Juwawu 11

Kwa wa Lazaro

1Ohokalawo mulombwana mmohi afwanyeya agali murenda, nzina naye aitaniwa Lazaro. Akala tatamo ya Betaniya. Arongoliye ali Mariya na Marta anno kakala tatamo imohive. 2Mariyiwa ali wenno afuna za kutulela perefume manyalo a Nabwiya, ampuputaga na nsisi naye. 3Evale Lazaro agaromile bulela, arongoliye kohorumiha mpanganyo wali Yesu ira: <<Nabwiya, nfwinyu Lazaro, wenno munamuziveletcha nyo, unafwanyeya agali murenda.>> 4Yesu agavwile enne, ohowonga, liye ira: <<Dihiiziwa ira urenda Lazaro unna liye, kahi urenda oira unokwana. Urenda waye unalaba ira undimuwa wa Mulugu uoneye. Ili ira Mwana wa Mulugu, ateteliwege mozela urenda unna Lazaro.>> 5Fwanyeya ira Yesu omuzivela Marta na mbalaye Mariya vamohi na murongoliwa Lazaro. 6Mbwenye agavwile ira: <<Lazaro murenda.>> kabaranyedile yawo. Ohodibeliwagave malambo menli wewule wafwanyeyaga liye.

7Evale Yesu ohowonga na anamamuharaye eraga: <<Ndoweni porovinsiya ya Judeya wakoka wene.>> 8Evale aliwa kohomuwakula keraga: <<Namafundjiha, nyo munafuna niwelele porovinsiya ya Judeya na makalelo bavi? Kahi wewule aJudewu kafuna atu uvokani mabwe tchineneva ira kaupeni?>> 9Yesu ohowakula eraga: <<Kodi tempu ya ntana kinakana ora kumi na mbinli?#11:9 tempu ya ntana kinakana ora kumi na mbinli? Yesu awongaga enne awonga mmisimbeni zela kalawo wa mutu. Kuma vabaliwe liye ante ukwa waye tapulela siku nimohi, ora kumi na mbinli. Muwari mwa muselu wazilena atu, ku wonga Yesu kakukumuwile zela aJudewu ale kafuna jompa. So liye ohoiziwa ira: <<Tempu ila tchi tempu yolaba mabasa.>> Ule unawenda na ntana kanagwagwaduwa mwasiwa unoona moneya wa ilambwela.#11:9 unawenda na ntana kanagwagwaduwa mwasiwa unoona moneya wa ilambwela: Yesu awongaga ira ule unawenda na moneya kanagwagwaduwa ku wonga ira: <<Jinera miyo ji, dihiiziwa inafuna miyo ira. Kadili maliba wenda na mahiyu.>> Zela mazwala, nione eto Juwawu 9:4-5. 10Mbwenye ule unawenda na mahiyu unogwagwaduwa tchoira muwari mwa liye kamunafwanyeya moneya.>>

11Yesu agawongile enne, ohowongagave na anamamuharaye ale eraga: <<Nfwihu Lazaro unagona. Mbwenye miyo nnadowa danvenyihe.>> 12Evale anamamuharaye kohomuwakulaga, aliwa ira: <<Nabwiya, akala unagona, ku wonga unokala pama.>> 13Kawongaga enne kesaga ku gona wa nikove bahi. Mbwenye Yesu awonga gona wa ukwa. 14Noira eno, Yesu ohowonga vatando vene moamasula eraga: <<Eni Lazaro uhukwa. 15Eto dihiziveliwa ira miyo kadidowilewo. Ili ira muwande roromela. Ndoweni vande vili liye.>> 16Evale Tome wenno aitaniwa Mwanasambini ohowonga na anamamuhara Yesu afwaye ira: <<Na hiyene ndowenimo ira nakwe vamohi na liye.>>

Yesu gunavaha ingumi eto gunamuvenyiha mutu mokwani

17Yesu afiyaga Betaniya, ohovwaga mundila ira: <<Lazaro uhukoyiwa eto vihivira malambo mannayi agakoyiwe.>> 18Fwanyeya ira kuma Jeruzalemu dowa Betaniya wali Marta na Mariya ali nnga kilometuru taru. 19Mwa tempu yenne aJudewu adjindji kohodowaga Betaniya ule, vande va Marta na Mariya ira katondole ukwa wa murongoliwa Lazaro. 20Marta agavwile ira: <<Yesu unaza.>> ohovenya, muharelaga. Mbwenye Mariya aligi ogaratene vande evale. 21Marta aganfwannye Yesu, ohowongaga, liye ira: <<Nabwiya, nyo mwahakale wewuno, miyo dihiiziwa ira murongolaga kakwa. 22Mbwenye masiki ukwileve, miyo dihiiziwa ira jatene munanvepa nyo Mulugu, unouvahani.>>

23Yesu ohomuwakulaga eraga: <<Murongolawo unovenya mokwani.>> 24Evale Marta ohowonga, liye ira: <<Miyo dihiiziwa ira unovenya siku nogomiheda, atu atene okwa kaza kavenyaga mokwani.>>

25Vevale Yesu ohomuwandela eraga: <<Miyo dili maliba avenyiha atu mokwani eto dili maliba avaha atu ingumi. Ule unadiroromela, masiki akwe, unokalawo. 26Eto mutu uli watene okalawo adiroromela, kaza akwa. Kodi weyo unororomela jatene jinawonga miyo ji?>>

27Marta ohomuwakulaga eraga: <<He, Nabwiya miyo nnororomela ira nyo muli Namatikeliwa, muli Mwana Mulugu wenno adedihiwa ira aze mwilamboni ya vati.>>

Gumana wa Mariya na Yesu

28Nowonga ejo, Marta ohovenyaga dowa wa mbalaye Mariya, liye mudowana vaye vene, muwandela ira: <<Namafundjiha uhuza, unouitana.>> 29Mariya agavwile enne ohovenyaga mobaranya, liye dowa ira agumane na Yesu. 30Mwa tempu yenne Yesu ali ahanavolowe mutatamoni mule. Mbwenye afwanyeyaga vevo vagumanne liye na Marta. 31Mwa enne aJudewu kafwanyeyaga evale, anno kazelege tondola, kagamuonne Mariya avenyaga mobaranya, na aliwene kohoromaga muhara kaumbuwelaga ira: <<Unadowa anlege masiye wewule ukoyiwe murongoliye.>>

32Mariya agafiyile vevo vafwanyeya Yesu, agamuonne, ohogwela vamendoni vaye, eraga: <<Nabwiya, nyo mwahakale wewuno, miyo dihiiziwa ira murongolaga kakwa.>> 33Evale Yesu agamuonne Mariya anlaga eto agaaonne na aJudewu anne kamuharile kanlaga, ohokumbanyaga mmirimani mwaye, akukumuwaga valukulu.

34Evale Yesu ohofuka ira: <<Munkoyile uvi?>> Atwale kohoira: <<Nabwiya, ndoweni mwaonewo.>> 35Evale Yesu ohonlaga.

36AJudewu ale, kagamuonne Yesu anlaga, kohowonga keraga: <<Na ibaribari omuzivela.>> 37Amohiwa eto kohowongaga, aliwa ira: <<Liye ohonvulumutcha maliba haona. Kodi yali yorutcha ira anvulumutche Lazaro ira ahakwe?>>

Yesu ohonvenyiha Lazaro mokwani

38Vevale Yesu ohokumbanya valukulu akoka, liye dowaga masiye ule. Masiye wamukoyile atu ali nifukwe nindimuwa eni eto kohofungawo na nibwe nlukulu. 39Evale Yesu ohowonga, liye kwi: <<Kakumihaniwo nibwe ni.>> Mbwenye mwanokwa ule murongoliye wenno aitaniwa Marta ohowongaga, liye ira: <<Ii, Nabwiya, unonuka na makalelo ohokala a masika. Tchoira agakoyiwe, vihimala malambo mannayi.>> 40Evale Yesu ohomuwakula ira: <<Miyo kaduwandenle ira wadiroromela, unoona undimuwa wa Mulugu?>> 41Evale kohulagawo kabiribidulaga nibwe nne. Mwa enne Yesu ohoing'anaga zulu, liye ira: <<Babani, nnoutamalelani mwasiwa muhudivwa. 42Miyo eto dihiiziwa ira nyo munodivwetcha. Mbwenye nnawongela eni na nyo ira atu ali eva, karoromele ira udirumile gu nyo.>> 43Nomala wonga eno, ohomuitana Lazaro na mazu olimbiha eraga: <<Lazaro kakumela unde.>> 44Evale marafula Lazaro ohovenyaga, liye roma kuma agalive opitikelrelreyene mandaye vamohi na manyalo aye na nguwo dedo dampitikelrelrena atu eto kove yaye yagalive yokuneleyene na lensori kampotilena atu kamukoyaga. Evale Yesu ohowonga ira: <<Kamutapuleni ira awendege pama.>>#11:44 Kamutapuleni ira awendege pama. Muselu wa Lazaro avenyaga mokwani muwari movwa itaniwa na Yesu Kiristu unatapulela nnga vulusiwa wa mutu. Ira mutu avulusiwe, Mulugu gunamuitana mokwani muli liye ira akayena ingumi. Nione Juwawu 6:37; 2 Korinto 4:6.

Andimuwa a aJudewu kohelavo zelru ira kampe Yesu

Matewuji 26:1-5; Markuji 14:1-2; Lukaji 22:1-2

45Noira enne, aJudewu adjindji anno kazile mutondola Mariya, kagaonne jejo jairile Yesu kohomuroromela. 46Mbwenye kohokalawo aJudewu amohiwa kavenyilege, aliwa dowa awandela aFarizewu jatene jairile Yesu jile. 47Noira eno, andimuwa a anamakuta na aFarizewu kohagumaniha andimuwa a anamatonga, aliwa roma fukana zelru keraga: <<Nnafuna niirevo avi na mutula? Tchoira unasimbwave iragana jionihedo jidjindji. 48Nera nimuhiyeni eni, atu adjindji anomala muroromela. Eto jaireya eno, aRoma kavwa ira: <AJudewu kohokana mutu muxa anamuhara atu>, anoza kabwanyule Nyumba ya Yehova vamohi na ilambo yehu.>>#11:48 anoza kabwanyule Nyumba ya Yehova vamohi na ilambo yehu owu hehi anoza kaniwake nimburo nehu vamohi na ilambwihu.

49Mbwenye muwari mwa aliwa ohokalavo mutu mmohi wenno ali mundimuwa wa anamakuta yaka yenne, nzina naye aitaniwa Kayafasi. Wenne ohowongaga na afwaye ale, liye ira: <<Nyo kamuizi yengo ili yatene, 50nne kamunawanda onelramo ira ili yofuneya ira mulombwana mmohi aakwele atu atene hiyaniha na aJudewu atene katolowe.>>

51Fwanyeya ira mwa tempu yenne mundimuwa Kayafasi awongaga enne, kawongile muwari moonelramo mwaye, nari. Mbwenye muwari mokala mundimuwa wa anamakuta yaka yenne, Mulugu gwanvahile mazwale ira arome fiyiheda ira Yesu unokwela nlogo natene na aJudewu. 52Eto hiya nlogo na aJudewu ve bahi, Yesu afuna aakwele na anne kafwanyeya molapa ira muwari mwa ukwa waye, awande agumaniha ana Mulugu ira kakale vamohive.

53Kuma siku nenne, pa evo varomile atu saka ndila yompana Yesu. 54Nona kuma evale Yesu ohiya wenda movioneyiha vamentoni va aJudewu. Ohomaruwaga dowa ilambo imohiwa wandamelana isalesaleni, sidadi imohi eni yaitaniwa Efarayimi, liye kalaga wewule na anamamuharaye.

55Pwando ya Mavirelo ya aJudewu yagawandamenle, aJudewu oindjiva kohokuma molapa molapa mmafora, aliwa dowa Jeruzalemu ira kavisakanyede ira kawande kala otchenene Pwando yahanarome.#11:55 kawande kala otchenene Pwando yahanarome: Pwando ya Mavirelo yafunaga djiwa aJudewu kovitcheniha. Ali malamulo kavahiwe atu na Mozeji. Nione 1 Samuweli 20:26. Eto muwari mwa mazu a Levitiku 7:21 johokalawo jengo johofwanela ira aIzarayeli kahinde, tawiha ira jinaatakalihe. Mwa enne mutu atakalihiwa na jejo jakondihile atu kavakala wandeya ira adowe agumane na afwaye. Agomela gwadiwa muwari mwa aIzarayeli. Eto kafunaga sakanya pwando ili yatene, kababiha vitcheniha, mwasiwa kafuna kadowe kadje pwando ile vamentoni va Nabwiya. 56AJudewu ale kagali Jeruzalemu kohoroma nvenda Yesu. Mwa enne kagali muNyumbani mwa Nabwiya, kowongaga oka oka keraga: <<Kodi munaonamo avi? Liye vapwandoni vano kanazavo?>> 57Tchoira andimuwa a anamakuta vamohi na aFarizewu kohokumiha nlamulo ira: <<Ule unaiziwe vinafwanyeya Yesu, aze aniwandele ira nimuhinde.>>

Currently Selected:

Juwawu 11: iLolo

Highlight

Copy