Seemthawhnak 20
20
Abraham leh Sarah cu Gerar ah
1Acunang cun Abraham cu Negeb ramṭhen laah a vai ih Kadesh leh Shur lakkarah omhmun a khuar. Gerar ah misiing in a om lioah, 2Abraham ni a nupi Sarah cu, “Ka tarnu a ii,” tiah a ti. Culeh Gerar Siangphahrang Abimelek ni mi thlah hratin Sarah cu a hruai. 3Ihmansela Abimelek ih a zan mang ah Pathian ni phain, “Na latmi nu ruangah nang cu na thi vel thok; icatile ani cu mi ih nupi a ii,” tiah a ti. 4Abimelek ni cu hnaih khaw a hnaih lo; curuangah, “Bawipa, sualnak ngeilo mipawl hi na siatsuah hngai kau lei maw? 5Amah pa rori ni, “Ani cu ka tarnu a ii’ a ma ti lo hmen maw? Cun amah rori ni, ‘Ani cu ka ṭapa a ii’ a ti hena. Ahi ka ti hi ka thinlung a tluanghmaan ih ka kut a thiangkau,” tiah a ti. 6Cutikah Pathian ni a mang ah, “A ii, hi thil hi na thinlung tluanghmaan in na ti ti ka tiahkau; cuhleiah ka parah sual lo dingin a tan kilkhawi ta tu cu kamah ka ita, hekhawh. Curuangah amah ka tan tongsak lo. 7Atu hi mipa ih nupi cu kirsak; icatile ani cu profet a ii ih na ca’h thla cam lei khawh na nung thok. Amah na kirsak lo zong a’cun nang leh na innsangmi an zate nan thi teuti thok ti hi tiah la,” tiah a ti.
8Curuangah Abimelek cu mawpan a tho ih a hemom an zate ko hngai in hi thil hmawhhmawh a sim hngai; culeh an thin a phang vuai. 9Cutikah Abimelek ni Abraham cu koin, “Kan parah itu ti zetzo ci maw? Na parah khawti’n ka sual ih kamah leh ka ram parah mawhphurhnak hnempi na suahsak. Ka parah ti awk a i lomi thil na ti rom a ik hi. 10Hi thil na titaak hi itu ruat zetzo ci maw?” tiah a ti. 11Abraham ni, “Ahihi ka titaak cu, hi hmun a’hin Pathian ṭihzahnak a om pun loih, ka nupi ruangah ma that lei-a uh tiah ka ruah ruangah. 12Cuhleiah ani hi ka tarnu a i taktak kau hena, ka pa ih tianu cu a i na’n ka nu ih tianu cu a i lo; cu cun ka nupi a cang. 13Culeh Pathian ni ka pa ih inn in vakvai dingih a ma vuak tikah amah cu, ‘Hihi ka parih na ti dingmi ṭhatnak a ii, kan phat nak hmunkipah kei hi ‘Ka ṭapa a ii’ na ti thok tiah ka ti,” tiah a sim. 14Cutikah Abimelek ni tuu leh cawpepawl, cun pami salpawl leh numi salpawl Abraham a ṭhen, culeh a nupi Sarah cu a hemah a piaṭhan. 15Abimelek ni, “Ka ram cu na hmaikaah a omkau hi; nuam na ti nakpohah om kau,” tiah a ti. 16Sarah cu, “Zoh hman na ṭapa hemah ngun tangka 1,000 ka pia rom; ahihi namah rum a ommi hmawhhmawh hemah na mawhlozia fiansak nak ah a ii; na ding pun ti lansaknak a ii,” tiah a ti. 17Cutikah Abraham ni Pathian hemah thla a cam; culeh Pathian ni Abimelek, cun a numi salle khaw a damsak hngai ih tianau an ngei kho. 18Icatile Abraham ih nupi Sarah ruangah Abimelek ih innsang cu an sul a phit ta hngai.
Currently Selected:
Seemthawhnak 20: KHBF
Highlight
Share
Copy
Want to have your highlights saved across all your devices? Sign up or sign in
Khualsim Holy Bible © Bible Society of Myanmar, 2021.
