Luka 8

Numi Hrekkhat ni an Zul

1Acuhnuk ii hlet hlanah khuapipawl leh khuatepawl ah vah peh in, Pathian uknak thuthangṭha a simphuang. Hleihnihle cu amah rum an om, 2thlarau thianglo ngeimi leh damlonak phunphun in a damsakmi numi hrekkhat: Magdala khuami nu tiih kawhmi Mari – a sungin khawsia pasarih ṭhawl piak a i minu, 3Herod sumsawkiltu Chuza ih nupi Joanna, Susanna, cun anmah ngeihsiah in Jesuh leh a kaizulle a bawn tu numi pace tlungpi khaw an om ve.

Thlaici Vorhtu Thuṭhim

(Mat 13:1-9; Mar 4:1-9)

4Mibuur pi an khawmtia ih, khua khat hnuk khua khat in mipawl a hem an phat tikah thuṭhim pakhat a sim hngai: 5“Thlaici vorhtu pakhat cu a thlaici vorh dingin a tatsuak, culeh a vorh tikah a ṭim cu lam parah tla u khawh teih an ii, cun vapawl ni khaw dengin an cu. 6A ṭim cu khur paatnak lungpaidar parah an tla; culeh vulei hnuum a sam ruangah an vuaicar ṭhan. 7A ṭim cu hling lakah an tla, culeh hling ni han hnempi in an zeel remro. 8A ṭim cu khur ṭhatnak ah an tla, culeh a hang hnem tikah a let 100 an hang vui,” tiah a ti. Ahi thu a sim uh tikah, “Zaknak naa ngei tu ahu ni khaw ngai seh,” tiah a au.

Thuṭhim ih Tumtahmi

(Mat 13:10-17; Mar 4:10-12)

9Cutikah a kaizulle ni ahi thuṭhim ih sullam itu a ik an dil. 10Jesuh ni, “Pathian uknak ih thuthuk tiah nakding cu nan hemah piak a i rom hin; a i nain mipacepawl hemah cu thuṭhim in sim a ii, cuticun:

‘Zoh nakauin an hmuthiam hlei thok lo,

cun ngai nakauin an tiahthiam hlei thok lo,’#Isa 6:9.

tiah a ti.

Thuṭhim Simfiangnak

(Mat 13:18-23; Mar 4:13-20)

11“Hihi thuṭhim ih sullam cu a ii: Thlaici cu Pathian thu a ii. 12Lam parih a tlami cu: thu an zak hnukah zumih run i lo dingah Satan ni pha hngai in an thinlung sungin cui thu a suh hngai mile an ii. 13Lung parih a tlami cu: thu an zak tikah lungawinak rum a cosang tu mipawl an ii. A i nain hile hi hram cu an ngei lo; caangkhat sung ceu an zumih hniksaknak caan ah an ngal. 14Hling lakih a tlami cu: thu an za nain an nunkhuasak thah ah nunnak ih siaherhnak, lennak leh nomnak ni a zelhngah ruangih an vui awk a suak lo mile an ii. 15A i nain khur ṭha ih a tlami cu: thu an zak tikah thinlung tluang leh ṭha in an ponṭho, cun thinsau ih tuarnak rum a nungmile an ii,” tiah a ti.

Cukong Khummi Mei-inn

(Mar 4:21-25)

16“Ahuhman ni mei-inn tlet hnukah cukong khum in, iklole ihkhun tangah khaw an sia lo, a vong lut tu mile ni a tle hmu dingah donsang parah an toh. 17Icatile phuanlan lo dingmi ituhman thuh a i lo, cun tiahngah lo dingmi leh a lang lo dingmi itu thil thup khaw a om lo. 18Curuangah khawti’n thu nan ngai ti ṭhate’n ruat tia uh, icatile a ngeitu cu piak beeng i lei u khawh; cun a ngei lo tu hemin cu ngei mangih an ruahtiakmi hman suh an i thok,” tiah a ti.

Jesuh ih Nu leh Naule

(Mat 12:46-50; Mar 3:31-35)

19Cuhnukah Jesuh cu a nu leh a naule ni an pha, ihmansela mibuur ruangah amah hem ngai cu an phatngah thiam lo. 20Culeh “Na nu leh na naule pawnla ah an diing, tan tuah an daw,” tiah mi ni an sim. 21Ihmansela, “Ka nu leh ka naule cu Pathian thu zaa in a vua tu mile an ii kovawh,” tiah a ti hngai.

Huihsia Rauhpi Daihsaknak

(Mat 8:23-27; Mar 4:35-41)

22Ni khat ah Jesuh cu a kaizulle rum lawng sungah an lut, culeh, “Tili khatla ral ah tat he hu,” tiah a ti hngai. Curuangah an poksuak, 23culeh lawng kaw in an tah lioah Jesuh cu a me. Huihsiapi ni rili cu a hnur, culeh lawng cu ti ni a khah ih thin phangin an om. 24A hemah tatin an ṭhang ih, “Bawipa, Bawipa, kan thi, kan hma thok hi,” tiah an hek. Culeh a han ṭhangtia ih huih leh tilet cu a hriing hngai; an dai ih thawngthaang omloin a dai ziikziik. 25Jesuh ni, “Nan zumnak teh khaw’h a he?” tiah a ti hngai. An hrul ih an don a har, culeh pakhat leh pakhat, “Hi pa hi ahu a i zetzo a he? Huih leh ti hman thu pia hngai khawh a thu an ngaih hi?” tiah an ti tia.

Gerasene ah Damsaknak

(Mat 8:28—9:1; Mar 5:1-20)

26Cuhnukah Galilee khatla ral ih a ommi Gerasene peng mipawl ih ram an pha. 27Khur a teih caangte khuasungmi pakhat, thlarau thianglo hrolhtiaknak pa ni Jesuh cu a tuak. Icatile caan saupi partlai sinhru loin a om, culeh inn hluum loin thlaan ah a om. 28Jesuh a hmuh tikah a hmakaah bok in, a aw ngeihnak in, “Kei rum itu kan pehpontia, Jesuh, Cungnung Tleng Pathian Tiapa? Ma hrem hlah law tiah naktiah ka tan dil,” tiah a au. 29Icatile Jesuh ni thlarau thianglo cu acu pa sungin suak dingah thu a pia ta rom. (Icatile thlarau thianglo ni a pon ṭiuṭeu; a kiltu sia in, thircikcin leh kehreeng in ṭawn a ii, ihmansela an ṭawnnak cu a ekhmal hngai ih, khawsia ni hramlak ah a mawng bil.) 30Curuangah Jesuh ni, “Na min ahu a ii?” tiah a dil. Ani ni, “Legion” #Mar 5:9. tiah a sawn; icatile khawsia tlungpi ni an hrolhtia. 31Khawsiale ni Jesuh cu khur thukpi ah kirsak hngai lo dingin naktiah an dil. 32Acunang tlang kap ah vokrual pi an bual; culeh khawsiale ni Jesuh cu vokrual sungah luhsak hngai dingin an dil. Curuangah sennak thu a pia hngai. 33Cutikah khawsiale cu acu pa sung cun suakin vokrual sungah an lut, culeh vokrual cu kilkam sangpi in tili sungah an peet ih dengin an pil. 34Vokkhaalle ni thilcangmi an hmuh tikah, an zuang ih an khua leh ram ah acu cu an sim. 35Cutikah itu a cang ti zoh dingah mipawl an vong pha. Jesuh hem an phat tikah a sungin khawsia ih a suahtaak mipa cu Jesuh ke hramah toin, partlai sinthlaitia leh tiimvarin an hmu. Culeh an ṭih. 36Khawsia hrolhtiaknak pa khawtiin damsak a ik a hmu tu mile ni cui thu cu an simla. 37Cutikah Gerasene ram hrialkam ih mi hmawhhmawh ni Jesuh cu anmah mata hngai dingin an dil ciamco; icatile an hrul vuai. Curuangah lawng sungah lutin a kirṭhan. 38A sungin khawsiale ih suahtaak mipa ni Jesuh hem i dingah a ngeen; ihmansela Jesuh ni, 39“Na inn ah kirṭhan la, cun Pathian ni ii tluk thil a tan ti piak ti simthan,” tiah ti in a thlah mianmi. Curuangah a tat mianmiih Jesuh ni a ca-ih ii tluk thil a ti piak zia khua sung hlawhin a simthan.

Jairas ih Tianu leh Thisuak Minu

(Mat 9:18-26; Mar 5:21-43)

40Jesuh a kirṭhan tikah, mibuur ni amah an dolawm, icatile an zate ni amah an hngak. 41Aculio fang ah sinakok ih hruaitu pakhat Jairas timi mipa a pha. Jesuh ke hramah bok-in a inn ih pha dingin a dil, 42icatile tianu pakhat te a ngei, kum hleihnih tluk a ii ih a thisam. Jesuh cu a tah tikah mibuur ni an nor hiamho. 43acunang ahcun kum hleihnih sung thisuak a tuar minu a om; a ngeihsiah zate sibawile hemah a hmang remro nain ahuhman ni an damsak zo lo. 44Jesuh dungla in a pha ih a angkitual zim a tham, culeh a voi khat ah a thisuak cu a kaang lohli. 45Cutikah Jesuh ni, “Ahu ni a ma tham?” tiah a dil hngai. An zate ni an pheh vek tikah, Piter ni, “Zirhtupa, mibuur ni tan ulkim in an tan nor hekhawh,” tiah a ti. 46Ihmansela Jesuh ni, “Pakhatkhat ni a ma tham kau; icatile ka sungin huham a suak ti ka tiahthiam,” tiah a ti. 47Minu ni thuhtiak a ngah lo ti a hmuh tikah, dok-awthah in a pha; culeh Jesuh hmaikaah bok-in, mi zate omhngan ahcun ituruangah Jesuh a tham ih khawtiin a dam lohli ti a simthan. 48Jesuh ni, “Ka tianu, na zumnak ni a tan damsak rom; nangamte’n tat law,” tiah a ti. 49A aan lio fang ah sinakok uktu ih inn in mi pakhat a pha ih, “Na tianu cu a thi; zirhtupa hi hnaihnok duh ti hlah,” tiah a ti. 50Curuangah Jesuh ni acu cu a zak tikah, “Hrul hlah maw. A zum ceu zumla, cun na tianu cu a damkau thok,” tiah a let. 51Sinakok uktu ih inn a phat tikah, Piter, Johan leh Jeim, tepangnu ih nulepa simlo ahuhman a hemih luh a sen hngai lo. 52Mi hmawhhmawh ni acu nu te cu an ṭah, an kuiraak; ihmansela Jesuh ni, “Ṭap hlah uh; icatile ani cu a thi le he lo, a me hekhawh,” tiah a ti. 53Culeh a thi ti an tiah kau ruangah an nihsan. 54Jesuh ni cu nu cu a kut zon tlaiin, ‘Nute, hang tho!” tiah a ti. 55A thlarau a kirṭhan ih a hang tho lohli. Cutikah Jesuh ni awkṭha pakhatkhat a barhsak hngai. 56A nulepa cu an don a harkau; ihmansela thilcangmi cu ahuhman sim lo dingin thu a kaa hngai.

Currently Selected:

Luka 8: KHBF

Highlight

Copy