Luka 10
10
1Pambele patsitsitsi pwu unkuludeva akavahala avange imilevulo lekelakupamato (70), navene akavasumusa ukuvasuṅa inzila mbuvili mbuvili, vwu vakatsitengula mbutsenge mwoni umwu atetsaga ndibiha. 2Akavavula akata: Ijyene imbene ju ńongosu, lola vadebe avabeni. Mutekelesage lino ku Mwenembene asuńe avańakubena mumbene jya mwene. 3Mubihage lino. Lola upwu ndikuvasuṅa pwu ndikuvasuṅa ukuta tukolo tuhangana namaduma. 4Ndakolelaga nakapako ka ndalama, ndavetsaga nakasaka ka mbopo, ndavetsaga nisikato, nukupembetsa ndampembetsaga nu-junge umunu munzila. 5Nńumba umwu mukwingila, mwu nkatengulage ilyakuta: Ulunotsehetso luve nńumba umwu. 6Angave mwale unalunotsehetso, pwu ulunotsehetso lwińo lulatama pamwene. Angave namuli ujyunge pwu lulavakilivukilaga uńe. 7Nńumba mumwa mwu nkavetsage mumwa sikutsoni. Nkalitsage nkańwetsage isyu vali nasyo. Mańa uvi ivomba imbombo anogye ukuta vamombe isya kumomba. Ndasamusaga nńumba tsoni. 8Ngave mukwitsa mbutsenge mwu vikuvupilila, pwu nkalitsage isyu vikuvasugila. 9Nkavaponyage avatamu avali mumwa. 10Mbutsenge umwu ngave mutye tubihe mańa avenevutsenge vibela ukuvupilila mwu nkahume mwimage paluvanza mutetsage: 11Nalu lusumbe lwa mbutsenge vwińo ulutubadamye mmalunde, lwu tukuvakunuṅila tukuvalekela. Lweli lyu mulimańage ili lilyakuta: Ulwene uludeva lwa Nguluve lwitsile luli mbwipi. 12Mańa ndikuvavula ndita: Ilitsuva lilya pwu itsa va mu-Sotomu tsilava nebepe ku tsa mbutsenge uvu. 13Vevyani vi Kolasini, vevyani vi Betisaita. Mańa isipelwa isipelilwe mwańe umu, singave syapelilwe namu-Tili namu-Sitoni pwu ndili vakilivwike kakatale, pwu ndili vaswalile nimikutulo, pwu ndili vatamile mulyela. 14Mańa ilitsuva lilya lya kuhigila pwu nitsa mu-Tili nitsa mu-Sitoni tsilava nyebepe kutsińo. 15Nuve vi Kapelinaumu vi usike kukyańa ukwimikivwa, lola ulasika nambutsuka ukugwisivwa. 16Uvi ipulika itsu mwitsova uńe vi apulike kwane vuvule. Uvi ikuvagilila uńe vi angilye uńe. Mańa uvi ikungilila uńe vi angilye uvi ansuṅile uńe.
17Lola avamilevulo lekelakupamato (70) vakitsa ukwu avasuṅile, vakahekela vakambula vakata: Nkuludeva natsene imepo tsalevile kwavwe mwitavwa lyako. 18Umwene akata: Nuńe ndimbwene USetano ukuṅiluka vuvule uta nzasi vwu itumbuka kukyańa. 19Lola ndivapye amaka ga kukada napańandalwe napatupilili napamaka goni ga ntavangwa, lweli nakange nakalapelele kinu uńe. 20Lweli tsu ndahekelaga itsu ngave mbwene imepo imbivi tsilevile kwańe. Tsu muhekelage lweli itsu ngave mbwene amatavwa gińo gavigilwe kukyańa.
21Pakavalilo kako pwu UMepo umbalatse akampelela ukuhekela sitso UJesu pwu akata: Ndikukuginya vi dada vi nkuludeva nakukyańa napasi ulwakuva usihile tsitsitsi nakuvańaluhala nakuvańakukalagala, uvadindulye avadebe. Ena vi dada tsu ukata tsu nnonu tsitsitsi kumiho kwave. 22Syoni amye udada nunswambe nujyunge umunu nammańili, mwene ju dadaje vi ammańile, nudadaje nujyunge umunu nammańili, mwene ju nswambe vi ammańile nuvi unswambe atye ndindindulile. 23Akavakilivukila vene avakongi va mwene akata: Ga ndugataluko amiho agilola itsu mwilola uńe, 24Mańa ndikuvavula ndita: Avańamalago navakuludeva vavongosu vakanogwa ukulola itsu mwilola uńe, vakalemwa ukutsimańa ukunge, vakata tupulike itsu mupulika uńe, vakalemwa ukwa kupulika ukunge.
25Pwu ujyunge umańandagilo akima akata ndingele akambutsa akata: Vi mańisi uńe ndivombe kiki ikya kwingilila pavuhale vwa vwumi vwa sikutsoni? 26Umwene UJesu akanda akata: Musimilitso ndeti kiki ikivigilwe? Vwu vwilola pakalata pwu vukutsivona iliku? 27Pwu umwene akanda akata: Livigilwe ilita: Unguluve untwa vako unganage nimumbula jyako jyoni nuntima gwako gwoni namaka gako goni nukwisagila kwako kwoni. Namwene unnino ungane nduvwu vwiganile vimwene. 28Pwu UJesu akata: Ugolwise vuvule-vule. Vwu ugahage vuvule-vule, pwu ulavuvona uvwumi. 29Umwene lola akata ndinotse, pwu akamwanda UJesu akata: Ino umwene unjango vi aliku? 30Pwu UJesu akanda akata: Alekwo ujyunge umunu uvi ahumaga mu-Jelusalemu akika ukubiha mu-Jeliko. Munzila mwu akaganila nimińambuda, gyu gikansula imisabwa, gikantova nisonzo, gikandeka vwu pasigye padebe ukuswa, gikaluta. 31Mańa unteketsi akaluta inzila jijyo. Akavona ambwene pwu akahena akaluta. 32Namwene uńa-Levi vuvule-vule akaluta baho namwene. Akavona asike upwu ale, akavona ambwene pwu akahena akaluta namwene. 33Ujyunge un-Samalija namwene ale ninzila jya mwene, akasika baho upwu ale. Pwu umwene kikambona ikisa mwitumbu vwu ambwene. 34Pwu akahegelela akaganza nimono namasilu akavopa isilaho, akantotsa paligodovwe lya mwene, akatsikumbika nńumba jya vańanzila mwu akambuvutsa. 35Lola vwu ivuka pavusiku pwu akatola indalama ivili, akampa umweneńumba jya vańanzila akata: Umbuvuhitsage umunu vango uju, lola syoni isyu ilya syu ndilakuhomba vwu ndivuja ndilutiṅanya. 36Ndeti lino uve upwu vwilola avanu vwu vadatu ava, ale nine aliku ulya uvi agine nimińambuda? 37Umwene akata: Ale nine uvi kyambwene ikisa. Pwu UJesu akanda akata: Bihaga lino vwu ukagahage vuvule-vule nuve.
38Lola vwu vigenda nave UJesu pwu vakatsisika mbutsenge uvunge. Pwu ujyunge undala uvi ale vi Malita ilitavwa akamwupilila nńumba jya mwene. 39Vi ale nununave uvi vatetsaga vi Malija ilitavwa. Vi akatsitama kumalunde ga nkuludeva, akapulihitsa itsu atsovaga umwene. 40Umwene UMalita akatiganika vuvule syoni isinu isyu akata ndigahe. Pwu akatsitsova kwa Jesu akatsita: Nkululudeva tsu navukutsivikila untima uve itsu ununa vango andekye ndimwene imbombo tsoni? Umbule tutangane. 41Umwene unkuludeva akanda akata: Malita, vi Malita ńongosu uve itsu vukisagila itsikukuswanganya. 42Kwukale kapamato lweli akene ukwu upita umunu avetsage nako. Umwene UMalija vi ihalye isima innonu jijyo jyu ujyunge nipoka kumwene.
Currently Selected:
Luka 10: Kinga
Highlight
Share
Copy
Want to have your highlights saved across all your devices? Sign up or sign in
New Testament in Kikinga © British and Foreign Bible Society, 1961.
