Johan 1

Thu cu Tiksa A Cang

(Seem 1:1—2:4a)

1A hramthawh ah Thu a om, Thu cu Pathian rum a om, cun Thu cu Pathian a ii. 2Amah cu a hramthawh in Pathian rum a om. 3Thil hmawhhmawh hi amah thawngin an cang ih, amah loin thil pakhat hman a cangmi a om lo. Thu cu amah thawngin 4a cangmi hmawhhmawh ih nunhram a ii, cui nunhram cu mi zate caah tleunak a ii. 5Tleunak cu khuamaw lakah a vaang, culeh khuamaw ni a di zo lo. 6A min ah Johan a imi, Pathian ih thlah mipa a omta. 7Mi zate ni amah thawngin an zum nakdingah ani cu ceunak thu sim ih diinpitu in a pha. 8Amah ngai hi cu ceunak a i lo, ceunak thu sim dingah a pha. 9Micang a ceusak hngai tu ceunak ngaingai cu vuleipi ahcun a pha kau. 10Amah cu vuleipi ah a omkau, culeh vuleipi hi amah thawngin a cang; ihmansela vuleipi ni amah cu a tiah lo. 11Amah ih ram ah a pha ih, amah ih mipawl ni an cosangla lo. 12Ihmansela amah a cola tu, a min a zum tu, an zate Pathian tiale cannak huham a pia hngai, 13acu cu minung thi leh sa dawtzawng, iklole minung dawtzawng in iloin Pathian ih dawtzawng in hrinmi an ii. 14Culeh Thu cu tiksa ah a cang ih kan lakah khua a sa, cun velngeihnak leh thuhmaan in a khatmi, Pa ih Tiapa ngeihsun ni a ngeihmi sunparnak phun a imi a sunparnak cu kan hmu. 15Johan ni amah thu a sim ih, “Hihi, ‘Kamah hnukih a pha tu pa cu kamah van a pipasawn, icatile kamah hlanah a om’ ka timi khi a ii,” tiah a au. 16Velngeihnak leh thuhmaan in a khatmi a iknak parin keimi ni velngeihnak pakhat hnuk pakhat kan co. 17Daan cu Moses thawngin a pha; velngeihnak leh thuhmaan tu cu Jesuh Khrih thawngin a pha. 18Ahuhman ni Pathian an hmu thah lo. Tiapa Ngeihsun a imi Pathian, Pa ṭaang ih ommi ni Amah cu mi ih tiah dingin a phuang.

Timihnimtu Johan ih Thutiahpimi

(Mat 3:1-12; Mar 1:1-8; Luk 3:1-20)

19Hihi “Ahu na ii?” tiah amah thudil dingah Judah mipawl ni Jerusalem in Tlangbawipawl leh Levi mipawl an thlah ṭum ah Johan ni a thutiahpimi a simmi a ii. 20Ani ni phehlotein, “Kei cu Messiah cu ka i lo,” tiah a phuang. 21Culeh anmimi ni, “Itu na i ṭung hmen? Elijah maw na ik?” tiah an dil. “Ka i lo,” tiah a let hngai. “Profet teh na ii maw?” tiah an dil. Ani ni, “I hlah,” tiah a let hngai. 22Cutikah anmimi ni, “Ahu na i hmen? A man thlahtule caah thulehnak kan daw. Namah leh namah itu e tia na ti tia?” tiah an ti.

23Ani ni,

“Kei cu Profet Isaiah ni

a ti mangin,

‘Bawipa ih lam dangin

vua uh’ tiah mi pakhat ni

ramṭhing ih a honak aw

cu ka ii,” #Isa 40:3.

tiah a ti.

24Farisile ih thlahmipawl ni, amah cu, 25“Messiah le na ikloah, Elijah le na ikloah, profet le na ik ṭung lo ah, ica’h hmen ti ah mi na hnim rero?” tiah an dil. 26Johan ni, “Kei ni cu ti in ka tan hnim hngai. Nanmah lakah nan tiah lomi pakhat, 27ka dung in a pha tu ding pa a om kau, kei cu a kedaap hri phoih ding hman ka tlak lo,” tiah a let hngai. 28Hihi Johan ni ti ah mi a hnim hngai rero nak Jordan varalla ih Bethani ah a cangmi a ii.

Pathian Tusuan

(Mat 3:13-17; Mar 1:9-11; Luk 3:21-22)

29A zingla ah Johan ni Jesuh cu amah hemla a phat a hmu ih, “Hihi vulei sualnak phur mianmi tu Pathian Tusuan a ii. 30Amah hi, ‘Kamah hnukih a pha tu pa cu kamah van a pipasawn, icatile kamah hlanah a om’ ka timi khi a ii. 31Kamah hrimhrim ni amah hi ka tiah ta lo; a i nain amah hi Israel mipawl hemih phuanlan a i taw timi thu caah kei pha ih ti in ka tan hnim hngai nak a ii,” tiah a than. 32Culeh Johan ni, “Thlarau cu vancung in thunu mangin a zong ṭum ka hmu ih Jesuh parah a omcih. 33Kamah rori ni cu ka tiah ta lo, a i nain ti in mi hnim dingah a ma thlah tu ni cu, ‘A parah Thlarau ṭumin a omcih na hmuhmi pa cu Thiang Thlarau in mi a hnim tu a ii,’ tiah a ma sim. 34Culeh kamah rori ni ka hmu ih, ahihi Pathian Tiapa a ii ti thu ka tiahpi,” tiah a sim.

Peitatleng Kaizulle

35A zingla ah Johan cu a kaizulle pahnih rum an diing khat, 36culeh Jesuh an hrialih a vah a zohthah ah, “Pathian Tusuan hi zoh hman uh!” tiah a ti. 37A kaizulle pahnih ni acuti a ti cu an za ih Jesuh cu an zul. 38Jesuh cu a mertia ih acule ni an zulh a hmuh hngai tikah, “Itu a ii nan hrawl?” tiah a ti hngai. Anmimi ni, “Rabbi, khawnangah na om?” tiah an ti. 39Ani ni, “Pha u la zoh hnik tu hmen uh,” tiah a ti hngai. A omnak cu tatin an zoh, culeh acu ni cu a hemah an omtadah. Acu cu sunhnuk nazi pali hrawng a ii. 40Johan ih simmi zain Jesuh a zultu lakih pakhat cu Simon Piter ih naupa Andru a ii. 41A upa Simon a tuak peitleng ih, “Messiah (Thathau hnulh mi tiih leh a ii) kan hmu rom,” tiah a sim. 42Simon cu Jesuh hemahcun a tahpi ih Jesuh ni zoh lain, “Nang hi Johan tiapa Simon na ii. Sifas (Piter tiih leh a ii) tiah kawh na i leh thok,” tiah a ti.

Filip leh Nathaniel Kawhnak

43A zingla ah Jesuh cu Galilee laah tat dingin a ruatcat. Filip a hmu, “Ma zul tu hmen,” tiah a ti. 44Filip cu Andru leh Piter ih khua Bethsaida in a ii. 45Filip ni Nathaniel a hmu ih, “Nazareth khua in Josef ih tiapa Jesuh, Moses ni Daan sungah leh profetpawl ni khaw a thu an nganmi pa cu kan hmu rom,” tiah a ti. 46Nathaniel ni, “Nazareth in thilṭha a suak kho hmen maw?” tiah a ti. Filip ni, “Pha la zoh,” tiah a ti. 47Jesuh ni Nathaniel a hem laah phain a hmuh tikah amah thu ah, “A sungih mideuhnak a omlo mi Israel hmaan pa hi!” tiah a ti. 48Nathaniel ni, “Khawnang in a ma tiah hmen?” tiah a dil. Jesuh ni, “Filip ih a tan kawh hlanahkhin thei kung tangah ka tan hmu rom hekhawh,” tiah a ti. 49Nathaniel ni, “Rabbi, nang hi Pathian Tiapa ii ci ee! Israel Siangphahrang ii ci ee!” tiah a ti. 50Jesuh ni, “Thei kung tangah ka tan hmu ka tan ti ruangah na zum hngen? Hipawl van nasasawn thilpawl hmu leh lei ci,” tiah a let. 51Culeh, “Thungaiin ka tan sim hngai, vancung hongtia in leh Pathian ih vanmipawl Mi Tiapa parah zong ṭum leh hang kai in hmu hngai leh lei cu,” tiah a ti.

Currently Selected:

Johan 1: KHBF

Highlight

Copy