Juwawu 9

Yesu ohonvulumutcha mutu mmohi abaliwe ohoonene

1Yesu agakumile Nyumba ya Yehova, aviraga mundila, ohonfwanyaga mulombwana mmohi ohoona, wenno abaliweve eno. 2Agangumannena mulombwanole, anamamuharaye kohonfuka keraga: <<Namafundjiha, kodi ira mutula abaliwe ohoonene, mwasiwa gwa jotega jaye owu jotega ja ababaye?>> 3Yesu ohawakulaga eraga: <<Nari. Mutula ira abaliwe ohoonene, kahi muwari mwa jotega jaye, nne kahi jotega ja ababaye. So aza abaliwaga ohoonene ali ira mabasa a Mulugu kaonihediwe mwa liye.

4<<Ili pama nilabege mabasa a wenno udirumile yagali ntana eni. Mwasiwa mahiyu anoza. Mahiyu kaza, kalivo unawanda laba. 5Vanakalegewo miyo mwilamboni ya vati, nnafwanyeya dagali moneya wa ilambo ya vati.>>

6Agawongile eno, ohotapelaga mare vati, liye kanda teya na mare aye ale, zoliha teya dile mmentoni mwa maliba haona ule. 7Agazolihilemo, ohomuruma mutule ira: <<Udowe wasusule tanki ya Silowe.>> (Silowe ku tapulela rumiwa.)

Noira eno, mutule ohovenyaga, fiya wewule. Agasusunle, ohoromaga ona. Evale ohoromaga welawo. 8Awelagawo ohagumanana amwandamanaye na ale kamuonetcha avepaga kobiri. Agaagumannena kohoroma fukana ira: <<Kodi ule kahi wenne akaletcha ogaratene, avepaga kobiri?>> 9Amohiwa korumelela keraga: <<He, gu liyene.>> Eto amohiwa koruniha keraga: <<Kahiwo. So unalandana na liye.>> Mbwenye mwinnya ohovwaga, liye rumelela eraga: <<He, gu miyene, wenno ahaonetcha.>> 10Vevale kohonfuka, aliwa ira: <<Nnga ira weyo uwande ona eni, uirile avi?>> 11Liye ohorumelaga, liye ira: <<Mulombwana anamuitana atu Yesu, gwakandile teya, zoliha mmentoni mwaga, liye diruma ira: <Tiye wavihuwe mmentoni mwawo tanki ya Silowe.> Miyo dowawo, vihuwa. Novihuwa, miyo roma ona!>> 12Atwale kohonfuka, aliwa ira: <<Nnga mulombwanoyo uli waani?>> Liye ohowakulaga kwi: <<Uli liye, miyo kadiiziwilewo.>>

AFarizewu kosakasaka iziwa makalelo avulumuwile maliba baliwa ohoonene

13Atu kohomutukulaga maliba vulumutchiwa ule, aliwa mudowana wa aFarizewu. 14Siku nanvulumutchaga Yesu mutule naligi siku na sabado. 15Agafiyile wa aFarizewu, aFarizewu kohoromaga nfuka nnga verile atu oromale, aliwa kwi: <<Nnga weyo uwandile avi vulumuwa?>> Liye roma wongamo eraga: <<Ukala mulombwana mmohi adifwanyile, liye tukula teya, hela mmentoni mwaga. Dagadowile susula, miyo roma ona.>> 16Evale aliwa kagavwilemo, muwari mwa aFarizewu emule, mohoromaga fwanyeya gaweya zela Yesu. Mwa aliwa amohiwa koiraga: <<Mutu wenno unanvulumutcha mutu siku na sabado, kanakumela wa Mulugu, nari.>> Mbwenye aFarizewu amohi kohofukaga, aliwa ira: <<Kodi wenno unvulumutchile ahakale mutu otega erege wanda irana jionihedo jokala ha jeji?>> 17Vevale aFarizewu ale kohonfukaga mulombwanole akoka, aliwa ira: <<Nnga zela weyo onamo wawo, unamuona avi mulombwana wenno uuvulumutchile zela haona wawo?>> Liye ohowakula eraga: <<Nnamuona nnga namafiyiheda okumela wa Mulugu.>>

18Evale aJudewu ale kohoira: <<Hiyo kannaroromela ira mutula abaliwe ohoonene. Ira niwande roromela, nnafuna nirome afuka ababaye.>> 19Mwa enne kagaaitanihile ababaye kohafukaga ira: <<Kodi na ibaribari mwaninyu mwamuwonga nyo mwiraga ubaliwe ohoonene gwenna? Nnga ira arome ona jiireyile avi?>> 20Evale ababaye ale kohowakula, aliwa ira: <<Na ibaribari liye gu mwanihu eto nnowanda rumelela ira liye ubaliwe ohoonene. 21Mbwenye mwanifuka zela vulumuwa waye, hiyo kaniiziwile makalelo uvulumuwile liye eto mutu wenno unvulumutchile, hiyo kanimuiziwile. Ili pama mmuitane mwinnya, munfuke. Unowongamo eka, tchoira liye kahi mwana.>> 22Ababaye ale kaza kawongaga eno, mwasiwa kaaova aJudewu ale. Tchoira aJudewu ale kohelavo zelru doira: <<Ule unarumelele ira Yesu gu Namatikeliwa, atamangihiwe muwari mwa nyumba yofundjamo Mazu.>> 23Nona ababaye kawonga ira: <<Mmuitane mwinnya munfuke. Unowongamo eka, tchoira liye kahi mwana.>>

24Evale aliwa kohomuitana maliba vulumutchiwa ule fendo yanembinli, aliwa muwandela keraga: <<Hiyo nnafuna nnga umutitimihege Mulugu bahi,#9:24 Hiyo nnafuna nnga umutitimihege Mulugu bahi: Owu hehi Hiyo nnafuna ulumbele vamentoni va Mulugu ira jinawonga we ti jejo. hiya mutitimihaga mutule. Mwasiwa iiziwile hiyo tchoira liye gu mutu otega.>> 25Evale liye ohowakula, liye ira: <<Akala liye gu mutu otega, miyo kadiiziwile. So iiziwile miyo tchoira miyo vano kadaona, mbwenye peno nnoona.>> 26Evale aliwa kohomuwongaganave keraga: <<Kaniwandelemo makalelo uuirilena liye ira we uone. Kodi uuvulumutchile na makalelo bavi?>> 27Liye ohorumelaga ira: <<Miyo dihimala uwandelanimo nnga vireyile eto nyo kamuwandile roromela. Nnga munafunela nni vwa yowonga imohive akoka? Nnga na nyenne munafuna mukale anamamuharaye?>> 28Evale andimuwale novwa mazwale, kohomuruwanaga keraga: <<Namamuharaye gu weyo. Hiyo mbwenye nihikana unamuhara hiyo, wenno unafwanyeya agali Mozeji. 29Hiyo niiziwile ira Mulugu ohowonga na Mozeji, mbwenye mutu wenno ukumenle liye kaniiziwilewo.>>

30Evale mulombwanole ohawakulaga eraga: <<Miyo so inaditikiniha tchoira nyo muni: <Hiyo kaniiziwile ukumenle liye>, agali liye uhuwanda hula meso aga. 31Tchoira hiyo nihiiziwa ira Mulugu kanabalra yolobela ya mutu otega. Unambalra mutu wenno unanvwelela eto unerana jofuna jaye. 32Eto kuma vapandutchiwe ilambo ya vati, kodi mubabiha vwa ira ukala mutu owanda nvulumutcha mutu obaliwa ohoonene? 33Mutule ahakumela wa Mulugu, liye kawanda divulumutcha.>> 34Agawongile mazu anne, aliwa kohomuwakulaga ira: <<We ubaliwe otegene. Kodi unavenda nnga unifundjihege hiyo?>> Mwa enne kohomutamangiha munyumbani mwewa mofundja mazu.

Maliba vulumutchiwa ohofiyeda mwezo omuroromela Yesu

35Yesu agavwile ira: <<Mutu ohoonole uhutamangihiwa munyumbani mofundja mazu>>, ohoroma musaka. Aganfwannye, ohonfuka eraga: <<Kodi weyo unomuroromela Mwana wa Mutu?>> 36Liye ohowakula ira: <<Andimuwa kodi Mwana wa Mutu bani? Nnafuna mudiwandelemo ira diwande muroromela.>> 37Yesu ohomuwandela eraga: <<Weyo umala muona. Mwana wa Mutu gwenno unawonga na weyo eni.>> 38Evale maliba vulumutchiwa ule ohowonga ira: <<Nabwiya, miyo nnouroromelani.>> Noira eno, ohokokora, liye mutamalela Yesu.

39Noira eno, Yesu ohomuwongaganave eraga: <<Miyo dizele ilambo ya vati ira ditonge ira aliba haona kaonege. Ale anaona, kahaonege.>> 40Mwa enne aFarizewu amohiwa kafwanyeyaga evale, kagavwile jawongile Yesu, kohonfuka keraga: <<Kodi ku wonga ira hiyo nili aliba haona?>> 41Yesu ohowakulaga eraga: <<Mwahakale atu ohoona, kamwafwanyeyana mulandu zela jotega. Mbwenye nnga munaviona ira muli aliba ona, nona mulandu ozela jotega jenyu unafwanyeyave na nyo.>>

Currently Selected:

Juwawu 9: iLolo

Highlight

Copy