Lukaji 13

Yesu ohawandela atu ira katwaruwe

1Yesu agalive evale, wohokala atu kazile aliwa roma muwandelamo jengo jaaireyele akuda Galileya anno Pilatu#13:1 Pilatu: Governadore Pilatu ali mutu oza atonga na nzina na akuda Roma. Tchoira ora yenno aJudewu tchavitonga okave, mbwenye katongiwa na aRoma. Muwari motongiwa na aRoma, aRoma keretcha aruma atu ira kakale agovernadore oatonga aJudewu. aafwanyile liye kavelelaga mikuto diwa wa Mulugu, noira eno liye aapa, sangiri niwa agumaniha na sangiri na mikuto diwa dile. 2Evale aliwa kagamuwandenlemo Yesu enne, liye ohawandelaga eraga: <<Kodi nyo munaona nnga aliwa para piwa na makalelo anno, kere kala atu otega bure hiyaniha na aGalileya atene? 3Fwanyeya ira nari. Miyo nnouwandelani ira na nyenne mwahatwaruwe, munagomela tolotchiwa atene nnga jairiwena aliwa. 4Kaumbuwelani eto zela atu amohiwa 18 anne kamoreliwe nyumba yolapa ya gwarda yafwanyeya Silowe. Kodi nyo munaumbuwela ira aliwa kere simbwa kala anamatega hiyaniha na afwiwa a Jeruzalemu ule? 5Miyo nnouwandelani ira nari. Na nyenne mwahatwaruwe, munagomela tolotchiwa atene nnga jairiwena aliwa.>>

6Yesu ohowongaga yofwalrafwaniha ila eraga: <<Ohokala mulombwana mmohi azanle mufigera muwari mwa mundaye wa uva. Siku nimohi liye ohovenya dowa vamutengoni vale ira asakemo jovaha. Mbwenye kafwanyilemo nne yovaha imohi. 7Nomala enne, ohowonga na namalaba aing'anela mundole, liye ira: <Kaing'anaga, miyo dihimala yaka taru doharana dene dizaga ira dihatche jovaha ja mutengola, mbwenye kannafwanyamo yengo. Inafwanela ugwademo mutengola, mwasiwa mmundani mu ukalelemo vasayi.> 8Evale namalabole ohomuwakulaga eraga: <Hehi mbwiyeni, miyo nnouvepani ira mmuhiye mutengola amale yaka imohi agali mmundani mwemu. Miyo dahala nnafuna dimutimbe vati vale, dikutulelevo mambi, dimuone akala liye unovaha. 9Awanda vaha yaka ya metchelo, tchapama. Mbwenye ahawande vaha, nyo podi za mukakatihamo.> >>

Yesu ohonvulumutchaga muhiyana mmohi orangala mitana siku na sabado

10Siku nimohi na sabado, Yesu ohokalaga nyumba yofundjamo Mazu liye fundjihaga. 11Mmba mule mohokalaga muhiyana mmohi arangalihiwe na munemba wabure. Liye ohomala yaka 18 mitana daye dagali dorangala dene, kawanda imela pama. 12Evale Yesu agamuonne muhiyanole enne, ohomuitana ira afiye vafwanyeya liye. Muhiyanole agafiyile vali Yesu, Yesu ohomuwongana ira: <<Muhiyana we, eni uhumala vulumuwa muwari mwa urenda wanna we!>> 13Agawongile enne, ohomuhelaga manda. Noira enne, muhiyanole ohovulumuwaga, mitana daye kala pama. Evale liye ohoroma mutitimiha Mulugu. 14Mbwenye mundimuwa wa nyumba yofundjamo Mazu yenne ohotakaleliwaga valukulu, mwasiwa Yesu anvulumutchile mutule siku na sabado. Mwa enne ohowongaga na atwale, liye ira: <<Kohokalawo malambo matanu na nimohi ira atu kalabege mabasiwa. Mwa malambo anno nyo muzege ira muvulumutchiwege. Mbwenye siku na sabado kamuzege ira: <Hiyo nnafuna nidowe navulumutchiwe.> >>

15Nomala enne, Nabwiya ohomuwakulaga awongaga eraga: <<Nyo angongomwa nyo! Kodi muwari mwa nyo atene kamunatapuletcha ng'ombe yenyu nari buru wenyu vanadja liye, mudowa mwang'wiha mahindje siku na sabado? 16Nnga muhiyanola liye gu mwana Abarahamu, liye alive omangiwene na Satana yaka 18. Kodi tchali yofwanela ira dimutapule siku na sabado zela urenda waye?>> 17Yesu agawongile enne, amwidani aye kaligi evale kohonyaswaga. Mbwenye atu atene amohiwa ale kohagalalaga na mwasa wa jengo japama jotikiniha jairana Yesu.

Yesu ohowonga yofwalrafwaniha ya mostarda

Matewuji 13:31-32; Markuji 4:30-32

18Moharela Yesu ohowongaga eraga: <<Kodi Umwene wa Mulugu unalingana na yengo nni? Kodi Umwene wa Mulugu nnafuna difwalrafwanihe na yengo nni? 19Umwene wa Mulugu unafwalrafwana na mbewu imohi ya mostarda#13:19 mostarda: Mostarda tchi mwana mbewu ing'ining'inive inakala nnga mpeza eto kamuzala aulukula, mutenguwa unoulukula kwaranya jozala jatene jozaliwa mmundani. mutu atukunle liye adowa azala mmundani mwaye. Yagamenle, yohoulukula, fiyeda kala mutengo mulukulu.#13:19 Yagamenle, yohoulukula, fiyeda kala mutengo mulukulu. Fwanyeya ira Umwene wa Mulugu tchi yengo inaroma na makalelo oyeva, mbwenye yadowaga musogolro unokala yengo ilukulu kwaranya jatene. Evale mbalrame dovava zulu dohoza, aliwa mangaga jitundji jiwa mutambini mwiwa mule.>>

Yesu ohowongaga yofwalrafwaniha ya leverina

Matewuji 13:33

20Yesu ohowongagave eraga: <<Kodi Umwene wa Mulugu nnafuna difwalrafwanihe na nni? 21Umwene wa Mulugu unafwalrafwana na leverina muhiyana mmohi atukunle liye, adowa atanganiha na malanta mararu a utu. Liye agatanganihile, masa matene kohonyakuwa.>>

Zela mulango opurana

Matewuji 7:13-14,21-23

22Yesu agalive muulrendoni mwaye adowaga Jeruzalemu, ohoviraga sidadi na tatamo afundjihaga. 23Mwa enne mutu mmohi ohonfukaga, liye ira: <<Nabwiya, kodi anafuna vulusiwa ba atu a vang'onove bahi?>> Evale Yesu ohowakulaga eraga: 24<<Mukukumuwele ira muwande volowa mulango opurana. Tchoira miyo nnouwandelani ira atu adjindji anofuna nnga kavolowe, mbwenye kiza kawanda volowa. 25Mwasiwa mwinnya wa vande unovenya afunge mulango. Era eno nyo munoza mukale unde mugogodaga musuwo muiraga: <Nabwiya kanihiyeni nivolowe!> Liye evale unoza awongege ira: <Miyo kaduiziwileni.> 26Era eno nyo munoza muwongege ira: <Hiyo nodjetcha eto nong'wetcha vamohi na nyo Nabwiya! Eto nyo mofundjihetcha musidadi mwehu.> 27Mbwenye liye unoza awakule ere: <Miyo nnouwandelani ira kaduiziwileni. Kakumanivo vali miyo va, nyo atu oirana jabure nyo.>#Salmu 6:8 28Evale nyo mwaza mmuona Abarahamu, Izaki, Jako vamohi na anamafiyiheda atene kagali muUmweneni mwa Mulugu eto nyo mwavokediwa unde, munoza munlege no takuna meno. 29Atu adjindji anoza kakumelege makumelo wa nzuwa fiyeda mavirelo wa nzuwa, nari pandi ya norti#13:29 Pandi ya norti ku wonga mutu aimela aing'anaga mavirelo wa nzuwa, pandi ya muwononi odjana. fiyeda pandi ya suli,#13:29 Pandi ya suli ku wonga mutu aimela aing'anaga mavirelo wa nzuwa, pandi ya muwononi oromana. kadowe kadje vamezani vamohi muUmweneni mwa Mulugu. 30Kaing'anani, kohokalawo ali ogomiheda anafuna za kala arandji eto kohokalawo amohiwa ali arandji anafuna za kala ogomiheda.>>

Yesu ohowonga zela Jeruzalemu

Matewuji 23:37-39

31Tempu imohive yawongaga liye enne, kohokalawo aFarizewu amohiwa kazile wa Yesu aliwa muwandela ira: <<Kakumanivo vili nyo va, mutawe. Mwasiwa mwene Erodi unafuna aze aupeni.>> 32Evale Yesu ohawakulaga, liye ira: <<Mudowe mwamuwandele mutu oxanga nnga mwanambwa a mukokolani uyo, muire: <Yesu uwongile ira: Kaing'ana, peno na metchelo miyo nnatamangiha minemba dabure no avulumutcha atu maurenda. Mbwenye siku naneraru miyo nnomariha mabasaga.> >> 33Yesu ohowongagave eraga: <<Miyo nnafuna diwende ulrendo waga peno, metchelo na ndawiyavano. Tchoira kavili jowandeya ira namafiyiheda akwele unde wa Jeruzalemu.>>

34Yesu ohowongagave eraga: <<Jeruzalemu, Jeruzalemu, weyo uli sidadi inaapa na mabwe anamafiyiheda, anno karumiwe ira kafiye wa we! Kodi fendo dingasi difunile miyo agumaniha ahimawo nnga jinaira nikolo na mwanaku aagumanihaga ahimaye vati va mapepelo aye? Miyo eto dagafunile ira daagumanihe ahimawo, weyo kufunile. 35Kaing'anani, eni vande vinyu vinoza vikale vadebe.#13:35 vande vinyu vinoza vikale vadebe: Yesu unawonga zela bwanyuliwa wa sidadi ya Jeruzalemu. Yesu unawonga eto muwari mokumbanya makalelo kanna atu kakala sidadi ya Jeruzalemu. Tchoira aliwa tchawandile kana ibaribari zela liye. Na ibaribari nnouwandelani ira nyo kamuza mudiona akoka fiyeda nyo muwonge ira: <Orelihiwa gu mutu wenno unaza na nzina na Nabwiya!> >>#Salmu 118:26

Currently Selected:

Lukaji 13: iLolo

Highlight

Copy