JOHAN 20

Hlankua Lawng

(Mat 28:1-8; Mar 16:1-8; Luk 24:1-12)

1Nipui nia zingniu khua a var hlan ah, Mary Magdalene tu hlanmual ah feh ai hlankua sin lungtlep a thawn cia in hmu i. 2Simon Peter le Jesuh ai a ithnak hnuahluntu hnenah dawp ai, “Hlan in Bawipa thiar zo i; a konteng ah dah i, ti ling lo ing!” tiin rel i.

3Cen Peter le a dang hnuahluntu heh suak kawm ai hlanmual ah feh i. 4Amahte pahnih in dawp kawm ai a dang hnuahluntu tu Peter tahin dawp cak deuh manin hmasa deuh in hlanmual ah hleng i. 5Hlan song heh kian ai luang tuamhnak pon nemniu hmu i, ikhalselai lut lo i. 6A khel lamin Simon Peter hleng ai hlan songah lut teu i. Luang tuamhnak pon nemniu le, 7Jesuh ai lu penhnak pon khiah hmu i. Ikhalselai a lu penhnak pon tu luang tuamhnak pon nemniu umhnak ah um lo i; a dangniu in a zual in um i. 8Cen hnuahluntu dang, hlanmual a hleng hmasa deuhtu pa khai hlan songah lut ai hmu ve ai sang i. 9Thihhnak in tho leh tuh i, tiin Lai Thianghlim in a tihnak tu a sullam lingthiam lai lo i. 10Cen hnuahlunte khai inn ah tlung kawm i.

Mary Magdalene Hnenah Jesuh Lar I

(Mat 28:9-10; Mar 16:9-11)

11Mary tu hlan pualam ah ding ai kap hnelhno i. Ciatihin kap kongin ut ai hlan song kian le, 12vancungmite pahnih pon ngo thawn thuam ai Jesuh luang dah hmun a lu lamah pakhat, a ke lamah pakhat to kawm hlen khiah hmu i. 13Vancungmi in, “Zaimanin kap hnelhno isi?” tiin Mary heh zawt i.

Ani in, “I Bawipa aisu in maw lang ai a konteng ah dah i ti ling lo ing,” tiin sawn i.

14Cen Mary tu her ai ciata ah Jesuh a ding khiah hmu i; ikhalselai Jesuh i, ti ling lo i. 15Jesuh in, “Nupang nu, zaimanin kap hnelhno isi? Aisu si isi?” tiin zawt i.

Ciatih ai a pontu heh vuan kiltu i tiin ruat ai Mary in, “Bawipa, nangmah in lang lesikhaw na dahhnak hmun i rel tulai feh tuhai lang tuh ing,” tiin ti i.

16Jesuh in, “Mary” tiin ko i.

Mary in Jesuh lam hoi ai Hebrew pong in “Rabboni!” tiin ti i. Rabboni tihnak tu Sayapa tica i.

17Jesuh in Mary khiah, “I awh mah! Zaimantifangin Pa hnenah hleng lai lo ing. Ikhalselai i unaute hnenah rel tulai ‘I Pa le ning Pa, I Pathian le ning Pathian hnenah feh tuh ing ti i,’ tiin rel tu,” ti i.

18Ciatihin Mary Magdalene khai feh ai Bawipa a hmuhnak thu le a hnenah a ponghnak tepawl hmuahhmuah hnuahlunte hnenah rel i.

Hnuahlunte Hnenah Jesuh Lar I

(Mat 28:16-20; Mar 16:14-18; Luk 24:36-49)

19Cia Nipui nia zan lamah hnuahlunte tu hmunkhat ah tawk dun tlang i. Judah mi hotute lau tlang manin dawngkham hmuahhmuah kham sek i. Cen Jesuh tu lar ai amahte lakah ding ai, “Ning hnenah daphnak um tuseh,” tiin ti i. 20Ciami a pong ben fangin anite hnenah a kut le a ke le a nak hmuh i. Hnuahlunte in a Bawipa hmu tlang fangin ang tlang ngai i. 21Jesuh in anite hnenah, “Ning hnenah daphnak um tuseh! I Pa in i hlat bangin ning khai kaimah in ning hlat ing,” tiin ti i. 22Ciatihin a pong hnuaah amahte vumah a haihawh pe ai, “Rauhla Thianghlim co tu ih! 23Mi sualhnak ngaithiam le i sikhaw ngaithiam in um tuhai; ngaithiam hlah le i sikhaw ngaithiamhnak ngah tuh lo i si,” tiin ti i.#Mat 16:19; 18:18

Jesuh Le Thomas

24Hnuahluntute hlaihnih lakah pakhat Thomas (Faphir) tihnak tu Jesuh a lar laitak ah anite hnenah um lo i. 25Ciamanin a dang hnuahlunte in, “Bawipa hmu na ing khaw!” tiin rel tlang i.

Thomas in anite hnenah, “A kut thir ai khenhnak hmaihma pot hmu ai i kut in cia hmaihma pot le a nak khiah i dai ngah hlanlo sang tuh lo ing,” tiin ti i.

26Zarh khat hnuaah hnuahlunte tu innkhan songah um tlang ai Thomas khai um ve i. Dawngkham kham sio napui Jesuh tu lar ai amahte lakah ding in, “Ning hnenah daphnak um tuseh!” tiin ti i. 27Cen Thomas hnenah, “Heta ah na kutzung dah tulai i kut heh sik tu; na kut suah tulai i nak dai tu. Sang loin um nawn mah; sang tuhang!” tiin ti i.

28Thomas in, “I Bawipa le i Pathian,” tiin ti i.

29Jesuh in, “I hmu manin i sang isim? I hmu lo napui a sangtu heh mi hmuifu i,” tiin ti i.

Hemi Laibu Ngantu Ai Tumtekhnak

30A hnuahlunte ai mithmuh ah Jesuh in ngaihsunurkul tampui a bawnhnak, he laibu songah ngan lohnak tampui um i. 31Ikhalselai he hmuah heh ngan ai i nganhnak sullam tu ningmah in Jesuh tu Messiah, Pathian ai Fapa i, ti sang tlang ai amah ning sanghnak thawmin le a hming in nunhnak ning nai thil tuhin i.

Currently Selected:

JOHAN 20: RZB

Highlight

Copy