IWUKA 18

Yethro asenguda Mose

(Uwa 1:9-18)

1Nahong'u Yetro, mkohanyi o Wamedi, ndeye omka o Mose, kaicho mbonyi ya shindo shilya shose Mndumii-Ruwa, awewutie Mose, na Waisraeli wandu wake, chandu Mndumii-Ruwa aleende Waisraeli wawuke Misri. 2 Nalyo Yetro, ndeye omka o Mose kaira Sipora, mka o Mose, amemaa immbihiṟa, 3 handu hamu na wana wake wawi; kiidi kyawo rina lya umu nyi Gershomu, kipfa nalehamba, “Inyi njilewa mhenu orukenyi lo wuhenunyi;” 4na rina lya o kawi nyi Eliezeri, kipfa nalehamba, “O Ruwa o wande oko nawei ngaya yako, kanjiashuo na oshu lo Farao.” 5Kyasia Yetro, ndeye o mka o Mose, handu hamu na mka o Mose na wana wake wawi, wakahendia Mose kulya nuka ya msanga, alya handu awekekaa, fumvuhu lya Ruwa; 6Mose kekiwio ke ndee o mka oke, na mka oke na wana wake wawi wakeri imchea, 7naho Mose kaida na nja kundu naambie ndee o mka oke, kamwindia na imhekia momu; nawo wakawesana mbonyi; kiidima wakaida na ihemenyi. 8Mose kaongoya ndee o mka mbonyi tso tsose Mndumii-Ruwa, alewutia Farao na Wamisri kui kipfa kya Waisraeli. Na mbonyi njiumu tsose tsilemhoya njienyi, na chandu Mndumii-Ruwa alewaashuo. 9Yetro nalechihio kipfa kya osaṟio lo Mndumii-Ruwa lose alewutia Waisraeli chandu alewaashuo na Wamisri. 10Naho Yetro kahamba, “Kuichiko Mndumii-Ruwa chu alewaashuo na mawoko ha Wamisri na owoko lo Farao; aleashuo wanduwo wawuke mawokonyi ha Wamisri. 11Wulalu ngamanya ke Mndumii-Ruwa nyai mnene kota maruwa hose; ee-da, kiidi kya mbonyiyo walewawutia kui wunesi.” 12Yetro ndee o mka o Mose kawikia Mndumii-Ruwa kidaso kemaya madonyi. Aroni kacha, na wameku wose wa Waisraeli, walye kelya handu hamu na ndee o mka o Mose oshangunyi lo Ruwa.

Wachili wasambuṟo

(Uwa 1:9-18)

13Lyi lya ngama Mose kadamia kundu naanduye wanduwo, nawo wakahoṟoka wadede na Mose wokia ngamenyi tane kyukanyi. 14Ndee o mka o Mose kekiwona shose alewutia wandu, kahamba, “Nkiki iki uiwutia wandu wa, nkiili ili iyo odamia oo iyo kumonyi, na wandu wose wakahoṟoka o kopfo wokia ngamenyi tane kyukanyi?” 15Mose kawia ndee o mka, “Nkipfa kya ili wandu wekenjichea kundu waidime iwesa kindo Mndumii-Ruwa akundi. 16Wawode kiloyo wekenjichea; na inyi njekedumbuo kiidi kya mndu na odoe, na inyi njekewaloṟa mdumbuye fo Ruwa na mawawaso hake.” 17Ndee o mka o Mose kambia, “Kindoki uiwuta chi nechapfo. 18Na kikaki iyo nochipooka na wandu wa wai na iyo daa, kyamba mbonyi ii nyi njilemeri mnu kopfo iyo, iyo ochiidima iṟunda kumonyipfo. 19Adanyia wulalu oloho loko; njechikuloṟa njia, na Mndumii-Ruwa, nakae hamu na iyo. Iyo kaaho kipfa kya wanduwa oshangunyi lo Mdumii Ruwa, na iyo noendie Ruwa madedo hawo. 20Na iyo nochiwalosha mawawaso halya na chila tsa Mndumii-Ruwa; na iyo nochiwaloṟa njia tsiwawaṟi ichumia, na maṟunda hawawaṟi iṟunda. 21Ngoseṟa ya isho nochikuwonyia kiidi kya wanduwa wandu wawode wuidimi; wahendelie Ruwa, wandu wa wukilohi, wasuo mbucha tsa mbaka; wawike wusongorunyi wowo, wawe wasongoru wo wandu shiku, na wasongoru wa wandu mahana, na wasongoru wa wandu makumi hatanu, na wasongoru wa wandu ikumi; 22Nyiwo wechideda mondu wawadumbuye wanduwo mkonu yose; naho, orio idedo lyiumu wechikuendie iyo, kyaindi orio idedo lyitutu wechilyidumbuo wawenyi; kyasia, ora lo kopfo iyo kumonyi nochiwona mwanya ngoseṟa, nawo wechiduo mhandafo handu hamu na iyo. 23Ke kowuta kudo mbonyitsi, na kokoya nyi wudo Mdumii Ruwa akundi kyasiang'u iyo nochiidima ihoṟoka, na wanduwo nawo wose wechihenda kanyi kowo handu hawo kui ofoṟo.” 24Nahong'u Mose kaadanya idedo lya ndee o mka, kawuta shilya shose chandu alemmbia. 25Mose kasambuṟa wandu wawode wuidimi kiidi kya Waisraeli wose, kawawika wawe wasongoru wa wandu, wanene wa wandu shiku, na wanene wa wandu mahana, na wanene wa wandu makumi hatanu, na wanene wa wandu ikumi. 26Nawo wakadumbuya wandu mondu yawo orio kiheri. Mondu ing'anyi wakaiendie Mose, kyaindi orio idedo lyitutu wakalidumbuo wawenyi. 27Nahong'u Mose kalekana na ndee o mka; nao Yethro kakuhendia, mṟasa orukenyi loke.

Currently Selected:

IWUKA 18: KIM2

Highlight

Compare

Copy