Johan 5

Sabbath ni ah Damsaknak

1Ahi hnukah Judah mipawl ih puai pakhat a om ih Jesuh cu Jerusalem laah a zong kai. 2Jerusalem ih Tuu Kotka hramah Hebru aan in Bet-zatha tiih kawhmi tili a om, a velkim ah zaudeep panga a ngei hngai. 3Acui zaudeeppawl sungah tekthiamlole, mitcaw, kezawng, zeng ih tiak an thlimtiakau, [“tili hang tek hngakin an om; 4icatile Bawipa ih vanmi pakhat imawmang caan ah zong ṭumin ti hang tekin a vua. Ti a hang teh caang a peet tu cu itumang titiak a ngeimi ni khaw a dam, curuangah mitiakpawl ni ti hang tek ding cu hngakin an om.”] 5Pakhat pa cu acunangah kum sawmthum kum riat sung tiakin a om. 6Jesuh ni acunangih a lumkau leh saupi a om rom a hmuh tikah, “Damsak ik daw cim?” tiah a ti. 7Mitiak pa ni, “Sayapa, ti a hang teh tikah tili sungih ma paih tu ahuhman an om lo, ka tah lio fang ah pakhatkhat ni ka hmalaah a ma ṭum kheel hngai liamlo,” tiah a ti. 8Jesuh ni, “Hang tho, na tangthah lain vak,” tiah a ti. 9A voi khat ah mipa cu a dam, cun a tangthah lain a tat. Acu ni cu Sabbath a ii. 10Curuangah Judah thungeitule ni damsakmi#5:10 Damsak hi sawmbawl ti tu kan om. pa cu, “Sabbath a ii hekhawh; na tangthah na put cu a phung a i tal lo,” tiah an ti reuri. 11Ihmansela ani ni, “A ma damsak tu pa ni, ‘Na tangthah lain vak’ a ma ti hepan,” tiah a sawn hngai. 12Anmimi ni, “ ‘Lain vak’ a tan ti tu pa cu ahu a i hmen?” tiah an dil. 13Damsakmi pa ni ahu a ik a tiah lo, icatile Jesuh cu acunangih a ommi mibuur lakah a hma. 14Hnukdeuh ah Jesuh ni biakinn sungah a hmu ih, “Ngai hnik! Atu hi damsak na i rom. Sual ti hlah la, cuticun na parah thilsiasin a cang hlah taw,” tiah a ti. 15Acu pa cu a tat mianmiih amah a damsak tu pa cu Jesuh a ii ti in Judah thungeitule a sim hngai. 16Curuangah Judah thungeitule ni Jesuh cu sabbath ni ah acumang thil a vuak hngai ruangah hrem an thawh. 17Ihmansela Jesuh ni, “Ka Pa cu rian a ṭuan rih berbo ih kei khaw ka ṭuan berbo ve,” tiah a sawn hngai. 18Ahi thu ruangah a ii Judah thungeitule ni Jesuh thah an dawt hlehhlo nak cu, icatile Sabbath a buar ceu iloin Pathian cu amah rori ih Pa tiah koin Pathian tluk ah a vuatia an ti.

Tiapa ih Thungeihnak

19Jesuh ni, “Thungaiin ka tan sim hngai, Tiapa ni cu amah thuthu in ituhman a ti zo lo, Pa ni ti in a hmuhmi ceu a ti zo; icatile Pa ih timi itupoh Tiapa ni acumangin a ti. 20Pa ni Tiapa a daw ih amah rori ih vuakliomi thil zate a hmuh; culeh ahile van pipasawnmi rianṭuanpawl a hmuh lai thok, cuticun donharin a om leh taw cu. 21A ngaingai ah, Pa ni mithi thawhsakin nunnak a piak hngai mangin, Tiapa ni khaw a dawtmi ahupoh nunnak a pia. 22Pa ni ahuhman thu a ṭhen lo, thuṭhennak hmawhhmawh cu Tiapa hemah a pia, 23cucu mi hmawhhmawh ni Pa an upat mangin Tiapa an upat nakdingah a ii. Tiapa a upat lo tupoh ni amah a thlah tu Pa a upat lo. 24Thungaiin ka tan sim hngai, ka aanka za ih a ma thlah tu a zum tu cu kumkhua nunnak a ngei, culeh thuṭhennak tangah a pha lo, thihnak lontain nunnak ah a lut rom. 25“Thungaiin ka tan sim hngai, mithile ni Pathian Tiapa ih aw an zak ih a za tu mipawl cu an nun thok caan pha leh lei, atu hinangah a ii. 26Icatile Pa ni amahte sungah nunnak a ngeih mangin Tiapa khaw amahte sungah nunnak ngeihtia ve dingin a pia; 27culeh ani cu Mi Tiapa a ik ruangah thuṭhen dingih thungeihnak a pia. 28Ahihi nan donhar hlah uh; icatile an thlaan sungih om tu hmawhhmawh ni Mi Tiapa ih aw zain, 29thilṭha a vua tu mipawl cu nung dingih thawhṭhannak ah, thilṭhalo a vua tu mipawl cu sualthuṭhen tuar dingih thawhṭhannak ah an va suah caan pha leh lei.

Jesuh Thutiahpitule

30“Kei cu kamahte in ituhman ka ti zolo, ka zakmi mangin thu ka ṭhen; culeh ka thuṭhen cu a dinghmaan, icatile kamah dawtzawng vuak khaai loin a ma thlah tu ih dawtzawng vuak ka khaai. 31“A i nain kamah thuhla ka simphuan a’cun ka simmi cu a hmaanlo. 32Kamah canah ka thuhla a sim tu pace a om ih ka thuhla a simmi cu a hmaan ti ka tiah. 33Johan hemah thuphurtule thlah cu khawh ani ni thuhmaan thu a sim. 34Acumang minung thusim cu kei ni ka pon tinak a i lo, a i nain hi thilpawl ka aan hi run nan ik nakdingah a ii. 35Amah cu a alh leh a tlemi mei-inn a ii, cun a tleunak sungah caangkhat cu lungawi ih omtiak nan daw. 36A i na’n Johan van a pipasawnmi thutiahpitu ka ngei. Pa ni ṭuan uuk dingih a ma piakmi rianṭuanpawl, atu ih ka ṭuan reromi rianṭuanpawl hi ni, Pa ni a ma thlah ti thu kamah canah thu an sim. 37Culeh a ma thlah tu Pa amah rori ni kamah canah ka thu a sim. A aw khaw nan za thah lo, a ruangthang khaw nan hmu thah lo, 38culeh a thlah mipa nan zum lo ruangah a thusim nan sungah a hmun lo. 39“An sungah nunnak ngah thok in nan ruah ruangah Lai Thianghlim nan zingzoi; anmah hi kovawh kamah canah ka thuhla a sim tu cu. 40A i nain nunnak ngah dingah ma phat hmawh nan al ṭung. 41Minungpawl hemin sunloihnak ka cosang lo. 42A i nain nan lakah Pathian ih dawtnak nan ngei lo ti ka tiah. 43Ka Pa ih min in pha ing khawh a ma cosang hngai lo; mipace ni amah ih min in pha sela cu cosang hngen tur cu. 44amah ceu Pathian a imi hemin a phami sunlawinak hmawh nan hrawl loih, pakhat leh pakhat hemin sunlawinak hmawh nan cosan tiak ah, khawti’n hi lei a ma zum hngai thiam? 45Pa hmaiah sual tan puh hngai thok cu ma ruat hlah uh; nangmi sualpuhtu cu nan ruahsanmi Moses a ii. 46Moses nan zum taak a’cun kei khaw a ma zum hngai kau thok, icatile amah ni ka thuhla a ngan ta. 47A i na’n a ngan taakmi nan zum lo a’cun khawti’n hi lei ka simmi nan zum?” tiah a ti hngai.

Currently Selected:

Johan 5: KHBF

Highlight

Copy