NALANGTE 1
1
I rual Theofilas
1I laibu hmasa songah Jesuh in naper ham a pan nia in vancung ah a lang lehsal nia tian, #Luk 1:1-4 2a thil bawnhnak hmuahhmuah le a thuzirhhnak hmuahhmuah ngan ing. Vancung ah a lang lehsal hlanah amah ai a rilmi a nalangte tu Rauhla Thianghlim hathnak huham thawn phatak niu in thuzirh i. 3A thi hnuaah ni sawmli song anite hnenah vel tampui lar ai nung leh i, ti khiah aisu inkhai el thil tuh loin phun tampui in larruai i. Amah hmu tlang ai ani in Pathian Ukhnak thu khiah anite hnenah rel i. 4Cen hmunkhat ah a tawk dun lai ah, anite hnenah hetihin thupe i: “Jerusalem an a konteng ah khai feh mah ih. I Pa in lehsawng ning pe tuh i, ti ai i relciahnak khiah iang tu sawn ih.#Luk 24:49 5John in tidap in baptisma pe i; ikhalselai ni rai hlanah Rauhla Thianghlim thawn baptisma pehnak co tuh i si,” tiin ti i.#Mat 3:11; Mar 1:8; Luk 3:16; Joh 1:33
Jesuh Vancung Ah Lang I
6Nalangte tu Jesuh thawn tawk dun tlang fangin anite in, “Bawipa, tun can ah Israel mite hnenah Ukhnak khiah pe leh tuh isim?” tiin zawt tlang i.
7Jesuh in anite hnenah, “Ciami can le nihla tu i Pa ai thunaihnak in thiahhnak i ai ning lingkulhnak ilo i. 8Ikhalselai ning hnenah Rauhla Thianghlim a hleng fangin hathnak huham thawn ning dim tuhai Jerusalem le Judea ram le Samaria ram hmuahhmuah le lailung a tong tian kaimah ai tetti i tuh i si,” tiin ti i.#Mat 28:19; Mar 16:15; Luk 24:47-48 9Ciatihin a rel ben fangin Jesuh tu amahte mithmuh rori ah van ah lang teu ai mairo in hup ai hmu thil tlang nawn lo i.#Mar 16:19; Luk 24:50-51
10Ciatih ai a honkaihnak van heh cuan tlang cuahco laitak ah pon var siltu mite pahnih amahte hiangah ding kawm vut ai, 11“Aw Galilee mite, zaimanin van hlir in ding tlang cuahco i si? Ning hnenin van a kaitu Jesuh heh van ah a kai laitak ning hmu bang rori in zuktolh leh tuh i,” tiin ti i.
Judas Aiawhtu Rilhnak
12Nalangte tu Olive in Jerusalem ah let tlang lehsal i. Olive Mual tu Jerusalem an peng hrek tluk hla i.#1:12 Peng hrek tihnak tu Greek ahcen Sabbath Nia feh khop ti i. Kaih thawng khat dung i tuh i. 13Khuapui songah feh tlang ai amahte umhnak vumta khan ah lut tlang i. Anite tu Peter le John, Jeams le Andrew, Philip, Thomas, Bartholomeo, Matthew le Alphaeus ai fapa Jeams, Phunṭantu Simon, Jeams ai fapa Judas i.#Mat 10:2-4; Mar 3:16-19; Luk 6:14-16 14Hmunkhat ah sawngen tlang tuhin tawk dun tlang de ai nupangte le Jesuh ai nu Mary le Jesuh ai naute khai tel tlang i.
15Ni tlawmniu a rai hnuaah sangtute pumkhawm tlang ai minung za le kul dung i. Peter tu ding ai, 16“U le naute, Rauhla Thianghlim in David ai hmurka hmang in a relciahnak Jesuh a pomtute hoitu Judas ai thu tu Lai Thianghlim songah nganciahnak bangin khim kul i. 17Judah tu kin naperpui songah tel tuh ve in rilmi imanin kin pawl songah songtel i ve i,” tiin ti i.
18(Judas in thilsual a bawn man ai a ngahhnak tangka in lo pakhat lai ai cia lo songah bah ai thi i; a pum khoi ai a songril hmuah phut sio i.#Mat 27:3-8 19Cia thu tu Jerusalem ai a umtu hmuahhmuah in za ai amahte pong in cia lo khiah Akeldama ti i: a sullam tu, “Thisan Lo,” tica i).
20Peter in, “Zaimantifangin
Saam laibu songah,
‘A inn tu lawng tu selai
A songah aisu khai um maseh,’
ti ai nganciahnak um i.
Cen hmundang ah, ‘Midang in
a naper lang tuseh,’#Saam 69:25; Saam 109:8
tiin um fawn i.
21-22“Ciatih imanin Bawi Jesuh tholehhnak thulingtu ah pakhatkhat in i telpui kul i si. Ani tu Bawi Jesuh kin hnenah khual a tlawng song hmuahhmuah kinmah lakah tel ai, John in baptisma thu a relhnak ai panin Jesuh kin hnenin van ah lang lehsal nia tian, kinmah lakah a tel ve mi i tuh i,” tiin ti i.#Mat 3:16; Mar 1:9; 16:19; Luk 3:21; 24:51
23Ciamanin mi pahnih ai hming pe i. Anite tu Barsabbas ti ai kohnak Joseph, (Justus ti inkhai kohnak) le Matthias i. 24Cen sawngen tlang ai, “Bawipa, nang in mi thinlung song ling sio isi; hemite pahnih lakah aisu deuh ril isi ti larruai tu law; 25a co tuhhnak hmunah kin fehsantu Judas aiawh ah na nalangte lakah ṭuanvo lang tuhin na rilmi heh fiangruai tu law,” tiin ti tlang i. 26Cen anite pahnih lakah aisu nalang cang tuh i ti linghnak ah camciafung duk kawm ai Matthias in ngah i. Matthias tu nalangte hlaikhat hnenah siarcih i.
Currently Selected:
NALANGTE 1: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
