Juwawu 12

Mariya ohozoliha perefume manyalo a Yesu

Matewuji 26:6-13; Markuji 14:3-9

1Malambo matanu na nimohi Pwando ya Mavirelo yahanaireye, Yesu ohodowaga tatamo ya Betaniya wewo wafwanyeya Lazaro wenno Yesu anvenyihile liye mokwani. 2Agafiyile wewule kohomupiyela Yesu jantari. Lazaro ali vameza#12:2 ali vameza: Owu hehi agonatile vameza. Tchoira tempu yenno atu kadjaga, kadjetcha vameza yokwiva kagali ogonatene. vevale vamohi na Yesu. Vameza vale asirivirivo ali Marta. 3Muwari mwa mwemule Mariya ohozagana garafwa mwagali perefume onukela osakanyiwa na mwana yomela imohi bahi yeriwa nardu wa peresu yokwima. Evale ohotukulaga perefume ule, mukutulela watene vamanyaloni va Yesu, tukula nsisi naye muzolihagana manyalo aye. Evale mmba mwatene emule mohozalaga nukela wa perefume ule. 4Mbwenye Judasi Iskariyoti namamuhara wenno afuna muguliha Yesu, ohowongaga eraga: 5<<Perefume wenna unagulihiwa kobiri da parata 300. Nnga ahagulihilege, amala kobiriwa adowa aavaha aliba simela?>> 6Para Judasi Iskariyoti awonge enne liye kaabalra aliba simela. Liye ali mbava. Liye gwakayetchana pasta mwemo mwakaletcha kobiri. Mwa enne otukuletchamo kobiri ya vang'ono ira ikale yaye. 7Yesu mbwenye ohomuwakula eraga: <<Nari, kamuhiye Mariya erena mofuna mwaye mwasiwa liye unavayela disakanyeda miyo ira siku nnafuna miyo koyiwa, dikale osakanyedeyene. 8Tchoira aliba simela anakalegeve na nyo#Detoronomiyo 15:11 mbwenye miyo kannakalegeve na nyo.>>

AJudewu kohelavo zelru ira Lazaro apiwe

9Vevale mwindji wa aJudewu oindjiva kohovwaga ira Yesu uli tatamo ya Betaniya. Mwa enne kohovenya kadowaga wewule. Mbwenye aliwa tchadowela ira kagumane na Yesu bahi, kafuna eto ira kamuone Lazaro wenno Yesu amuvenyihile liye mokwani. 10-11Mwa enne aJudewu adjindji, na mwasa omuona Lazaro wenno Yesu anvenyihile liye mokwani, kohomuroromela Yesu. Evale andimuwa a anamakuta kohelagavo zelru ira: <<Yapamiwa eva, kanimpe Yesu bahi. Na Lazaro wenne, ndoweni nimpeni.>>

Yesu ohovolowa Jeruzalemu

Matewuji 21:1-11; Markuji 11:1-11; Lukaji 19:28-40

12Mmetcheloni muwa Yesu ohovenya, adowaga Jeruzalemu. Mwa enne atu oindjiva anno kadowilege pwandoni ule, kagavwile ira: <<Yesu unademula sidadi ya Jeruzalemu ila>>, 13kohokasaga tambi da minazi,#12:13 tambi da minazi dalaba ira katande, Yesu aviremo. Ku wonga aliwa kohomuwatchela nnga mwene. Nione Matewuji 21:8. aliwa muharelaga ira kagumane na liye, kakuwaga keraga: <<Hozana!#12:13 Hozana! Atu kamuwatchelaga Yesu keraga: <<Hozana!>>, kamuwatchela nnga mwene. Hozana ku wonga ira: <<Nabwiya munivuluse.>> Muwari mowonga: <<Hozana! Hozana!>>, kahi ira atwale kafuna nnga kaleveleliwe jotega jiwa. Ku wonga aliwa kafuna Yesu akale mwene wewa ira kahatongiwegeve na aRoma. Orelihiwa gu Mwene wa Izarayeli wenno unaza na nzina na Nabwiya.>>

14Yesu ohosaka mwana buru, liye gwelavo, avolowaga Jeruzalemu, mokwakwaneliheda yenno ilrembiwe mMazuni ira:

15 <<We namwali mwana wa Siyawu, #12:15 Namwali wa Siyawu: Siyawu gu mwango wenno wamangiwe sidadi ya Jeruzalemu. (Izaiya 10:32) Namwali wa Siyawu unawongiwa ba akuda Jeruzalemu. kuove! Kaing'ana! Mwene wawo unaza, agagwenle vazulu va mwana buru!>>

16Mbwenye anamamuharaye tchawandile onelramo ira jejile jakwakwaneliheda mazu kalrembiwe wanle. So kazile onelramo Yesu agadowile zulu, agatitimihiwe. Mwa enne paiziwile atu ira: <<Jatene jalrembiwe wanle jamuwonga liye eto ti jejo jamuireyele.>>

AFarizewu kohogomiwa niso na mwasa oira atu oindjiva katamangela wa Yesu

17Fwanyeya ira anamwindji atene kaligi vevale tempu Yesu anvenyihaga liye mulombwana Lazaro mokwani nifukweni ule, kohawandela amohi kahalivo zela jatene jaireyile ira na ibaribari Yesu ohonvenyiha Lazaro mokwani. 18Mwa enne atu adjindji kohodowaga ira kagumane na Yesu na mwasa wa jionihedo javwile atu zela venyihiwa wa Lazaro ule. 19Vevale aFarizewu kagaaonne atu oindjiva kamutamangelaga Yesu, kohoroma wonga oka oka keraga: <<Alombwana, hiyo kannawanda ira yengo. Kaing'anani, atu atene anamuhara mutule!>>

AGerego amohiwa kafunafuna jongumanana Yesu

20Muwari mwa ale kazile dja pwando ya Mavirelo, vohofwanyeya atu amohi ohokala aJudewu anno kali aGerego. 21Evale aliwa kohodowa wonga na Filipi wenno ali wa sidadi ya Betisayida muwari mwa porovinsiya ya Galileya, atu kwi: <<Andimuwa, hiyo nnafuna nimuone Yesu.>> 22Filipi agavwile mazwale, ohodowa muwandela Andire, aliwa venya vamohi dowa muwandela Yesu ira: <<Kohokalawo aGerego anafuna kauoneni.>>

23Kagamuwandenle Yesu, liye ohawakula eraga: <<Ihifiya tempu ira atu kaone undimuwa unna Mwana wa Mutu. 24Miyo nnafuna duwandeleni ibaribari. Tanga imohi ya tirigu yahatatileliwe vati, inakalave tanga imohi yenno. Mbwenye yatatileliwa vati amala ivunda, imela, tangeyo inobaliha tirigu mudjindji.>> 25Noira eno, ohowongagave eraga: <<Mutu wenne unaziveliwa ingumi yaye unoyelela ingumi, mbwenye mutu wenne unaida ingumi yaye mwilamboni ya vati unokana ingumi ya ibaribari yohomala. 26Ule unafuna dilaba, adihare. Wewo unakalege miyo na liyene unerege kala wewo. Ule unadilaba, Baba unomutetela.>>

Yesu oholaleya zela kwa waye

27Yesu ohowongaga ira: <<Murima waga uhukana kumbanya ulukulu. Nnga masiki dinnave kumbanya, miyo nnafuna dire avi? Kodi dogomuwongana Mulugu ira: <Mulugu dikumihedenimo goyi dinna miyo?> Nari. Mwasiwa miyo dizaga, dazele ona goyi dedi.>> 28Evale Yesu ohonvepa Mulugu ira: <<Muwari mwa goyi nnafuna miyo ona, Babani aoniheni atu undimuwa wa nzina nenyu.>> Agairile enne zulu wohokumaga mazu oira: <<Dihimala aoniha atu undimuwa wa nzina naga eto nnoza daaoniheve akoka.>> 29Mbwenye atwale kaligi vevale kagavwile nizu nne, amohiwa kohowongaga ira: <<Tchi ndari.>> Amohiwa kohoiraga: <<Gu mungelro wa Mulugu awonga na Yesu.>>

30Mbwenye Yesu ohawakula atwale, liye ira: <<Nizu ni kanizele na mwasa wa miyo, mbwenye nizele ira mukayena ibaribari. 31Ihifiya tempu ira ilambo ya vati itongiwe eto mwene unakala vati vano agondjihiwe. 32Mbwenye miyo mwadiona ditomeyiwaga vazulu, nnoaziha atu atene wa miyo.>> 33Yesu awongaga zela tomeyiwa vazulu, awonga zela makalelo afuna liye kwa mokomeliwa vamuradini.

34Evale anamwindji kaligi evale kohomuwakulaga ira: <<Hiyo mmalamuloni nnavwetcha ira Namatikeliwa unokalawo kala no kala. Nnga nyo munawanda avi wonga ira: <Inafwanela Mwana wa Mutu atomeyiwe.>? Mwana wa Mutu unafuna tomeyiwa guvi?>> 35Evale Yesu ohawakula eraga: <<Moneya unakala muwari mwa nyo ora ya vang'onove bahi. Muwendegena moneya tempu inafwanyeya liye na nyo eni, tawiha ira isi inaufwanyeni. Tchoira ule unawenda na isi kanaiziwa unadowa liye. 36Moneya uli liye na nyo eni inafwanela mmuroromelege ira muwande kala ahima a mowareyani.>> Yesu agamanle wonga ejo, ogundeya, liye dowa vikoya ira kahamuone.

Atu kagaonne jairile Yesu, oindjiva tchamuroromela

37Mbwenye masiki Yesu airilenave jionihedo jidjindji vamentoni va atwale, aliwa tchamuroromela. 38Ejo ali ira jikwakwanelihede mazu kawongiwe na namafiyiheda Izaiya ira:

<<Nabwiya, kalivo uroromenle muselu nilaleyile hiyo. Eto nne kalivo Nabwiya umuonihile liye muwono waye!>>

39Nona atwale tchawanda muroromela Yesu. Kalaga nnga mazu amohiwa kalrembiwe na namafiyiheda Izaiya, oira:

40 <<Mulugu uhaatimiha meso ewa eto Mulugu uhummiha mirima diwa tawiha ira anaze kaonege na meso ewa eto tawiha ira anaze kaonelremo na mmirimani mwewa ira katwaruwe ira miyo daavulumutche.>>

41Ira Izaiya awonge mazu anne mwasiwa ohoona undimuwa wa Yesu, nona awanda wonga zela liye.

42Masiki eno, kohokalawo andimuwa a aJudewu oindjiva kamuroromela Yesu. Aliwa mbwenye tchawanda wonga vatando vene mwasiwa aliwa koaova aFarizewu ira anaze kaatamangihemo muwari mwa nyumba yofundjamo Mazu. 43Mwasiwa andimuwale kali atu kasimbwa ziveliwa bure titimihiwa na mutu kwaranya titimihiwa na Mulugu.

Yesu kwi: <<Ule unadiroromela miyo unamuroromela na wenne udirumile.>>

44Yesu ohowongaga na mazu okuwa eraga: <<Ule unadiroromela miyo, kanadiroromela miyo ve bahi. Unamuroromela na wenno udirumile. 45Ule unadiona miyo, unamuona eto na wenno udirumile. 46Miyo dizile mwilamboni ya vati ira dimoneye ira ule unadiroromela miyo ahakaleve muisini.

47<<Ule unavwa mazwaga, amala atatila, miyo kannamutonga. Tchoira za dizile miyo, kadizele ira ditonge ilambo ya vati. Dizile ira daavuluse atu a ilambo ya vati. 48Mbwenye ule unadikonda miyo, ule ahanafuna rumela mazwaga, siku nogomiheda anafuna za mmanga mulandu ba mazu anawonga miyo. 49Tchoira miyo kannawonga mazu aga. Nnawonga mazu a Baba wenno udirumile. Nnawonga jidiwandenle liye. 50Miyo dihiiziwa ira nlamulo na Baba nnovaha ingumi yohomala. Nona jinawonga miyo, jatene nnawonga nnga mwemo Baba mudiwandenle liye.>>

Currently Selected:

Juwawu 12: iLolo

Highlight

Copy