Luka 9

1Pwu akavalundamanya avakitsigo navavili akavapa ningusu namaka ga kulesehetsa imepo imbivi nukuponehetsa uvutamu vwoni. 2Akavasuṅa akata: Mbihage nkasimilitsage uludeva lwa Nguluve, nkavaponyage navatamu. 3Akavavula akata: Ndavetsaga nasyo isinge munzila. Bako nulusonzo, bako numpako, bako nisinu nindalama, kwu bako ukuva nigyańingilitsa givili. 4Ngave mukwingila nńumba mwu nkavetsage mumwa, mwu nkahumage vwu mwimile ukuvuja ukuvuka. 5Voni uvwu navikuvupilila, vwu nkahumage mbutsenge vwa vene, nkatovelelage nakasumbe kumalunde, tsu tsive tsa kumańilamwo avene. 6Pwu vakasisimuka ukuvuka, vakamala uvutsenge vwoni, vakatsitsova inongwa innonu mwoni-mwoni, vakavaponya avanu avatamu.

7Pwu namwene nu-Heloti untwa akapulika tsoni itsu apelaga. Pwu akasama ulwakuva avwene avange vita vi vi Johani atsukile mbaswe. 8Avange akavona vita vi vi Elija avonike. Avange akavona vita vi vi namalago ujyunge uva katale atsukile. 9Umwene UHeloti vi akata umwene vi vi Johani vi ndintemile untwe. Umwene uju vi veni, uvi ndipulika ukuta ipelela tsitsitsi? Akata ndimmańe. 10Pwu avapositili vakatsikwitsa ukwu avasuṅile vakambula tsoni itsu vavombile. Pwu umwene akajaga navo akatsikijekela navo mbutsenge uvunge uvwu vita mu-Betisaita. 11Mańa avene avanu vakambona pwu vakankonga ikipuga vuvule. Umwene akavupilila akavavula itsa ludeva lwa Nguluve. Navene avakuvaponya akavaponya. Vakavona vwu litengula ukusema ilitsuva, 12pwu vakahegelela kumwene avakitsigo navavili vakata: Uvatavulage avanu, vabihage mwoni mbutsenge mumbale, mwu vakagone vakalitsage isya kulya. Mańa tuli ndukungu umu. 13Umwene akanda akata: Mbapetsage uńe isya kulya. Avene vakata: Natuli nasyu syongosu. Isivanda sihano nisomba ivili syu tuli nasyo vuvule. Ńage pange tubihage tuvagulilage isinu voni avanu ava. 14Ulwakuva vali pavaelipu vahano (5000) avagosi. Umwene akavavula avakongi va mwene akata: Mbavule vatame ndukindi ndukindi, ulukinde ulunge imilevulu gihano (50) ulukindi ulunge imilevulu gihano. 15Pwu voni vakatama pasi nduvwu avavulaga. 16Pwu umwene akatola nisivanda sihano sisyo nisomba ivili, akalola kukyańa akasana. Pwu akameńulanya akavapa avakongi va mwene, vwu vakavapa avanu. 17Pwu vakalya vakiguta voni. Vakalundamanya utumeńukila utwu vasigitse isidoto kitsigo nasivili.

18Vwu avwene ijekye navakongi va mwene vwu isajile, pwu akavavutsa akata: Avanu upwu vikunzova uńe vita ndili na veni? 19Avene vakambula vakata: Avange vita veve Johani umwotsi, avange vita veve Elija, avange vita vi namalago uva katale sitso atsukile. 20Umwene akata: Uńe lino mwita ndili ńa veni? Pwu akamwanda UPetele akata: Veve Kilisiti va Nguluve uve. 21Pwu umwene akantanila sitso akalagila akata: Ndambulaga ujyunge umunu. 22Akongeletsa akata: Uńamunu upita vi akuvilwagwe sitso. Navańivaha avenekivumbuko navateketsi avavaha navamańakalata valameka valambuda, mańa alatsukila palitsuva ilya datu. 23Pwu akavavula voni akata: Uvi ita aṅongage mumbele uńe, vi upita idulusage vuvule, atetsage nikidamiṅanye kya mwene itwikage sikutsoni, pwu aṅongage uńe. 24Uvi ita ndiponye uvwumi vwango, vi avwambutsihitse ṅani. Lweli uvi uvwumi vwa mwene ambuhitse mumwane, vi aponehitse ṅani. 25Nupwu angave umunu akikavaga kyoni ikilunga angave itagile mumwa, pwu kikumbumbulila kiki lino? 26Uvi iva nisoni kwane nakumameńu gango, namwene Uńamunu alava nisoni kumwene vwu ikwitsa mbuvaha vwa mwene nuvwa dadaje nuvwa vasuṅwa avavalatse. 27Jilweli ndikuvavula ndita: Ńi mwimile baha avange nandakumańe ukuswa vwu nanduvweni tango uludeva lwa Nguluve ukwitsa.

28Pwu vwu atsovile amameńu aga vwu vagonile nnana, pwu akatola nu-Petele nu-Johani nu-Jakobu akatoga navo pakidugala ikinge pakwisaja. 29Pwu vwu ali pakwisaja pwu vakakeńemuka nakumiho ikwanduka iva ponu vuvule, nunsabwa gwa mwene gwiva swe vuvule guṅala. 30Vakavona avanu vavili vitsova nave. Vakavona vwu va-Mose nu-Elija. 31Vwu vakavonekela mbudwadwa. Vakatsova itsa kuhuma nkilunga umu umwene itsu avetsaga pakuhumila mu-Jelusalemu. 32Avene va-Petele navanine itulu tsavalemile. Vwu vakasisimuka, pwu vakambona mbuvaha vwa mwene uvudwadwa vuvule, vakavona navanu vavili vimile nave. 33UMose nu-Elija vwu vimile upwu alipwo jujwa vwu vivuka, pwu UPetele akatsova nu-Jesu akata: Nkuludeva pannonu ukuva baha uvwe. Tutsengage ihema idatu apa. Ijyinge jive jyako, ijyinge jive jya Mose, ijyinge jive jya Elija. Ulwakuva nalumańili itsu atsovaga. 34Vwu ali pakutsova tsitsitsi pwu vakavona ilivingo likuvilikila. Pwu vakadwada vwu ilivingo livaganye. 35Pwu vakavona ilimeńu lihuma mwivingo umu lita: Uju vi vi nswambango ungane kwane, vi mumpulihitsage jujwa. 36Lino vwu lili pakutsova ilimeńu ili, pwu vakavona UJesu ali mwene vuvule. Avene tango vakava mye vuvule, vakaleka nukumbula ujyunge umunu itsu vatsivwene.

37Palitsuva lya kilavo vwu ikwika pakidugala pwu umwene akaganila navanu ikipuga kyongosu. 38Pwu vakakeńemuka umunu nkipuga umu ikuta ita: Vi mańisi nditekelesa kwave ndita ungandolelaga unswambango uju, mańa ndili nave jujwa mwene ludiga. 39Lola imepo jikumusanya, pwu umwene ikuta, pwu itsilika namahuve givoneka pandomo. Jihuma mola-mola vuvule vwu jimusitse. 40Nditekelise kuvakongi vako nditye: Muhumyage imepo iji, mańa valemilwe. 41Pwu umwene UJesu akanda akata: Hi, kwu kutsilakwidika kuki avanu va lino ava, vwu vutsimu vuki! Ndisike ndaku ukuva nuńe, ndisike ndaku ukuta lya imaga sikutsoni! Ungege kunu unswambo. 42Lino vwu ali pakuhegelela nave pwu imepo imbivi jikantwangulitsa pasi akatsilika. Pwu UJesu akatanila nimepo imbivi iji, akamponya undume akampa udadaje. 43Pwu voni vakaginzamuka mwitumbu uvuvaha vwa Nguluve. Lino vwu voni vali pakudega tsoni itsu apelaga, pwu umwene akatsova kuvakongi va mwene akata: 44Mudindulage vunnonu imbulukutu tsińo, mupulikage amameńu ugwu ndikuvavula. Ulwakuva Uńamunu viva pakuvapa mmavoko avanu. 45Avene vakalemwa ukutsivona itsu atsovaga, tsikasihama ukuta valatsivońaga. Nukudwada vakadwada ukumbutsa itsu atsovaga.

46Lukavoneka ulukani avene ulwakuta: Ino veni mbaha twivoni umwu tuvelye? 47Pwu umwene UJesu akatsimańa itsu visagilaga munumbula tsa vene, pwu akantola umwana akambika mumbale mmwene 48akavavula akata: Uvi umwana juju ikumwupilila mwitavwa lyango, vi ańupilye uńe. Mańa uvi ikuńupilila uńe, vi amwupilye uvi asuṅile uńe. Ulwakuva uvi avalutile ńivoni ulwisijo, vi avalutile uvuvaha.

49Pwu UJohani akambula akata: Vi mańisi tumbwene ujyunge uvi imepo imbivi atsihumihitse mwitavwa lyako, pwu uvwe tukambetsa ulwakuva tumbwene natwiva nave pakukukonga. 50Umwene UJesu akanda akata: Kwu mwale nakiki ukumbetsa? Mańa uvi natutegeṅana vi tuvelana nave.

51Lola vwu amatsuva ga mwene ga kuvuja kuntola kukyańa umwene vwu gahegelye, pwu akalotsa amiho ku Jelusalemu mwu akata ndibihe. 52Pwu akavasuṅa avakulongolo mbulongolo mwene. Vwu vakagenda vakatsisika mbutsenge uvunge uvwa va-Samalija mwu vakata tugahe apakuva. 53Avene avenevutsenge vakabela ukumwupilila ulwakuva vakavona amiho alotsitse mu-Jelusalemu ita mwu ndibihe. 54Vwu vatsivwene tsitsitsi avakongi va mwene ava-Jakobu nu-Johani pwu vakata: Nkuludeva, ndulungave vukwidika, pwu ndali tukugutsova umwoto ukuta guhume kukyańa vapitsage vasile. 55Pwu umwene akakilivuka akavatanila akata: O, namwimańili? Ndi vana va Mepo aliku? 56Mańa Uńamunu nitsili ukuvajatsa uvwumi avanu. Bako umwene itsye nkuvapoka. Pwu vakabiha mbutsenge uvunge.

57Lola pwu vwu igenda munzila pwu ujyunge umunu akatsova nave akata: Nkuludeva ndikukukongaga mwoni umwu vugenda. 58Umwene UJesu akanda akata: Vukumbona ndaku? Mańa natsene iṅeve tsili namaguli, nisyene isidege sili nuvuswa, umwene Uńamunu vi nali napo apakuhagulila untwe. 59Ujyunge akambula jujwa akata: Ṅongage. Pwu umwene akata: Nkuludeva ndita ndibihe ndikansile tasi udada. 60Umwene UJesu akata: Uvaleke avaswe vasilane vene. Uve bihaga ukavonye uludeva lwa Nguluve. 61Ujyunge akatsova nave akata: Nkuludeva nuńe ndikukukongaga leka tasi ngavasimilitse avalukololwango. 62Umwene UJesu akanda akata: Uvi ivika ikivoko palikumbulu, ivuja ikwima ukulola kumbele, vi nanogilikuludeva lwa Nguluve.

Currently Selected:

Luka 9: Kinga

Highlight

Copy