LUKA 15
15
A Paimi Tuu
(Mat 18:12-14)
1Vaikhat ah siahkhawltute le misual ti ai hnawl mite tampui in Jesuh thurelhnak ngai tuhin a hnenah kawi tlang i.#Luk 5:29-30 2Ciafangin Farasi le Danthiam mite tu phuncam tlang ai, “Hemi pa in hnawlmi misualte khai kom ai amahte hnenah rong khai ai i!” tiin ti tlang i. 3Ciamanin Jesuh in a hnia lamai santehhnak rel i.
4“Santehhnak ah ningmah lakah mi pakhat in tuu zakhat nai ai tuu pakhat pai bang selai ziang bawn ni tur? Tuu sawmkua le pakuate khiah hampalak ah hlum tuhai a paimi a hmu hlanlo si tuh dekdo i. 5A tawk fangin a ang ze in a ko ah phur ai, 6Inn ah tlunpui i. Cen a rualpui le a innhnente kokhawm ai ‘A paimi i tuu hmu leh ai i ang ze i. Ciamanin ang ngai in puai bawn tuh ising,’ tiin ti i. 7Ciatih bangin sualsirhnak a kul lomi mipha sawmkua le pakuate tahin a sirtu misual pakhat ca vancung ah anghnak tam sawn i,” tiin ti i.
A Paimi Tangka
8“Cia hlahle, nupang pakhat in tangka fang hra nai selai fangkhat paitiar lekhaw ziang bawn ni tur? Maikhuat var in a inn khiah phiak ai a hmu leh hlanlo a ningnawi tianin si sio i. 9A tawk leh fangin a rualpuite le a innhnente ko ai, ‘I paitiarhnak tangka tawk leh zo ing; ciamanin i angpui tu ih,’ tiin ti tuh i. 10Ciatih bangin sualsirhnak a naitu misual pakhat caah Pathian ai vancungmite ang tlang tuh roh i,” tiin ti i.
A Paimi Fapa
11Jesuh in hetihin rel i. “Vaikhat ah mi pakhat um ai fapate pahnih nai i. 12A nauta sawn in a pa hnenah, ‘I pa, i co tuhhnak rothil tunin i pe tu,’ tiin ngen i. Ciamanin a pa in a rothil hmuahhmuah heh khan ai a fapate pahnih zem i. 13Ni a rai hlanah fapa nauta sawn in a cohnak thilri heh zuar sek ai a ngahhnak tangka thawn inn in suak i. Ram hlapui ah feh ai pamhmaihhnak zaikhai nai loin a tangka heh a nuamnuam in hmang sek i. 14A naihnak hmuahhmuah heh hmangral sek i. Cen cia ram songah rian tlung ai zaikhai nai nawn lo i. 15Ciamanin cia ramai mi pakhat hnenah a na per sah tuhin feh ai vok khal tuhin a lo ah fehruai i. 16Vokfak bekawng khiah kham roh in ai selai duhngat ngai napui aisu inkhai ai tuh zaikhai pe fawn lo i. 17A hnuataber ah a lungfim ai, “I pa ai hlawhfate tu ai cawk loin aih pha nai tlang i; ikhalselai kai tu heta ah aih tuh nai loin i thi cuahco ihang! 18Tho tuhai i pa hnenah tlung tuh ing. I pa, Pathian vumah le na vumah i sual zo i. 19Na fapa tuhin i tlak nawn lo i; na napertu na sal pakhat ah i bawn tu hram law, tiin ti tuh ing,’ tiin ruat i. 20Ciamanin a pa hnenah tlung tuhin feh i.
“Lamhlapui in a tlung phetpho khiah inn in a pa in hlir ai hmu i. A ninghio ze manin dawp ai a fapa heh kuah ai thut i. 21A fapa in, ‘I pa, Pathian vumah le na vumah i sual zo i. Na fa tiin ko tuh khai i tlak nawn lo i,’ tiin ti i. 22Ikhalselai a pa in a hnenumte ko ai, ‘Rang ngai in kawi tu ih! Hnikpon pha ber koih tu ilai silh tu ih. A kut ah kutruk ruk tu ilai a ke ah kedawl dawl sah tu ih. 23Cen kawlpaw faniu a thau ber ro tu ilai anghnak puai bawn tuh ising! 24Zaimantifangin he i fapa heh thi zo napui nung leh i; pai zo napui hmu leh zo i,’ tiin ti i. Ciatihin anghnak puai bawn tlang i.
25“Cialak fangin fapa upa sawn heh lo ah feh i. Lo in tlung ai inn hiang a hleng fangin la sa thawm le lamhnak thawm za i. 26Ciamanin hnenum pakhat ko ai ‘Ziang bawn tlang dekdo i?” tiin zawt i. 27Ciami hnenum in, ‘Na naupa tlung leh zo i, cak le himniu in let manin na pa in kawlpaw faniu a thau ber roh i,’ tiin ti i.
28A fapa upa sawn heh a thinraw roh ai inn song ahkhai lut nuam lo i. Ciamanin a pa suak ai inn songah lut tuhin leem i. 29Ikhalselai a fapa in, ‘Ruat tucuk! Kum hezah liangluang sal bangin na naper per ai na thu vel khat bangkhai na el awng lo ing. Ziang i pe isi? I rualpuite thawn nunnuamhnak puai bawnhnak tuhin me lu khat bangkhai i pe awng lo isi! 30Ikhalselai he na fapa tu hlotlaute thawn nuamhnak ah na thilri hmuahhmuah momrul in hmang ai na hnenah a let fangin kawlpaw faniu a thau ber roh isi!’ tiin a pa heh ti i. 31A pa in, ‘I fapa, nang tu i hnenah um ngio ai i naihnak thil hmuahhmuah heh nangmah ai i. 32Ikhalselai na naupa tu thi ai tunin nung leh i; pai zo napui tunin hmu leh ing; ciamanin lungawi aipuang in puai bawt tlak hrimhrim i,’ ti i,” tiin Jesuh in rel i.
Currently Selected:
LUKA 15: RZB
Highlight
Share
Copy
Want to have your highlights saved across all your devices? Sign up or sign in
Zanniat Bible © Bible Society of Myanmar, 2018.
