NALANGTE 3
3
Ke Zemi Cak I
1Nikhat ah Peter le John tu sawngen can zan lam nazi pathum fangin Biakinn ah feh kawm i. 2Ciafangin Kotka mawi tihnak ah a suahkeh in ke a zemi pa pakhat um i. Nisiar in Biakinn ah a kawitute hnenin tangka ngen tuhin cia kotka ah mite in dah de i. 3Peter le John lut kawm a hmu fangin thil pakhatkhat pe tuhin ngen i. 4Phantakniu in sik kawm ai Peter in, “Kin sik tucuk!” tiin ti i. 5Ziang ngah tuh ini ing, tiin umlam roh in sik i. 6Cen Peter in, “Tangka na pe tuh zaikhai nai lo ing; ikhalselai i naihnak na pe ing: Nazareth mi Jesuh Khrih hming in tho tulai vak tu,” tiin ti i. 7Cen a kiahhan lam kut in awh ai thoruai i. Cia sawngpah in ciami pa ai ke le a titiruh kemitte cak lehsal i. 8Ani khai tho vut ai amah niu in ding ai vak ben i. Cen Peter le John hnenah Biakinn songah lut ve i. Dawk dekdo ai a vak kong in kik zutzo in Pathian thangphat i. 9Ciatih ai a vak thil le Pathian a thangphat khiah mizapui in hmu tlang ai, 10Kotka mawi ai tangka ngen in a um ṭiotu i, ti khiah ling fangin a vumai thil a hlenghnak manin khuaruahhar tlang ai aican tlang roh i.
Biakinn Songah Peter thurelhnak
11Ciapa tu Solomon saphmai tihnak ah Peter le John hnenah a um khiah hmu fangin mizapui tu khuaruahhar in anite hnenah dawp tlang i. 12Ciami khiah Peter in a hmu fangin anite hnenah, “Aw i phunpui Israel mite, Zaimanin he thu ah khuaruahhar in kinmah lehlam mitkhep loin kin sik i si? Hemi pa a vak thil heh kinmah ai hathnak le Pathian daihzawng in a nung bentu kin imanin a canghnak vuah tlang i sim? 13Abraham, Isaac le Jacob ai Pathian, kin pupate ai Pathian in amah ai songlawihnak heh a cengfa Jesuh hnenah pe zo i.#3:13 ‘Cengfa’ tihnak tu ‘Fa’ ti khai i thai i. Isa 52; 13-53:12 songai thawn a peh dun i. Ikhalselai ning in ani tu thunaitu kut songah pe i si. Pilat in hlat tuhin a relciahnak rin amah mithmuh rori ah hnawl i si.#Luat 3:15; Isa 52:13—53:12 14Jesuh tu mi thianghlim le mipha bik inapui ningmah in hnawl i si; cia hlaiah Pilat hnenah ninghio ngen tlang ai mirektu heh hlat tuh sawn in ruai i si.#Mat 27:15-23; Mar 15:6-14; Luk 23:13-23; Joh 19:12-15 15Ningmah in nunhnak ah mi a fehpuitu khaih rek i si; ikhalselai Pathian in thihhnak in thoruailehsal ai kinmah heh ciami a lingpuitute i ing. 16Ciami Jesuh hming ai huham manin he ke zemi pa heh cakhnak ngah thil i. Ning hmuhnak le ning zahnak heh a hming sanghnak thawmin bawnhnak i. Ning veksen in ning hmu sio bangin Jesuh ah sanghnak in he pa heh cakruai i.
17Ciamanin u le naute, ningmah le ning hotute in Jesuh vumai ning bawnhnak heh ning ling lo manin ning bawnhnak i ti ling ing. 18Pathian in khuahlanlai pui ah a rilmi Messiah tu harsahnak tuar tuh i tiin prophette hnenah phuang zo i; ciami heh tunah hetihin khim ihang. 19Sual sir tu ilai Pathian hnenah let tu ih. Ciatih ilekhaw ning sualhnak ning ngaithiam tuh i. Ciatihin ti le i sikhaw, 20Bawipa hnenin rauhla hathnak can hleng tuhai ning caah a ril cia mi Messiah tihnak Jesuh heh ning hnenah ning pe tuh i. 21Pathian in hlanlaipui ai a thianghlim prophette hnenin a phuang cia bangin zaizongza a thar ai sem thar can a hleng hlanlo Jesuh tu vancung ah um tuh i. 22Zaimantifangin Moses in, “Bawipa ning Pathian in kaimah i hlat bangin ning miphun prophet pakhat ning hnenah hlat tuh i. Amah ai ning relhnak hmuahhmuah hlun kul tuh sio i si.#Danp 18:15, 18 23Ciami prophet a hlun nuam lotu heh Pathian miphun songin hnawthnak tuar tuhai siatsuahhnak tawk tuh i,’ ti i.#Danp 18:19 24Cen thuthan tuh a naitu prophette, prophet Samuel le amah hnua ai a hlengtu prophette inkhai, amahte veksen in tun dungso ai a canghnak heh rel cia ṭen zo i. 25Prophette hnenin Pathian ai thukhamhnak tu ningmah caah i ai Pathian in ning pupate hnenah a bawnhnak thutiam a kawmtu ve i si. Pathian in Abraham hnenah, “Na tesinfate songin laivum ai mi zongzong hmuifu pe tuh ing,’ tiin ti i. #Sem 22:18 26Ciatih imanin Pathian in aisu bang khai ning phatlohnak in let ai hmuifu ning pe thilhnak tuhin a rilmi a Cengfa#3:26 ‘Cengfa’ tihnak tu ‘Fa’ ti khai i thai i. Isa 52-53:12 ah sik tu. tu a hmasaber ah ning hnenah hlat i,” tiin ti i.#Isa 52—53
Currently Selected:
NALANGTE 3: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
