WALEWI 11
11
Shuma shiteṟefukie na shilateṟefukie
(Uwa 14:3-21)
1Mndumii-Ruwa kadeda na Mose na Aroni, kawawia, 2“Dedenyi na wana wa Waisraeli, mochiwawia: Shumasho shii na moo nyisho mochilya, kiidi kya mandoho hose hai wuyanenyi. 3Orio indo lyiwode mbahachu ipfo madendenyi halyo, tsihawukanyi o makidi hawi, sa lyekelya ngamru, iho nyi mochilya. 4Handu hamu na isho, manya mulalye nyama tsa kiuma kyose kilakelya ngamru, ma koka mbahachu tsake tsihawukanyi makidi hawi; manya mulalye ngamia, kipfa kya ili yekelya ngamru, ilyo nyi indo lifanyi lilawari ilio nanyo. 5Na iṟenganatsi, kipfa yekelya ngamru kyaindi liwode mbahachupfo, yo nyi kindo kiteṟefutsie mrima konu. 6Na kilodang'a, kipfa yekelya ngamru, kyaindi kiwode mbahachupfo yo nyi kindo kiteṟefutsie mrima konu. 7Na nguwe, kipfa yo iwode mbahachu, iwode madende hahawanyikie o makidi hawi, indi yekelya ngamrupfo, yo nyi kindo kiteṟefutsie mrima konu. 8Mulalye nyama yatso manya mulapaye mnying'a yatso; isho nyi shindo shiteṟefutsie mrima konu.
9“Kiidi kya mandoho hose ha ipfo mṟingenyi na mochikuliia, orio kiwode makungo na mawala sha ipfo mṟingenyi na ipfo ipalyipalyinyi, na ipfo medenyi mochishikuliia. 10Na iho hose halawode makungo na mawala ha ipfo ipalyipalyinyi na medenyi, kiidi kya isho shose shekechumia mṟingenyi, na kiidi kya isho shose shii na moo, shii mṟingenyi, isho nyi shindo shiphulutsie konu, 11shechiwa shindo shipfulutsie konu; mulalye nyama yasho, na mnying'a yasho yechiwa shipfulutsie konu. 12Orio kilawode makungo manya mawala kii mṟingenyi nyi kindo kipfulutsie konu. 13Shileheshi shechiwa shipfulutsie konu; shechiliopfo, nyi shindo shipfulutsie; mbeṟo, na fuṟukombe, na mbaṟahanga; 14na owishi, na kozi kui mbaṟi yasho, 15na orio ikuru kui mbaṟi yaho; 16na nyaha na kirukanjia, na dudumizi, na kipanga, kui mbaṟi yasho; 17na ikudukudu, na mnandi, na ikudukudu lying'anyi; 18na mumbi, na mwari, na mderi, 19na korongo, na koikoi kui mbaṟi yaho, na hudihudi, na ikungu.
20“Na shose shekeafuo shiwode makungo shekechumia na madende haana, ishi nyi shipfulutsie konu. 21Hamu na isho, ishi shekeafuo shiwode makungo shekechumia na madende haana shisumhanyi ikuliia; isho shiwode madende maleshe, herunduka huya oruka; 22kiidi kya isho muwode momu foshilya; nzihe, kui mbaṟi yatso, na nzihe tsing'anyi kui mbaṟi yatso, na maandi kui mbaṟi yatso, na ndatari kui mbaṟi yatso. 23Kyaindi shose shekeafuo shiwode makungo shiwode madende haana, nyi shindo shipfulutsie konu.”
Mando hai na moo na hapfiie halawaṟi ilya
24“Nanyo mochiteṟefuka mrimenyi kui kipfa kya shumashi; orio mopaaya mnying'a fosho nechiteṟefuka mrima mṟasa kyukanyi, 25na mnducho oose echiduo ikyo kyose kya mnying'a yasho nechisanja nguo tsake, na nechiteṟefuka mṟasa kyukanyi. 26Orio kiumbe kiwode kudende kuhawe kawi nakyo kilawode mbahachu tsiwi, manya kilekelya ngamru, ikyo nyi kiteṟefukie konu; orio mopaaya shiumbesho nechiteṟefuka. 27Kingise orio kiumbe kekechumia na shitanga shake, kiidi kya shiumbe sho shose shekechumia na madende haana, isho nyi shindo shiteṟefukie konu; icho oose echipaaya mnying'a yasho, nechiteṟefuka mṟasa kyukanyi. 28Na msa echiduo mnying'a fosho nechisanja nguo tsake, na nechiteṟefuka mṟasa kyukanyi, isho shose nyi shiterefutsie konu.
29“Na kiidi kya shindo shilya shekeafuo wanda, ishi nyi shiteṟefukie; kyaha, na ikokoi, na itaha, kui mbaṟi yaho 30na guruguru, mbukanda, na isehesa, na goromeo, na shiafuo 31Isho shose nyi shindo shiteṟefukie kiidi kya isho shekeafuo; icho oose echishipaya, kiheri shipfiie, nechiteṟefuka mṟasa kyukanyi. 32Na kindo kyo kyose kechihoya mnying'a fo indolyo, kechiteṟefuka; kokoya nyi kihia kya kidi, ang'u nguwo, ang'u njonyi, ang'u ikunyia, kihia kyo kyose kechihoyo, ki nyi kihia keṟunda iṟunda lyo lyose kiwaṟi kiwiko mringenyi nakyo kechiteṟefuka mṟasa kyukanyi, nlyondi kechiheṟemka.
33“Na orio kihia kya teri kechihoyo nyi indo limuho, orio kindo kii kiidi kyakyo kechiteṟefuka, na kihia kyo kechipaṟopaṟo. 34Orio kelya kiipfo, kii nyi kelio, ikyo mṟinga fochinyoo ili numa kechiteṟefuka; na orio kenyoo kii nyi kenyo, kii ipfo kihienyi, kechiteṟefuka. 35Na orio kindo kechihoyo nyi kipeṟengu kyo kyose kya mnyinga foho kechiteṟefuka; kokoya nyi nungu ya modo, ang'u mariko ha teri, kechipaṟopaṟo; nyi shii shindo shiteṟefukie, konu nyo shechiwa shindo shiteṟefukie. 36Handu hamu na isho, soka ang'u maṟungu ha mṟinga kundu mṟinga fokekuwumbia shikahoyo nyi mnying'ayo, shishiele; indi kindo kechipaya mnying'ayo kechiteṟefuka. 37Na kipeṟengu kya mnying'a kikahoya mbeu tsewaya tsechiwaayo, tsechiwaayo tsinjiele. 38Kyaindi kokoya mbeutso tsilewiko mṟinga, na ikyo kyose kya mnying'ayo ikatsiolokia, tsechiteṟefuka.
39“Kokoya kopfa indo lyose, sa muwode momu folya, msa echipaaya mnyuing'afo nyi echiteṟefuka mṟasa kyukanyi. 40Na msa echilya nyamayo nechisanja nguwo tsake, nao nechiteṟefuka mṟasa kyukanyi; na msa echiira mnying'a folyo nechisanja nguwo tsake, nao nechiterefuka mṟasa kyukanyi.
41“Orio kindo kekeafuo wanda nyi kindo kipfulutsie; kechiliopfo. 42Orio kindo kekekukuruo wanda na ndeu yakyo, na orio kindo kekechumia na madende haana, na orio kekehenda na madende hafoi, isho mulashilye kipfa shiteṟepfukie. 43Koikyo manya mlakuteṟepfuse koilya shindosho shekeafuo orukenyi. 44 Kipfa kya ili Inyi njii Mndumii-Ruwa onu njimuele; heṟemtsenyi mrima yanu, muwe waele. Manya mulafanyitse mrima yanu kui kindo kya mbaṟi yose kekeafuo, kekechumia orukenyi. 45Kyamba Inyi nyi Mndumii-Ruwa, Ruwa menyi wuitoṟi njilemteteṟa kuwuka orukenyi lo Misri, kee njiwe Ruwa onu; ko ikyo mochiwa waele, kyamba Inyi njii Mwele.
46“Ilyi nlyo iwawaso kiidi kya mandoho ha nja, na malehe, na orio kindo kii na moo, kekechumia mṟingenyi, na orio kii na moo orukenyi: 47Ambuyenyi muidime imanya isho shiteṟefukie na isho shiheṟemtsu, na kiidi kya shii na moo shekelio, na ikyo kii na moo kilekelio.”
Currently Selected:
WALEWI 11: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.