IWUKA 11

Mbonyi tsa iwoho lya orio kiwee kya Misri yahambo

1Mndumii-Ruwa kawia Mose, “Kutsuheṟepfo ngapo imu, sa njechiende huya Farao na huya Misri; numa nechimuinenga nyo momu muwuke kunu; nao ili echimuinenga momu, nechimufuna kichi kichi mukure kunu. 2Kyasia, iyo deda madunyi ha wanduwa, na orio mndu msoṟo nakunde kui kiheri kyake, na orio mndu mka nakunde kui kiheri kyake, shihia sha fesa, na shihia sha sahabu.” 3Mndumii-Ruwa kainenga wanduwo iidikio oshangunyi lo Wamisri. Ngoseṟa ya isho, Mosechu nawei mnene ang'anyi kulya orukenyi lo Misri, oshangunyi lo waṟundi wa Farao, na oshangunyi lo wandu wake. 4Mose kahamba, “Mndumii-Ruwa nahamba adi, kui kio kya mahelehele inyi njechikure njiide Misri kose, 5Na wawee wose wa orukenyi lo Misri wechipfa, wokia mana mmbee o Farao adamie loṟikehu loke lo wuitoṟi ushike mana mmbee o kisinga ki numa ya ifeo; na orio kiwee kya shuma shose. 6Nlyondi kochikaapfo kilio king'anyi orukenyi lo Misri lose, sa ofano loke lulalembono kiheri kyose, manya ofano loke lochikaa luwono manyalepfo. 7Kyaindi ipfo ko wana wa Waisraeli kuipfo manya kite kechipomapfo, kochiho olele kiidi kya wana wa Israeli, kundu muwuteho imanya chandu Mndumii-Ruwa ailetsana Wamisri na wana wa Waisraeli. 8Na waṟundiwo wapfo wose wechisoka na koko inyi, nawo wechinjindia wehamba, kure iyo, na wanduwa wapfo wose waitumanyi na iyo; na numa ya isho njechikure.” Nahong'u kawuka ko Farao na nyashi ing'anyi.

9Mndumii-Ruwa kawia Mose, “Farao echimuidikia nyopfo; kundu ṟiho tsako tsiengeṟeke ipfo orukenyi lo Misri.” 10Mose na Aroni walewuta ṟihotso tsose oshangunyi lo Farao; Mndumii-Ruwa kaumiṟa mrima fo Farao, nalainenge wana wa Waisraeli wawuke kulya orukenyi loke.

Currently Selected:

IWUKA 11: KIM2

Highlight

Compare

Copy