Luka 6

Sabbath ni Thudilnak

(Mat 12:1-8; Mar 2:23-28)

1Sabbath ni khat ah Jesuh cu sangvut lo sungih a vah lioah, a kaizulle ni sangvut vui zuutpahin an kut ah an nuai, cun an aw. 2Ihmansela Farisile mi hrekkhat ni, “Sabbath ni ih vuak phung a i lo mi cu icaah nan vua?” tiah an ti. 3Jesuh ni, “David ni a rualcomle rum an ṭaṭhit lioah itu an ti ta ti nan rel rom lo maw? 4Pathian inn sungah lut hratin tlangbawile simlo ih awk phung a i lo mi Sunghlun Sang lain a aw, cun a hrekkhat a rualcomle a pia hngai hin,” tiah a sawn hngai. 5Cuhnukah, “Mi Tiapa hi sabbath ih bawi a ii,” tiah a ti hngai.

Kutzeng pa Damsaknak

(Mat 12:9-14; Mar 3:1-6)

6Sabbath ni ce ah Jesuh cu sinakok ah lutin thu a zirh, culeh acunangah a kut vorhla a zeng mipa a om. 7Daanzirhtupawl leh Farisile ni sabbath ni ah mi damsak leng lei maw ti in amah sual hrawl dawt ah an bawh langlang. 8An ruahmi cu a tiah nakauin a kut a zeng mipa cu, “Ma pha la, hina’h diing hnik,” tiah a ti. A tho ih acunang ahcun a diing. 9Cutikah Jesuh ni, “Sabbath ni ah thilṭha ti maw harnak mipiak, nunnak runsuah maw siatsuah a phung ii, ti ka tan dil hngai?” tiah a ti hngai. 10A hrialkam an zate a zoh hngai hnukah, cu pa cu, “Na kut thlam hnik,” tiah a ti. A thlam ih a kut cu a damngahṭhan. 11Ihmansela Farasipawl leh daanzirhtupawl cu hehharnak in an khat ih, Jesuh khawtiih an ti thok thu pakhat leh pakhat an rontia.

Tirhthlah Hleihnih Rilnak

(Mat 10:1-4; Mar 3:13-19a)

12Acu lioah Jesuh cu thlacam dingin tlang ah a kai; culeh zan cu Pathian hemih thlacamnak in a hmang. 13Khua a van tikah a dungzulle ko hngai in, tirhthlahle tiah khaw a kawh hngaimi hleihnih: 14Simon, Piter tiah min a vawh mi, cun a naupa Andru, cun Jeim, Johan, Filip, Bartholomeo, 15Matthai, Thomas, Alfias ih tiapa Jeim, Simon – Zealot tiih kawhmi, 16Jeim ih tiapa Judah, cun leirawitu ih a cangleh tu Judas Iskariot cu a ril hngai.

Thuzirh leh Damsaknak

(Mat 4:23-25; Mar 1:35-39; Luk 4:44)

17Anmah rum a zong ṭum ih hmunrawn ah a diing; a dungzul mibuur pi leh Judea peng hmawh, Jerusalem, cun rili pangkap ih om Tai-ar leh Sidon khua in mipibuur pi khaw an om. 18A thusim ngai ding leh an damlonak in damsak ik dawt ah an pha; culeh thlarau thianglopawl ih buaisakmi khaw damsak an ii. 19Cun mibuur pi lakih an zate ni amah tham an zuamtia vek, icatile a sungin huham a suakih an zate a damsak hngai.

Thluasuah leh Harnak

(Mat 5:1-12)

20Jesuh ni a kaizulle cu zoh hngai in:

“Nangmi a farah mipawl,

mithluasuak nan ii,

icatile Pathian uknak cu

nanmah ih ta a ii.

21“Nangmi atu ih ṭaṭhi mipawl,

mithluasuak nan ii,

icatile nan khim leh thok.

“Nangmi atu ih a ṭap mipawl,

mithluasuak nan ii,

icatile nan nihtia leh thok.

22“Mi Tiapa thu ruangah mi ni an tan huat tik leh, an tan hnon, an tan nautat ih, nan min an siatsak tikah mithluasuak nan ii.

23Cui nikhua ah nan thinnuam u la, lungawi in sokphet uh; icatile vancung ah nan ngahvo a hnem; icatile acu cu an pupale ni profetpawl parih an titaakmi cu a ii.

24“A i nain nangmi atu ih

a lian mipawl cu

nan hmaka a pit,

icatile nan nangamnak

nan co rom.

25“Nangmi atu ih

a khopkhim mile cu

nan hmaka a pit,

icatile nan ṭaṭhi leh lei.

“Nangmi atu ih a nihtialio

tu mile cu nan hmaka a pit,

icatile nan lung a zuur thok ih

nan ṭap thok.

26“Mi hmawhhmawh ni an tan sim ṭhat tiak tikah nan hmaka a pit, icatile acu cu an pupale ni a hmaanlomi profetpawl parih an titaakmi a ii,” tiah a ti hngai.

Ralpawl Dawtnak

(Mat 5:38-48; 7:12)

27Ihmansela ka thu a ngai tu nangmi cu ka tan ti hngai, Nan ralmi daw u la, an tan hua tu mipawl parah thilṭha vua uh, 28an tan camkha tu mipawl thluasuah u la, an tan hmuhsit tu mipawl ca’h thla cam uh. 29Mi pakhat ni na hngeisebeel tan beeng taw ah khatla khaw tun rih; na angki pawnthuah a tan sut tu cu na angki khaw lat sen lo’n i hlah. 30Na hemin a tan ngeen tu cang pia hngai; cun mi pakhat ni na thilpawl tan sut taw ah dil ṭhan duh hlah. 31Na parah mi ih an vuak ding na dawt mangin mi parah va vua. 32An tan daw tu mipawl nan dawt a’cun nan ca’h itu ṭhatnak a om hmen? Icatile misualpawl hman ni anmah daw tu mile cu dawt thiam uh in. 33Nan parih thilṭha vuatu hemah thilṭha nan vuak a’cun nan ca’h itu ṭhatnak a om hmen? Icatile misualpawl hman ni acumang cu an vua hekhawh. 34An hemin ngah ṭhan ding nan ruahsanmi mipawl hemih nan coih a’cun nan ca’h itu ṭhatnak a om hmen? Misualpawl ni hman an coih zet ngah ṭhan dingah misualpawl hemah an coih hena. 35Ihmansela, nan ralmi daw uh, cun mi coih uh, itu ngah ṭhan ding khaw ringtia loin. Nan ngahvo cu a pipa thok, cun Cungnung Tleng ih tiale nan i thok; icatile amah cu lungawi-thiamlomi leh miṭhalo hemah a thinlung a ṭha. 36Nan Pa cu phusahihngei a ik mangin phusahihngei ii uh.

Mi Siatthlaih thok lo

(Mat 7:1-5)

37“Siat mi thlaih hlah, culeh siatthlaih na i thok lo; mi va hnong hlah, culeh hnon na i thok lo. Ngaidam la, ngaidam na i thok; 38pia la piak na i thok. Ṭhangai tahmi, zon nammi, hlingbeengmi, liam thluahthlo cu nan donnak khat in piak nan i thok; icatile nan piak zet cu nan ngah ṭhanmi a i thok,” tiah a ti hngai. 39Thuṭhim pakhat: “Mitcaw ni mitcaw a hruai kho maw? An pahnih khur-awng ah an tla thok lo hmen maw? 40Kaizul cu zirhtu cunglaah a om lo, a i nain a thiamngah tu cu zirhtu mang a i kau thok. 41Ica’h namah ih mit sungih thingtum hmawh tiahthiam loin na unau mit sungih hnawmhne hmawh na hmu ṭung? 42Iklole namah ih mit sungih thingtum hman hmu tia loin, na unau cu, ‘Unau, na mithnawm tan coih lang’ tiah na ti? Nang mitisaktia, peita ah na mit ih thingtum phorhtia, cuhnukah na unau mithnawm coih piak dingah fiangte’n na hmu thiam thok,” tiah khaw a sim hngai.

Thingkung leh a Vuang

(Mat 7:15-20)

43“Thingkung ṭha ni pang sia a vuang lo, thingkung sia ni khaw pang ṭha a vuang lo; 44thingkung cang cu an vuang in tiahthiam an ii. Hling kung in theivuang lawh an i thah lo, hling buur lakin sabit khaw an lo thah lo. 45Miṭha ni cu a thinlung sungih thilṭha a khawlmi in thilṭha a suahsak, cun miṭhalo ni thilṭhalo a khawlmi sungin thilṭhalo a suahsak; icatile thinlung sungih a khatmi cu hmurka ni a awn-ang.

Innsatule Pahnih

(Mat 7:21-27)

46“Ica’h ‘Bawipa, Bawipa’ ma ti hratin ka tan sim hngaimi nan vua lo? 47Kamah ma pha hratin, ka aan zaa in, acu parin a tekcak tu mi pakhat cu itumang a ii ti ka tan hmuh hngai thok. 48Acu mi cu lung parah thukpi khuar in hram a lingih inn a sa tu mang a ii; ti a len tikah, thlawng ti ni a inn cu a sainong nain a hninsak zo lo, icatile ṭhangai-ih sakmi a ii. 49A i nain a za nakauin acu parih a tekcak lo tu cu hramlin omloin khur parih inn a sa tu pa mang a ii. Thlawng ti ni a sainong tikah, a voi khat ah a purzaan, culeh cui inn purzaan rauh zia cu!” tiah a ti.

Currently Selected:

Luka 6: KHBF

Highlight

Copy