Teekɨtɨga 14
14
Israelag gangɨn Bahbo kɨkɨre kɨ njad
1Bɨraɓe el Moij an: 2El Israelag kad telɨn kɨgog kad hɔn londɨ nõ lot kɨ tɔa i Pi Elahirot, mbɨna ɓe Migdolt kɨ bahbo nõ lot kɨ tɔa i Baal Sepon. I lot'n non la a i hɔn londɨt kad bahbot. 3Paraõ a elta dan dɔ Israelagt an ndomɨn ɗob kam dɔningt nõ, ĩn kɨ kut kam dɨlalot tɔ. 4M'a mad kam Paraõ kongkong kɨdɔt, na a tuɓa god. M'a m'ngaa tɔko kɨta Paraõ kɨ kɨta bahkad koosɨ ngéɗɔɔg loa tube, na Ejiptiag a gerɨn mĩ, mĩ Bɨraɓe Israelag ɗan titbe.
5Elɨn ngar kɨ Ejipt't anan: Israelag ãin na. Paraõ kɨ ɓerg lon ndɨngan rod dɔ tat lo deg'n non anan: Kɨtɔɗi kɨ ɗa'n titbe, kɨ nya Israelag ad awɨn na ɗan kɨlaɓer adjɨn al a? 6Paraõ ad ɗan go pusɨɗɔɔ lon, ɔi deg lon nat sen. 7Ɔi pusɨɗɔɔg kɨngang ɓukɨbojidet kɨ pusɨɗɔɔ kɨ Ejipt tube kɨ kɨrãɗɔɔg kamt. 8Bɨraɓe ad kam Paraõ, ngar kɨ Ejipt, kongkong kɨdɔt ad Paraõ tuɓa go Israelag na Israelag teen kɨ jid kɨ kɔi kɨ dõ. 9Ejiptiag tuɓan god kɨ sɨndag tube kɨ pusɨɗɔɔg lo Paraõ kɨ ngékal sɨndag loa kɨ koosɨ ngéɗɔɔg loa, ndɔdɨnd londɨdt kɨ ta bahbot, kad Pi-Hahirot't, nõ Baal Sepont.
10Lon Paraõ ndɔt kɨ rodt ye Israelag unɨn kumd kɨ dõ, oon ne Ejiptiag a ndian godt, ad ɓool tɔld sɔkɨr, na Israelag kon kɨdɔ Bɨraɓet. 11Elɨn Moij anan: Dɔɓadg goton dɔning Ejipt't hã i ɗe sej kad j'oi kam dɨlalot a? Kɨtɔɗi ɓai i ɗan sej titbe kad i tee sej Ejipt kɨtɨga a? 12'Nten i ta'n j'eli kam dɔning Ejipt j'an i nyàj kad kɨ ɗa ɓer jad Ejiptiag al e? Kɨtɔ i soojt kad kɨ ɗa ɓer jad Ejiptiag tɔi kad j'oi kam dɨlalot 'nten. 13Moij el deg an: Ot ɓoolɨn I ɗan gasɨ, a oon kaj lo Bɨraɓea ajsɨ ɓone kɨta ejiptiag'n i ɗa oond ɓone, a oond gog al kɨnõt. 14Bɨraɓe a ɗɔɔ kɨtatɔsɨ na ĩn, i ɗan gasɨ koon.
Luwah gang bahbokat dene joo ad ngan Israelg tɔint
15Bɨraɓe el Moij an: Kɨtɔɗi ɓai i ko'n kɨdɔmt a? El Israelag kad ndian kɨkete 16Na ĩ, un kag tɔsɨ loi kɨ dõ, i la jii kɨdɔ bahbot, i ganga nat, na Israelag a tɔin dan bahbot dɔningt kɨtut. 17Na m'a mad kam Ejiptiag kongkong kɨdɔt, a andɨn godt. M'a m'ngaa tɔko kɨta Paraõ kɨ kɨta koosɨg loa kɨta pusɨɗɔɔg loa kɨta ngékal sɨndag loa. 18Ejiptiag a gerɨn kad mĩ la mĩ Bɨraɓe ye lon m'a m'ngan tɔko kɨta Paraõ kɨta pusɨɗɔɔg loa kɨ kɨta ngékal sɨndag loa tɔ.
19Kamla malaika lo Luwah ngekɔrr nõ koosɨ Israelag ye, tel ɗa ko gid'dt kilndii kɨ nõdt tɔ tel ɗa gid'dt, 20mbɨna koosɨ Israelagt kɨ koosɨ Ejiptiag. Kilndiin non ad til diw kɨta Ejiptiag, na ad kunj Israelag kondɔ. Ɓut koosɨg kɨjoo'n non teen ro nat nderbe al ndɔ mbã lo ti.
21Moij la jin kɨdɔ bahbot. Bɨraɓe ad bahbo tel kɨgog kɨta nél kɨtag kɨ loɓakàdt kɨ la ndɔ mbã loti ad bahbo tel dɔning kɨtut, ad man gang dene joo. 22Israelag andɨn dan bahbot dɔningt kɨtut, man ɗa dõ tit ndogbɔrr be ko kõdt kɨ ko geldt. 23Ejiptiag tuɓan god, andɨn godt dan bahbot, ad i sɨndag lo Paraõ kɨpusɨɗɔɔg loa kɨ ngékal sɨndag loa tube. 24Dɔkaglot kɨsĩ ritit, Bɨraɓe'n i kam horrt kɨ kilndii koosɨ Ejiptiag na nujd. 25Tɔrr nja pusɨɗɔɔg lod kɔ ad ndiad ngang ngãi. Kamla Ejiptiag elɨn anan: Ad kɨ j'ãin kɔ nõ Israelagt kɨta Bɨraɓe ndɨ ɗɔɔ Ejiptiag kɨtatɔd.
26Bɨraɓe el Moij an: I la jii kɨdɔ bahbot ad man tel kɨdɔ Ejiptiagt gog kɨ kɨdɔ pusɨɗɔɔgt lod kɨ kɨdɔ ngékal sɨndagt lod. 27Moij la jin kɨdɔ bahbot ad bahbo tel nũ gootɨnt tit kɨkete kɨsĩ. Ejiptiag, lokãidt, ndɔdɨn man na Bɨraɓe ɓukɨd dan bahbot. 28Man tel gog tiw dɔ pusɨɗɔɔg purum kɨ ngékal sɨndag mbã kɨdɔ koosɨgt lo Paraõ. Tubeg'n andɨn kam bahbot go Israelagt ye, kɨkɨɗa kɨ nãi kɨ dɔn dõ goto. 29Na Israelag ndian dɔningt kɨtut dan bahbot, man ɗa dõ tit ndogbɔrr be ko kõdt kɨ ko geld. 30Titbe la Bɨraɓe aj'n Israelag ji Ejiptiagt ndɔt'n non ye, na Israelag oon nin Ejiptiag ta bahbot. 31Israelag oon kɨlaɗa Bɨraɓe kɨbo lon nujɨn Ejiptiag. Deg ɓoolɨn Bɨraɓe, na adɨn kamd Bɨraɓe kɨ ɓer loa Moij.
Currently Selected:
Teekɨtɨga 14: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
