LUKA 5
5
1 Kukashika mfiri fumu, lilya mandi wandu wechicha imlulumia, kundu wamwadanyie kidedo kya Ruwa, nao ahoṟoki alya ohambehu lo nduwa ya Genesareti. 2Kawona ngalawa tsiwi tsiwekeri alya ohambehu lo nduwa iya; na wadehi walya wawembuka-pfo; wakahenda isanjia mdeho yawo ii ya ndusu tsinjioke maṟawushi. 3Kaida na ngalawenyi imuho, iya iwekeri ya Simon, kamterewa naiseheṟe kitutu ihende aleshe-leshe na wambaṟa ya nduwa iya; kadamia, kalosha mamwingi fulya fo wandu ai ipfo ngalawenyi. 4Kekihutsia ideda kawuya iwia Simon, “Duo ngalawa ipfo makiidi hawi, ipfo oṟonyi ya nduwa, musotsye-ho mdehoyo yanu mdehe makunga.” 5 Simon kahaluo kahamba, “Mwaaria, nyi lulee loitambahana kio kyose kukakya lulawone ma kindo, kyaindi kui kidedo-kyo kyapfo na njechihenda sotsya-ho mdeho.” 6 Naalyo wekihenda kuwutia wado, wakakunguwa kilula kya makunga; mdeho iya yawo ikakiṟa itusuka-tusuka. 7Wakatsinyia wodoyawo wa-wekeri ngalawenyi ingi ke wache iwaikanyia; nawo wakacha, wakaichuṟa ngalawa tsilya tsitsiwi itane tsakiṟa isoṟowia wanda. 8Simon Petro awona adi kacha ikuhutsa alya shi-ya madende ha Yesu kahamba, “Kekure nombuke Mndumii, kipfa inyi njikeri mndu makideko.” 9Nyi kipfa waleṟihio mnu o na walya wawekeri nao wose, kipfa kya makunga halya waleorana. 10Nyi wudo na Yakobo na Yohane, wana wa Sebedayo walya waweei wodoe wa Simon. Yesu kawia Simon, “Ulaowuo, kimatsika wulalu nyi ochiwa mdehi modeha wandu.” 11Wameende ngalawa tsilya na wambaṟa, wakakudeya-ho shose, wakamwosha.
Yesu aheṟemtsa mndu awodo saka
(Mat 8:1-4; Mar 1:40-45)
12Kukashika lilya mandi awetsindie mṟinyi fowo fumu-ho, kuweepfo mndu awewodo nyi saka; nao awona Yesu kakuhutsa wanda na kyamu kamterewa kahamba, “Iyo Mndumii, kokukundia na ochiidima injiheṟemtsa!” 13Nao kahoṟuo owoko loke kampaaya kahamba, “Ngamkunda; heṟemka!” Naalyo saka iya ikasia. 14 Kambawasa nalakiwie mndu, “Kyaindi henda kuloṟe kulya ko mkohanyi nowewika na kindo kya iheṟemka lyapfo, chando kikiteṟie nyi Mose kiwe kiṟingishio kyawo.” 15Kyaindi sumu tsake tsikaengeṟa idung'ana, wakakuwumbia mamwingi ifoi icha imwadanyia na ichiṟo nyio ndaaṟe tsawo. 16Nao kawa mosheṟuka, kakaa kundu kulawode wandu kechiterewa Ruwa.
Yesu achiṟa awei mhulyi
(Mat 9:1-8; Mar 2:1-12)
17Kukashika ili limu kechilosha wandu, kuwedamie-pfo Wafarisayo na walosha na wuwawaso wawewukie orio mṟinyi yose ya Galilaya na Yudaya na Yerusalemu, na pfinyia ya Mndumii ikambanza, kachiṟa wandu. 18Wadi aiwa womi warie mndu na kitaṟa, aluo lyetiliwana shiwungo, wakatambahana imwitsa napfo wahende imleṟia alya sumuhana nao. 19Walawone mwaanya fomwitsa, kipfa kya mamwingi fulya fo wandu, wakado kulya mbehu, wakamsotsa kulya matofalinyi ha huye ario nyi kitaṟa kyake, wakamsotsia alya kiidi sumuhana na Yesu. 20Nao awona iidikia lyawo kambia, “Iyo mndu, njonyamaṟo tsapfo nyi tsinjiwute.” 21Walaanyi walya wa shitapu na Wafarisayo wakawooka ihia-hia wakahamba, “A mndu chu-nyi ada, itane adeda ado shindo sheruma Ruwa? Nyiu ichu echiidima iwuta njonyamaṟo tsa wandu shile nyi Ruwa amonyi?” 22Na Yesu kekimanya mahio hawo kahalo kawawia, “Nyiki muihiha ipfo ngoonyi tsanu? 23Sa ki kyangu-ho nyi kihya? Ngesa nyi ihamba, ‘Njonyamaṟo tsapfo nyi tsinjiwute,’ ang'u nyi ihamba, ‘Kure nochuimie?’ 24Kyaindi muwone handu mochimanya ke Mana o Mndu nyi awode pfinya kunu orukenyi yewuta njonyamaṟo kawuya iwia ulya atiliwanyi shiwungo.” Ngakuwia, “Kekureng'u uire kitaṟa-kyo kyapfo nohende kanyi kopfo!” 25Naalyo lienyi kahoṟoka alya sumuhana nawo kakuhendia kanyikoke kechiidapfuma Ruwa. 26Na wandu wakaṟihio wose, wakahamba, “E-lae, nyi inu lowona shiṟiha!”
Lewi alaho nawe umu o wakiloshyonyi
(Mat 9:9-13; Mar 2:13-17)
27Shindo-sho shambutika kawuka-pfo kahenda, kawona mndu mosana okamba elaho nyi Lewi adamye alyando okamba lokesanyio, kacha imbia, “Njoo; awishana na inyi.” 28Nao kada-ho shose, kakure kahenda yawishana nao. 29Na Lewi kahenda imkoṟia mfuho kulya mba koke; kukakaa-ho mamwingi fufoi fo wasanyi wa okamba na wengi wakundanyi nawo wawedamie kilionyi hamu nawo. 30 Kyasia Wafarisayo walya na walaanyi wa shitapu wakarihinyikia walya wa kiloshionyi kyake wakahamba, “A nyiki ili molya mukawenyo hamu na wesana okamba na wetehia?” 31Na Yesu kahaluo kawawia, “Iwo wai na oru wasarie mhangapfo shile nyi iwo waluo tupu. 32Chi njicheye ilaha iwo wecha wasumuhanyipfo, indi nyi iwo wanyamaṟie kundu wadumbuye.”
Mbonyi tsa ikuotoya
(Mat 9:14-17; Mar 2:18-22)
33Nawo wakambia, “Aili wa kiloshionyi kya Yohane wekekuotoya kitsitsi, na iterewa shiterewo, na walya wa Wafarisayo naawo, kyaindi iwo wa kopfo wakawa molya na ikunyooya.” 34Na Yesu kawawia, “Alae nyi mochiidima iwia wandu wa walinyi wakuotoye mandi-ho menyi wali akeri nawo? 35Kya kake na kukae kushike mafiri, ili indi menyi wali echiwuto kowo, nlyondo wechikuotoya mafiri-ho.” 36Kawawia mfanano, “Ma kuwode mndu echiwuta kirache kya nguwo njihya nakiwehie nguwo-hu njikupfo; kokooya nyi wudo echiranduo iya njihya na kirache-kyo kikiwute nguwo-hu nyihya kilaṟinganyi na nguwo iya njiku. 37Ma kuwode mndu echiwika mvinyio mhya machorenyi makupfo, kokooya nyi wudo, mvinyo-fo mhya mfochiranduo-randuo machoreho, nafo nyi fochipusukia wanda na machore hakanyamaṟika. 38Kyaindi mvinyo mhya nyi kikundi fuletsio machorenyi mahya, nasho shikakia shishiwi. 39Ma kuipfo mndu ekenyo mvinyo fukaiye kacha akundi-se mhyapfo; cha-kipfa nyiechihamba, nanga ifu fukaye kacha.”
Mbonyi tsa mkonu to Sabato
(Mat 12:1-8; Mar 2:23-28)
Currently Selected:
LUKA 5: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
