WALEWI 7
7
Shidaso shetalaa
1Na iwawaso lya kidasokyo kya deko nyi ili; 2wechishinjia kidaso kya deko alya alya handu wekeshinjia kidaso kekoṟa; na samu yake inanatsio rasionyi njora, tsose. 3Kiidi kya kidasokyo nechisengeṟiaho mafuda hakyo hose; ke; nyi mhasi fokyo fuwode mafuda, na ha onga lo ndewunyi, 4na shiho tsakyo tsiwi, na mafuda hawodanyi natso hai kufui na kitsi kyakyo, na kitambi kii kufui na dima, handu hamu na shiho tsakyo tsiwi, iho hose nechihawutapfo; 5na mkohanyi nechiharumatsia alya rasionyi, shiwe kidaso ko Mndumii kui njia ya modo; nyi mwano fo ideko. 6Orio msoṟo kiidi kya wakohanyi nechikulia kya mwanofo, yechiliiyo kiidi kya handu haele; nyi kii kiele mnu nakamu. 7Chando kidasokyo kya wunyamaṟi kii, na wudo na kidasokyo kya ideko kii; iwawaso lyasho nyi limu mkohanyicho nawike kisanza kyasho, nyio echikaa nasho. 8Kingise mkohanyi echisembeṟia kidaso kekoṟa kya mnducho oose, mkohanyicho nechiira njonyi ya indo lilya lya kidaso kekoṟa alisembeṟia iwe yake. 9Na orio mwano fo mso fotsuwiko rikonyi, na shose shishiteseheṟie nungunyi ang'u kyohonyi, shose shechiwa sha mkohanyicho alesembeṟia kidasokyo. 10Na orio mwano fo mso, kokoya fumsungusie na mafuda, ang'u kokoya fulambike mafuda, wana wose wa Aroni wechifuira wahawiane, orio mndu kihianyi.
Mwano ya ofoṟo
11Na iwawaso lya shidaso sha ofoṟo sa mndu echishiinenga Mndumii nyi ili; 12ke nashilekie kui imwana, nlyondi echiinengya handu hamu na mwano ya mkate ilantarang'ashe insungusie na mafuda, na mkate ya keki ilantarang'ashe injishie mafuda, na mkate ya mso mmamiri fumsanze na mafuda. 13Nechiende mwanofo foke, handu hamu na mkate intarang'ashe, handu hamu na shidaso shake sha ofoṟo kui iana. 14Na kiidi kya isho nechiinenga kimuho kya orio mwano kiwe nyi kidaso keiria huye ko Mndumii, kechiwa nyi kya mkohanyicho echiolia samuyo ya kidaso kya ofoṟo. 15Na nyamayo ya shidaso shake sha ofoṟo tsileshinjo kipfa kya mwano yechilio mfiri naifo fo folekia kidasokyo kyake, nalatsuhaṟe ma kipeṟengu tane ili lya ngama. 16Kyaindi kokoya kiinengoki kya kidaso kyake nyi kiasa, ang'u nyi kya nnga, yechilio mfirifo aende kidaso kyake, numa ikyo kechitsuhaa itane ili lya ngama kechilio, 17indi ikyo kechitsuhaa, kiidi kya nyamatso tsa kidasokyo itane ili lya kaṟaṟu kechikoṟo na modo. 18Na nyamayo yose ya kidasokyo kyake ya kidaso kya ofoṟo ikalio ili lya mfiri fo kaṟaṟu, molekia kidaso echiidikiopfo, manya yechiitalio ko ichu moilekiapfo; yechiwa nyi kipfulutsa, na mnduchu moilya nechiduo wuwicho woke.
19Kingise, nyama yechikupaya na kindo kiteṟefukie yechiliopfo; yechikoṟo na modo. Na kidi kya nyamayo ingi, orio mndu ai mheṟemtsu nawode momu foilya; 20kyaindi mnducho echilya nyama ya kidaso kya ofoṟo shii nyi sha Mndumii, nao akuteṟefutsie, mnducho nechikumbo kuleshe na wandu wake. 21Nahong'u mnducho oose echipaaya kindo kyose kiteṟefukie, ngafu ya mndu o wandu, ang'u indo lyiteṟefukie, ang'u mapfulutsa hose hateṟefukie, numa kalya nyama ya kidaso kya ofoṟo shii nyi sha Mndumii, mnducho amekumbo kuleshe na wandu wake.
22Mndumii kadeda na Mose, kambia, 23“Deda na wana wa Waisraeli, nowawie, ‘Mlalye mafuda ho hose ha mmbe, manya ha ichondi, manya ha mburu. 24Kingise, mafuda ha indo lyapfa lilienyi, ang'u mafuda ha indo lyaraho nyi mando hengi mlalye manyale, muwode momu foṟunda-naho maṟunda hengi. 25Kyamba mnducho echilya mafuda ha indo, kiidi kya mando halya wandu wekehawuta mwano ko Mndumii kui modo, mnducho echilya mafudaho nechikumbo kuleshe na wandu wake. 26 Kingise, manya mlanyo samu yo yose ma ya kilehe, manya ya indo, ipfo mmbenyi tsanu tsose. 27Mnducho oose echinyo samu, mnducho nechikumbo kuleshe na wandu wake.’”
28Mndumii kadeda na Mose, kambia, 29“Deda na wana wa Waisraeli, nowawie, icho aiendie Mndumii mwano foke fo kidaso kya ofoṟo naendie Mndumii shiinengo shake, shiwukie ipfo mwanonyi fo shidaso shake sha ofoṟo; 30nechiende na mawoko hake amonyi shidasosho shetikiria modonyi; mafuda hakyo handu hamu na kidari nechishiende, kundu kidarikyo kisingitso kiwe kidaso kesingitsa oshangunyi lo Mndumii. 31Mkohanyi nechirumatsia mafudaho o huya rasionyi; indi kidarikyo kechiwa kya Aroni na wana wake. 32Kudende ko ora lo kulyo mochiinenga mkohanyi kiwe kidaso keiria kiwukie ipfo kiidi kya shidasosho shanu sha ofoṟo. 33Kiidi kya wana wa Aroni, icho echisembeṟia samu ya kidaso kya ofoṟo, na mafuda hakyo, o nechiinengo kudende ko kulyo kiwe nyi ohawi loke. 34Kyamba, kidarikyo kesingitsa, na kudendeko koiria, njileshiira ko wana wa Waisraeli ipfo mwanonyi yawo ya shidaso sha ofoṟo na Inyi ngainengya Aroni mkohanyi na wana wake, luwe ohawi lowo lo mlungana kuwuka ko wana wa Waisraeli. 35Ifu nyifo mooko fo Aroni, na mooko fo wana wake, kuwukia ishimbuo kyawo, ipfo mwanonyi yekesembeṟio Mndumii kui modo, mfiri fulya alewawika kundu waṟundie Mndumii kiidi kya iṟunda lya wukohanyi. 36Mooko sa Mndumii, alewawasa wainengo nyi wana wa Waisraeli, mfiri fulya alewashimbuo. Nyi ohawi lowo lo mlungana kiidi kya shishari shawo shose.”
37Iwawaso lya kidaso kekoṟa modonyi nyi ili, na lya kidaso kya mso, na lya kidaso kya wunyamaṟi, na lya kidaso lya ideko, na lya ishimbuo, na lya kidaso kya ofoṟo; 38sa Mndumii alewawasia Mose kulya fumvunyi lya Sinai, mfiri fulya alewawasa wana wa Waisraeli wainenge Mndumii shiano shawo, kulya nuka olelenyi lo Sinai.
Currently Selected:
WALEWI 7: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.