Lukaji 14

Yesu agali vande va muFarizewu

1Siku nimohi na sabado, Yesu ohodowaga vande va mundimuwa mmohi wa aFarizewu ira adowe adje. Agadowile wewule, atu kohoromaga muing'anetchetcha. 2Mwa enne ohokalaga mulombwana mmohi anna urenda ozimbelana maningo matene afwanyeyaga vevale valigi Yesu. 3Yesu agamuonne mulombwanole, ohafukaga anamafundjiha malamulo na aFarizewu, liye ira: <<Kodi mwa nlamulo inorumelihiwa nvulumutcha mutu siku na sabado owu hehi?>> 4Aliwa mbwenye tchawakunleve yengo. Evale liye ohomuhindaga mulombwanole, liye nvulumutcha, nomala liye muruma ira: <<Dowaga vande.>> 5Evale Yesu ohowongaga ira: <<Kodi muwari mwa nyo mutu akana ng'ombe yaye nari mwanaye amorela muisimeni siku na sabado, kanadowa mukumihamo mobaranya?>> 6Evale aliwa tchawandilege wakula yengo.

Yofwalrafwaniha ya aliba dowa dja pwandoni

7Mwa ora yenne Yesu ohaonaga aliba itaniwa amohiwa kafwanyeya vevale, kasakulraga mipando da undimuwa. Evale Yesu agaonne enne, ohawongelaga yofwalrafwaniha imohi, liye ira: 8<<Waitaniwa vapwandoni ya matelo, kuvendege jogarati mipando da undimuwa. Mwasiwa evale unoza akalevo mutu mmohiwa uitaniwile oukwaranya weyo. 9Tchoira weyo wagarati nimburo napama, maliba uitanani ule aza, aira: <Weyo kavenyavo, agarativo ula>, evale weyo unonyaswa eto unodowa wagarati mipando da mundulri da atu ohokana mabasa. 10Mbwenye mofutukula, akala weyo wire itaniwa vapwandoni, inafwanela udowe wagarati mipando da mundulri dogomiheda. Waira enne, maliba uitanani ule unowonga na weyo ira: <Nfwaga, kaza ugarati sogolro uno vampandoni vapama va.> Jaireya enne weyo unotitimiheya vari va atu atenene anafwanyeya vameza vamohi na weyo. 11Tchoira mutu wenne unavitukulela, unoyevihiwa. Mbwenye ule unaviyeviha, unotukuleliwa.>>

12Nomala enne, Yesu ohomuwongagana mulombwana amuitanile ule, liye ira: <<Weyo wafunaga sakanya jantari nari wafunaga sakanya pwando, kwaaitane afwawo, nne adibilawo, nne atu a muibalini mwawo, nne amwandamanawo orayela. Mwasiwa waaitana afwawo, na aliwene anouitana weyo. Mwaira enne aliwa kohoupagalri zela jejile jaairele we. 13Mbwenye weyo wafunaga sakanya pwando, waaitanege aliba simela, aliba rangala, aliba hawenda na aliba haona. 14Waira eno, weyo unorelihiwa. Tchoira waaitana atu osimela, aliwa kinapagalri yenno yaairele we, mbwenye Mulugu gunafuna za upagalri siku na mavenyelo wa atu atene apama.>>

Yesu ohowongaga yofwalrafwaniha ya mulombwana mmohi asakanyile pwando vande vaye

Matewuji 22:1-14

15Mutu mmohi afwanyeya vameza vale, agavwile ejile, ohomuwongana Yesu eraga: <<Orelihiwa ba atu anno anafuna kadje pawu vameza muUmweneni mwa Mulugu!>> 16Evale Yesu ohowongaga, liye ira: <<Ohokala mulombwana mmohi asakanyile pwando ilukulu, nomala liye aitana atu adjindji. 17Ora ya pwando yagafiyile, mulombwanole ohomurumaga namalabaye ira: <Udowe waawandele atu atene daitanile miyo ira kaze, mwasiwa jatene jihimala kwakwanela!> 18Mbwenye namalabole agadowile ira aawandele atwale, atene kohoroma vepa ira aakurumuwele. Mutu oroma ohowonga na namalabole, liye ira: <Miyo dihigula munda eni, dafuna didowe daonewo. Nnavepa ira kadikurumuwele.> 19Mutu mmohiwa ohowonga eraga: <Miyo dihigula ng'ombe daga kumi dolima mbinli, mbinli. Miyo dafuna daxixe limana ira dione akala nnolaba pama. Nnavepa ira kadikurumuwele.> 20Mmohiwa ohowonga eraga: <Miyo ditenle tchineneva, kavili jowandeya ira nnoya wewo.>#14:20 kavili jowandeya ira nnoya wewo: Muwari mwa mazwala, nnovwa miselu dawonga atu muwari mokonda dowa pwandoni ya matelo a mwene. Yesu unaniwandela zela jengo jobarela ndila ira mutu ahavolowe muwari mwa Umwene wa zulu. Fwanyeya ira kohokalawo anaimwanana volowa muUmweneni mwa Mulugu na mwasa oira aliwa anolramwisa jofuna ja Mulugu, aliwa limbelaga jolima na ja malronda na jimohi jiwa ja mwilamboni.

21<<Evale namalabole agawenlewo, ohomuwandelaga mbwiyaye ule. Mbwenye mbwiye wa vande vale agavwile, ohotakaleliwaga, liye muwandela ira: <Venya uharege rampa nlukulu na mandila a mutatamoni mo, waazena uno atu atene osimela, orangala, ohoona na atu ohowenda.> 22Namalaba ule agamanle irana jarumiwe liye, ohowelagawo, liye ira: <Mbwiyeni miyo dihirana nnga mwawongele nyo mbwenye mamburo kohalawove.> 23Evale mbwiyaye ule ohomuwakulaga, liye ira: <Udowe mmarampani na ndila da mmatatamoni waakanyihedege atu atene unaafwanye we, kaze kavolowe ira nyumbaga izale. 24Tchoira miyo nnouwandelani ira zela atu atene oroma itaniwa ale, kalivo unafuna lawiha pwando yaga.> >>

Yofwalrafwaniha zela ibaribari yomuhara Yesu

Matewuji 10:37-39

25Noira eno, kohokalawo anamwindji kamuharaga Yesu. Evale Yesu oharungunuwelaga, liye ira: 26<<Akalavo mutu unafuna za wa miyo eto ahamuide babaye na mmaye, muhiyanaye na ahimaye, adibiliye na arongoliye nari ingumi yaye, liye kanakala namadiharaga.#14:26 ahamuide babaye na mmaye, muhiyanaye na ahimaye, adibiliye na arongoliye nari ingumi yaye, liye kanakala namadiharaga: Va Yesu kanawonga ira naidege abalihu. So mbwenye ku wonga mutu wenne unasimbwa aziveliwa abalaye, ahamuziveliwaga Yesu, mutu wenno kanafwanela kala namamuharaye. 27Eto mutu wenne ahanawanda tukula muradi waye adihara, liye kaza eto kala namadiharaga.#14:27 tukula muradi waye: Mutu tukula muradi waye, dowa muhara Yesu ku wonga vilela kwela mabasa a Yesu. Hiya tukula ikwamutu yosema ya Yesu Kiristu, kapatchiha mukohini mwaye. Tchoira Yesu kaarumile atu ira: <<Mutukule muradi waga.>> mbwenye aarumile ira kada mutu atukule muradi waye. 28Kodi muwari mwa nyo, mutu afunaga manga nyumba yolapa ya gwarda#14:28 nyumba yolapa ya gwarda: Malambo a mundulrimu amwene komangetcha nyumba dolapa ira mutu agwela, aing'anege ilambo yatene. Yeniyo yalaba ira amwidani kazaga, kaoneye kagalive olapela wene. unobaranyeda roma manga ahanababihe garati akontari kobiri dinna liye, aona akala unomarihana nyumbayele? 29Mutu wenno ahanairana eno, liye unomanga aliserisive, mbwenye nyumbiwa kinamala. Aira enne, atu atene anerege muteya keraga: 30<Mulombwanole ohoroma manga nyumbaye pama eto kawandile mariha!> 31Eto kodi mwene guvi uni afunaga dowa wana kondo na mwene nfwaye ahababihaga garati aumbuwela ira: <Miyo dinna anyakondo 10.000. Mwene nfwaga unna 20.000. Kodi miyo na anyakondo aga nnowanda wana na mwene nfwaga unna anyakondo 20.000?> 32Liye aona ira: <Miyo kannawanda agondjiha>, mwene nfwaye ule agalive olapela wene, liye unoaruma anamalabaye ira: <Mudowe mwawonge na mwene nfwagole, mwanvepe makalelo anafuna hiyo vwanana nahawanile.> >> 33Yesu ohomarihaga eraga: <<Sawasawa muwari mwa nyo, mutu wenno ahanawanda rumela hiya jatene jinna liye, wenno kanawanda kala namadiharaga.>>

34Yesu ohowongaga eto eraga: <<Mwinnyu tchi yengo yapama. Mbwenye yozivele yamalamo, unawanda avi welela kana yoziva ya mwinnyu akoka? 35Unagomela tukuliwa dowa tatiliwa. Mwasiwa kanalaba yengo, nne para tatileliwa vateyani ira teya ibalihe pama, nne para tatileliwa vakambani ya mambi. Ule unna mabaru ovwana, avwe.>>

Currently Selected:

Lukaji 14: iLolo

Highlight

Copy