Лука 6
6
О сиклярдэ чинэн о гив андэ суббота
1Екхвар андэ суббота, кана о Исус накхелас андар ливадя, катэ барёлас о гив, Лэскерэ сиклярдэ чинэнас о гив, ронискерэнас лэс вастэнца тай ханас. 2Ай сарсавэ фарисея пхучлэ:
— Соски тумэ керэн одова, со на муклёл тэ керэн андэ суббота?
3О Исус лэнги пхэнляс:
— На драпкердянус тумэ одолэстар, со кердяс о Давид, кана ов тай кон сас лэса бокхалилэ? 4Ов диняс андэ кхер ки Дэвлэско, лиляс о манро, кай сас башладимэ э Дэвлэски, саво на муклёлас тэ хал никхон, екх о попазя, халяс, тай диняс лэс ли пэ манушэн.
5Тай пхэнляс лэнги генэ:
— О Чяво о Манушыкано си о Сагбус опэр суббота!
О Исус аиндэрдиел андэ суббота манушэс, савэстэ сас шуки муси
6Авэр суббота о Исус диняс андэ синагога тай сиклярэлас. Отхэ сас мануш шуке чяче мусяса. 7О сикляримаря э Тхэдимаски тай о фарисея дикхенас пал Лэстэ, на кан аиндэрдиел Ов андэ суббота, вай родэнас, андар состэ тэ керэн дошалэс Лэс. 8Ай о Исус джянэлас, состар он тюшундиенас, тай пхэнляс э манушэски э шуке мусяса:
— Ущи тай никлё ко машкар.
Одова ущино тай никлисто ангал. 9Дэчи о Исус пхэнляс лэнги:
— Мэ пхучяв тумэн: со муклёлпэс тэ керэс андэ суббота, лачипэ я джюнгалипэ? Тэ кутардиес о бэшыпэ я тэ мударэс?
10Ов дикхляс карин лэндэ тай пхэнляс э манушэски:
— Сидэ ти муси.
Одова сидиняс, тай лэски муси састили. 11Ай он холясаилэ тай лилэ тэ зборизэн машкарэ пэстэ, со лэнги тэ керэн э Исусеса.
О Исус никалэл дэшудон апостолен
12Одола деса о Исус ваздиняспэс опэр горас тай састи рат зборизэлас э Дэвлэса. 13Кана уло дес, Ов диняс икос Пэ сиклярдэн тай лиляс андар лэндэ дэшудон, савэн тхэдяс апостолен: 14э Симонэс (савэс Ов тхэдяс Пётар), э пхралэс э Андреес, э Яковес, э Иоаннес, э Филиппес, э Варфоломеес, 15э Матфеес, э Фомас, э Яковес, э чявэс э Алфеескерэс, э Симонэс, савэски пхэнэнас Зилот, 16э Иудас, э чявэс э Яковескерэс, тай э Иудас Искариотес, саво уло пхукаимари.
Бахт тай касэвэти
17О Исус фулистино лэнца тэлэ опрал горас, опэр гортэ тханэстэ. Отхэ кидинэпэс бут Лэскерэ сиклярдэ тай бут мануша андар Иудея, Иерусалими тай андар диза ко Тир тай Сидон, савэ си паш ко бошы пани. 18Он алэ тэ шунэн э Исусес тай тэ аиндиен катар насвалиматэс. Одола, кас кхинярэнас о бишужэ духя, ли одола улэ аиндимэна. 19Алаи о дюняс мангенас тэ колизэн ко Исус, вай андар Лэстэ никлёлас зор, сави алаен аиндэрдиелас.
20Дикхляс карин сиклярдэ, о Исус лиляс тэ пхэнэл:
— Бахталэ тумэ, чёралэн,
вай тумэндэ э Дэвлэско Патишайлыки.
21Бахталэ тумэ, кон анкха бокхало,
вай тумэ кан чялён.
Бахталэ тумэ, кон анкха ровэл,
вай тумэ кан асан.
22Бахталэ тумэ,
кана о мануша тумэн на дэхэн,
кана тумэн кувдиен тай кушэн,
кана калярэн тумаро нав андар Чяво ко Манушыкано.
23Вай аякха керэнас э прарокенги о папудэс адалэ манушэнги. Одова дес лошаса чен тумэн, вай опрэ тумэн кан махтадиен!
24Ами касэвэти тумэнги, барвалалэн,
вай тумэ анкха лилянус тумаро рагати.
25Касэвэти тумэнги, кон анкха чяло,
вай тумэ кан овэн бокхалэ.
Касэвэти тумэнги, кон анкха асал,
вай тумэ кан гаулизэн тай кан ровэн.
26Касэвэти тумэнги, кана алаи махтадиен тумэн,
вай аякха лэнги папудэс махтадиенас э хохавнэ прарокен.
О Исус сиклярэл тэ дэхэс тэ душманен
27— Мэ пхэнав тумэнги, одолэнги, кон шунэл Ман: дэхэн тумарэ душманен, керэн лачипэ одолэнги, кон на дэхэл тумэн, 28манген алгышы одолэнги, кон арманя дэл тумэн, тай манген э Дэвлэс одолэндар, кон керэл тумэнги джюнгалипэ. 29Одолэс, кон кан чялавэл ти екх фалка, тхэ ли авэр, ай одова, кон лэл тутар опрунэ савутя, мук мэ лэл ли о гад. 30Кажнески, кон тумэндэ мангел, дэ; тай кон-то, кан лэл тинро, ма манг палэ. 31Керэн э манушэнги аякха, сар тумэ манген, он тэ керэн тумэнги.
32Тэ дэхэнa тумэ одолэн, кон дэхэл тумэн, андар состэ тумэн тэ махтадиен? Вай джи о бэзялэ дэхэн одолэн, кон лэн дэхэл. 33Тэ керэн тумэ лачипэ одолэнги, кон керэн лачипэ тумэнги, андар состэ тумэн тэ махтадиен? Вай джи о бэзялэ керэн аякха. 34Тэ дэн тумэ борджи екх одолэн, кастар ишандиен тэ лэн палэ, андар состэ тумэн тэ махтадиен? Вай джи о бэзялэ дэн борджи э бэзялэн, тай ишандиен, тэ лэн палэ оборкха, сокабор динэ. 35Ай тумэ дэхэн тумарэ душманен, керэн лэнги лачипэ тай дэн борджи, тай ма ишандиен палэ. Дэчи тумэн кан махтадиен опрэ, тай тумэ кан овэн о чявэ э Уче Дэвлэски. Вай Ов Сам лачё джи э налаченги тай э канлыдэнги. 36Овэн милаки, сар милако тумаро Дад.
О Исус пхэнэл катар цындос
37Ма керэн цындос, тай тумэнги на кан керэн цындос. Ма керэн дошалэс, тай тумэн на кан керэн дошалэн. Апувикерэн, тай тумэн кан апувикерэн. 38Дэн, тай ли тумэн кан дэн. Пхэрдо паи, тасавдо тай чёрдёл опрал чети, тумэнги кан чёрэн андэ тумарэ подятэ. Со паи дэн тумэ, асавко кан дэн ли тумэн.
39О Исус пхукавдяс лэнги акасавко пхукаипэ:
— Кан гелэл о коро э корэс? Та со, он на кан пэрэн ли о дуй андэ хандаки? 40О сиклярдо нанай баро пэ сикляримарестар, ай кажни, кон алаи кан сиклёл, кан овэл сар по сикляримари. 41Со ту дикхес карин тикноро кашторо андэ якх тэ пхралэстэ, кана андэ тинрятэ на дикхес бари ровли? 42Сар ту пхэнэс тэ пхралэски: «Пхрала, дэ мэ кан никалав о кашторо андар тэ якхатэ», кана ту на дикхес бари ровли андэ тэ якхатэ? Домонго, никал ханик э бари ровли андар тэ якхатэ, ай дэчи лачес ту кан дикхес, сар тэ никалэс о кашторо андар якх тэ пхралэстэ.
О пхукаипэ катар лаче тай налаче имиша
43О лачё тэрэки на анэл кермалэ имиша, тай кермало тэрэки на анэл лаче имиша. 44Кажни тэрэки галён катар имиша. Вай на кидэн опрал хлядяло тэрэки инжыри я опрал хлядяло кущёки дракх. 45Андар ило, пхэрдо лачипэ, о лачё мануш никалэл лачипэ, ай о канлыс мануш никалэл канлыки андар ило, пхэрдо канлыки. Вай опэр чиб ки манушэски одова, соса си пхэрдо лэско ило.
Кхер опэр барэстэ
46Со тумэ дэн икос Ман: «Сагбуса, Сагбуса», ай на керэн, со Мэ пхэнав? 47Мэ кан сикавав тумэнги, соски ушадиел кажни, кон авэл Мандэ, шунэл Мэ зборэс тай керэл лэн. 48Ов ушадиел одолэски, саво керэл кхер, саво хранляс хор хандаки тай тхэдяс о фундамент опэр барэстэ. Кана ваздиндило пани тай опэр кхер чёрдили диряв, ой на кхелавдяс лэс, вай ов сас зоралэс кердо. 49Ай одолэс, кон шунэл Мэ зборэс, ай на керэл лэн, ушадиел манушэски, саво тхэдяс кхер опэр пху бифундаментеско. Сар э диряв чёрдили опэр кхер, о хурдярдипэ, тай о пэрипэ лэско сас баро.
Currently Selected:
Лука 6: КРБ
Highlight
Share
Copy
Want to have your highlights saved across all your devices? Sign up or sign in
© 2021 Bible Translators of Ukraine
© 2021 Pioneer Bible Translators
This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/
