MAWOOKIONYI 49

Yakobo awikia wana wake ona

1Yakobo kalaha wana wake, kahamba, “Kusanzienyi handu hamu,

kundu njimuwie shindo shechimuhoya mkonu yechicha.

2Kusanzienyi, muicho lanye wana wa Yakobo

njiadanyienyi Israeli, ndeanu.

3Reubeni, ui mana oko mmbee,

Pfinya tsako, na wuilewetsi wo wuidimi woko,

nuelewetsie wengi kui wunene na pfinya.

4Nutoolie mṟasa cha mfu fo mṟinga, na kulawadese wunene,

Kipfa kuledooya kitaṟenyi kya ndeo,

Kokiterefutsa; nalekidooya kitaṟa kyako.

5Simeoni na Lewi nyi wana wa mka.

Njoshu tsawo nyi shisha sha wutimbiri.

6Mrima foko, kulaide na kiidi kya kiṟike kyawo,

Wulole woko, kulakulunge na kisanzio kyawo,

Kyamba kiidi kya tuuke yawo walewaha mndu,

Na kui orikiki lowo waledumbuo mri fo mmbe;

7Tuuke yawo na iseso, kyamba iwenjiwawo,

Na nyashi yawo, kyamba ilawewode makulili.

Njechiwahawa kiidi kya Yakobo,

Njechiwapaṟatsana kiidi kya Israeli,

8Yuda, wana wa mayo wechikuichika,

Owoko lopfo lochikaa nzingonyi ya wakituwa wapfo.

Wana wa ndeo wechikuaramia.

9 Yuda nyi ialea lya miiso (simba)

Kuwuka kilasionyi, mana oko, noledopfo.

Nalearama kakulaṟa wanda cha miiso,

Na cha miiso njika; nyiu echimwamtsa?

10Ndichi ya wumangi yechilekana ipfo ko Yudapfo.

Manya mowika mawawaso madendenyi hakepfo.

Na kuwede nache Ichu, menyi uikolonyi.

Ichu mkambo ya wandu wechimwindia.

11Nechipfunga nzoi yake kidinyi kya msabibu,

Na ihache lyake lya nzoi kidinyi kya msabibu mcha.

Nasanjie nguo tsake na mpfinyo,

Na maṟao hake na samu ya msabibu.

12Meso hake hechifana kimaande kui mpfinyo,

Na maheho hake hechiila cha maruwa.

13Zebloni nechikaa mbai ya ipalyipalyi,

Nechiwa mbai ya ipalyipalyi cha handu heleṟia merikebu.

Na mṟasa foke fochiwa mbai ya Sidoni.

14Isakari nyi nzoi iwode pfinya.

Ekekulaṟa kiidi kya mapo ha machondi;

15Nalewona ke handu hesia moo nyiho hecha,

Na oruka ke nyi lulucha,

Kaaramtsa koso lyake lyiduo mhanda,

Kawa isinga ko maṟunda maumu.

16Dani nechianduya wandu wake,

Cha umu o mkambo fo Israeli;

17Dani nechiwa njoka mtandarenyi,

njoka ya wuṟoi mbai ya njia.

Ekeimada mbahachu tsa frasi,

kundu msa echiidoya nechiho na mhongo.

18Okiṟo lopfo njileluwedia, Hoi Mndumii-Ruwa.

19Gadi ichekeṟo lechimṟingichia,

Kyaindi nechiwaṟingichia wo mṟasa kitsinano.

20Aseri, kelya kyake kechiwa kinoru.

Nao nechilekia sha nnga sha wumangi.

21Naftali nyi mburu ya nja njika ilanjipfunge; yekeshaa shidahina shicha.

22Yosefu nyi ikidi lya oṟuwe liikumbia,

ikidi lyitutu likumbia kufui na soka,

maṟamba hake hakualie mawandenyi.

23Welasa na mfi walembutia shiwawo kuinyashi.

Wakamkumbia, wakamsukiṟa mnu iki kiwicho.

24Kya indi wuda woke wukakaa wuwanzi.

Mawoko hake hakawada pfinya,

Kui mawoko ha mopfinya o Yakobo;

Kui rina lya mlisi, nyio iṟaṟa lya Israeli.

25Ee-da kui Ruwa o ndeo nyio echikutarama.

Na kui Ruwa Menyipfinya echikuwikia mboṟa.

Kui mboṟa tsa ruwehu huye.

Mboṟa tsa mṟingenyi kundu kuṟungukie kui wanda,

mboṟa tsa mawee na tsa wusunyi.

26Mboṟa tsa ndeo, tsiidie mboṟa tsa mafumvu ha mlungana;

Shindo shiwode kiweṟe sha mafumvunyi ha mlungana;

Huya ododo lo mdo foke icho

Shikekaa huya mdo fo Yosefu,

huye ya ichu awemletsane na wana wa mae.

27Benyameni nyi kite kya ngeṟenyi ekeranduo randuo,

ngamenyi nechilya shilya alewada,

na kyukanyi nechihawa shilya aleende shidenyi.”

28Itso nyitso mbaṟi tsa Israeli ikumi na tsiwi.

Na isho nsho ndeawo alewawia, na iwawikia mboṟa; kui umu umu kui mboṟa yake alewawikia.

Opfu lo Yakobo

29Kawawawasa, kechihamba, “Inyi njihenda isanyio handu hamu na wandu wako; munjiṟike hamu na wande wako, opangenyi lui demenyi lya Efroni, Mhiti; 30 kulya opangenyi lo dema lya Makipela, liambuyanyi na Mamre orukenyi lo Kanaani, sa Abrahamu alelihuṟa handu hamu na dema lya Efroni Mhiti, hawe handu hake heṟika wandu. 31 Npfo kundo waleṟika Abrahamu, na mka oke Sara napfo waleweṟika Isaki na mka oke Rebeka, na inyi napfondo njileṟika Lea; 32dema na opanga lyiipfo lilehuṟo ko Wahiti.”

33 Nahong'u Yakobo kekimarisa iwawasa wana wake, kairia madende hake kitaṟenyi, kapfa, kasanzio handu hamu na waku wake.

Currently Selected:

MAWOOKIONYI 49: KIM2

Highlight

Compare

Copy