IWUKA 40

Ihema lya Mndumii-Ruwa, lyahoṟotso na ishimbuyo

1Mndumii-Ruwa kadeda na Mose, kambia, 2“Mkonu fo kuwoka fo meri fo kuwoka nochihoṟotsa handuho hekaa ihema lyekusanzia. 3Na iyo nowikepfo isanduku lya wuṟingishi, na iyo nolishikie isanduku lyo na isulia. 4Na iyo noende mesa noiwikepfo, nowikepfo necha shindo shilya huyayo; numa noitse na mba kimnaṟa kilya kya taa, na iatsa taa tsakyo. 5Numa nohoṟotse rasio iya ya sahabu idutsiaho uvumba sumhana na isanduku lya wuṟingishi, na iwika isulia o mongo fo handuho hekaa. 6Numa nowike rasio lya kidaso kemaya modonyi sumhana na mongo fo handu hekaa ihema lyesanzia. 7Numa nowike biṟikalyo makidi hawi ha ihema lyesanzia na rasiolyo noletsiepfo mṟinga. 8Numa nohoṟotse okuta lo oṟiho lutengetie njora tsose, na imasa isulia o mongo fo oṟiho. 9Numa noire mafuda heshia, na ishia mafudaho handuho hekaa, na orio kindo kii ipfo mba, na iihaluo iwe njiele, na shihia shayo shose; na handuho hechiwa haele. 10Numa nochishia mafuda rasio lya kidaso kemaya modonyi, na shihia shalyo shose, na iihaluo iwe rasio njiele; na rasiolyo lyechiwa lyiele mnu. 11Numa nochishia biṟikalyo mafuda na mrihiyo folyo, na ilyihaluo lyiwe liele.

12“Numa noende Aroni na wana wake na o mongo fo ihema lyekusanzia, nowasanje na mṟinga. 13Numa noṟike Aroni maṟao maele; na iyo nomshie mafuda, na immbika nawe mwele, kundu naidime injiṟundia kiidi kya iṟunda lya wukohanyi. 14Numa noende wana wake na iwaṟika kanzu tsawo; 15Na iyo nochiwashia mafuda chandu oshia ndeawo mafuda, kundu wanjiṟundie kiidi kya iṟunda lya wukohanyi; na ishiolyo lyawo lya mafuda lyechiwa nyi wukohanyi wo mlungana shisharinyi shawo shose.”

16Mose katana ado shose; chando Mndumii-Ruwa emmbia nyi wudo aletana. 17Koikishika meri fo kuwoka maka fo kawi, mkonu fo kuwoka fo meri handu halya hekaa halehoṟotso. 18Mose kahoṟotsa handu hekaa, kawika mrihiyo kahoṟotsa mbau tsake, kawikapfo mriiti yake, kahoṟotsa ngo tsake. 19Kahekiaho ihema huya handu halya hekaa, kahekia kipfinko kya ihema huyalyo; chandu Mndumii-Ruwa alewawasia Mose. 20Kaira kiṟingishio kilya kakiwika kulya isandukunyi, kawikaho mashidi helyiduo o huyalyo, kahekia loṟika lo osaṟio huya isandukulyo, 21kiidima kaende isandukulyo kaliwika mba ya handu halya hekaa, nao kamasa isulia lilya lyeshikia kashikia isanduku lilya lya wuṟingishi chandu Mndumii-Ruwa alewawasia Mose. 22Kawika mesa iya kulya ihemenyi lyesanzia, ora lo handu hekaa luambuye mtsudu, nja ya isulia. 23Kaṟihicha mkate iya huyayo oshangunyi lo Mndumii-Ruwa; chandu Mndumii-Ruwa alewawasia Mose. 24Kiidima kawika kimnaṟa kya taa kulya ihemenyi lyekusanzia, iambuyana na mesayo ora lo mtsudu luambuye ora lo nuka. 25Kiidima kaatsa taa tsakyo oshangunyi lo Mndumii-Ruwa; chandu Mndumii-Ruwa alewawasia Mose. 26Kawika rasio lya sahabu kulya ihemenyi lyekusanzia kufui na isulia. 27Kadutsiaho uvumba wo mafuda hepfaama; chandu Mndumii-Ruwa alewawasia Mose. 28Kawikapfo isulia lya mongo fo handu halya hekaa. 29Kawikapfo rasio lya kidaso kemaya modonyi alya mongo fo handu hekusanza, kalekiaho kidaso kemaya modonyi, na kidaso kya mso; chandu Mndumii-Ruwa alewawasia Mose. 30Kawikapfo mboṟiko kulya ihemenyi lyekusanzia na rasio, kawikapfo mṟinga folyisanja. 31Mose na Aroni, na wana wake wakasambapfo mawoko hawo na madende; 32mandi wameida na ihemenyi lyekusanzia, na mandi wametikiria hafui na rasio, walesamba chandu Mndumii-Ruwa alewawasia Mose. 33Kahoṟotsa omombo lo oṟiho lukatengetia handu halya hekaa na rasio, kamasa isulia lya mongo fo oṟiho lulya. Nahong'u Mose kamarisia iṟundalyo.

Ipuchi huya ihema lya Mndumii-Ruwa

(Mta 9:15-23)

34 Nalyo ipuchi lilya likashikia ihema lyekusanzia, na kiṟumikyo kya Mndumii-Ruwa kikaichuṟa handu halya hekaa. 35Manya Mose alaidime iida na kulya ihemenyi lyekusanzia, kipfa kya ipuchi lilya lilekaa huyalyo, na kiṟumi kyo kya Mndumii-Ruwa kikaichuṟa handu halya hekaa. 36Na kiheri ipuchi lileirio kuwuka huya handu halya hekaa, wana wa Waisraeli wakakure wakahenda shaṟonyi shawo shose, 37Indi kokoya ipuchi lilya lilataṟawuka, kiheri kyo wechiira kyaṟopfo mtano kiheri lyameiroho. 38Kyamba ipuchi lilya lya Mndumii-Ruwa liwei huya handu halya hekaa kiheri kya mfiri, na liwewode modo kiidi kyalyo kiheri kya kio.

Currently Selected:

IWUKA 40: KIM2

Highlight

Copy

Compare