WALEWI 13
13
Ndaṟe ya Saka
1Kiidima Ruwa menyi wuitoṟi kadeda na Mose na Aroni, na iwawia, 2“Mndu kawada njindo mbihunyi foke, ang'u ipaṟi ang'u fana ntutu njiili, nayo ikawa ngapo ya saka mbihunyi foke, nlyondi echiendo na ko mkohanyi Aroni, ang'u ko wana wake, umu o wakohanyi, 3na mkohanyicho nechiambuya ngapoyo ii o mbihunyi, na kokoya njui tsikeri o handu ha ngapoyo tsikawono tsinjiili, na ngapo ikawono iidie na kya mba kota njonyi yake ya handu hengi, iyo nyi ngapo ya saka na mkohanyi nechimwambuya na ihamba ke nyi mndu ateṟefukie. 4Na fanayo njiili, kokoya injiili njonyinyi ya mbihunyi foke, ikawono ilawode kipeche kiidie na kya mba kota njonyi yake, na njui tsa handu halya tsilanjiili, nlyondi mkohanyi echimbika handu mfiri mfungade icho awode ngapoyo; 5numa mkohanyi namwambuyese mfiri fo mfungade; nao kawona ke ngapo yameila weṟu, na ngapo yadung'ana njonyinyi yakepfo, nlyondi mkohanyi echimmbikase handu mfiri mfungade;
6“Numa mfiri fo mfungade mkohanyi naambuyese, kokoya ngapoyo yawooka inyia, manya iladung'ane njonyinyi yake, nlyondi mkohanyi echihamba ke namheṟemtsu; nyi ipaṟi tupu; nao nechisanja maṟao hake; numa nechiheṟemka. 7Kyaindi kokoya ipaṟi liledung'ana njonyinyi yake ammaa ikuloṟa ko mkohanyi na iwona iheṟemka lyake, nechikuloṟase ko mkohanyi, 8na mkohanyi nechiambuya, na ambuya kokoya ipaṟilyo liledung'ana njonyinyi, nlyondi mkohanyi echihamba ichu nateṟefukie; nyi saka.
9“Ili mndu echiwado nyi saka, nlyondi echiendo na ko mkohanyi; 10na mkohanyi nechiambuya, ambuya, kokoya kuwode kiuhee kiili o njonyinyi yake, na njui tsameilachika tsikaila, na kokoya kuwodese nyama njiwishi iledo alya kiuheenyi, 11nyi saka ya kacha ii njonyinyi ya mbihunyi foke, na mkohanyi nechihamba ke nateṟefukie; echimmbika handupfo; kipfa o nateṟefukie. 12Na kokoya sakayo ikamchea njonyinyi yake, na saka ikamdung'ana njonyinyi yose, wokia mdohu tane madendenyi, chandu mkohanyi awona; 13nlyondi mkohanyicho echiambuya, kokoya saka yadung'ana mbihu foke fose, nechihamba ke namheṟemtsu icho awode ngapoyo; yahaluka ikawa njiili yose; o namheṟemtsu. 14Kyaindi handu hose kochiwoneka nyama njiwishi ko mnducho nechiwa nateṟefukie. 15Mkohanyi nechiambuya nyamayo njiwishi, nao nahambe nateṟefukie; nyama iya njiwishi nyi kiteṟefutsa; nyi saka. 16Ang'u kokoya nyamayo njiwishi ileilachikase, ikawa njiili, nlyondi echihenda ko mkohanyi, 17na mkohanyicho nechimwambuya; ambuya, kokoya ngapoyo ileilachika ikawa njiili nlyondi mkohanyi echihamba kee namheṟemtsu icho awewode ngapoyo; o namheṟemtsu.
18“Kingise, mbihu fo mndu fukawada ode lya njonyinyi, nalyo likasalaa, 19na handu ode lilya liwei kukowada kituṟu kiili, ang'u ipaṟi liili, wuili wulonganyi na kimaande kitutu, nlyondi echiloṟa mkohanyi handuho; 20na mkohanyi nechiambuya, na ambuya, kukawoneka kufondekie kota njonyi ingi, na njui tsa handuho tsikailachika tsikaila, nlyondi mkohanyi echihamba kee nateṟefukie; nyi ngapo ya saka, ilechea kiidi kya odelyo. 21Kyaindi mkohanyi kaambuyaho, ambuya, kuwode njui njiilipfo, manya kufondekie kota njonyi ingipfo, indi kowooka isalaa, nlyondi mkohanyi echimbika handu ko mfiri mfungade; 22na kokoya kee njonyi iya yamedungana, nlyondi mkohanyi echihamba kee nateṟefukie, nyi ngapo. 23Kyaindi kokoya ipaṟi lyo lyiili lyatirima alya alya manya liladung'ane, nyi ngoru ya ode; na mkohanyi nechihamba ke namheṟemtsu.
24“Ang'u mbihu fo mndu fukawa fuwode handu njonyi yake kuwode modo, na nyama idoye handu halya ha modo, kokoya kuiho paṟi lya kimaande kitutu, ang'u kiili; 25nlyondi mkohanyi echiambuyaho na kokoya njui tsa paṟi lilya tsiinjiili, na kee kowoneka kufondekie kota njonyiyo; nyi saka, ilechea handu hawode modo; na mkohanyi nechihamba kee nateṟefukie; ii nyi ngapo ya saka. 26Kyaindi mkohanyi kaambuyaho, na ambuya, kuwode njui njiili alya kipaṟinyi kiilipfo, nalyo lyifondekielyo, indi lyisalaa; nlyondi mkohanyi echimbika handu ko mfiri mfungade 27na mkohanyi nechimwambuya mfiri fo mfungade; kokoya kiledung'ana alya njonyinyi nlyondi mkohanyicho echihamba ke nateṟefukie; ii nyi ngapo ya saka. 28Na kokoya paṟilyo lyiletirima alya alya lyiladung'ane alya njonyinyi, indi lyilesalaa; nyi kuleiwuchu alya handu kuwewode modo, na mkohanyi nechihamba kee namheṟemtsu; kipfa ii nyi ngoru ya ihya ko modo.
29“Kingise, mndu msoṟo ang'u mndu mka kawada ndaaṟe ya mdohu, ang'u kerinyi kyake, 30nlyondi mkohanyi echiambuya ndaaṟeyo, ambuya, kokoya kufondekie kota handu hengi, kukawewada njui tsa fana ya mbaṟe, nlyondi mkohanyi echihamba kee nateṟefukie, kyamba nyi ngoru, nyi saka ya mdohu ang'u kerinyi. 31Kokoya mkohanyi kaambuya ngapoyo ya ngoru na ambuya, kukawoneka kulafondikie kota handu hengi, manya kulawodeho njui njiiwu, nlyondi mkohanyi echimbika handu mnducho awodo ngapo ya ngoru ko mfiri mfungade; 32na mfiri fo mfungade mkohanyi nechiambuya ngapoyo, na kokoya ngoruyo ilaledung'ana, manya kulawodeho njui tsa fana ya mbeṟe, na ngoruyo ilalefondekia kota handu hengi, 33nlyondi mnducho echiodo njui indi ngoruyo yechiodopfo; na mkohanyi nechimmbika handu mnducho awode ngoru mfiri mfungadese; 34na mfiri fo mfungade mkohanyi na echiambuya ngoruyo, ambuya, kokoya ngoru ilaledung'ana alya njonyinyi yake, manya kokoya kulalefondekia kota handu hengi; nlyondi mkohanyi echihamba kee namheṟemtsu; nao nechisanja nguwo tsake, nao nechiwa mheṟemtsu. 35Kyaindi kokoya ngoruyo yadung'ana njonyinyi yake numa ya iheṟemka lyake; 36nlyondi mkohanyi echimwambuya; na kokoya ngoruyo iledung'ana njonyinyi yake, mkohanyi echishiha njuitso tsa fana ya mbeṟepfo; o nateṟefukie. 37Kyaindi kawona ke ngoruyo yasalaa, na njui njiiwu tsidoeho; ngoruyo yaruma, nao namheṟemtsu, na mkohanyicho nechihamba ke namheṟemtsu.
38“Mndu msoṟo ang'u mndu mka ili echiwona mapaṟipaṟi haiwaa njonyinyi yake, mapaṟipaṟi maili haiwaa 39nlyondi mkohanyi echiambuya, ambuya, kokoya mapaṟipaṟiho haiwaa njonyinyi ya mbihu foke hamaili kitutu; iyo nyi mbuwa, yachea njonyinyi; ichu namheṟemtsu.
40“Kokoya njui tsa mndu tsatumka o mdohu foke o nawode ohaa, namheṟemtsu. 41Kingise kokoya njui tsa mndu tsatumka mdohu kufui na kyamu, o nawode ohaa; namheṟemtsu. 42Kyaindi kokoya alya mdohu fuwode ohaa, ang'u osu lulya luwode ohaa kukawonekaho ngapo njiili na numa ya kimaande kitutu, loke lo osu. 43Nlyondi mkohanyi echimwambuya, ambuya, ndumbo ya ngapo ikaila na samu samu, mdohu fo mndu awode ahaa, ang'u osu loke lo ohaa, cha ili kowoneka saka njonyinyi ya mbihu, 44o nyi mndu awodo nyi saka, nateṟefukie, ngapo yake ii mdohu foke.
45“Numa icho awodo nyi saka awode ndaaṟe kiidi kyake, nguo tsake tsechiranduo, na njui tsa mdohu foke tsilashikio, nao napfumbuṟie momu foke fo huye, nakoṟoṟome, “Njiteṟefukie, njiteṟefukie.” 46Mafiri hose ngapo ii nao, nechiwa nateṟefukie; nateṟefukie; nechikaa amonyi handu hake hechiwa nja ya omombo.”
Iwawaso lya wuhee wui nguonyi
47“Na ṟaolyo lyiwode ndaaṟe ya saka, kokoya nlya mberi tsa machondi, ang'u nyi lya kitani; 48kokoya lyilipfume, ang'u lyiliokeoke nlya kitani, ang'u mberi tsa machondi; kee njonyinyi, ang'u kindo kingi kyose kikisungusie na njonyi; 49ngapoyo ikawa ya fana ya kimaṟamaṟa ang'u kimaande ipfo ṟaonyi, ang'u njonyinyi, ang'u kiidi kya kikipfume ang'u kiidi kya lyiliokeoke, ang'u kindo kingi kyose kya njonyi; nyi ngapo ya saka, nayo yechiloṟo mkohanyi; 50na mkohanyi naambuye ngapoyo nao nakiwike handu kindokyo kiwode ngapoyo ko mfiri mfungade; 51numa ya mfiri mfungade naambuye ngapoyo; kokoya ngapoyo yandung'ana ko ilyo lyilipfume, ang'u ilyo lyiliokeoke ang'u njonyinyi, ma kokoya njonyiyo iwode kiṟundio kyo kyose; ngapoyo nyi saka iilya; ṟaolyo nyi lyiteṟefukie. 52Nao nechikoṟa ṟaolyo na modo, kokoya lyilipfume ang'u ke lyiliokeoke, lyii lya mberi tsa machondi; angu lya kitani, ang'u kindo kyose kya njonyi, kiwode ngapo kiidi kyake kyamba nyi saka iilya; ṟaolyo lyechikoṟo na modo. 53Na kokoya mkohanyi aambuya, na ambuya, kokoya lyilandung'ana kiidi kya raolyo, ma kiidi kya ilyo lyilipfume, ma ilyo lyiliokeoke, ma kiidi kya kindo kyose kya njonyi; 54nlyondi mkohanyi echiwawasa ke wasanje kindokyo kiwode ndaaṟeyo, nao nawike kindokyo handu ko mfiri mfungade 55numa mkohanyi naambuye ndaaṟeyo, kikammaa isanjo, kokoya ngapoyo ilailachika fana yayo, ma idung'ana, nyi lyiteṟefukie; kechikoṟo na modo; nyi lyinyamaṟikie, kokoya lyiwode ohaa kyamba ang'u kya nja.
56“Mkohanyicho kaambuya kawona ngapoyo yawoka isalaa, numa yamemaa isanjo, nlyondi echiranduoranduo ngapoyo, iwuke ipfo ṟaonyi, ang'u njonyinyi, ang'u kiidi kya lyilipfume, ang'u kya lyiliokeoke; 57numa ikawono na wudo ii oo ṟaonyi, lyilipfume, ang'u lyiliokeoke, ang'u kiidi kya kindo kingi kyose kya njonyi, nyi ndaaṟe yedung'ana; na iyo nochikoṟa ṟaolyo lyiwode ndaaṟeyo modonyi. 58Na ṟaolyo, lyilipfume, ang'u lyiliokeoke, ang'u kindo kyose kya njonyi ili ochilisanja, na ndaaṟeyo ikaukaho ikalekana na ṟaolyo, nlyondi lyechisanjose lya kawi nalyo lyechiwa lyiheṟemtsu. 59Na kiidi kya ngapo ya saka ṟaonyi lya mberi tsa machondi, ang'u lya kitani, kokoya ṟaolyo lyilipfume, angu lyiliokeoke ang'u kiidi kya kindo kingi kyose kya njonyi iwawaso lyayo nyi ilyo, ihamba kee nyi amheṟemtsu ang'u ihamba kee nateṟefukie.”
Currently Selected:
WALEWI 13: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.