IWUKA 33

Mndumii Awawasa Waisraeli Wawuke Sinai

1 Mndumii-Ruwa kadeda na Mose, kambia, “Kurenyi, iya, iyo na wanduwo kulewawuta Misri, muhende oruka lulya njileliia Abrahamu, na Isaki, na Yakobo nyamu, lilya njilehamba, njechiinenga luwa lyapfo orukalu; 2na inyi njechiduma malaika nakusongoe oshangunyi lopfo; na inyi njechifuna Mkanaani, na Mhiti, na Mwamori, na Mperizi na Mhivi, na Myebusi; 3washikie oruka lokeletseka maruwa na wuki; cha kipfa inyi njechichumia kiidi kyanupfo; kyamba nyo mui wandu wawode ngoo njiumu; njilashike iwaarisia njienyi.” 4Wandu wekiicho mbonyitso njiwicho wakaeṟeṟa; manya kulakae mndu aṟaa shindo shake sha wulole shekuchopa. 5Mndumii-Ruwa kawia Mose, “Wia wana wa Waisraeli, Nyo nyi wandu muwode ngoo njiumu; kokoya ngaida na kiidi kyanu oweṟe lumu, njechimrumatsa; kyasia wulalu kuatuonyi shindo shanu sha wulole kundu njiidime imanya kindo njechimuwutia.” 6Nahong'u wana wa Waisraeli wakakuatuo shindo shawo sha wulole, wakahenda wechifihiṟa wokia fumvunyi lya Horebu.

Mndumii Kiidi Kya Wandu Wake

7Kyasia, mwichiwie fo Mose, fuwei kee nyi iira ihema lilya, na iliilika handu haleshe na kambi; kalindumbuya rina, Ihema lyekusanzia. Kikawa orio mndu akundi idedo ko Mndumii-Ruwa, nawekekure, kahenda ihemenyi lyekusanza, lyiwei nja ya kambi. 8Kikawa Mose kamekure nahende, kulya ihemenyi, wandu wose wawekekure wakahoṟoka, orio mndu mongo fo ihema lyake, kaambuya Mose, tane aida na kulya ihemenyi. 9Kikawa Mose kameida na kulya ihemenyi, ngo iya ya ipuchi iwekesoka, ikahoṟoka alya mongo fo ihema lilya; nao Mndumii-Ruwa kadeda na Mose. 10Wandu wose wakawona ngo iya ya ipuchi ihoṟoki alya mongo fo ihema; wandu wose wakakure wakaadapfuma, orio mndu mongo fo ihema lyake. 11Nao Mndumii-Ruwa kadeda na Mose kyamu kui kyamu, chandu mndu ekededa na mbuya yake. Numa kahaluka kawuya na kambinyi; kyaindi mṟundi oke Yosua, mana o Nuni, nao nyi mrika, nalakure kulya ihemenyi.

Ruwa Awika Kyaasa Kekaa Kiidi Kya Wandu Wake

12Mose kawia Mndumii-Ruwa, “Ambuya iyo nonjiwia, duo wanduwa; na iyo omenjiwie nyiu ochimduma handu hamu na inyi pfo. Kyaindi nolehamba, Njikuichi rina lyapfo, na iyo nolewona osaṟio oshangunyi loko. 13Kyasiang'u, wulalu ngakuterewa, kokoya njilewona osaṟio oshangunyi lopfo, kenjiloṟa njia tsapfo, njiidime ikumanya na ikuṟundia necha. Ke kumbuo ke mkambo fu nyi iyo kulefusambuṟa fuwe fopfo. 14Kyasia, Mndumii kambia, ‘Kyamu kyako kechichumia na iyo, na inyi njikunenge sia.’” 15Na Mose kambia, “Kyamu kyapfo kilamehende hamu na inyi; manya kulawute iya. 16Kokoya ulahenda na inyi na wandu wako, kechimanyika kuda ke njilewona osaṟio kyamunyi kyapfo, inyi na wandu wako? Kipfa kohenda naso, wandu wechimanya ke lufananyi na wandu wengi wa wuyana pfo.” 17Mndumii-Ruwa kawia Mose, “Njechiwuta na idedolyi ohamba daa, kyamba iyo nyi mbuya yako, na inyi njimchihie nyi iyo.” 18Kyasia, Mose kamterewa mnu kechihamba, “Kenjiloṟa kenjiloṟa kiṟumi kyapfo.” 19 Mndumii-Ruwa kahamba, “Ee da, Inyi nyi Mndumii-Ruwa. Na njechiloṟa osaṟio na ikunda ko mndu ose ngakunda. Njechikuloṟa kiṟumi kyako na ikutana noidime iicho rina lyako liele.” 20Kyaindi ochiidima iwona kyamu kyako pfo, kyamba mndu oose echinjiwona nechipfa. 21Mndumii-Ruwa kahamba, “Ambuya, kuwode iṟaṟa kufui na inyi, hoṟokaho; 22numa ili kiṟumi kyako kechiida njechikuwika kiidi kya mwanya fukeri o iṟaṟenyi, na ikushikia ko owoko loko mtano ngamarisa iida. 23Na inyi njechiwuta owoko loko huya yapfo, na iyo nochiwona mhongo foko, kyaindi kyamu kyako ochikiwona-pfo.”

Currently Selected:

IWUKA 33: KIM2

Highlight

Copy

Compare