Teekɨtɨga 15
15
Moij ɔsɨ pa ndubɨn Bɨraɓe
1Kamla Moij kɨ Israelag ɔsɨn pa 'nten kɨdɔ Bɨraɓet, anan:
M'a m'ɔsɨ pa kɨdɔ Bɨraɓet, kɨta i kɨ tɔi kɨ dõ ngãi,
la sɨnda kɨ ngekala kɔ kam bahbot.
2Bɨraɓe i tɔgɨm kɨ pa kɔsɨm,
i ngekajɨm. Ĩ la i Luwah lom ye,
m'a m'nduba,
i Luwah lo bɔwɨm tɔ, m'a m'tɔia kɨ dõ.
3Bɨraɓe i ngeɗɔɔ,
tɔa i Bɨraɓe.
4La pusɨɗɔɔg lo Paraõ
kɨ koosɨ ngéɗɔɔg loa kɔ kam bahbot,
bɨradɔg kɨkɔt loa, Bahbo kɨkɨre hɔd.
5Dɔɓul man kɨwo kɨɓing ut dɔd,
gangɨn ɗing kɨgir ɓul bahbot tit mbal be.
6Bɨraɓe, jikõi oj tɔgɨn kɨtɔitɔi,
Bɨraɓe, jikõi teet madngéta rumrum.
7Kɨtakul maj kɨtɔitɔi loi kɨngãi,
I tɔsɨn ngéndoorig i tɨlad kɔ
i nya wong loi kɨtɨngabil
ad õd mugɨj tit mũ be.
8Kɨtakul kò kɨ tee kõit la man wurɨn dub ye,
man bahbo ɓai ɗan dõ tit ndogbɔrr be,
dɔɓul man tel ngang dan bahbot.
9Madngéta el an: M'a m'tuɓa god, m'a m'hɔd,
m'a m'keg nyamajg lod,
m'a m'ɗa sed nya kɨ kam ndig,
m'a m'tui kiyaɗɔɔ lom hawat, jim a nujd kɔ.
10A ad nél loi la,
ad bahbo ut dɔd,
ad gangɨn ɗing tit plomb be
kam man bahbot kɨɓai kɨ tɔgɨn.
11Bɨraɓe, nõ tit sei ku luwahgt a?
Nõ ngemaj kɨtɔitɔi tit sei kam kunjɗangt,
Ngekootɓool kɨta nyaɗai kɨ asɨ kad ndubɨn ne,
Ngeɗa nyag kɨyaya a?
12I la jikõi,
ad dɔning turd nyut.
13Kɨgo kamkẽt loi la ɔrrɨn ta ɗob degdeg loi
kɨ i badɔd,
kɨtakul tɔg loi la ɔrrdɨn ta ɗob
aw sed londit kɨjaɓat ye.
14Girrdeg kɨ dang dang oon hoia,
rod ndad yatat, kɨngasa ga Pilistiag.
15Kamla ɓool tɔl ngarg kɨ dɔning Edom sɔkɨr,
rondad hɔ mbaiɓeg kɨ dɔning Moabt,
ngendɨ dɔning Kanat tube tĩn na kɔ.
16Ndild kɨtee saw kɨ ɓool kɨtɔlsɔkɨr hurd yedeng.
Kɨtakul tɔg jii kɨbobe
ad'd ɗan god mbo tit mbal be,
mbã kad deg loi tɔin ne, Bɨraɓe
mbã kad deg'n i ndugod tɔin.
17Tajigla a aw sed, dɔ mbalbot
kad ad'd nyakagɓet loi.
Lon non i ɗago kɨtakad i londɨ ĩ Bɨraɓe.
I lokɨjaɓat kɨ jii nda, Bɨraɓe.
18Bɨraɓe a õɓe kɨndɔgndɔg mbãkɨnõt.
19Kɨtɔ sɨndag lo Paraõ kɨ pusɨɗɔɔg loa kɨ
ngékal sɨndag loa andɨn kam bahbot, kamla Bɨraɓe tel
kɨ man kɨ bahbot gog dɔdt, na Israelag ndian dɔningt kɨtut dan bahbot.
20Mari ngekelta kɨ ta Luwaht, kõnan Aarõ un kɔd mad jint,
na dekɨdẽg tube teen goat kɨ kɔdg, a ndomɨn ne.
Man kɨ Mara
21Maɗi lad pat an:
Ɔsɨn pa kɨdɔ Bɨraɓet
kɨta i kɨ tɔi kɨ dõ ngãi,
la sɨnda kɨ ngekala kɔ kam bahbot.
Man Mara kɨ at bang
22Moij ɓai kɨ Israelag ta Bahbot kɨkɨre, ɔrrd ta ɗob kɨkete, kamla andɨn kam dɨlalot kɨ Sur. Ndian ndɔ mɨta kam dɨlalot, na ngahn man al.
23Lon teen lot kɨ Mara ye, asɨ kãin man kɨ Mara al kɨta man'n non at bang. Kɨtɔ 'nten la kunɨn ne tɔ lon non Mara ye. 24Kamla deg nyurɨn ta kɨdɔ Moijt, anan: Ɗi j'a j'ãi a? 25Moij ko kɨdɔ Bɨraɓet, na Bɨraɓe ɔja kag mad. Moij laa kam mant kamla man tel kɨnel. Nõbe la Bɨraɓe ad deg mberkɨnda kɨ takɨgang ye, nõbe tɔ la nád ho ye. 26El an: Ĩla oo dɔ ndɨ Bɨraɓe Luwah loi maj, ĩla i ɗa nya kɨgoɗobat takumat, ĩla i nel mbii kɨdɔ mberkɨndagt loa, na ĩla i ngomgo mberkɨndag loa a ne, ku yokoosɨgt'n mad son dɔ Ejiptiagt, m'a m'nya kɨkɨɗa mad so dɔit al, kɨta mĩ la mĩ Bɨraɓe kɨ Ngeyooti ye.
Ngan Israel hɔn londɨ ta mant kɨ Elɨm
27Teen Elimt. Mang kɨɓa kɨlah gidaijoo kɨ kag tumburg dɔtanãimɨta ĩn lot'n non. Hɔn londɨt nõbe ta mant.
Currently Selected:
Teekɨtɨga 15: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
