Marka 16
16
Jesuh Thawhṭhannak
(Mat 28:1-10; Luk 24:1-12; Joh 20:1-10)
1Sabbath ni a liam tikah, Magdala khuami Mari, Jeim ih nu Mari leh Salome cu Jesuh hnulh dingah rimhmui an lei. 2Culeh zarh khat ih ni peitatleng mawpan, ni suak hnuk caang thlaan ah an tat. 3“Ahu ni thlaan kaa ih lung man thau piak lei hmen maw?” tiah an ti tia. 4An zoh tikah lung hnempi cu hnialtia cia-in an hmu. 5Thlaan sung an luh tikah, tlangval pakhat, angkitual raang khawhtia in vorhla kap ih a to an hmu; culeh an thla a kawk. 6Ihmansela an hemah, “Nan thlakawk hlah uh. An khentarmi Nazareth khuami Jesuh nan hrawl kau cu. Thawhsak a i rom; hinangah a om lo. An khangnak hmun cu zoh hman uh. 7Tat lei cu khawh a kaizulpawl leh Piter hemah Galilee la ah a tat li thok ih acunangah a tan simtaak hngai mangin amah nan tuak thok tiah sim uh,” tiah a ti hngai. 8Curuangah an suakih thlaan in an leeu; icatile thlahmat leh donhar ni a tlak hngai, culeh ahu pakhat hman itu thu khaw an sim lo, icatile an hrul.
MARKA DENGNAK TAWIDEUH
9An hemih thupiak hmawhhmawh cu Piter hrialkam ih a mipawl hemah a tawinak in an sim. 10Cun cuhnukah Jesuh amah rori ni a thianghlimmi leh a rawkthiam lomi kumkhua nunnak thu cu nisuahnak in nipilnak tiang anmah thawngin a thansak sin.
MARKA DENGNAK SAUDEUH
Jesuh Mari Magdalene hemih Lannak
(Joh 20:11-18)
9Zarh khat ih ni peitatleng mawpan ih a thawhṭhan hnukah, a sungin khawsia pasarih a ṭhawl minu Magdala khuami Mari hemah a lang peitleng. 10Mari cu tatin Jesuh rum a om ta tu mipawl an lungzuur leh an ṭah lioah a sim hngai. 11Ihmansela Jesuh a nun leh cu nu ih a hmuh thu an zak tikah an zumla duh lo.
Kaizul Pahnih hemih Lannak
(Luk 24:13-43; Joh 20:19-23)
12Ahi hnukah an lakih pahnih, khuate la ih a vakliomi hemah Jesuh cu phunce in a lang. 13Culeh kirṭhan in a taangle hemah an sim, ihmansela an zum duh lo.
Kaizulle Tirhhlahnak
(Mat 28:16-20; Luk 24:44-49; Joh 20:19-23; Tirh 1:6-8)
14Cu hnukdeuh ih hleikhatle caw an awk lioah Jesuh cu an hemah a lang, culeh zumnak an sambau leh an lungpawt ruangah a cam hngai, icatile a thawhṭhan hnukih amah hmuta tu mile khi an zum ta lo. 15An hemah, “Vulei cung hmawh ah tatin, seemsuahmi zate hemah thuthangṭha simthan uh. 16A zumih tihnim a imi cu run a i thok; a i nain a zum lo tu cu sual thuṭhen a i thok. 17Cun a zum tu mipawl cu hi minhlinnakpawl ni an zul hngai thok: ka min hmangin khawsia an ṭhawl thok; aan thar in an ang thok; 18rul an pon thok, cun thihsii an din ah khaw an ii a poi thok lo; mitiak parah an kut an suang lei ih, cun an dam thok,” tiah a ti hngai.
Jesuh Vankainak
(Luk 24:50-53)
19Bawi Jesuh cu an hemih thu a sim hnukah vancung ah an han kaipi ih Pathian vorhla ah a to. 20Culeh tirhthlahle cu an tat ih hmuncangah thuthangṭha cu an simthan. Bawipa ni rian a ṭuanpi hngai ih an thusim cu a khurtu#16:20 Khur ti cu Dungla in khalhtican a ii, Khor ti tu kan om. minhlinnakpawl thawngin a ṭhosak.
Currently Selected:
Marka 16: KHBF
Highlight
Share
Copy
Want to have your highlights saved across all your devices? Sign up or sign in
Khualsim Holy Bible © Bible Society of Myanmar, 2021.
