currently Selected:
மத்தேயு 7: KFI
Highlight
Share
Copy
Want to have your highlights saved across all your devices? Sign up or sign in
@New Life Computer Institute
