MAITALA 4
4
Kiṟundio Wakohathi waledambikio
1Mndumii-Ruwa kawia Mose na Aroni, 2“Itala wandu wa mba ya Kohathi, umu o shishari sha Lewi, chandu mba tsawo tsii na shishari shawo; 3nochiṟehia wasoṟo wose wawode maka makumi haṟaṟu (30) mṟasa makumi hatanu (50) sa weidima iṟunda lya ipfo ihemenyi lyekusanzia. 4Ili nlyo iṟunda lya wana wa Kohathi, lyeachikia shindo shiele mnu.
5“Mndumii kawia Mose kudi. Kiheri kewunduo kambi, Aroni na wana wake wechiida na ipfo ihemenyi, wasotsie wanda isulia lii mbele ya Isanduku lya mkundana, numa walishikie na isulialyo. 6Huyalyo wahekiepfo kipfinko kya njonyi njimamiri ya mburu, numa waaleho kitambaa kya fana ya buluu iya njicha. Numa waṟoṟowishepfo mshamo yeliduo.
7“Huya mesa yewika mkate yeṟihichia oshangunyi lo Mndumii-Ruwa waaleho kitambaa kya fana ya buluu huyakyo wechiwikaho sahanyi, mboṟiko tsa ubani, mboṟiko na bilauṟi kipfa kya mwano ya mpfinyo. Mkate fochiwiko o mesenyi kiheri kyose. 8Numa washikie shihiashi shose na kitambaa kya kimaande, na huyake wawikepfo kipfinko kya njonyi ya mburu njimamiri. Numa waṟoṟowishepfo mshamo yeliduo.
9“Wechiira kitambaa kya fana ya buluu washikie nakyo kimnaṟa kya taa, na taatso, makasi hakyo, mapongo hakyo na shihia shose wekewika nasho mafuda. 10Wechikiwika njonyinyi njimamiri ya mburu handu hamu na shihia shose wahekie huya mshamo yeliduo.
11“Numa waale kitambaa kya buluu huya rasionyi ya sahapu washikie huye na njonyi njimamiri ya mburu. Numa waṟoṟowishe mshamo yeliduo. 12Wechiira shihia shose shekeṟunda Handu Haele washipfunge na kitambaa kya buluu na ishishikia na njonyi njimamiri ya mburu, numa washihekie huya mshamo yeshiduo.
13“Wechiira mafu rasionyi na huya yake waaleho kitambaa kya king'aring'ari. 14Huye yake wawikeho shihia shose shekeṟunda rasionyi kiheri kya mwindie: mhado, menya, njoliko na mamboṟiko. Washikie na njonyi njimamiri ya mburu na ioṟoṟowishapfo mshamo yelikudika. 15Aroni na wana wake wakameshikia Handu Haele na shihia na nzohoṟa tsasho tsose, wakuṟeheṟie iwooka kyaṟo, nlyondi wandu wa kishari kya Kohathi wechicha washikudike. Kyaindi wo wawode momu manyanta fopaaya shihiasho shielepfo, walashike ipfa. Ilyo nlyo iṟunda lya kishari kya Kohathi orio mandi ihema lyekusanzia lyamesamiṟo.
16“Kiwaṟi Eleasari mana o mkohanyi Aroni naringe mafuda ha taa, ubani wopfaama, mwano ya mso ya orio mkonu, mafuda heshia kiheri keshimbuo na orio kindo kikishimbuo kya ipfo ihemenyi.”
17Nahong'u Mndumii-Ruwa kawia Mose na Aroni. 18“Mlalekie kishari kya mba tsa Kohathi kiidi kya Walewi kirumatso. 19Kyasia kundu walacheipfa kipfa kya itikiria kufui na shihia shiele mnu; nyi wudi ochiwika: Aroni na wana wake wechiida na mba, na ihawia orio umu kindo echiṟunda. 20Kyaindi wa kishari kya Kohathi wechiida na mba iambuya shindo shii shiele mnu mantapfo; wakawuta wado wechipfa.”
Maṟunda ha Walewi kishari kya Gershoni
21Mndumii-Ruwa kawia Mose, 22“Itala wandu wa kishari kya Gershoni kui mba tsawo; 23ṟehia wasoṟo wose wa maka makumi haṟaṟu (30) mṟasa maka makumi hatanu (50) sa weidima iṟunda ipfo ihemenyi lyesanzia. 24Iṟunda lyawo nyi: 25Wechikudika masulia ha ihemenyi liele na ha ihemenyi lyesanzia handu hamu na kipfinko kyalyo, kipfinko kya njonyi njimamiri ya mburu kikihekie huyalyo, isulia lya mongo, 26masulia na shihowo sha oṟiho lutengetie ihema na rasionyi, masulia ha mongo fo mfiṟiha, na nzohoṟa tsose tsekeṟunda handu hamu nasho Wechiambuya mnu shindo shose shekewuto na nzohoṟatsi. 27Aroni na wana wake wai Wakohanyi nyiwo wechiloṟa maṟunda hose ha Wagershoni. 28Na ikudika shindo shose wechisongoyo nyi Ithamari mana o mkohanyi Aroni.”
Maṟunda ha Walewi na kishari kya Merari
29“Na wudo, italase wana wa Merari kui mba tsawo na shishari shawo. 30Nochiitala wasoṟo wose wawode maka wokia makumi haṟaṟu (30) tane wa maka makumi hatanu (50), sa wechiidima iṟunda ipfo ihemenyi lyesanzia. 31Wechiwada iṟunda lyekudika mbau na mataṟuma, ngo na otende lo ihema lyesanzia. 32Na ngo tseṟingichia oṟiho njora tsose, mrihiyo, mambo na shihowo hamu na nzohoṟa tsasho tsose na shihia shake shingi shose. Nochiwahawia kui marina hawo shindo wechikudika. 33Ili nlyo iṟunda lya wanawo wa Merari, ipfo ihemenyi wechisongoyo nyi Ithamari mana o mkohanyi Aroni.”
Mtalie fo Walewi
34Kyasia Mose, Aroni na wasongoru wa madembo hose, wakaitala wandu wa kishari kya Kohathi, kui mba tsawo tsose. 35Wakaṟehia wandu wawode maka wokia makumi haṟaṟu (30) itane maka makumi hatanu (50), orio msa echiidima iṟunda kulya ihemenyi lyesanzia. 36Waweshikie wandu shiku shiwi mahana mfungade na makumi hatanu (2,750). 37Iwa nyiwo wandu wa mba ya Kohathi waleidima iṟunda kulya ihemenyi lyesanzia chandu Mndumii-Ruwa alewawasa Mose na Aroni.
38Iitala lya wandu wa kisharinyi kya Gershoni kui mba tsawo, 39wawode maka wokia makumi haṟaṟu (30) itane maka makumi hatanu (50) wawewaṟi iṟunda kiidi kya ihema lyekoyanyia, 40nawo wawei wandu shiku shiwi mahana haṟandaṟu na makumi haṟaṟu (2,630). 41Iwa nyiwo wandu wa mba ya Gershoni. 42Iitala lya wandu wa kishari kya Merari kui mba tsawo, 43weidima iṟunda kulya ihemenyi lyekusanza, 44wawei shiku shiṟaṟu na mahana hawi (3,200). 45Iwa nyi wa mba ya Merari chandu waleitalo nyi Mose na Aroni.
46Ko ikyo, Walewi wose waleṟehio nyi Mose na Aroni 47sa walewoneka ke wechiidima iṟunda lyekudika ihema lyesanzia, 48waweshikie wandu shiku nyanya mahana hatanu na makumi nyanya (8,580). 49Orio umu naileinengo ohawi loke lowada kiheri kekudika ihemalyo, chandu Mndumii-Ruwa alewawasia Mose
Currently Selected:
MAITALA 4: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.