Juwawu 10
10
Yesu ohowonga yofwalrafwaniha zela namakumbuza na mabilaye
1Yesu ohowongaga eraga: <<Miyo nnafuna duwandeleni ibaribari. Ule unadowa kolrani wa mabila, ahavolowela va mulango, mbwenye agwela vantchihini, amorela muwari, wenno na ibaribari gu mbava na namaba. 2Mbwenye ule unavolowela va mulango, liye gu namakumbuza wa mabila ale.
3<<Namakumbuza afiya va mulango, gwarda unohula ira mabila kakume. Evale mabila ale anovwa nizu na namakumbuza ule. Liye unoniitana kada nibila na nzina niwa, akumihedaga unde mabila matene. 4Amala akumihamo matene, unodowa sogolro uwa, mabilale aliwa muharaga mundulri mwaye mwasiwa koholemela nizu naye. 5Mbwenye mofutukula aza mutu mmohiwene, mabilale anokonda muhara mwasiwa kiiziwile nizu na atu amohiwene a burebure.>>
6Yesu agamanle wonga yofwalrafwaniha ile, atwale tchawandile onelramo yotapulela iwa. 7Mwa enne Yesu ohawandelagave eraga: <<Na ibaribari nnouwandelani ira miyo dili mulango wa mabila. 8Ale kazile miyo dahanaze, kafwanyeya kagali ambava, atu ofuna joba. Nona mabila tchaavwile aliwa.
9<<Miyo dili mulango. Ule unavolowela wa miyo, unovulusiwa. Malringana avolowela wa miyo, unerege kuma mofuna mwaye ira adjege tongwe, amala avolowege akoka. 10Mbava azaga, unazela ira abe, ape, atolotche. Mbwenye miyo dizele ira atu kakayena ingumi eto kana uwa kakayena mokwakwanela.#10:10 kakayena ingumi eto kana uwa kakayena mokwakwanela: Mazwala ananiwandela zela makalelo a mutu omuroromela Yesu awendaga mwilamboni ya vati ahanakwe. Nibila na Yesu nnowanda dja tongwe. Ku wonga Yesu unonvaha mutu omuroromela makalelo ira awendege pama mwilamboni ya vati. Fwanyeya ira Yesu azele avaha atu ingumi yokwakwanela. Ingumi yokwakwanela ku wonga mutu agavulusiwe, unowanda hinda mabasa a Nabwiya Mulugu nnga Adawu na Eva kahanamutegele Mulugu. Ingumi yokwakwanela ku wonga mutu agavulusiwe, kanakalave niguruguzu nohokana mabasa. Muwari mwa kopolo da Munemba Otchena, unowanda kala mutu ohinda jofuna ja Mulugu.
11<<Miyo dili namakumbuza wapama. Namakumbuza wapama unoakwela mabilaye.#10:11 Namakumbuza wapama unoakwela mabilaye. Namakumbuza adowana mabila kokolani, aona mwanainyama owopiha ira unafuna ahinde nibila naye atakune, unokana kondo ante liye kala muwari mwa ukwa. So jatene ejo unerela ira mabilaye kakale pama. Yesu eto ohofiyeda kwa ira hiyo mabilaye nahakwe. 12Mbwenye namalaba oing'anela tambilra bahi, ahali namakumbuza wa ibaribari, ahali mwinnya wa mabila ale, aona mwanambwa wa mukokolani azaga, unoahiya mabila, liye tawaga jaye. Vevale mwanambwa wa mukokolani ule roma ahinda mabila, abalaletchaga. 13Fwanyeya ira namalaba wenno ahali namakumbuza wa ibaribari, unotawa mwasiwa liye unalaba ganyo bahi. Liye mbwenye kanaabalra mabila ale.
14-15<<Miyo mbwenye dili namakumbuza wapama. Miyo na Baba nihiiziwana. Na makalelo amohive nnga Baba udiiziwile liye miyo eto miyo dimuiziwa Baba, miyo na mabilaga nihiiziwana na makalelo amohive. Miyo dahaiziwa mabilaga. Mabilaga eto kohodiiziwa miyo. Miyo nnoakwela mabilaga.
16<<Dihikana eto mabila amohiwa kahanafwanyeya nkolrani mu. Ili yapama daadowele. Daadowela, anovwelela nizu naga. Era eno atene anoza kagumane kakale nikuru nimohive, kadiharaga miyo namakumbuza mmohive.
17<<Baba udizivela miyo mwasiwa miyo dihirumela velela ingumi yaga ira diwande itukula akoka. 18Kalivo unadiwaka ingumi yaga. Miyo nnovelela mofuna mwaga. Miyo dihikana utongi ovaha ingumi yaga eto dihikana utongi otukula akoka. Jatene ejo Baba gudirumile ira diirena.>>
19AJudewu kagavwile mazwale, muwari mwa aliwa mohokalaga gaweya akoka. 20Adjindji muwari mwa aliwa kawonga ira: <<Yesu ukana munemba wabure. Ukana mihala. Kodi munambalrela nni wenne?>> 21Amohiwa mbwenye koruniha keraga: <<Jowonga jaye kahi jowonga ja mutu ozuzumana munemba wabure, nari. Kodi mutu okana munemba wabure unowanda avulumutcha aliba haona?>>
AJudewu kohomukonda Yesu na mazu awongile liye
22Jeruzalemu wohokalaga Pwando ya Inagurasawu,#10:22 Pwando ya Inagurasawu: Kavali mazu mBibiliyani oniwandela zela pwando yenno. Mbwenye amohiwa ani Pwando ya Inagurasawu inawongiwa va, aJudewu va kada yaka kaumbuwela tempu imohi karomile atu labana Nyumba ya Yehova kagamanle yaka taru kahalabagana mwasiwa kohogondjihiwa na atu oakameliha ira kahalabegemo. Muselu wenno mbwenye kanafwanyeya mBibiliyani. Kadja pwando yenno mwedi nnga Dezemburu tchoira ilambo yali atu, Dezemburu gu mwedi odidila pama. eto ali tempu yodidila. 23Yesu ohodowaga vatando va Nyumba ya Yehova, liye wendawendaga Nikonde na Salomawu. 24Mwa enne aJudewu kohogumanelaga, aliwa dowa muwerewera liye kala vari, aliwa nfuka ira: <<Kodi weyo unafuna unihiyeve no wanganyeda wehu ante alini? Kaniwandele pama pama mohonikuwa. Kodi na ibaribari weyo uli Namatikeliwa?>> 25Yesu mbwenye ohawakula, liye ira: <<Miyo dihimala uwandelani, nyo mbwenye kamunaroromela. Eto mabasaga matene nnairana miyo mwa nzina na Baba jatene jejo jinadihidedela umboni. 26Mbwenye nyo kamunaroromela, mwasiwa kamuli muwari mwa mabila aga. 27Tchoira mabilaga anovwa nizu naga eto miyo dahaiziwa. Aliwa eto anodihara. 28Miyo nnoavaha ingumi yohomala eto kiza katolowa. Kalivo eto unafuna diwaka mmandani mwaga. 29Eto nne kalivo unafuna muwaka Baba mmandani mwaye, tchoira Babaga wenno udivahile gu mundimuwa akwaranya atene. 30Miyo na Baba nili mmohi.>>
31AJudewu kagavwile mazwale, kohododaga mabwe akoka ira kampena Yesu. 32Evale Yesu ohawakula, liye ira: <<Miyo duhuonihani joira jidjindji japama jokumela wa Baba. Nnga muwari mwa joira jatene jiirile miyo, yoira tchivi inafunela nyo dipela?>> 33AJudewu ale kohomuwakula keraga: <<Hiyo kannaupela na mwasa wa yoira ili yatene yapama, nari. Nnaupela mwasiwa unamululuviha Mulugu. Tchoira weyo wagali mutu eto unoviwonga nnga Mulugu.>>
34Yesu ohawakula, liye ira: <<Mmalamuloni mwenyu munofwanyeya mazu a Mulugu awongile liye oira: <Miyo dirile: <<Muli amilugu.>> >#10:34 Muli amilugu: Va nnavwa mazu a Yesu oira: <<Mmalamuloni munofwanyeya mazu Mulugu awongile liye oira: <Miyo dirile: <<Muli amilugu.>> > >> Navenda mBibiliyani mazu anne anafwanyeya Salmu 82:6. Mulugu awongaga na atu ira: <<Nyo muli amilugu.>> Kahi ira Mulugu aira: <<Munaahara amilugu.>> Eto nne kahi ira Mulugu awonga ira: <<Muhukana amilugu enyu.>> So Mulugu kwi: <<amiluguwa gu nyenne.>> Tapulela ira Mulugu ohowonga na atu ira: <<Nyo muli aguverno a ilambo ya vati. Nyo muli atu okana utongi.>> Sawasawa nnga mwana akala vande, babaye na mmaye ba amilugu a vande, Mulugu anipandutchile ira nikale amilugu a ilambo ya vati. Kahi ira nili Mulugu owanda jatene. So mazwala anawonga ira nili atu okana utongi. Ira Yesu awonge mazwala muwari mwa muselu unawonga liye, ku wonga Yesu kwi: <<Akala atu amohiwa anaitaniwa na nzina na amilugu, ki eto wenno Mulugu amurumile liye ira aze mwilamboni ya vati? Akala udirumile gu Mulugu, mwasiwa gwa nni nyo takaleliwaga na mazwaga oira: <Miyo dili Mwana Mulugu.>?>> 35Mulugu awongaga ira: <Muli amilugu>, awonga zela atwale katambilra mazwaye. Nyo muhuiziwa ira mMazuni kilimo yengo yahali ya ibaribari. Eto munowanda rumela ira Mulugu ohowonga na atu amohiwa katambilra mazwaye ira: <Muli amilugu.> 36Miyo eto dawonga ira: <Miyo dili Mwana Mulugu>, kamunawanda roromela. Munawonga ira: <Umululuviha Mulugu.> Mwasiwa gwa nni? Tchoira miyo kadili mutu wa vaheno vene. Miyo eto dili wenno Baba amusakunlre liye. Dili wenno Mulugu umurumile liye ira aze mwilamboni ya vati.
37<<Akala miyo kannairana joira ja Baba, nyo kamudiroromele. 38Mbwenye akala nnairana joira ja Baba, masiki akala munodiwanganyeda, murumele joira jinera miyo ira mukayena ibaribari ira miyo dili na Baba eto Baba uli na miyo.>> 39AJudewu ale kagavwile mazwale, kofuna kamuhinde Yesu akoka. Mbwenye Yesu ohotawa mmandani mwewa.
40Evale Yesu ohovenyaga, liye lambuwa akoka muhindje Jordawu, dowa nimburo nabatizetcha Juwawu voroma vene, liye garati wewo. 41Mwa enne atu adjindji kodowa waligi liye, aliwa wongaga keraga: <<Juwawu kairile nne ionihedo imohi. Mbwenye jatene jawongile liye zela mulombwanola, jali ja ibaribari.>> 42Vevale atu adjindji a wewule kohoroma muroromela Yesu.
Currently Selected:
Juwawu 10: iLolo
Highlight
Share
Copy
Want to have your highlights saved across all your devices? Sign up or sign in
© 2018 Visão Integral
